耶利米書 第 35 章

1

(THR) Tng Iû-tāi ông Iok-se-a ê kiáⁿ Iok-ngá-kèng chē-ūi ê sî, Iâ-hô-hoa ê ōe lîm-kàu Iâ-lī-bí kóng,

(BCL) 當猶大王約西亞的子約雅敬坐位的時，耶和華的話臨到耶利米講：

2

(THR) Lí tio̍h khì Lī-kah cho̍k ê chhù, kap in kóng-ōe; chhōa in kàu Iâ-hô-hoa ê chhù, jı̍p chı̍t keng pâng, ēng chiú hō͘ in lim.

(BCL) 「你著去利甲族的厝，及講話，導到耶和華的厝入一間房，用酒互飲。」

3

(THR) Góa chiū chiong Hap-pa-sé-nî-ngá ê sun, Ngá-lī-bí-ngá ê kiáⁿ, Ngá-sat-nî-a, kap i ê hiaⁿ-tī, kap i ê chèng-kiáⁿ, í-kı̍p Lī-kah chôan-cho̍k ê lâng,

(BCL) 我就將哈巴洗尼雅的孫雅利米雅的子雅撒尼亞及伊的兄弟，及伊的眾子，以及利甲全族的人，

4

(THR) chhōa in kàu Iâ-hô-hoa ê chhù, jı̍p Siōng-tè ê lô͘-po̍k I-ki-tāi-lī ê kiáⁿ Hap-lân chèng-kiáⁿ ê pâng; hit keng pâng tī kùi-cho̍k ê pâng ê keh-piah, kùi-cho̍k ê pâng chiū-sī tī Sa-liông ê kiáⁿ pé-mn̂g--ê Má-se-ngá ê pâng ê téng-bīn.

(BCL) 導到耶和華的厝，入上帝的奴僕伊基大利的子哈難眾子的房。彼間房佇貴族的房的隔壁，貴族的房就是佇沙龍的子把門的瑪西雅的房的頂面。

5

(THR) Góa chiū ēng óaⁿ ēng poe tóe chiú móa-móa, pâi tī Lī-kah cho̍k lâng ê bīn-chêng; kā in kóng, Chhiáⁿ lín lim chiú.

(BCL) 我就用碗用杯貯酒滿滿排佇利甲族人的面前，給講：「請恁飲酒。」

6

(THR) In chiū kóng, Góan m̄-lim chiú, in-ūi góan ê sian-chó͘, Lī-kah ê kiáⁿ Iok-ná-ta̍t, bat hoan-hù góan kóng, Lín kap lín ê kiáⁿ-sun éng-éng m̄-thang lim chiú.

(BCL) 就講：「阮呣飲酒；因為阮的先祖利甲的子約拿達曾吩咐阮講：『恁及恁的子孫永永呣通飲酒，

7

(THR) Ia̍h m̄-thang khí chhù, m̄-thang iā-chéng, m̄-thang chai-chèng phû-tô-hn̂g, m̄-thang ū chiah-ê; chı̍t-sì-lâng tio̍h tòa tī pò͘-pîⁿ, hō͘ lín tn̂g hè-siū tī lín kià-kha ê tōe-hng.

(BCL) 亦呣通起厝、呣通撒種、呣通栽種葡萄園，呣通有諸個，一世人著住佇布棚，互恁長歲壽佇恁寄腳的地方。』

8

(THR) Kìⁿ-nā góan sian-chó͘ Lī-kah ê kiáⁿ Iok-ná-ta̍t hoan-hù góan ê ōe, góan lóng thiaⁿ-thàn; góan kap góan ê bó͘, góan ê kiáⁿ, góan ê cha-bó͘-kiáⁿ, chı̍t-sì-lâng lóng bô lim-chiú.

(BCL) 見若阮先祖利甲的子約拿達吩咐阮的話，阮攏聽趁。阮及阮的某，阮的子，阮的查某子，一世人攏無飲酒，

9

(THR) Ia̍h bô khí-chhù lâi ka-kī khiā-khí, ia̍h bô ū phû-tô-hn̂g, bô ū chhân-hn̂g, bô ū chéng-chí.

(BCL) 亦無起厝來家己徛起，亦無有葡萄園，無有田園，無有種子。

10

(THR) to̍k-to̍k khiā-khí pò͘-pîⁿ, lóng chun-thàn góan ê sian-chó͘, Iok-ná-ta̍t só͘ bēng-lēng--ê lâi kiâⁿ.

(BCL) 獨獨徛起布棚，攏遵趁阮的先祖約拿達，所命令的來行。

11

(THR) To̍k-to̍k Pa-pí-lûn ông Nî-pò͘-kah-nî-sat chiūⁿ-lâi chit ê tōe ê sî, góan chiū kóng, Lâi ah, lán tio̍h chiūⁿ Iâ-lō͘-sat-léng, lâi siám-pī Ka-le̍k-tí lâng ê peng, kap A-lân ê peng; in-ūi án-ni, góan chiah khiā-khí Iâ-lō͘-sat-léng.

