創世記 第 22 章

1

(THR) Chiah ê tāi-chì í-āu, Siōng-tè chhì A-pek-la̍h-hán, kiò i kóng, A-pek-la̍h-hán; i ìn kóng, Góa tī-chia.

(BCL) 諸個代誌以後，上帝試亞伯拉罕，叫伊講：「亞伯拉罕！」伊應講：「我佇遮。」

2

(THR) Siōng-tè kóng, Lí tòa lí ê kiáⁿ, chiū-sī lí to̍k-siⁿ ê kiáⁿ, lí só͘ thiàⁿ ê Í-sat, khì Mô͘-lī-a ê tōe, Góa só͘ beh chí-sī lí ê soaⁿ; tī-hia chiong i hiàn-chòe sio-chè.

(BCL) 上帝講：「你帶你的子，就是你獨生的子，你所疼的以撒，去摩利亞的地，我所欲指示你的山，佇遐將伊獻做燒祭。」

3

(THR) A-pek-la̍h-hán thàu-chá khí-lâi, pī-pān lû, tòa i ê nn̄g ê siàu-liân lâng, kap i ê kiáⁿ Í-sat; ia̍h phòa sio-chè ê chhâ; chiū khí-sin khì Siōng-tè só͘ chí-sī i ê tōe.

(BCL) 亞伯拉罕透早起來，備辦驢，帶伊的二個少年人及伊的子以撒，亦破燒祭的柴，就起身去上帝所指示伊的地。

4

(THR) Kàu tē-saⁿ jı̍t, A-pek-la̍h-hán kia̍h-ba̍k hn̄g-hn̄g khòaⁿ hit ê só͘-chāi.

(BCL) 到第三日，亞伯拉罕抬目遠遠看彼個所在。

5

(THR) A-pek-la̍h-hán tùi i ê siàu-liân lâng kóng, Lín kap lû tiàm chia thèng-hāu, góa kap gín-á khì hia kèng-pài, chiū tò-lâi lín chia.

(BCL) 亞伯拉罕對伊的少年人講：「恁及驢踮遮聽候，我及囝仔去遐敬拜，就倒來恁遮。」

6

(THR) A-pek-la̍h-hán chiong sio-chè ê chhâ hē tī i ê kiáⁿ Í-sat ê sin-chiūⁿ, ka-kī ê chhiú kia̍h hé kap to; tùi hit-tia̍p nn̄g-lâng saⁿ-kap kiâⁿ.

(BCL) 亞伯拉罕將燒祭的柴下佇伊的子以撒的身上，家己的手抬火及刀；對彼霎二人相及行。」

7

(THR) Í-sat kā i ê lāu-pē A-pek-la̍h-hán kóng, Pē ah; i kóng, Góa ê kiáⁿ, góa tī-chia. I kóng, Lí khòaⁿ, hé kap chhâ lóng ū; chóng-sī sio-chè ê iûⁿ-á tī tah-lo̍h?

(BCL) 以撒給伊的老父亞伯拉罕講：「父啊！」伊講：「我的子，我佇遮。」伊講：「你看，火及柴攏有，總是燒祭的羊仔佇叨落？」

8

(THR) A-pek-la̍h-hán kóng, Góa ê kiáⁿ, Siōng-tè beh ka-kī pī-pān sio-chè ê iûⁿ-á; tùi hit-tia̍p nn̄g-lâng saⁿ-kap kiâⁿ.

(BCL) 亞伯拉罕講：「我的子，上帝欲家己備辦燒祭的羊仔。」對彼霎二人相及行。

9

(THR) In kàu Siōng-tè chí-sī i ê só͘-chāi; A-pek-la̍h-hán tī-hia khí tôaⁿ, chiong chhâ pâi-hó, pa̍k i ê kiáⁿ Í-sat, hē tī tôaⁿ-nı̍h ê chhâ-téng.

(BCL) 到上帝指示伊的所在，亞伯拉罕佇遐起壇，將柴排好，縛伊的子以撒，下佇壇裡的柴頂。

10

(THR) A-pek-la̍h-hán chiū chhun-chhiú kia̍h-to, beh thâi i ê kiáⁿ.

(BCL) 亞伯拉罕就伸手抬刀，欲伊的子。

11

(THR) Iâ-hô-hoa ê sù-chiá tùi thiⁿ kiò i kóng, A-pek-la̍h-hán, A-pek-la̍h-hán; i ìn kóng, Góa tī-chia.

(BCL) 耶和華的使者對天叫伊講：「亞伯拉罕！亞伯拉罕！」伊應講：「我佇遮。」

12

(THR) Sù-chiá kóng, Lí m̄-thang tī chit ê gín-á ê sin-chiūⁿ hē-chhiú, ia̍h m̄-thang tùi i cháiⁿ-iūⁿ chòe; in-ūi góa taⁿ chai lí sī kèng-ùi Siōng-tè, ia̍h bô chiong lí ê kiáⁿ, chiū-sī lí to̍k-siⁿ-ê, lâu-teh, m̄-hō͘ góa.

