耶利米書 第 33 章

1

(THR) Iâ-lī-bí iáu-kú koaiⁿ tī khu-liû-só͘ ê īⁿ-lāi, Iâ-hô-hoa ê ōe tē-jī-pái lîm-kàu i kóng,

(BCL) 耶利米猶久關佇拘留所的院內，耶和華的話第二擺臨到伊講：

2

(THR) Kiâⁿ i--ê ê Iâ-hô-hoa, kè-e̍k lâi kiàn-lı̍p i--ê ê Iâ-hô-hoa sī I ê miâ, I án-ni kóng,

(BCL) 「行伊者的耶和華，計劃來建立伊者的耶和華，是伊的名。

3

(THR) Lí kiû Góa, Góa chiū ìn lí, ia̍h chiong lí só͘ m̄-chai, tōa koh oh-tit ê sū, chí-sī lí.

(BCL) 伊按呢講：你求我，我就應你，亦將你所呣知，大閣得的事指示你。

4

(THR) Lūn-kàu chit ê siâⁿ-lāi ê chhù, kap Iû-tāi ông ê chhù, chiū-sī thiah-húi lâi tí-tng tùi-te̍k ê thô͘-tui, kap tí-tng to-kiàm--ê;

(BCL) 論到此個城內的厝及猶大王的厝，就是拆毀來抵當對敵的土堆及抵當刀劍的，

5

(THR) Í-sek-lia̍t ê Siōng-tè Iâ-hô-hoa án-ni kóng, Lâng beh lâi kap Ka-le̍k-tí lâng kau-chiàn, put-kò sī hō͘ sin-si chhiong-móa chiah ê chhù, chiū-sī Góa tī siū-khì kap tōa siū-khì ê tiong-kan só͘ thâi-sí ê lâng, in-ūi in it-chhè ê pháiⁿ, Góa chiū ng Góa ê bīn, m̄-khòaⁿ chit ê siâⁿ.

(BCL) 以色列的上帝──耶和華按呢講：人欲來及迦勒底人交戰，不過是互身屍充滿諸個厝，就是我佇受氣及大受氣的中間所死的人，因為一切的歹，我就掩我的面呣看此個城。

6

(THR) Khòaⁿ ah, Góa beh hō͘ i ê siong ho̍k-gôan, koh ēng hó-io̍h i-hó--i; koh chiong hong-sēng ê pêng-an kap sêng-sı̍t hián-bêng tī in.

(BCL) 看啊，我欲互伊的傷復原，閣用好藥醫好伊，閣將豐盛的平安及誠實顯明佇。

7

(THR) Góa ia̍h beh hō͘ Iû-tāi siū-lia̍h--ê, kap Í-sek-lia̍t siū-lia̍h--ê, tò-tńg lâi; koh kiàn-lı̍p in chhin-chhiūⁿ khí-thâu.

(BCL) 我亦欲互猶大受掠者及以色列受掠者倒轉來，閣建立親像起頭。

8

(THR) Góa beh sóe-tû in it-chhè kan-hōan Góa ê chōe; Góa ia̍h beh sià-bián in it-chhè kan-hōan Góa, pōe-pōan Góa chiah ê chōe.

(BCL) 我欲洗除一切干犯我的罪，我亦欲赦免一切干犯我，背叛我諸個罪。

9

(THR) Chit ê siâⁿ beh tī bān-kok kā Góa chòe hoaⁿ-hí ê miâ, chòe o-ló, chòe êng-kng; in-ūi bān-kok thiaⁿ-kìⁿ Góa só͘ siúⁿ-sù tī in it-chhè ê hok-khì, iā ūi-tio̍h Góa só͘ siúⁿ-sù it-chhè ê hok-khì kap pêng-an, beh kiaⁿ-hiâⁿ ngia̍uh-ngia̍uh-chhoah.