(BCL) 獨獨巴比倫王尼布甲尼撒上來此個地的時，阮就講：『來啊，咱著上耶路撒冷。』來閃避迦勒底人的兵及亞蘭的兵，因為按呢，阮才徛起耶路撒冷。」

12

(THR) Iâ-hô-hoa ê ōe lîm-kàu Iâ-lī-bí kóng,

(BCL) 耶和華的話臨到耶利米講：

13

(THR) Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Lí tio̍h khì kā Iû-tāi lâng kap Iâ-lō͘-sat-léng khiā-khí ê peh-sìⁿ kóng, Iâ-hô-hoa kóng, Lín m̄-siū kà-sī, m̄ thiaⁿ-thàn Góa ê ōe mah?

(BCL) 「萬軍的耶和華──以色列的上帝按呢講：你著去給猶大人及耶路撒冷徛起的百姓講，耶和華講：恁呣受教示，呣聽趁我的話嗎？

14

(THR) Lī-kah ê kiáⁿ Iok-ná-ta̍t só͘ hoan-hù i ê kiáⁿ-sun m̄-thang lim chiú ê ōe, in lóng chun-siú, kàu kin-á-jı̍t ia̍h bô lim; in-ūi in thiaⁿ-thàn sian-chó͘ ê bēng-lēng; chóng-sī Góa ū tùi lín kóng, chá-chá khí-lâi kóng; nā-sī lín m̄-thiaⁿ Góa.

(BCL) 利甲的子約拿達所吩咐伊的子孫呣通飲酒的話，攏遵守，到今仔日亦無飲，因為聽趁先祖的命令。總是我有對恁講，早早起來講，若是恁呣聽我。

15

(THR) Góa ia̍h chhe Góa ê chèng lô͘-po̍k chiah ê sian-ti chiū-kūn lín, chá-chá khí-lâi chhe in, kóng, Lín tio̍h o̍at-thâu, ta̍k-lâng lī-khui i ê pháiⁿ-lō͘, kóe-ōaⁿ lín ê só͘-chòe; bô thàn pa̍t-hō ê siōng-tè lâi ho̍k-sāi in, lín chiū thang khiā-khí Góa só͘ siúⁿ-sù lín kap lín lia̍t-chó͘ ê tōe; chóng-sī lín m̄ àⁿ hī-khang, ia̍h m̄-thiaⁿ Góa.

(BCL) 我亦差我的眾奴僕諸個先知就近恁，早早起來差，講：『恁著越頭，逐人離開伊的歹路，改換恁的所做，無趁別號的上帝來服事，恁就通徛起我所賞賜恁及恁列祖的地。』總是恁呣俯耳孔，亦呣聽我。

16

(THR) In-ūi Lī-kah ê kiáⁿ Iok-ná-ta̍t ê kiáⁿ-sun ū chun-siú in ê sian-chó͘ só͘ hoan-hù in ê bēng-lēng, to̍k-to̍k chit ê peh-sìⁿ bô ū thiaⁿ-thàn Góa;

(BCL) 因為利甲的子約拿達的子孫有遵守的先祖所吩咐的命令，獨獨此個百姓無有聽趁我！

17

(THR) só͘-í Iâ-hô-hoa, bān-kun ê Siōng-tè, Í-sek-lia̍t ê Siōng-tè án-ni kóng, Khòaⁿ ah, Góa beh hō͘ Góa só͘ kóng kong-kek in it-chhè ê chai-ē lîm-kàu Iû-tāi lâng kap Iâ-lō͘-sat-léng it-chhè khiā-khí ê peh-sìⁿ; in-ūi Góa tùi in kóng, in bô ū thiaⁿ-thàn; Góa kiò--in, in bô ìn.

(BCL) 所以，耶和華──萬軍的上帝、以色列的上帝按呢講：看啊，我欲互我所講攻擊一切的災禍臨到猶大人及耶路撒冷一切徛起的百姓。因為我對講，無有聽趁；我叫，無應。」

18

(THR) Iâ-lī-bí tùi Lī-kah cho̍k ê lâng kóng, Bān-kun ê Iâ-hô-hoa, Í-sek-lia̍t ê Siōng-tè, án-ni kóng, In-ūi lín thiaⁿ-thàn lín ê sian-chó͘ Iok-ná-ta̍t ê bēng-lēng, siú i it-chhè ê kài-bēng, kiâⁿ i lóng-chóng só͘ bēng-lēng lín--ê;

(BCL) 耶利米對利甲族的人講：「萬軍的耶和華──以色列的上帝，按呢講：因為恁聽趁恁的先祖約拿達的命令，守伊一切的誡命，行伊攏總所命令恁的，

19

(THR) só͘-í bān-kun ê Iâ-hô-hoa, Í-sek-lia̍t ê Siōng-tè, án-ni kóng, Lī-kah ê kiáⁿ Iok-ná-ta̍t tek-khak éng-óan ū lâng khiā tī Góa ê bīn-chêng.

(BCL) 所以萬軍的耶和華──以色列的上帝按呢講：利甲的子約拿達的確永遠有人徛佇我的面前。」

Bible Color Mark

• 台語漢字羅馬本
• 巴克禮全羅