創世記 第 21 章

1

(THR) Iâ-hô-hoa chiàu I chêng ê ōe kòan-kò͘ Sat-la̍h; tùi án-ni Iâ-hô-hoa chiàu I só͘ kóng-ê kā Sat-la̍h chòe-chiâⁿ.

(BCL) 耶和華照伊前的話眷顧撒拉，對按呢耶和華照伊所講的給撒拉做成。

2

(THR) A-pek-la̍h-hán nî-lāu ê sî, Sat-la̍h hôai-īn; kàu Siōng-tè tùi i kóng ê jı̍t-kî, chiū kā i siⁿ chı̍t ê kiáⁿ.

(BCL) 亞伯拉罕年老的時，撒拉懷孕；到上帝對伊講的日期，就給伊生一個子。

3

(THR) A-pek-la̍h-hán kā Sat-la̍h só͘ siⁿ ê kiáⁿ, hō miâ kiò Í-sat.

(BCL) 亞伯拉罕給撒拉所生的子號名叫以撒。

4

(THR) Í-sat chhut-sì poeh-jı̍t, A-pek-la̍h-hán chiàu Siōng-tè só͘ hoan-hù-ê, kā i ê kiáⁿ kiâⁿ kat-lé.

(BCL) 以撒出世八日，亞伯拉罕照上帝所吩咐的，給伊的子行割禮。

5

(THR) I ê kiáⁿ Í-sat chhut-sì ê sî, A-pek-la̍h-hán chı̍t-pah hè.

(BCL) 伊的子以撒出世的時，亞伯拉罕一百歲。

6

(THR) Sat-la̍h kóng, Siōng-tè hō͘ góa hoaⁿ-hí chhiò; kìⁿ-nā thiaⁿ-kìⁿ-ê, beh kap góa tâng hoaⁿ-hí chhiò.

(BCL) 撒拉講：「上帝互我歡喜笑，見若聽見者欲及我同歡喜笑」；

7

(THR) Koh kóng, Chī-chūi ōe tāi-seng kā A-pek-la̍h-hán kóng, Sat-la̍h beh hō͘ eⁿ-á suh-leng? in-ūi tī i nî-lāu ê sî, góa kā i siⁿ chı̍t ê kiáⁿ.

(BCL) 閣講：「是誰會代先給亞伯拉罕講『撒拉欲互嬰仔吸奶』？因為佇伊年老的時，我給伊生一個子。」

8

(THR) Gín-á chiām-chiām tōa, chiū tn̄g-leng; Í-sat tn̄g-leng ê jı̍t, A-pek-la̍h-hán pâi-siat tōa iân-sia̍h.

(BCL) 囝仔漸漸大，就斷奶。以撒斷奶的日，亞伯拉罕排設大筵席。

9

(THR) Tng-sî Ai-kı̍p lâng Hā-kah kā A-pek-la̍h-hán só͘ siⁿ ê kiáⁿ teh léng-chhiò, hō͘ Sat-la̍h khòaⁿ-kìⁿ;

(BCL) 當時，埃及人夏甲給亞伯拉罕所生的子冷笑，互撒拉看見，

10

(THR) chiū tùi A-pek-la̍h-hán kóng, Tio̍h kóaⁿ-chhut chit ê lú-pī kap i ê kiáⁿ; in-ūi lú-pī ê kiáⁿ bōe-thang kap góa ê kiáⁿ Í-sat tâng chòe hō͘-sû.

(BCL) 就對亞伯拉罕講：「著趕出此個女婢及伊的子！因為女婢的子通及我的子以撒同做後嗣。」

11

(THR) A-pek-la̍h-hán in-ūi i ê kiáⁿ ê iân-kò͘ put-chí iu-būn.

(BCL) 亞伯拉罕因為伊的子的緣故不止憂悶。

12

(THR) Siōng-tè kā A-pek-la̍h-hán kóng, Lí m̄-thang ūi-tio̍h chit ê gín-á í-kı̍p lí ê lú-pī iu-būn; kìⁿ-nā Sat-la̍h tùi lí kóng ê, lí lóng tio̍h thiaⁿ; in-ūi tùi Í-sat siⁿ-ê, chiah beh chheng-chòe lí ê hō͘-è.

