希伯來書 第 11 章

1

(THR) Sìn chiū-sī só͘ ǹg-bāng ê ê sı̍t-chāi, kap bē khòaⁿ-kìⁿ ê sū ê pîn-chún.

(BCL) 信就是所向望者的實在，及未看見的事的憑準。

2

(THR) In-ūi tī chit-ê, chiū kó͘-chá lâng ū tit-tio̍h kan-chèng.

(BCL) 因為佇此個，就古早人有得著干證。

3

(THR) Tùi sìn, lán chai chiah ê sè-kài sī tùi Siōng-tè ê ōe lâi chō-chiâⁿ; án-ni só͘ khòaⁿ-kìⁿ ê m̄ sī tùi ōe khòaⁿ-kìⁿ ê lâi chiâⁿ.

(BCL) 對信，咱知諸個世界是對上帝的話來造成；按呢，所看見的，呣是對會看見的來成。

4

(THR) Tùi sìn, A-pek hiàn-chè hō͘ Siōng-tè, pí Kai-ún khah hó; tùi án-ni tit-tio̍h kan-chèng i sī gī, chiū-sī Siōng-tè khòaⁿ i ê lé-mı̍h lâi chòe kan-chèng; koh tùi chit ê sìn, i sí-liáu iáu teh kóng ōe.

(BCL) 對信，亞伯獻祭互上帝，比該隱卡好，對按呢得著干證伊是義，就是上帝看伊的禮物來做干證。閣對此個信，伊死了猶講話。

5

(THR) Tùi sìn, Í-lo̍k siū chhian-sóa, tì-kàu bô kìⁿ-tio̍h sí; lâng chhē i bōe tio̍h, in-ūi Siōng-tè chhian-sóa i; sī bē chhian-sóa ê tāi-seng, ū tit-tio̍h kan-chèng i hō͘ Siōng-tè hoaⁿ-hí.

(BCL) 對信，以諾受遷徙，致到無見著死，人尋伊著，因為上帝遷徙伊；是未遷徙的代先，有得著干證伊互上帝歡喜。

6

(THR) Siat-sú bô sìn, chiū bōe-ōe hō͘ Siōng-tè hoaⁿ-hí; in-ūi chhin-kūn Siōng-tè ê, tek-khak tio̍h sìn I ū, iā sī pò-siúⁿ hiah ê kiû I ê lâng.

(BCL) 設使無信，就會互上帝歡喜；因為親近上帝者，的確著信伊有，也是報賞許個求伊的人。

7

(THR) Tùi sìn, Ná-a tī bē khòaⁿ-kìⁿ ê sū, í-keng tit-tio̍h be̍k-sī, chiū kèng-ùi, lâi pī-pān tōa chûn, kiù i ê ke-kòan; tùi án-ni lâi tēng sè-kan ê chōe, koh tit-tio̍h sêng-chiap chiàu sìn ê gī.

(BCL) 對信，挪亞佇未看見的事，已經得著默示，就敬畏，來備辦大船，救伊的家眷。對按呢來定世間的罪，閣得著承接照信的義。

8

(THR) Tùi sìn, A-pek-la̍h-hán siū tiàu ê sî, chiū sūn bēng-lēng chhut-khì, kàu chiong-lâi beh tit-tio̍h chòe gia̍p ê tōe; i chhut-khì, m̄ chai beh khì tá-lo̍h.

(BCL) 對信，亞伯拉罕受召的時就順命令出去，到將來欲得著做業的地；伊出去，呣知欲去叨落。

9

(THR) Tùi sìn chiū chhut-gōa tī só͘ èng-ún ê tōe, chhin-chhiūⁿ tī m̄ sī ka-kī ê tōe, khiā-khí tī pò͘-pîⁿ, kap Í-sat, Ngá-kok, chiū-sī saⁿ-kap sêng-chiap tâng chı̍t iūⁿ ê èng-ún ê;

(BCL) 對信，就出外佇所應允的地，親像佇呣是家己的地，徛起佇布棚，及以撒、雅各就是相及承接同一樣的應允的。

10

(THR) in-ūi i ǹg-bāng ū tōe-ki ê siâⁿ, sī Siōng-tè só͘ keng-êng khí-chō ê.

(BCL) 因為伊向望有地基的城，是上帝所經營起造的。

11

(THR) Tùi sìn, Sat-la̍h, sui-bóng kè seng-sán ê nî-hè, iáu tit-tio̍h ōe hôai-īn, in-ūi i lia̍h èng-ún i ê chòe sìn-sı̍t;

(BCL) 對信，撒拉，雖罔過生產的年歲，猶得著會懷孕，因為伊掠應允伊的做信實。

12

(THR) só͘-í tùi chı̍t lâng, koh sī chhin-chhiūⁿ í-keng sí ê, siⁿ-thòaⁿ chhin-chhiūⁿ thiⁿ chhiⁿ ê chōe, chhin-chhiūⁿ hái-soa ê bōe sǹg-tit.

