創世記 第 42 章

1

(THR) Ngá-kok khòaⁿ-kìⁿ Ai-kı̍p ū gō͘-kak, Ngá-kok chiū kā i hiah ê kiáⁿ kóng, Lín siáⁿ-sū teh saⁿ-khòaⁿ.

(BCL) 雅各看見埃及有五穀，雅各就給伊許個子講：「恁啥事相看？」

2

(THR) Koh kóng, Góa thiaⁿ-kìⁿ Ai-kı̍p ū gō͘-kak, lín thang lo̍h-khì hia, ūi lán tia̍h tām-po̍h, hō͘ lán thang tō͘-o̍ah, bián sí.

(BCL) 閣講：「我聽見埃及有五穀，恁通落去遐，為咱糴淡薄，互咱通度活，免死。」

3

(THR) Tùi án-ni Iok-sek cha̍p ê hiaⁿ lóng lo̍h Ai-kı̍p, khì tia̍h bí-niû.

(BCL) 對按呢，約瑟十個兄攏落埃及去糴米糧。

4

(THR) Chóng-sī Iok-sek ê sió-tī Piān-ngá-bín, Ngá-kok bô chhe i kap in hiaⁿ saⁿ-kap khì; in-ūi i kóng, Kiaⁿ-liáu i tú-tio̍h hāi.

(BCL) 總是約瑟的小弟便雅憫，雅各無差伊及兄相及去，因為伊講：「驚了伊抵著害。」

5

(THR) Lâi tia̍h bí-niû ê lâng ê tiong-kan, Í-sek-lia̍t hiah ê kiáⁿ ia̍h ū lâi, in-ūi Ka-lâm tōe ia̍h ū ki-hng.

(BCL) 來糴米糧的人的中間以色列許個子亦有來，因為迦南地亦有飢荒。

6

(THR) Tng-sî tī-lí Ai-kı̍p tōe ê sī Iok-sek; thiò bí-niû hō͘ hit só͘-chāi ê chèng peh-sìⁿ-ê, ia̍h sī i; Iok-sek hiah ê hiaⁿ lâi, phak-lo̍h tōe pài i.

(BCL) 當時治理埃及地的是約瑟；糶米糧互彼所在的眾百姓者亦是伊。約瑟許個兄來，仆落地，拜伊。

7

(THR) Iok-sek khòaⁿ-kìⁿ i hiah ê hiaⁿ, ōe jīn-tit, ké-chòe siⁿ-hūn-lâng, tùi in kóng khah-giâm ê ōe, mn̄g in kóng, Lín tùi tah-lo̍h lâi? in kóng, Tùi Ka-lâm tōe lâi tia̍h bí-niû.

(BCL) 約瑟看見伊許個兄，會認得，假做生份人，對講卡嚴的話，問講：「恁對叨落來？」講：「對迦南地來糴米糧。」

8

(THR) Iok-sek ōe jīn-tit in hiaⁿ, in bōe jīn-tit i.

(BCL) 約瑟會認得兄，認得伊。

9

(THR) Iok-sek kì-tit chêng só͘ bāng lūn-kàu in-ê hiah ê bāng, chiū tùi in kóng, Lín sī cheng-thàm, lâi thàm-thiaⁿ chit só͘-chāi ê hu-sı̍t.

(BCL) 約瑟記得前所夢論到的許個夢，就對講：「恁是偵探，來探聽此所在的虛實。」

10

(THR) In tùi i kóng, Góan ê chú ah, m̄-sī, lí ê lô͘-po̍k lâi beh tia̍h bí-niû.

(BCL) 對伊講：「阮的主啊，呣是。你的奴僕來欲糴米糧。

11

(THR) Góan lóng sī chı̍t-lâng ê kiáⁿ, góan sī láu-sı̍t lâng, lí ê lô͘-po̍k m̄-sī cheng-thàm.

