創世記 第 41 章

1

(THR) Kè nn̄g-nî ka-nn̂g, Hoat-ló bîn-bāng; bāng-kìⁿ i khiā tī hô-piⁿ,

(BCL) 過二年足足，法老眠夢，夢見伊徛佇河邊，

2

(THR) khòaⁿ-kìⁿ chhit chiah gû-bú tùi hô-nı̍h khí-lâi, súi koh pûi; tī lô͘-tek-á-lāi teh chia̍h.

(BCL) 看見七隻牛母對河裡起來，娞閣肥，佇蘆竹仔內食。

3

(THR) Tè-āu koh ū chhit chiah gû-bú tùi hô-nı̍h khí-lâi, khiap-sì koh sán; kap chêng hiah ê gû tâng-khiā tī hô-piⁿ.

(BCL) 隨後閣有七隻牛母對河裡起來，怯勢閣瘦及前許個牛同徛佇河邊。

4

(THR) Chiah ê khiap-sì koh sán ê gû-bú it-chīn chia̍h hit chhit-chiah súi koh pûi ê gû. Hoat-ló chiū chhíⁿ.

(BCL) 諸個怯勢閣瘦的牛母一盡食彼七隻娞閣肥的牛。法老就醒。

5

(THR) I koh khùn, tē-jī pái bîn-bāng; bāng-kìⁿ chı̍t châng be̍h chhut chhit-sūi, phauh koh hó.

(BCL) 伊閣睏，第二擺眠夢，夢見一欉麥出七穗，博閣好。

6

(THR) Āu-lâi khòaⁿ-kìⁿ koh chhut chhit-sūi, phàⁿ-phàⁿ, koh hō͘ tang-hong sàu-pháiⁿ.

(BCL) 後來看見閣出七穗，冇冇閣互東風掃歹。

7

(THR) Chiah ê phàⁿ ê sūi thun hit chhit-sūi phauh koh pá-móa-ê. Hoat-ló chhíⁿ, chiah chai sī bāng-kìⁿ.

(BCL) 諸個冇的穗吞彼七穗博閣飽滿的。法老醒，才知是夢見。

8

(THR) Kàu thiⁿ-kng, Hoat-ló sim bô pêng-an; chiū chhe lâng tiàu Ai-kı̍p só͘ ū ê su̍t-sū, phok-sū lâi; Hoat-ló chiū chiong i só͘ bāng-kìⁿ-ê kā in kóng; in bô lâng ōe kā Hoat-ló ôan.

(BCL) 到天光，法老心無平安，就差人召埃及所有的術士、博士來；法老就將伊所夢見的給講，無人會給法老圓。

9

(THR) Hit-sî chiú-chèng-tiúⁿ kā Hoat-ló kóng, Góa kin-á-jı̍t kì-tit góa ê chōe.

(BCL) 彼時酒政長給法老講：「我今仔日記得我的罪。

10

(THR) Chêng Hoat-ló siū-khì jîn-sîn, chiong góa kap tû-pâng-thâu koaiⁿ tī sī-ōe-tiúⁿ hú-lāi ê kaⁿ.

(BCL) 前法老受氣人臣，將我及廚房頭關佇侍衛長府內的監。

11

(THR) Góa kap i, nn̄g-lâng siâng hit-mî ū bāng-kìⁿ, kok chiàu i ê bāng ê ì-gī lâi bāng.

(BCL) 我及伊二人像彼暝有夢見，各照伊的夢的意義來夢。

12

(THR) Tī-hia, kap góan tī-teh, ū chı̍t ê Hi-pek-lâi ê siàu-liân lâng, sī sī-ōe-tiúⁿ ê lô͘-po̍k, góan kā i kóng, i chiū kā góan ôan góan ê bāng; sī chiàu góan ta̍k-lâng ê bāng lâi ôan.

(BCL) 佇遐及阮佇有一個希伯來的少年人，是侍衛長的奴僕，阮給伊講，伊就給阮圓阮的夢，是照阮逐人的夢來圓。

13

(THR) Āu-lāi tú-tú chiàu i só͘ kā góan ôan-ê lâi chiâⁿ; i hō͘ góa ho̍k-chit, hit-lâng siū tiàu lâi sí.