(BCL) 所以對一人閣是親像已經死者生湠，親像天星的多，親像海沙的算得。

13

(THR) Chiah-ê lóng sī chiàu sìn lâi sí, bē bat tit-tio̍h só͘ èng-ún ê, to̍k-to̍k hn̄g-hn̄g khòaⁿ, hoaⁿ-hí lâi tán-chih, koh ka-kī jīn tī tōe-chiūⁿ chòe lâng-kheh, chòe chhut-gōa ê.

(BCL) 諸個攏是照信來死，未曾得著所應允的；獨獨遠遠看，歡喜來等接，閣家己認佇地上做人客，做出外的。

14

(THR) In-ūi án-ni kóng ê, sī piáu-bêng in teh chhē chı̍t ê chó͘-ke.

(BCL) 因為按呢講的是表明in teh尋一個祖家。

15

(THR) In nā siàu-liām só͘ tùi hia chhut-lâi ê tōe, chiū ū thang tò-khì ê ki-hōe.

(BCL) in若數念所對遐出來的地，就有通倒去的機會。

16

(THR) Chóng-sī taⁿ in him-bō͘ koh khah hó ê, chiū-sī tī thiⁿ-nı̍h ê; só͘-í Siōng-tè chheng-chòe in ê Siōng-tè, bô lia̍h-chòe kiàn-siàu; in-ūi í-keng thòe in pī-pān chı̍t ê siâⁿ.

(BCL) 總是今in欣慕閣卡好的，就是佇天裡的。所以上帝稱做in的上帝，無掠做見誚，因為已經替in備辦一個城。

17

(THR) Tùi sìn, A-pek-la̍h-hán siū chhì ê sî, hiàn Í-sat; chiū-sī hit ê sêng-siū chiah ê èng-ún ê hiàn i to̍k-siⁿ ê kiáⁿ;

(BCL) 對信，亞伯拉罕受試的時，獻以撒；就是彼個承受諸個應允的，獻伊獨生的子。

18

(THR) bat ū kā i kóng, Tùi Í-sat siⁿ ê beh chheng-chòe lí ê hō͘-è:

(BCL) 曾有給伊講：「對以撒生的欲稱做你的後裔。」

19

(THR) in-ūi i lia̍h-chòe Siōng-tè tùi sí-lâng tiong ōe hō͘ i koh-o̍ah; só͘-í thang phì-jū kóng tit-tio̍h i tùi sí tò-tńg-lâi.

(BCL) 因為伊掠做上帝對死人中會互伊復活；所以通譬喻講得著伊對死倒轉來。

20

(THR) Tùi sìn, Í-sat lūn chiong-lâi ê sū chiok-hok Ngá-kok, Í-sò.

(BCL) 對信，以撒論將來的事祝福雅各、以掃。

21

(THR) Tùi sìn, Ngá-kok lîm-chiong ê sî, kā Iok-sek nn̄g ê kiáⁿ chiok-hok; òa kóaiⁿ-á lâi kèng-pài.

(BCL) 對信，雅各臨終的時，給約瑟二個子祝福，倚枴仔來敬拜。

22

(THR) Tùi-sìn, Iok-sek lîm-chiong ê sî, liām-tio̍h Í-sek-lia̍t ê hō͘-è beh chhut Ai-kı̍p; koh ūi-tio̍h i ê kut-hâi lâi hoan-hù.

(BCL) 對信，約瑟臨終的時，念著以色列的後裔欲出埃及，閣為著伊的骨骸來吩咐。

23

(THR) Tùi sìn, chiū Mô͘-se chhut-sì ê sî, i ê pē-bú, in-ūi khòaⁿ-kìⁿ kiáⁿ chheng-siù, khǹg-ba̍t i saⁿ ge̍h jı̍t; ia̍h m̄ kiaⁿ ông ê bēng-lēng.

(BCL) 對信，就摩西出世的時，伊的父母因為看見子清秀，囥密伊三月日，亦呣驚王的命令。

24

(THR) Tùi sìn, Mô͘-se í-keng tióng-sêng, m̄ sêng-jīn chòe Hoat-ló cha-bó͘-kiáⁿ ê kiáⁿ;

(BCL) 對信，摩西已經長成呣承認做法老查某子的子。

25

(THR) khah ài kap Siōng-tè ê peh-sìⁿ saⁿ-kap siū khó͘-lān, m̄ ài chiām-sî hióng-siū chōe-ok ê khòai-lo̍k;

(BCL) 卡愛及上帝的百姓相及受苦難，呣愛暫時享受罪惡的快樂。

26

(THR) lia̍h-chòe ū hūn Ki-tok ê lêng-jio̍k, pí Ai-kı̍p ê châi-pó khah kùi-khì: sī ǹg-bāng pò-siúⁿ ê iân-kò͘.