(BCL) 此個城欲佇萬國給我做歡喜的名，做謳咾，做榮光。因為萬國聽見我所賞賜佇一切的福氣，也為著我所賞賜一切的福氣及平安，欲驚惶愕愕惙。」

10

(THR) Iâ-hô-hoa án-ni kóng, Lín lūn-kàu chit ê tōe-hng ū kóng, Sī pha-hng, bô lâng, bô cheng-siⁿ ê tōe-hng; chóng-sī tī chit só͘-chāi í-kı̍p pha-hng, bô lâng, bô jîn-ian, bô cheng-siⁿ ê Iû-tāi chiah ê siâⁿ, kap Iâ-lō͘-sat-léng ê koe-chhī,

(BCL) 耶和華按呢講：「恁論到此個地方有講，是拋荒，無人，無精牲的地方，總是佇此所在以及拋荒，無人，無人煙，無精牲的猶大諸個城及耶路撒冷的街市，

11

(THR) beh koh thiaⁿ-kìⁿ ū hoaⁿ-hí ê siaⁿ, khòai-lo̍k ê siaⁿ, sin-kiáⁿ-sài ê siaⁿ, sin-niû ê siaⁿ; ia̍h ū lâng ê siaⁿ, chiū-sī hiah ê tòa siā-un ê chè kàu Iâ-hô-hoa ê chhù--ê, teh kóng, Tio̍h kám-siā bān-kun ê Iâ-hô-hoa, in-ūi Iâ-hô-hoa sī hó, I ê chû-ài éng-óan tī-teh; in-ūi Góa beh hō͘ chit só͘-chāi siū-lia̍h ê lâng tò-tńg--lâi, chhin-chhiūⁿ khí-thâu chı̍t-iūⁿ; che sī Iâ-hô-hoa kóng--ê.

(BCL) 欲閣聽見有歡喜的聲，快樂的聲．新子婿的聲，新娘的聲，亦有人的聲就是許個帶謝恩的祭到耶和華的厝者講：著感謝萬軍的耶和華，因為耶和華是好；伊的慈愛永遠佇！因為我欲互此所在受掠的人倒轉來，親像起頭一樣。這是耶和華講的。

12

(THR) Bān-kun ê Iâ-hô-hoa án-ni kóng, Tī chit ê pha-hng, bô lâng, bô cheng-siⁿ ê tōe-hng, kap kî-tiong só͘ ū ê siâⁿ, beh koh ū bo̍k-chiá khiā-khí, hō͘ in ê iûⁿ-kûn tó tī-hia.

(BCL) 萬軍的耶和華按呢講：「在此個拋荒無人無精牲的地方及其中所有的城，欲閣有牧者徛起；互的羊群倒佇遐。

13

(THR) Tī soaⁿ-tōe chiah ê siâⁿ, pîⁿ-iûⁿ chiah ê siâⁿ, lâm-hng chiah ê siâⁿ, Piān-ngá-bín, Iâ-lō͘-sat-léng ê chiu-ûi, kap Iû-tāi chiah ê siâⁿ, beh koh ū iûⁿ-kûn keng-kè sǹg ê lâng ê chhiú; che sī Iâ-hô-hoa kóng--ê.

(BCL) 佇山地諸個城、平洋諸個城、南方諸個城、便雅憫、耶路撒冷的周圍，及猶大諸個城欲閣有羊群經過算的人的手。這是耶和華講的。」

14

(THR) Iâ-hô-hoa kóng, Khòaⁿ ah, jı̍t-chí beh kàu, Góa èng-ún Í-sek-lia̍t-ke kap Iû-tāi-ke ê hó-ōe, Góa beh hō͘ i chiâⁿ.

(BCL) 耶和華講：「看啊，日子欲到，我應允以色列家及猶大家的好話我欲互伊成。

15

(THR) Tng hit-jı̍t hit-sî Góa beh kā Tāi-pı̍t hoat-siⁿ gī ê Ki, I beh tī tōe-chiūⁿ kiâⁿ kong-pêng kap kong-gī.

(BCL) 當彼日，彼時，我欲給大衛發生義的枝；伊欲佇地上行公平及公義。

16

(THR) Tī hit-jı̍t Iû-tāi beh tit-tio̍h kiù, Iâ-lō͘-sat-léng beh an-jiân khiā-khí; i ê miâ beh chheng-chòe, Iâ-hô-hoa lán ê gī.