(BCL) 使者講：「你呣通佇此個囝仔的身上下手，亦呣通對伊怎樣做。因為我今知你是敬畏上帝；亦無將你的子，就是你獨生者，留呣互我。」

13

(THR) A-pek-la̍h-hán kia̍h-ba̍k khòaⁿ, khòaⁿ-kìⁿ āu-bīn ū chı̍t chiah iûⁿ-káng, kak tîⁿ tī kui-phō ê chhiū-á; A-pek-la̍h-hán chiū khì lia̍h hit chiah iûⁿ-káng lâi, hiàn chòe sio-chè, lâi thòe i ê kiáⁿ.

(BCL) 亞伯拉罕抬目看，看見後面有一隻羊，角纏佇歸部的樹仔，亞伯拉罕就去掠彼隻羊來，獻做燒祭，來替伊的子。

14

(THR) A-pek-la̍h-hán miâ hit ê só͘-chāi kiò Iâ-hô-hoa-í-le̍k; kàu kin-á-jı̍t lâng iáu teh kóng, Tī Iâ-hô-hoa ê soaⁿ beh pī-pān.

(BCL) 亞伯拉罕名彼個所在叫「耶和華以勒」，到今仔日人猶講：「佇耶和華的山欲備辦。」

15

(THR) Iâ-hô-hoa ê sù-chiá tē-jī pái tùi thiⁿ kiò A-pek-la̍h-hán kóng,

(BCL) 耶和華的使者第二擺對天叫亞伯拉罕講：

16

(THR) Iâ-hô-hoa kóng, Lí í-keng kiâⁿ chit ê sū, bô lâu lí ê kiáⁿ, chiū-sī lí to̍k-siⁿ ê kiáⁿ, Góa chiū kí ka-kī chiù-chōa kóng,

(BCL) 「耶和華講：『你已經行此個事，無留你的子，就是你獨生的子，我就指家己咒誓講：

17

(THR) Góa sù-hok beh sù-hok lí, ke-thiⁿ beh ke-thiⁿ lí ê hō͘-è, chhin-chhiūⁿ thiⁿ-téng ê chhiⁿ, hái-piⁿ ê soa; lí ê hō͘-è beh tit-tio̍h chiah ê tùi-te̍k ê koan-ài.

(BCL) 我賜福欲賜福你；加添欲加添你的後裔，親像天頂的星，海邊的沙。你的後裔欲得著諸個對敵的關隘，

18

(THR) Koh tōe-chiūⁿ bān-pang beh in-ūi lí ê hō͘-è tit-tio̍h hok-khì; in-ūi lí thiaⁿ-thàn Góa ê ōe.

(BCL) 閣地上萬邦欲因為你的後裔得著福氣；因為你聽趁我的話。』」

19

(THR) Tùi hit-tia̍p A-pek-la̍h-hán tò-lâi i hiah ê siàu-liân lâng hia; in chiū saⁿ-kap khí-sin khì Pia̍t-sī-pa. A-pek-la̍h-hán chiū tiàm tī Pia̍t-sī-pa.

(BCL) 對彼霎亞伯拉罕倒來伊許個少年人遐，就相及起身去別是巴，亞伯拉罕就踮佇別是巴。

20

(THR) Chiah ê tāi-chì liáu-āu, ū lâng kā A-pek-la̍h-hán kóng, Bı̍t-ka kā lí ê sió-tī Ná-ho̍k siⁿ-kiáⁿ;

(BCL) 諸個代誌了後，有人給亞伯拉罕講：「密迦給你的小弟拿福生子，

21

(THR) tōa-ê Ou-su, sió-tī Pò͘-su, kap A-lân ê lāu-pē, Ki-bó͘-lī;

(BCL) 大的烏斯，小弟布斯及亞蘭的老父基某利，

22

(THR) kap Ki-siat, Hap-só, Pit-ta̍t, Ek-la̍h, Pí-thó͘-lī, (Pí-thó͘-lī siⁿ Lī-pek-ka)

(BCL) 及基設、哈瑣、必達、益拉、彼土利（彼土利生利百加）。」

23

(THR) Chí poeh-lâng lóng sī Bı̍t-ka kā A-pek-la̍h-hán ê sió-tī Ná-ho̍k siⁿ-ê.

(BCL) 此八人攏是密迦給亞伯拉罕的小弟拿福生的。

24

(THR) Ná-ho̍k ê sòe-î, miâ Liû-má, siⁿ Thê-pat, Ka-hâm, Tha-hat, kap Má-ka.

(BCL) 拿福的細姨名流瑪，生提八、迦含、他轄，及瑪迦。

Bible Color Mark

• 台語漢字羅馬本
• 巴克禮全羅