(BCL) 後來抵抵照伊所給阮圓的來成：伊互我復職，彼人受吊來死。」

14

(THR) Hoat-ló chiū chhe lâng khì tiàu Iok-sek, in chiū kín-kín chhōa i chhut-kaⁿ; i chiū chián-hoat, ōaⁿ i ê saⁿ, lâi kìⁿ Hoat-ló.

(BCL) 法老就差人去召約瑟，就緊緊導伊出監，伊就剪髮，換伊的衫，來見法老。

15

(THR) Hoat-ló kā Iok-sek kóng, Góa bāng-kìⁿ chı̍t ê bāng, bô lâng ōe ôan-i; góa thiaⁿ-kìⁿ lâng kóng kàu lí thiaⁿ-kìⁿ bāng chiū ōe ôan.

(BCL) 法老給約瑟講：「我夢見一個夢，無人會圓伊；我聽見人講到你，聽見夢就會圓。」

16

(THR) Iok-sek ìn Hoat-ló kóng, Che m̄-sī chāi-tī góa; Siōng-tè beh chiong pêng-an chí-sī Hoat-ló.

(BCL) 約瑟應法老講：「這呣是在佇我，上帝欲將平安指示法老。」

17

(THR) Hoat-ló kā Iok-sek kóng, Góa bāng-kìⁿ góa khiā tī hô-piⁿ,

(BCL) 法老給約瑟講：「我夢見我徛佇河邊，

18

(THR) ū chhit chiah gû-bú tùi hô-nı̍h khí-lâi, pûi koh súi; tī lô͘-tek-á-lāi teh chia̍h;

(BCL) 有七隻牛母對河裡起來，肥閣娞，佇蘆竹仔內食。

19

(THR) tè-āu koh ū chhit chiah gû-bú khí-lâi, nńg-chiáⁿ, chin khiap-sì, koh chin sán; piàn Ai-kı̍p tōe, góa m̄-bat khòaⁿ-kìⁿ kàu chiah pháiⁿ.

(BCL) 隨後閣有七隻牛母起來，軟茈真怯勢閣真瘦，遍埃及地，我呣曾看見到即歹。

20

(THR) Chiah ê sán koh khiap-sì ê gû-bú it-chīn chia̍h tāi-seng hit chhit chiah pûi ê gû-bú;

(BCL) 諸個瘦閣怯勢的牛母一盡食代先彼七隻肥的牛母，

21

(THR) thun lo̍h pak, iáu-bōe khòaⁿ-chhut ū thun-lo̍h khì; hit ê khiap-sì ê khóan iû-gôan kap tāi-seng bô koh-iūⁿ; góa chiū chhíⁿ.

(BCL) 吞落腹猶未看出有吞落去，彼個怯勢的款猶原及代先無各樣。我就醒。

22

(THR) Góa tī bāng-tiong koh khòaⁿ-kìⁿ chı̍t châng be̍h, chhut chhit-sūi, pá-móa koh hó;

(BCL) 我佇夢中閣看見一欉麥，出七穗，飽滿閣好，

23

(THR) āu-lâi koh chhut chhit-sūi, ko͘-tâ, phàⁿ-phàⁿ, koh hō͘ tang-hong sàu-pháiⁿ;

(BCL) 後來閣出七穗，枯焦冇冇閣互東風掃歹；

24

(THR) chiah ê phàⁿ-phàⁿ ê sūi thun hit chhit sūi hó-ê. Góa kóng hō͘ su̍t-sū thiaⁿ, iā bô lâng ōe kā góa kóe-bêng.

(BCL) 諸個冇冇的穗吞彼七穗好的。我講互術士聽，也無人會給我解明。」

25

(THR) Iok-sek kā Hoat-ló kóng, Hoat-ló ê bāng chiū-sī chı̍t-ê; Siōng-tè só͘ beh kiâⁿ ê sū, ū chí-sī Hoat-ló.