(BCL) 掠做有份基督的凌辱比埃及的財寶卡貴氣，是向望報賞的緣故。

27

(THR) Tùi sìn, i lī-khui Ai-kı̍p, bô kiaⁿ ông ê siū-khì; kian-sim jím-nāi, chhin-chhiūⁿ khòaⁿ-kìⁿ só͘ bōe khòaⁿ-kìⁿ ê Chú.

(BCL) 對信，伊離開埃及，無驚王的受氣；堅心忍耐，親像看見所看見的主。

28

(THR) Tùi sìn, lâi siat pôaⁿ-kè-choeh, kap boah huih ê lé, bián-tit châu-bia̍t tōa kiáⁿ ê kha̍p-tio̍h in.

(BCL) 對信，來設過節，及抹血的禮，免得剿滅大子的磕著。

29

(THR) Tùi sìn, in kè Âng-hái, chhin-chhiūⁿ kiâⁿ ta tōe: Ai-kı̍p lâng chhì kiâⁿ i, chiū tîm-lo̍h-khì.

(BCL) 對信，過紅海親像行乾地；埃及人試行伊，就沈落去。

30

(THR) Tùi sìn, se̍h Iâ-lī-ko siâⁿ le̍k-kè chhit jı̍t, siâⁿ chiū tó-hōai.

(BCL) 對信，踅耶利哥城歷過七日，城就倒壞。

31

(THR) Tùi sìn, chhiong-ki Lat-ha̍p ēng hô-pêng chiap-la̍p sòe-choh, só͘-í bô kap m̄ sūn-thàn ê lâng saⁿ-kap bia̍t-bô.

(BCL) 對信，娼妓喇合用和平接納細作，所以無及呣順趁的人相及滅無。

32

(THR) Góa beh koh kóng sím-mı̍h ah? beh kóng Ki-tiân, Pa-le̍k, Chham-sun, Iâ-hut-tha; kap Tāi-pı̍t, Sat-bó͘-jíⁿ, í-kı̍p chiah ê sian-ti, chiū sî bô kàu-gia̍h.

(BCL) 我欲閣講甚麼啊？欲講基甸、巴拉、參孫、耶弗他、及大衛、撒母耳，以及諸個先知，就時無夠額。

33

(THR) Hiah ê lâng, tùi sìn, thâi-iâⁿ chiah ê kok, kiâⁿ kong-gī, tit-tio̍h èng-ún, nı̍h sai ê chhùi,

(BCL) 許個人對信，贏諸個國，行公義，得著應允，勒獅的嘴，

34

(THR) phah-hoa hé-iām, siám-pī lāi to, jio̍k chiâⁿ-chòe kiông, kau-chiàn ióng-béng, kong-phòa gōa-pang ê chiàn-tīn.

(BCL) 拍熄火焰，閃避利刀；弱成做強，交戰勇猛，攻破外邦的戰陣。

35

(THR) Ū hū-jîn-lâng tit-tio̍h in ê chhin-lâng tùi sí koh-o̍ah; ia̍h ū lâng siū khok-to̍k ê hêng-ho̍at, m̄ gōan siū sio̍k; sī ài tit-tio̍h khah hó ê koh-o̍ah:

(BCL) 有婦仁人得著的親人對死復活。亦有人受酷毒的刑罰，呣願受贖，是愛得著卡好的復活。

36

(THR) koh ū lâng siū hì-lāng, piⁿ-phah, í-kı̍p só-liān, koaiⁿ-kaⁿ, chiah ê chhì:

(BCL) 閣有人受戲弄、鞭拍、以及鎖鍊、關監、諸個試，

37

(THR) koh ū lâng siū chio̍h-thâu tìm, kù-á kù, siū iú-he̍k ê chhì, hō͘ to thâi-sí: chhēng mî-iûⁿ soaⁿ-iûⁿ ê phê, phun-pho ta̍k só͘-chāi, tú-tio̍h sòng-hiong, hōan-lān, pō-gio̍k;

(BCL) 閣有人受石頭擲，鋸仔鋸，受誘惑的試，互刀死，穿綿羊山羊的皮奔波逐所在，抵著喪鄉、患難、暴虐，

38

(THR) ū-ê tī khòng-iá, tī soaⁿ-niá, tī chio̍h-tōng, tī tōe-hia̍t, sì-kòe phiau-liû; chiah ê lâng sī sè-kan bōe kham-tit ū ê.

(BCL) 有的佇曠野、佇山嶺、佇石洞、佇地穴，四界漂流，諸個人是世間堪得有的。

39

(THR) In lóng í-keng tùi sìn tit-tio̍h kan-chèng, nā-sī bē bat tit-tio̍h só͘ èng-ún ê;

(BCL) 攏已經對信得著干證，若是未曾得著所應允的；

40

(THR) in-ūi Siōng-tè kā lán tāi-seng pī-pān koh khah hó ê sū, sī beh hō͘ in, nā bô lán, chiū bōe tit-tio̍h ôan-chôan.

(BCL) 因為上帝給咱代先備辦閣卡好的事，是欲互若無咱，就得著完全。

Bible Color Mark

• 台語漢字羅馬本
• 巴克禮全羅