創世記 第 3 章

1

(THR) Iâ-hô-hoa Siōng-tè só͘ chō soaⁿ-iá it-chhè ê o̍ah-mı̍h, chôa sī pí in khah káu-khiat. Chôa tùi hū-jîn-lâng kóng, Siōng-tè kiám ū-iáⁿ kóng, Hn̂g-lāi it-chhè ê chhiū, lín lóng m̄-thang chia̍h mah?

(BCL) 耶和華上帝所造山野一切的活物，蛇是比卡狡譎。蛇對婦仁人講：「上帝豈有影講園內一切的樹恁攏呣通食嗎？」

2

(THR) Hū-jîn-lâng tùi chôa kóng, Hn̂g-lāi chhiū-nı̍h ê ké-chí góan thang chia̍h;

(BCL) 婦仁人對蛇講：「園內樹裡的果子阮通食，

3

(THR) chí-ū hn̂g tiong-ng hit châng chhiū ê ké-chí Siōng-tè bat kóng, Lín m̄-thang chia̍h-i, ia̍h m̄-thang bong, kiaⁿ-liáu ōe sí.

(BCL) 只有園中央彼欉樹的果子，上帝曾講：『恁呣通食伊，亦呣通摸，驚了會死。』」

4

(THR) Chôa tùi hū-jîn-lâng kóng, Lín bô tek-khak ōe sí.

(BCL) 蛇對婦仁人講：「恁無的確會死；

5

(THR) In-ūi Siōng-tè chai lín chia̍h ê jı̍t, lín ê ba̍k-chiu chiū ōe khui, lín beh chhin-chhiūⁿ Siōng-tè, ōe hun-piat hó-pháiⁿ.

(BCL) 因為上帝知，恁食的日恁的目睭就會開，恁欲親像上帝會分別好歹。」

6

(THR) Hū-jîn-lâng khòaⁿ hit châng chhiū, hó-chia̍h ia̍h kah-ba̍k; koh hit châng chhiū sī thang him-bō͘, hō͘ lâng ū tì-hūi; chiū bán i ê ké-chí chia̍h i, sòa hō͘ i ê tiōng-hu, i ia̍h chia̍h i.

(BCL) 婦仁人看彼欉樹好食，亦合目，閣彼欉樹是通欣慕互人有智慧，就挽伊的果子食伊，續互伊的丈夫，伊亦食伊。

7

(THR) In nn̄g-lâng ê ba̍k-chiu chiū khui, chiah chai in sī thǹg-pak-theh; chiū pín bû-hoa-kó hio̍h, ūi ka-kī chòe kûn.

(BCL) 二人的目睭就開，才知是褪腹裼，就揙無花果葉為家己做裙。

8

(THR) Jı̍t liâng-léng ê sî, Iâ-hô-hoa Siōng-tè kiâⁿ-iû tī hn̂g-lāi; in thiaⁿ-kìⁿ I ê siaⁿ, hit-lâng kap i ê hū-jîn-lâng chiū bih tī hn̂g-lāi ê chhiū-tiong, lâi siám-pī Iâ-hô-hoa Siōng-tè ê bīn.

(BCL) 日涼冷的時，耶和華上帝行遊佇園內。聽見伊的聲，彼人及伊的婦仁人就匿佇園內的樹中，來閃避耶和華上帝的面。

9

(THR) Iâ-hô-hoa Siōng-tè kiò hit-lâng, tùi i kóng, Lí tī tah-lo̍h?

(BCL) 耶和華上帝叫彼人，對伊講：「你佇叨落？」

10

(THR) I chiū kóng, Góa thiaⁿ-kìⁿ Lí ê siaⁿ tī hn̂g-lāi, góa chiū kiaⁿ, in-ūi góa thǹg-pak-theh; chiū ka-kī bih.

(BCL) 伊就講：「我聽見你的聲佇園內，我就驚；因為我褪腹裼，就家己匿。」

11

(THR) Kóng, Chī-chūi kā lí kóng, lí thǹg-pak-theh? Góa hoan-hù lí m̄-thang chia̍h hit châng chhiū, lí chia̍h i mah?

(BCL) 講：「是誰給你講你褪腹裼？我吩咐你呣通食彼欉樹，你食伊嗎？」

12

(THR) Hit-lâng kóng, Lí só͘ hō͘ góa chòe-phōaⁿ ê hū-jîn-lâng, i ēng hit châng chhiū ê ké-chí hō͘ góa, góa chiū chia̍h i.

(BCL) 彼人講：「你所互我做伴的婦仁人，伊用彼欉樹的果子互我，我就食伊。」

13

(THR) Iâ-hô-hoa Siōng-tè tùi hū-jîn-lâng kóng, Lí só͘ chòe sī sím-mı̍h sū? Hū-jîn-lâng kóng, Chôa ín-iú góa, góa chiū chia̍h.

