耶利米書 第 34 章

1

(THR) Pa-pí-lûn ông Nî-pò͘-kah-nî-sat chhōa i lóng-chóng ê kun-peng, kap i só͘ kóan tōe-chiūⁿ ê bān-kok ta̍k-cho̍k, lâi kong-kek Iâ-lō͘-sat-léng, í-kı̍p hiah-ê sio̍k--i ê siâⁿ; hit-sî Iâ-hô-hoa ê ōe lîm-kàu Iâ-lī-bí kóng,

(BCL) 巴比倫王尼布甲尼撒導伊攏總的軍兵，及伊所管地上的萬國逐族，來攻擊耶路撒冷以及許個屬伊的城。彼時，耶和華的話臨到耶利米，講：

2

(THR) Iâ-hô-hoa Í-sek-lia̍t ê Siōng-tè án-ni kóng, Lí tio̍h khì kā Iû-tāi ông Se-tí-ka kóng, Iâ-hô-hoa án-ni kóng, Khòaⁿ ah, Góa beh chiong chit ê siâⁿ kau tī Pa-pí-lûn ông ê chhiú, i beh ēng hé sio--i.

(BCL) 「耶和華──以色列的上帝按呢講，你著去給猶大王西底家講，耶和華按呢講：看啊，我欲將此個城交佇巴比倫王的手，伊欲用火燒伊。

3

(THR) Lí bōe-ōe thoat-lī i ê chhiú, tek-khak siū lia̍h, kau tī i ê chhiú-thâu, lí ê ba̍k-chiu beh khòaⁿ Pa-pí-lûn ông ê ba̍k-chiu, i beh kap lí chhùi tùi chhùi kóng-ōe, lí ia̍h beh kàu Pa-pí-lûn.

(BCL) 你會脫離伊的手，的確受掠，交佇伊的手頭。你的目睭欲看巴比倫王的目睭，伊欲及你嘴對嘴講話，你亦欲到巴比倫。

4

(THR) Iû-tāi ông Se-tí-ka ah, Lí iáu-kú tio̍h thiaⁿ Iâ-hô-hoa ê ōe. Iâ-hô-hoa lūn-kàu lí án-ni kóng, Lí tek-khak bô hō͘ to-kiàm thâi-sí; lí beh pêng-an kè-sì;

(BCL) 猶大王西底家啊，你猶久著聽耶和華的話。耶和華論到你按呢講：你的確無互刀劍死，你欲平安過世，

5

(THR) lâng beh ūi lí sio phang ê mı̍h, chhin-chhiūⁿ ūi-tio̍h lí ê lia̍t-chó͘, chiū-sī lí í-chêng ê sian-ông só͘ sio--ê chı̍t-iūⁿ. Lâng beh ūi-tio̍h lí ai-siong, kóng, Chhám ah, góa ê chú ah. Iâ-hô-hoa kóng, Chit ê ōe Góa í-keng kóng--i lah.

(BCL) 人欲為你燒芳的物，親像為著你的列祖，就是你以前的先王所燒的一樣。人欲為著你哀傷講：『慘啊！我的主啊。』耶和華講：此個話我已經講伊啦。」

6

(THR) Tùi án-ni, sian-ti Iâ-lī-bí tī Iâ-lō͘-sat-léng chiong che it-chhè ê ōe kā Iû-tāi ông Se-tí-ka kóng.

(BCL) 對按呢，先知耶利米佇耶路撒冷將這一切的話給猶大王西底家講。

7

(THR) Hit-sî Pa-pí-lûn ông ê kun-peng teh kong-kek Iâ-lō͘-sat-léng, koh kong-kek Iû-tāi só͘ chhun ê siâⁿ, chiū-sī La̍h-kiat kap A-se-ka; in-ūi Iû-tāi kian-kò͘ ê siâⁿ, chí ū chhun chiah-ê.