(BCL) 佇彼日猶大欲得著救，耶路撒冷欲安然徛起，伊的名欲稱做『耶和華──咱的義』

17

(THR) In-ūi Iâ-hô-hoa án-ni kóng, Tāi-pı̍t beh éng-óan ū lâng chē Í-sek-lia̍t ê pó-chō.

(BCL) 「因為耶和華按呢講：大衛欲永遠有人坐以色列的寶座；

18

(THR) Chè-si, Lī-bī lâng, ia̍h éng-óan ū lâng hiàn sio-chè lé-mı̍h; siông-siông pān-lí hiàn-chè ê sū tī Góa ê bīn-chêng.

(BCL) 祭司、利未人亦永遠有人獻燒祭禮物；常常辦理獻祭的事佇我的面前。」

19

(THR) Iâ-hô-hoa ê ōe lîm-kàu Iâ-lī-bí kóng,

(BCL) 耶和華的話臨到耶利米講：

20

(THR) Iâ-hô-hoa án-ni kóng, Lín nā ōe hòe-bô Góa só͘ lı̍p jı̍t--sî ê iok, mî--sî ê iok, hō͘ jı̍t-mî bô chiàu in ê sî;

(BCL) 「耶和華按呢講：恁若會廢無我所立日時的約，暝時的約，互日暝無照的時，

21

(THR) chiū ōe hòe-bô Góa kap Góa ê lô͘-po̍k Tāi-pı̍t só͘ lı̍p ê iok, hō͘ i bô ū kiáⁿ tī i ê pó-chō chòe ông; ia̍h ōe hòe-bô Góa kap ho̍k-sāi Góa ê chè-si Lī-bī lâng só͘ lı̍p ê iok.

(BCL) 就會廢無我及我的奴僕大衛所立的約，互伊無有子佇伊的寶座做王，亦會廢無我及服事我的祭司、利未人所立的約。

22

(THR) Thiⁿ ê siōng bōe sǹg--tit, hái ê soa bōe niû--tit, Góa beh chiàu án-ni hō͘ Góa ê lô͘-po̍k Tāi-pı̍t ê hō͘-è, kap ho̍k-sāi Góa ê Lī-bī lâng, ke-thiⁿ chōe-chōe.

(BCL) 天的象算得，海的沙量得，我欲照按呢互我的奴僕大衛的後裔及服事我的利未人加添多多。」

23

(THR) Iâ-hô-hoa ê ōe koh lîm-kàu Iâ-lī-bí kóng,

(BCL) 耶和華的話閣臨到耶利米講：

24

(THR) Chiah ê peh-sìⁿ só͘ kóng ê ōe, lí bô thiaⁿ-kìⁿ mah? in kóng, Iâ-hô-hoa só͘ kéng ê nn̄g-cho̍k, I í-keng khì-cho̍at--i, in án-ni khòaⁿ-khin Góa ê peh-sìⁿ, lia̍h-chòe bōe koh chiâⁿ kok tī in ê bīn-chêng.

(BCL) 「諸個百姓所講的話你無聽見嗎？講：『耶和華所揀的二族，伊已經棄絕伊。』按呢看輕我的百姓，掠做閣成國佇的面前。

25

(THR) Iâ-hô-hoa án-ni kóng, Góa só͘ lı̍p jı̍t--sî mî--sî ê iok nā ōe bô--khì, Góa nā bô siat thiⁿ-tōe ê tēng-lē;

(BCL) 耶和華按呢講：我所立日時暝時的約若會無去，我若無設天地的定例，

26

(THR) Góa chiū ōe khì-sak Ngá-kok kap Góa ê lô͘-po̍k Tāi-pı̍t ê hō͘-è tì-kàu bô tùi i ê hō͘-è chhú lâng tī-lí A-pek-la̍h-hán, Í-sat, Ngá-kok ê hō͘-è. In-ūi Góa beh hō͘ in siū-lia̍h ê lâng tò-lâi, ia̍h beh lîn-bín in.

(BCL) 我就會棄拺雅各及我的奴僕大衛的後裔，致到無對伊的後裔取人治理亞伯拉罕、以撒、雅各的後裔；因為我欲互受掠的人倒來，亦欲憐憫。」

Bible Color Mark

• 台語漢字羅馬本
• 巴克禮全羅