(BCL) 耶和華上帝對婦仁人講：「你所做是甚麼事？」婦仁人講：「蛇引誘我，我就食。」

14

(THR) Iâ-hô-hoa Siōng-tè tùi chôa kóng, Lí í-keng chòe chit-ê, só͘-í lí siū chiù-chó͘, pí it-chhè ê cheng-siⁿ, kap soaⁿ-iá it-chhè ê cháu-siù, khah-tāng; lí beh ēng pak-tó͘ kiâⁿ, it-seng chia̍h thô͘-hún.

(BCL) 耶和華上帝對蛇講：你已經做此個，所以你受咒詛，比一切的精牲及山野一切的走獸卡重；你欲用腹肚行，一生食土粉。

15

(THR) Góa beh hō͘ lí kap hū-jîn-lâng kiat oan-siû, lí ê hō͘-è kap i ê hō͘-è ia̍h kiat oan-siû; i beh siong lí ê thâu-khak, lí beh siong i ê kha-āu-tiⁿ.

(BCL) 我欲互你及婦仁人結冤讎；你的後裔及伊的後裔亦結冤讎。伊欲傷你的頭殼；你欲傷伊的腳後。

16

(THR) Koh tùi hū-jîn-lâng kóng, Góa tek-khak tōa-tōa ke-thiⁿ lí hôai-īn ê kan-khó͘; lí beh kan-khó͘ siⁿ-kiáⁿ; lí beh lôan-bō͘ lí ê tiōng-hu, i beh kóan-hat lí.

(BCL) 閣對婦仁人講：我的確大大加添你懷孕的艱苦；你欲艱苦生子。你欲戀慕你的丈夫；伊欲管轄你。

17

(THR) Iā tùi A-tong kóng, Lí í-keng thiaⁿ-thàn lí ê hū-jîn-lâng ê ōe, lâi chia̍h Góa só͘ hoan-hù lí kóng, Lí m̄-thang chia̍h-i ê; só͘-í thó͘-tōe in-ūi lí ê iân-kò͘ siū chiù-chó͘; lí chı̍t-sì-lâng lô-khó͘, chiah tùi i tit-tio̍h chia̍h.

(BCL) 也對亞當講：你已經聽趁你的婦仁人的話，來食我所吩咐你講你呣通食伊的，所以土地因為你的緣故受咒詛；你一世人勞苦才對伊得著食。

18

(THR) Thó͘-tōe beh ūi-tio̍h lí hoat chhì-phè kap che̍k-lê; lí iā beh chia̍h hn̂g-nı̍h ê chhài-soe.

(BCL) 土地欲為著你發莿帕及蒺藜；你也欲食園裡的菜蔬。

19

(THR) Lí beh kōaⁿ-lâu móa-bīn chiah thang tit-tio̍h chia̍h, kàu lí kui thó͘; in-ūi lí sī tùi thô͘ the̍h-chhut-lâi; lí pún sī thô͘-hún, iā beh kui tī thô͘-hún.

(BCL) 你欲汗流滿面才通得著食，到你歸土，因為你是對土提出來。你本是土粉，也欲歸佇土粉。

20

(THR) Hit-lâng kā i ê bó͘ hō miâ, kiò Hā-oa; in-ūi i chòe chèng-lâng ê lāu-bú.

(BCL) 彼人給伊的某號名叫夏娃，因為伊做眾人的老母。

21

(THR) Iâ-hô-hoa Siōng-tè ūi-tio̍h hit-lâng kap i ê bó͘ ēng phê chòe i-ho̍k, hō͘ in chhēng.

(BCL) 耶和華上帝為著彼人及伊的某，用皮做衣服互穿。

22

(THR) Iâ-hô-hoa Siōng-tè kóng, Khòaⁿ ah, chit-lâng í-keng kap lán saⁿ chhin-chhiūⁿ, ōe hun-piat hó-pháiⁿ; taⁿ kiaⁿ-liáu i chhun-chhiú koh tùi o̍ah-miā chhiū bán, lâi chia̍h, chiū o̍ah kàu éng-óan;

(BCL) 耶和華上帝講：「看啊，此人已經及咱相親像，會分別好歹；今驚了伊伸手閣對活命樹挽來食，就活到永遠。」

23

(THR) só͘-í Iâ-hô-hoa Siōng-tè kah i chhut Ai-tiân hn̂g, lâi chèng-choh hit ê thô͘, chiū-sī i só͘ tùi i chhut ê.

(BCL) 所以耶和華上帝教伊出伊甸園，來種作彼個土，就是伊所對伊出的。

24

(THR) Só͘-í kóaⁿ hit ê lâng chhut; iā tī Ai-tiân hn̂g ê tang-sì an-tì Ki-lō͘-peng kap sì-bīn tńg-se̍h hoat hé-iām ê kiàm, lâi hông-siú o̍ah-miā chhiū ê lō͘.

(BCL) 所以趕彼個人出；也佇伊甸園的東勢安置兵及四面轉踅發火焰的劍，來防守活命樹的路。

Bible Color Mark

• 台語漢字羅馬本
• 巴克禮全羅