(BCL) 彼時，巴比倫王的軍兵攻擊耶路撒冷，閣攻擊猶大所剩的城，就是拉吉及亞西加。因為猶大堅固的城只有剩諸個。

8

(THR) Iâ-hô-hoa ê ōe koh lîm-kàu Iâ-lī-bí.

(BCL) 耶和華的話閣臨到耶利米。

9

(THR) Sī in-ūi Se-tí-ka ông kap Iâ-lō͘-sat-léng ê chèng peh-sìⁿ lı̍p-iok, kā in soan-pò͘ tháu-pàng; chiū-sī ta̍k-lâng tio̍h tháu-pàng i ê lô͘-po̍k lú-pī, hōan-nā Hi-pek-lâi ê lâm-lú, hō͘ in chū-iû, bô lâng thang koh ēng i ê hiaⁿ-tī Iû-tāi lâng chòe lô͘-po̍k.

(BCL) 是因為西底家王及耶路撒冷的眾百姓立約，給宣佈解放，就是逐人著解放伊的奴僕女婢，凡若希伯來的男女，互自由，無人通閣用伊的兄弟猶大人做奴僕。

10

(THR) Ū hūn chit ê iok ê kùi-cho̍k kap chèng peh-sìⁿ, thiaⁿ-kìⁿ ta̍k-lâng tio̍h tháu-pàng i ê lô͘-po̍k lú-pī, hō͘ i chū-iû, bô koh ēng i chòe chhe-ēng, in chiū chun-thàn lâi tháu-pàng.

(BCL) 有分此個約的貴族及眾百姓，聽見逐人著解放伊的奴僕女婢，互伊自由，無閣用伊做差用。就遵趁來解放；

11

(THR) Āu-lâi chiū thè-hóe, hō͘ in só͘ tháu-pàng chū-iû ê lô͘-po̍k lú-pī tò--lâi, bián-kióng in iû-gôan chòe lô͘-po̍k lú-pī.

(BCL) 後來就退悔，互所解放自由的奴僕女婢倒來，勉強猶原做奴僕女婢。

12

(THR) In-ūi án-ni, Iâ-hô-hoa ê ōe tùi Iâ-hô-hoa lîm-kàu Iâ-lī-bí, kóng,

(BCL) 因為按呢，耶和華的話對耶和華臨到耶利米講：

13

(THR) Iâ-hô-hoa Í-sek-lia̍t ê Siōng-tè án-ni kóng, Góa chhōa lín ê lia̍t-chó͘ tùi Ai-kı̍p tōe chòe lô͘-châi ê ke chhut-lâi ê jı̍t, kap in lı̍p-iok, kóng,

(BCL) 「耶和華──以色列的上帝按呢講：我導恁的列祖對埃及地做奴才的家出來的日，及立約講：

14

(THR) Kàu tē chhit nî, lín tio̍h ta̍k-lâng tháu-pàng i ê hiaⁿ-tī Hi-pek-lâi lâng, bōe hō͘ lí--ê; i í-keng ho̍k-sāi lí la̍k-nî, lí tio̍h tháu-pàng--i, lī-khui lí lâi chū-iû; chóng-sī lín ê lia̍t-chó͘ m̄-thiaⁿ Góa, ia̍h bô àⁿ hī-khang.

(BCL) 『到第七年恁著逐人解放伊的兄弟希伯來人，賣互你者；伊已經服事你六年，你著解放伊離開你來自由。』總是恁的列祖呣聽我，亦無俯耳孔。

15

(THR) Taⁿ lín í-keng kóe-pìⁿ, kiâⁿ Góa só͘ khòaⁿ chòe chèng-tı̍t ê sū; ta̍k-lâng tùi chhù-piⁿ soan-pò͘ tháu-pàng, koh tī ēng Góa ê miâ lâi chheng ê chhù, tī Góa ê bīn-chêng lı̍p-iok.