(BCL) 約瑟給法老講：「法老的夢就是一個。上帝所欲行的事有指示法老。

26

(THR) Chhit-chiah hó ê gû-bú sī chhit-nî; chhit-sūi hó-ê, ia̍h sī chhit-nî; bāng sī chı̍t-ê.

(BCL) 七隻好的牛母是七年，七穗好的亦是七年；夢是一個。

27

(THR) Hiah ê tè-āu khí-lâi ê chhit chiah sán koh khiap-sì ê gû-bú, sī chhit-nî; hiah ê chhit sūi khang-phàⁿ, koh hō͘ tang-hong sàu-pháiⁿ-ê, ia̍h sī chhit nî; beh chòe chhit nî ê ki-hng.

(BCL) 許個隨後起來的七隻瘦閣怯勢的牛母是七年，許個七穗空冇閣互東風掃歹的亦是七年，欲做七年的飢荒。

28

(THR) Siōng-tè só͘ beh chòe ê sū, ū hián-bêng tī Hoat-ló; che sī góa tùi Hoat-ló só͘ kóng-ê.

(BCL) 上帝所欲做的事有顯明佇法老，這是我對法老所講的。

29

(THR) Lí khòaⁿ, Ai-kı̍p piàn-tōe beh tú-tio̍h tōa hó-nî-tang chhit-nî;

(BCL) 你看，埃及遍地欲抵著大好年冬七年，

30

(THR) tè-āu, koh beh tú-tio̍h ki-hng chhit-nî; sīm-chì tī Ai-kı̍p tōe lóng bōe kì-tit í-chêng ê hó-siu; chôan-tōe beh hō͘ ki-hng só͘ bia̍t;

(BCL) 隨後閣欲抵著飢荒七年，甚至佇埃及地攏記得以前的好收，全地欲互飢荒所滅。

31

(THR) in-ūi í-āu ê ki-hng thài siong-tiōng, chiū m̄-chai í-chêng tōe-hng ê hó-siu.

(BCL) 因為以後的飢荒太傷重，就呣知以前地方的好收。

32

(THR) Lūn-kàu Hoat-ló nn̄g pái ê bîn-bāng, sī in-ūi Siōng-tè chù-tiāⁿ chit ê tāi-chì, koh Siōng-tè beh kín-kín chiâⁿ-i.

(BCL) 論到法老二擺的眠夢，是因為上帝註定此個代誌，閣上帝欲緊緊成伊。

33

(THR) Só͘-í Hoat-ló tio̍h kéng chı̍t ê ū chhang-miâ, ū tì-hūi ê lâng, phài i tī-lí Ai-kı̍p tōe.

(BCL) 所以，法老著揀一個有聰明有智慧的人，派伊治理埃及地。

34

(THR) Hoat-ló tio̍h án-ni kiâⁿ, koh lı̍p koaⁿ-ôan kóan-lí chit ê tōe; tng chhit-nî hó-nî-tang ê sî, Ai-kı̍p tōe só͘-siu-ê, gō͘-hūn thiu chı̍t-hūn;

(BCL) 法老著按呢行，閣立官員管理此個地。當七年好年冬的時，埃及地所收的五份抽一份，

35

(THR) hō͘ in tī chiong-lâi ê hó-nî-tang, chek-chū it-chhè ê bí-niû; chū-chı̍p ngó͘-kok, siu-khǹg chiàu-kò͘; tī ta̍k ê siâⁿ chòe chia̍h-mı̍h, kui tī Hoat-ló ê chhiú-thâu.

(BCL) 互佇將來的好年冬積聚一切的米糧，聚集五穀，收囥照顧，佇逐個城做食物，歸佇法老的手頭。

36

(THR) Só͘ chek-chū ê bí-niû, thang chòe Ai-kı̍p tōe chiong-lâi chhit-nî ki-hng ê lō͘-ēng; bián-tit chit ê tōe hō͘ ki-hng só͘ bia̍t.