(BCL) 阮攏是一人的子，阮是老實人；你的奴僕呣是偵探。」

12

(THR) Iok-sek kā in kóng, M̄-sī án-ni, lín lâi sī beh thàm-thiaⁿ chit só͘-chāi ê hu-sı̍t.

(BCL) 約瑟給講：「呣是按呢，恁來是欲探聽此所在的虛實。」

13

(THR) In kóng, Lí ê lô͘-po̍k cha̍p-jī ê hiaⁿ-tī, sī Ka-lâm tōe chı̍t ê lâng ê kiáⁿ; tē-it-sòe-ê, hiān-kim tī góan lāu-pē hia; ū chı̍t-ê bô-khì lah.

(BCL) 講：「你的奴僕十二個兄弟，是迦南地一個人的子，第一細者現今佇阮老父遐，有一個無去啦。」

14

(THR) Iok-sek kā in kóng, Góa tú-á kóng lín sī cheng-thàm, chit ê ōe sı̍t-chāi bô chhò.

(BCL) 約瑟給講：「我抵仔講恁是偵探，此個話實在無錯。

15

(THR) Góa kí Hoat-ló ê sìⁿ-miā lâi chiù-chōa, nā lín soah-bé ê sió-tī bô kàu chia, lín bōe-tit-thang chhut chit só͘-chāi; ēng án-ni lâi chhì-giām lín ê hu-sı̍t.

(BCL) 我指法老的生命來咒誓，若恁煞尾的小弟無到遮，恁得通出此所在，用按呢來試驗恁的虛實。

16

(THR) Tio̍h chhe lín tiong-kan chı̍t-lâng khì chhōa lín ê sió-tī lâi, lín chiah-ê lóng tio̍h koaiⁿ tī-chia, chèng-bêng lín ê ōe, chai lín sêng-sı̍t á-bô; nā bô, góa kí Hoat-ló ê sìⁿ-miā lâi chiù-chōa, lín it-tēng sī cheng-thàm.

(BCL) 著差恁中間一人去，導恁的小弟來。恁諸個攏著關佇遮，證明恁的話，知恁誠實抑無，若無，我指法老的生命來咒誓，恁一定是偵探。」

17

(THR) Tùi án-ni Iok-sek chiong in lóng koaiⁿ tī Kaⁿ-nı̍h saⁿ-jı̍t.

(BCL) 對按呢約瑟將攏關佇監裡三日。

18

(THR) Kàu tē-saⁿ jı̍t Iok-sek tùi in kóng, Góa kèng-ùi Siōng-tè; lín chiàu góa ê ōe kiâⁿ, chiū ōe o̍ah.

(BCL) 到第三日，約瑟對講：「我敬畏上帝；恁照我的話行就會活。

19

(THR) Lín nā kó-jiân sī láu-sı̍t lâng, lín hiaⁿ-tī-tiong thang lâu chı̍t-ê pa̍k tī lín hit kaⁿ-lāi; chóng-sī lín thang tòa bí-niû tò-khì, kiù lín ke-lāi ê ki-hng,

(BCL) 恁若果然是老實人，恁兄弟中通留一個縛佇恁彼監內，總是恁通帶米糧倒去，救恁家內的飢荒。

20

(THR) chiong lín soah-bé sió-tī chhōa lâi góa chia; án-ni lín ê ōe chiū ū pîn-kù, lín iā m̄-bián sí. In chiū chiàu án-ni kiâⁿ.

(BCL) 將恁煞尾小弟導來我遮，按呢，恁的話就有憑據，恁也呣免死。」就照按呢行。

21

(THR) In saⁿ-kap kóng, Lán tùi tī lán ê sió-tī sı̍t-chāi ū chōe, i ai-kiû lán ê sî, lán khòaⁿ-kìⁿ i sim-lāi ê kan-khó͘, iā m̄-khéng thiaⁿ i; só͘-í chit-tiûⁿ ê khó͘-lān kàu tī lán.