(BCL) 今恁已經改變，行我所看做正直的事，逐人對厝邊宣佈解放，閣佇用我的名來稱的厝，佇我的面前立約。

16

(THR) Chóng-sī lín iū-koh thè-hóe, siat-to̍k Góa ê miâ, ta̍k-lâng hō͘ só͘ tháu-pàng tit-tio̍h chū-iû ê lô͘-po̍k lú-pī tò-tńg, bián-kióng in iû-gôan chòe lín ê lô͘-po̍k lú-pī.

(BCL) 總是恁又閣退悔，褻瀆我的名，逐人互所解放得著自由的奴僕女婢倒轉，勉強猶原做恁的奴僕女婢。

17

(THR) Só͘-í Iâ-hô-hoa án-ni kóng, Lín bô thiaⁿ-thàn Góa, ta̍k-lâng tùi i ê hiaⁿ-tī, tùi i ê chhù-piⁿ soan-thôan tháu-pàng, khòaⁿ ah, Góa tùi lín soan-thôan tháu-pàng hō͘ to-kiàm, un-e̍k, ki-hng, koh hō͘ lín liû-lo̍h tī thiⁿ-ē bān-kok tiong; che sī Iâ-hô-hoa kóng-ê.

(BCL) 所以耶和華按呢講：恁無聽趁我，逐人對伊的兄弟對伊的厝邊宣傳解放。看啊！我對恁宣傳解放互刀劍、瘟疫、飢荒，閣互恁流落佇天下萬國中。這是耶和華講的。

18

(THR) Kìⁿ-nā pōe Góa ê iok, bô thàn hit ê iok ê ōe, chiū-sī phòa-khui gû-á lâi keng-kè hit tiong-kan ê sî, tī Góa ê bīn-chêng só͘ lı̍p--ê;

(BCL) 見若背我的約，無趁彼個約的話，就是破開牛仔來經過彼中間的時，佇我的面前所立者，

19

(THR) chiū-sī Iû-tāi ê kùi-cho̍k, Iâ-lō͘-sat-léng ê kùi-cho̍k, í-kı̍p thài-kàm, chè-si, kéng-lāi chèng peh-sìⁿ, kìⁿ-nā tùi phòa-khui ê gû-á ê tiong-kan keng-kè--ê;

(BCL) 就是猶大的貴族，耶路撒冷的貴族，以及太監、祭司，境內眾百姓，見若對破開的牛仔的中間經過者。

20

(THR) Góa beh chiong in kau tī in ê tùi-te̍k ê chhiú, kap siàu-siūⁿ in ê sìⁿ-miā ê lâng ê chhiú; in ê sin-si beh hō͘ khong-tiong ê pe-chiáu kap tōe-chiūⁿ ê iá-siù chòe chia̍h-mı̍h.

(BCL) 我欲將交佇的對敵的手及數想的生命的人的手；的身屍欲互空中的飛鳥及地上的野獸做食物。

21

(THR) Koh Góa beh chiong Iû-tāi ông Se-tí-ka kap i ê kùi-cho̍k kau tī in ê tùi-te̍k ê chhiú, kap siàu-siūⁿ i ê sìⁿ-miā ê lâng ê chhiú; ia̍h kau tī Pa-pí-lûn ông kun-peng ê chhiú, chiū-sī lī-khui lín khì--ê.

(BCL) 閣我欲將猶大王西底家及伊的貴族交佇的對敵的手及數想伊的生命的人的手，亦交佇巴比倫王軍兵的手就是離開恁去者。

22

(THR) Iâ-hô-hoa kóng, Góa beh bēng-lēng in, hō͘ in koh lâi chit ê siâⁿ; in beh kong-kek--i, chhú--i, ēng hé sio--i; Góa ia̍h beh hō͘ Iû-tāi chiah ê siâⁿ pha-hng, bô lâng khiā-khí.

(BCL) 耶和華講：我欲命令互閣來此個城，欲攻擊伊，取伊，用火燒伊。我亦欲互猶大諸個城拋荒，無人徛起。」

Bible Color Mark

• 台語漢字羅馬本
• 巴克禮全羅