(BCL) 所積聚的米糧通做埃及地將來七年飢荒的路用，免得此個地互飢荒所滅。」

37

(THR) Hoat-ló kap i it-chhè ê jîn-sîn lóng lia̍h chit ê tāi-chì chòe-hó.

(BCL) 法老及伊一切的人臣攏掠此個代誌做好。

38

(THR) Hoat-ló tùi i ê jîn-sîn kóng, Lán kiám ōe chhē-tio̍h chı̍t-ê chhin-chhiūⁿ i chit ê lâng, ū Siōng-tè ê sîn tī i ê lāi-bīn mah?

(BCL) 法老對伊的人臣講：「咱豈會尋著一個親像伊此個人，有上帝的神佇伊的內面嗎？」

39

(THR) Hoat-ló tùi Iok-sek kóng, Siōng-tè í-keng chiong chit ê tāi-chì lóng chí-sī lí, khó-kiàn bô lâng chhin-chhiūⁿ lí ū chit-hō ê chhang-miâ tì-hūi.

(BCL) 法老對約瑟講：「上帝已經將此個代誌攏指示你，可見無人親像你有此號的聰明智慧。

40

(THR) Lí thang kóan-lí góa ê ke; góa ê peh-sìⁿ lóng tio̍h thiaⁿ lí ê ōe, hō͘ lí kóan-lí; to̍k-to̍k tī pó-chō, góa pí lí khah tōa.

(BCL) 你通管理我的家；我的百姓攏著聽你的話互你管理。獨獨佇寶座我比你卡大。」

41

(THR) Hoat-ló kā Iok-sek kóng, Góa kú-khí lí kóan-hat Ai-kı̍p chôan-tōe.

(BCL) 法老給約瑟講：「我舉起你管轄埃及全地。」

42

(THR) Hoat-ló chiū pak i chhiú-nı̍h chòe ìn ê chhiú-chí, kòa tī Iok-sek ê chńg-thâu-á; kā i chhēng iù-tōe-saⁿ; chiong kim-liān kòa tī i ê ām-kún.

(BCL) 法老就剝伊手裡做印的手指，掛佇約瑟的指頭仔，給伊穿幼苧衫，將金鍊掛佇伊的頷頸，

43

(THR) Koh hō͘ Iok-sek chē i ê tē-jī pān chhia; khui-tō-ê kiò kóng, Kūi; án-ni Hoat-ló siat-lı̍p i tī-lí Ai-kı̍p chôan-tōe.

(BCL) 閣互約瑟坐伊的第二班車，開道者叫講：「跪。」按呢，法老設立伊治理埃及全地。

44

(THR) Hoat-ló tùi Iok-sek kóng, Góa sī Hoat-ló, nā bô lí ū siaⁿ, tī Ai-kı̍p chôan-tōe, m̄-chún lâng tāng kha-chhiú.

(BCL) 法老對約瑟講：「我是法老，若無你有聲，佇埃及全地，呣准人動腳手。」

45

(THR) Hoat-ló khim-sù Iok-sek ê miâ kiò Sat-hoat-ná-thek Pa-lōe-a; koh chiong An-siâⁿ ê chè-si Pho-thê-hui-la̍h ê cha-bó͘-kiáⁿ A-se-la̍p hō͘ i chòe-bó͘. Iok-sek chiū chhut-sûn Ai-kı̍p tōe.

(BCL) 法老欽賜約瑟的名叫撒發那忒巴內亞，閣將安城的祭司波提非拉的查某子亞西納互伊做某。約瑟就出巡埃及地。

46

(THR) Iok-sek kìⁿ Ai-kı̍p ông Hoat-ló ê sî, hit-nî saⁿ-cha̍p hè. Iok-sek tùi Hoat-ló ê bīn-chêng chhut-khì, piàn kiâⁿ Ai-kı̍p chôan-tōe.

(BCL) 約瑟見埃及王法老的時彼年三十歲。約瑟對法老的面前出去，遍行埃及全地。

47

(THR) Chhit-ê hó nî-tang ê lāi-bīn, tōe ê chhut-sán ke̍k-kî hong-sēng.