(BCL) 相及講：「咱對佇咱的小弟實在有罪。伊哀求咱的時，咱看見伊心內的艱苦，也呣肯聽伊，所以此場的苦難到佇咱。」

22

(THR) Liû-piān ìn in kóng, Góa kiám m̄-sī tùi lín kóng, m̄-thang hāi hit ê gín-á lâi chhú-chōe, to̍k-to̍k lín m̄-thiaⁿ? só͘-í lâu i ê huih ê chōe, tùi lán chiah-ê thó.

(BCL) 流便應講：「我豈呣是對恁講，呣通害彼個囝仔來取罪，獨獨恁呣聽，所以流伊的血的罪對咱諸個討。」

23

(THR) In m̄-chai Iok-sek thiaⁿ ōe hiáu-tit; in-ūi tī in tiong-kan ū ēng hoan-e̍k-koaⁿ.

(BCL) 呣知約瑟聽會曉得，因為佇中間有用翻譯官。

24

(THR) Iok-sek o̍at-tńg-sin lâu ba̍k-sái; koh o̍at-lâi kap in kóng-ōe; chiū tī in tiong-kan chhú Se-biān chhut-lâi, tī in ê bīn-chêng kā i pa̍k-teh.

(BCL) 約瑟越轉身，流目屎，閣越來及講話，就佇中間取西緬出來，佇的面前給伊縛。

25

(THR) Iok-sek hoan-hù lâng chiong gō͘-kak jı̍p tī in ê khì-kū kàu móa-móa, iā chiong in ta̍k-lâng ê gûn hē tī in ê pò͘-tē-lāi, lâi hêng in, koh ēng lō͘-nı̍h ê chia̍h-mı̍h hō͘ in; lâng chiū chiàu án-ni lâi kā in chòe.

(BCL) 約瑟吩咐人將五穀入佇的器具到滿滿，也將逐人的銀下佇的布袋內來還，閣用路裡的食物互，人就照按呢來給做。

26

(THR) In chiū chiong gō͘-kak hō͘ in ê lû chài, chiū lī-khui hia khì.

(BCL) 就將五穀互的驢載，就離開遐去。

27

(THR) Kàu hioh-mî ê só͘-chāi, in tiong-kan ū chı̍t-lâng tháu-khui i ê pò͘-tē, beh the̍h hō͘ lû chia̍h, chiah khòaⁿ-kìⁿ i ê gûn iû-gôan tī-teh, hē tī pò͘-tē-kháu.

(BCL) 到歇暝的所在，中間有一人解開伊的布袋，欲提互驢食，才看見伊的銀猶原佇下佇布袋口。

28

(THR) Chiū kā i ê hiaⁿ-tī kóng, Góa ê gûn hêng tò-tńg, lí khòaⁿ, iû-gôan tī góa ê pò͘-tē-lāi; in chiū kiaⁿ kàu bô sim-koaⁿ, ngia̍uh-ngia̍uh-chhoah, saⁿ-kap kóng, Siōng-tè án-ni khóan-thāi lán sī sím-mı̍h?

(BCL) 就給伊的兄弟講：「我的銀還倒轉，你看，猶原佇我的布袋內。」就驚到無心肝，愕愕惙相及講：「上帝按呢款待咱是甚麼？」

29

(THR) In kàu Ka-lâm tōe, kàu in lāu-pē Ngá-kok hia, chiong só͘ tú-tio̍h ê sū lóng kā i kóng, kóng, Hit-lâng, chiū-sī hit só͘-chāi ê chú, tùi góan kóng chin giâm ê ōe, lia̍h góan chòe hit só͘-chāi ê cheng-thàm.