(BCL) 上帝給亞伯拉罕講：「你呣通為著此個囝仔以及你的女婢憂悶。見若撒拉對你講的，你攏著聽；因為對以撒生的，才欲稱做你的後裔。

13

(THR) Lūn-kàu lú-pī ê kiáⁿ, Góa ia̍h beh hō͘ i chiâⁿ-chòe chı̍t-kok, in-ūi i ia̍h sī lí siⁿ-ê.

(BCL) 論到女婢的子，我亦欲互伊成做一國，因為伊亦是你生者。」

14

(THR) A-pek-la̍h-hán chá-chá khí-lâi, the̍h piáⁿ kap chı̍t phê-tē ê chúi hō͘ Hā-kah; hē tī i ê keng-thâu-téng; liân gín-á sòa kah i khì; i chiū khì, kàu Pia̍t-sī-pa ê khòng-iá chiū kiâⁿ bô lō͘.

(BCL) 亞伯拉罕早早起來，提餅及一皮袋的水，互夏甲，下佇伊的肩頭頂，連囝仔續教伊去，伊就去。到別是巴的曠野就行無路。

15

(THR) Phê-tē lāi ê chúi ēng-liáu, Hā-kah chiū chiong gín-á pàng tī sòe châng chhiū kha.

(BCL) 皮袋內的水用了，夏甲就將囝仔放佇細欉樹腳，

16

(THR) Pún-sin kiâⁿ-khui, iok-lio̍k cho̍h chı̍t ki chìⁿ ê hn̄g, saⁿ-tùi-bīn teh chē; kóng, Góa put-jím khòaⁿ gín-á sí; chiū saⁿ-tùi-bīn chē, chhut-siaⁿ tōa thî-khàu.

(BCL) 本身行開約略擲一支箭的遠，相對面坐，講：「我不忍看囝仔死」，就相對面坐，出聲大啼哭。

17

(THR) Siōng-tè thiaⁿ-kìⁿ gín-á ê siaⁿ; Siōng-tè ê sù-chiá tùi thiⁿ-nı̍h kiò Hā-kah kóng, Hā-kah, lí ū sím-mı̍h tāi-chì? m̄-bián kiaⁿ; Siōng-tè í-keng thiaⁿ-kìⁿ gín-á tī-hia ê siaⁿ.

(BCL) 上帝聽見囝仔的聲；上帝的使者對天裡叫夏甲講：「夏甲，你有甚麼代誌？呣免驚，上帝已經聽見囝仔佇遐的聲。

18

(THR) Khí-lâi, ia̍h hō͘ gín-á khí-lâi, khan tī lí ê chhiú; Góa beh hō͘ i chiâⁿ-chòe tōa-kok.

(BCL) 起來！亦互囝仔起來牽佇你的手，我欲互伊成做大國。」

19

(THR) Siōng-tè khui i ê ba̍k-chiu, i chiū khòaⁿ-kìⁿ chúi-chíⁿ; chiū chiong phê-tē khì jı̍p-chúi kàu móa-móa, sòa hō͘ gín-á lim.

(BCL) 上帝開伊的目睭，伊就看見水井，就將皮袋去入水到滿滿，續互囝仔飲。

20

(THR) Siōng-tè kap gín-á tī-teh, i chiū chiām-chiām tōa; tiàm tī khòng-iá, chiâⁿ-chòe siā-chìⁿ ê lâng.

(BCL) 上帝及囝仔佇，伊就漸漸大，踮佇曠野，成做射箭的人。

21

(THR) I khiā-khí tī Pa-lân ê khòng-iá; i ê lāu-bú tùi Ai-kı̍p tōe kā i chhōa chı̍t ê bó͘.

(BCL) 伊徛起佇巴蘭的曠野；伊的老母對埃及地給伊娶一個某。

22

(THR) Tng hit-sî A-pí-bí-le̍k, kap i ê kun-tiúⁿ Hui-kok, tùi A-pek-la̍h-hán kóng, Kìⁿ-nā lí só͘ kiâⁿ ê sū, Siōng-tè kap lí tī-teh.