(BCL) 七個好年冬的內面，地的出產極其豐盛，

48

(THR) Iok-sek chū-chı̍p Ai-kı̍p tōe chhit ê hó nî-tang it-chhè ê bí-niû; chiong bí-niû chek-chū tī ta̍k ê siâⁿ; chiu-ûi chhân-tōe ê bí-niû, lóng chek-chū tī i ê pún-siâⁿ.

(BCL) 約瑟聚集埃及地七個好年冬一切的米糧，將米糧積聚佇逐個城；周圍田地的米糧攏積聚佇伊的本城。

49

(THR) Iok-sek chek-chū gō͘-kak ke̍k-chōe, chhin-chhiūⁿ hái-piⁿ ê soa, kàu i thêng-chí bô sǹg; in-ūi sǹg-bōe-liáu.

(BCL) 約瑟積聚五穀極多，親像海邊的沙，到伊停止無算，因為算了。

50

(THR) Ki-hng ê nî bē-kàu í-chêng, An-siâⁿ ê chè-si Pho-thê-hui-la̍h ê cha-bó͘-kiáⁿ A-se-la̍p kā Iok-sek siⁿ nn̄g ê kiáⁿ.

(BCL) 飢荒的年未到以前，安城的祭司波提非拉的查某子亞西納給約瑟生二個子。

51

(THR) Iok-sek kā tōa kiáⁿ hō miâ kiò Má-ná-se; in-ūi i kóng, Siōng-tè hō͘ góa bōe-kì-tit góa it-chhè ê khùn-khó͘, kap góa ê lāu-pē ê chôan-ke.

(BCL) 約瑟給大子號名叫瑪拿西，因為伊講：「上帝互我記得我一切的困苦及我的老父的全家。」

52

(THR) I kā tē-jī kiáⁿ hō miâ Í-hoat-liân; in-ūi i kóng, Siōng-tè hō͘ góa tī góa siū-khó͘ ê tōe-hng heng-ōng.

(BCL) 伊給第二子號名以法蓮，因為伊講：「上帝互我佇我受苦的地方興旺。」

53

(THR) Ai-kı̍p tōe chhit-nî hó nî-tang í-keng ôan,

(BCL) 埃及地七年好年冬已經完，

54

(THR) chhit-nî ki-hng chiū lâi, tú-tú chiàu Iok-sek só͘ kóng-ê; ta̍k-kok lóng ū ki-hng; to̍k-to̍k Ai-kı̍p chôan-tōe ū bí-niû.

(BCL) 七年飢荒就來。抵抵照約瑟所講的，逐國攏有飢荒；獨獨埃及全地有米糧。

55

(THR) Kàu Ai-kı̍p chôan-tōe ū ki-hng, chèng peh-sìⁿ tùi Hoat-ló ai-kiû bí-niû; Hoat-ló tùi Ai-kı̍p ê chèng-lâng kóng, Lín khì chhē Iok-sek, hōan-nā i só͘ kóng-ê, lín lóng tio̍h chòe.

(BCL) 到埃及全地有飢荒，眾百姓對法老哀求米糧，法老對埃及的眾人講：「恁去尋約瑟，凡若伊所講的，恁攏著做。」

56

(THR) Tng-sî ki-hng piàn-móa thiⁿ-ē; Iok-sek khui ta̍k só͘-chāi ê chhek-chhng, thiò bí-niû hō͘ Ai-kı̍p lâng; tī Ai-kı̍p tōe ki-hng chin siong-tiōng.

(BCL) 當時飢荒遍滿天下，約瑟開逐所在的粟倉，糶米糧互埃及人；佇埃及地飢荒真傷重。

57

(THR) Ta̍k-kok ê lâng lóng khì Ai-kı̍p, kàu Iok-sek hia tia̍h bí-niû; in-ūi thiⁿ-ē ki-hng chin siong-tiōng.

(BCL) 逐國的人攏去埃及，到約瑟遐糴米糧，因為天下飢荒真傷重。

Bible Color Mark

• 台語漢字羅馬本
• 巴克禮全羅