(BCL) 到迦南地、到老父雅各遐，將所抵著的事攏給伊講，講：

30

(THR)

(BCL) 「彼人就是彼所在的主，對阮講真嚴的話，掠阮做彼所在的偵探。

31

(THR) Góan kā i kóng, Góan sī láu-sı̍t lâng, góan m̄-sī cheng-thàm,

(BCL) 阮給伊講：『阮是老實人，阮呣是偵探。

32

(THR) góan sī cha̍p-jī ê hiaⁿ-tī, sī góan lāu-pē ê kiáⁿ; ū chı̍t-ê bô-khì, tē-it-sòe-ê hiān-kim kap góan lāu-pē tī Ka-lâm tōe.

(BCL) 阮是十二個兄弟，是阮老父的子，有一個無去，第一細者現今及阮老父佇迦南地。』

33

(THR) Hit-lâng, chiū-sī hit só͘-chāi ê chú, kā góan kóng, Nā ài hō͘ góa chai lín sī láu-sı̍t lâng, lín hiaⁿ-tī-tiong thang lâu chı̍t-ê tī góa chia, lín chiah-ê thang tòa gō͘-kak tò-khì, kiù lín ke-lāi ê ki-hng;

(BCL) 彼人就是彼所在的主給阮講：『若愛互我知恁是老實人，恁兄弟中通留一個佇我遮，恁諸個通帶五穀倒去，救恁家內的飢荒。

34

(THR) chhōa lín soah-bé ê sió-tī lâi góa chia, góa chiū chai lín m̄-sī cheng-thàm, sī láu-sı̍t lâng; án-ni góa chiū chiong lín ê hiaⁿ-tī kau hō͘ lín, lín iā thang tī chit só͘-chāi bóe-bōe.

(BCL) 導恁煞尾的小弟來我遮，我就知恁呣是偵探，是老實人。按呢，我就將恁的兄弟交互恁，恁也通佇此所在買賣。』」

35

(THR) Āu-lâi in piàⁿ in ê pò͘-tē, bô phah-sǹg, in ta̍k-lâng ê gûn-pau lóng tī in ê pò͘-tē-lāi; in kap in lāu-pē khòaⁿ-kìⁿ gûn-pau chiū lóng kiaⁿ-hiâⁿ.

(BCL) 後來傾的布袋，無拍算，逐人的銀包攏佇的布袋內；及老父看見銀包就攏驚惶。

36

(THR) In ê lāu-pē Ngá-kok kā in kóng, Lín hō͘ góa sit-lo̍h góa ê kiáⁿ; Iok-sek bô-khì, Se-biān iā bô-khì, lín koh beh chhōa Piān-ngá-bín khì; chiah ê tāi-chì lóng sī hāi-tio̍h góa.

(BCL) 的老父雅各給講：「恁互我失落我的子：約瑟無去，西緬也無去，恁閣欲導便雅憫去；諸個代誌攏是害著我。」

37

(THR) Liû-piān kā i ê lāu-pē kóng, Góa nā bô chhōa i tò-lâi kau lí, lí thang thâi góa nn̄g ê kiáⁿ; chòe lí thang chiong i kau-tài góa, góa tek-khak chhōa i tò-lâi kau lí.

(BCL) 流便給伊的老父講：「我若無導伊倒來交你，你通我二個子。做你通將伊交代我，我的確導伊倒來交你。」

38

(THR) Ngá-kok kóng, Góa ê kiáⁿ góa bô beh hō͘ i kap lín khì; i ê hiaⁿ í-keng sí, chí-ū chhun i; i nā tī lín só͘ kiâⁿ ê lō͘ tú-tio̍h hām-hāi, he! chiū-sī lín hō͘ góa pe̍h-thâu-mn̂g chhiⁿ-chhám lo̍h im-hú.

(BCL) 雅各講：「我的子我無欲互伊及恁去；伊的兄已經死，只有剩伊，伊若佇恁所行的路抵著陷害，彼就是恁互我白頭毛、淒慘落陰府。」

Bible Color Mark

• 台語漢字羅馬本
• 巴克禮全羅