(BCL) 當彼時，亞比米勒及伊的軍長非各對亞伯拉罕講：「見若你所行的事上帝及你佇。

23

(THR) Taⁿ lí tī-chia tio̍h kí Siōng-tè kap góa chiù-chōa, m̄-thang khi-hū góa, kap góa ê kiáⁿ, í-kı̍p góa ê sun; góa àn-cháiⁿ-iūⁿ hó khóan-thāi lí, lí ia̍h tio̍h chiàu án-ni khóan-thāi góa, í-kı̍p lí só͘ kià-ku ê tōe-hng.

(BCL) 今你佇遮著指上帝及我咒誓，呣通欺負我及我的子，以及我的孫。我按怎樣好款待你，你亦著照按呢款待我以及你所寄居的地方。」

24

(THR) A-pek-la̍h-hán kóng, Góa beh chiù-chōa.

(BCL) 亞伯拉罕講：「我欲咒誓。」

25

(THR) Chêng A-pí-bí-le̍k ê lô͘-po̍k pà-chiàm chı̍t kháu chúi-chíⁿ, A-pek-la̍h-hán ūi chit ê sū hiâm A-pí-bí-le̍k.

(BCL) 前，亞比米勒的奴僕霸佔一口水井，亞伯拉罕為此個事嫌亞比米勒。

26

(THR) A-pí-bí-le̍k kóng, Chī-chūi chòe chit ê tāi-chì, góa m̄-chai; lí ia̍h bē ū kā góa kóng, kàu kin-á-jı̍t góa chiah thiaⁿ-kìⁿ.

(BCL) 亞比米勒講：「是誰做此個代誌，我呣知，你亦未有給我講，到今仔日我才聽見。」

27

(THR) A-pek-la̍h-hán chiong iûⁿ kap gû hō͘ A-pí-bí-le̍k; nn̄g-lâng chiū saⁿ-kap lı̍p-iok.

(BCL) 亞伯拉罕將羊及牛互亞比米勒，二人就相及立約。

28

(THR) A-pek-la̍h-hán chiong chhit chiah bú ê iûⁿ-ko lēng-gōa pàng tī chı̍t só͘-chāi.

(BCL) 亞伯拉罕將七隻母的羊羔另外放佇一所在。

29

(THR) A-pí-bí-le̍k mn̄g A-pek-la̍h-hán kóng, Lí chiong chhit chiah bú ê iûⁿ-ko lēng-gōa pàng tī chı̍t só͘-chāi, sī sím-mı̍h ì-sù?

(BCL) 亞比米勒問亞伯拉罕講：「你將七隻母的羊羔另外放佇一所在，是甚麼意思？」

30

(THR) Ìn kóng, Lí tio̍h tùi góa ê chhiú siu chí chhit chiah bú ê iûⁿ-ko, chòe góa khui chit kháu chíⁿ ê chèng-kù.

(BCL) 應講：「你著對我的手收此七隻母的羊羔，做我開此口井的證據。」

31

(THR) Só͘-í miâ hit só͘-chāi kiò Pia̍t-sī-pa, in-ūi in nn̄g-lâng tī-hia ū chiù-chōa.

(BCL) 所以名彼所在叫別是巴，因為二人佇遐有咒誓。

32

(THR) In tī Pia̍t-sī-pa lı̍p-iok; A-pí-bí-le̍k chiū kap i ê kun-tiúⁿ Hui-kok khí-sin tò-khì Hui-lī-sū tōe.

(BCL) 佇別是巴立約，亞比米勒就及伊的軍長非各起身倒去非利士地。

33

(THR) A-pek-la̍h-hán tī Pia̍t-sī-pa chai chı̍t châng sûi-si-liú chhiū; koh tī-hia kiû-kiò Iâ-hô-hoa éng-éng tī-teh Siōng-tè ê miâ.

(BCL) 亞伯拉罕佇別是巴栽一欉垂絲柳樹，閣佇遐求叫耶和華──永永佇上帝的名。

34

(THR) A-pek-la̍h-hán tī Hui-lī-sū lâng ê tōe kià-ku chōe-chōe jı̍t.

(BCL) 亞伯拉罕佇非利士人的地寄居多多日。

Bible Color Mark

• 台語漢字羅馬本
• 巴克禮全羅