耶利米書 第 40 章

1

(THR) Iâ-lō͘-sat-léng lâng, kap Iû-tāi lâng, siū-lia̍h khì Pa-pí-lûn; kî-tiong Iâ-lī-bí ia̍h hō͘ Sī-ōe-tiúⁿ lia̍h--khì, ēng thih-liān pa̍k--i; āu-lâi tùi La̍h-má pàng i khì; jiân-āu Iâ-hô-hoa ê ōe lîm-kàu Iâ-lī-bí.

(BCL) 耶路撒冷人及猶大人受掠去巴比倫，其中耶利米亦互侍衛長掠去，用鐵鍊縛伊，後來對拉瑪放伊去，然後耶和華的話臨到耶利米。

2

(THR) Sī-ōe-tiúⁿ kiò Iâ-lī-bí lâi, kā i kóng, Iâ-hô-hoa lí ê Siōng-tè bat kóng, beh kàng chit ê chai-ē hō͘ chit ê só͘-chāi.

(BCL) 侍衛長叫耶利米來，給伊講：「耶和華──你的上帝曾講欲降此個災禍互此個所在。

3

(THR) Taⁿ Iâ-hô-hoa hō͘ i kàu, chiàu I só͘ kóng--ê lâi kiâⁿ. In-ūi lín tek-chōe Iâ-hô-hoa, bô thiaⁿ-thàn I ê ōe, só͘-í chit ê tāi-chì kàu tī lín.

(BCL) 今耶和華互伊到，照伊所講的來行；因為恁得罪耶和華，無聽趁伊的話，所以此個代誌到佇恁。

4

(THR) Khòaⁿ ah, góa kin-á-jı̍t tháu-khui lí chhiú--nih ê thih-liān; lí nā khòaⁿ kap góa khì Pa-pí-lûn sī hó, chiū thang lâi khì, góa beh hó khóan-thāi lí; lí nā khòaⁿ kap góa khì Pa-pí-lûn m̄-hó, chiū bo̍h-ēng khì. Khòaⁿ ah, chôan-tōe tī lí ê bīn-chêng, lí khòaⁿ toh-lo̍h sī hó, sī ha̍p-gî, chòe lí thang khì.

(BCL) 看啊，我今仔日解開你手裡的鐵鍊，你若看及我去巴比倫是好，就通來去，我欲好款待你；你若看及我去巴比倫呣好，就莫用去。看啊，全地佇你的面前，你看叨落是好，是合宜，做你通去！」

5

(THR) I iáu-bē tò-khì, Sī-ōe-tiúⁿ koh kā i kóng, Lí thang tò--khì Sa-hoan ê sun, A-hi-kam ê kiáⁿ, Ki-tāi-lī hia; hiān-kim Pa-pí-lûn ông siat-lı̍p i kóan-hat Iû-tāi chiah ê siâⁿ; lí thang kap i khiā-khí tī peh-sìⁿ-tiong, á-sī lí só͘ khòaⁿ-chòe ha̍p-gî ê só͘-chāi, chiū thang khì. Tùi án-ni, Sī-ōe-tiúⁿ sàng i bí-niû kap lé-mı̍h, hō͘ i khì.

(BCL) 伊猶未倒去，侍衛長閣給伊講：「你通倒去沙番的孫亞希甘的子基大利遐；現今巴比倫王設立伊管轄猶大諸個城。你通及伊徛起佇百姓中，抑是，你所看做合宜的所在就通去。」對按呢侍衛長送伊米糧及禮物，互伊去。

6

(THR) Iâ-lī-bí chiū kàu Bí-su-pa, kìⁿ A-hi-kam ê kiáⁿ Ki-tāi-lī; kap i khiā-khí tī kéng-lāi chhun ê peh-sìⁿ ê tiong-kan.

(BCL) 耶利米就到米斯巴見亞希甘的子基大利，及伊徛起佇境內剩的百姓的中間。

7

(THR) Tī chhân-iá it-chhè ê kun-tiúⁿ, kap sio̍k in ê lâng, thiaⁿ-kìⁿ Pa-pí-lûn ông siat-lı̍p A-hi-kam ê kiáⁿ Ki-tāi-lī kóan-hat chit só͘-chāi; ia̍h chiong bô lia̍h-khì Pa-pí-lûn ê ta-po͘-lâng, hū-jîn-lâng, gín-á, kap kéng-lāi ke̍k sòng-hiong ê lâng, lóng-chóng kau i;

(BCL) 佇田野一切的軍長及屬的人聽見巴比倫王設立亞希甘的子基大利管轄此所在，亦將無掠去巴比倫的查甫人、婦仁人、囝仔，及境內極喪鄉的人攏總交伊。

8

(THR) in chiū lâi Bí-su-pa Ki-tāi-lī hia; chiū-sī Nî-thàm-ngá ê kiáⁿ Í-sı̍t-má-lī, Ka-lī-a nn̄g ê kiáⁿ Iok-hap-lân kap Iok-ná-tan, Tan-hō͘-bia̍t ê kiáⁿ Se-lâi-ngá, kap Nî-tô-hoat lâng Í-húi ê chèng-kiáⁿ, Má-ka lâng ê kiáⁿ Iâ-sat-nî-a, kap sio̍k in ê lâng.

(BCL) 就來米斯巴基大利遐，就是尼探雅的子以實瑪利、加利亞二個子約哈難及約拿單、單戶篾的子西萊雅及尼陀法人以裴的眾子，瑪迦人的子耶撒尼亞及屬的人。

9

(THR) Sa-hoan ê sun, A-hi-kam ê kiáⁿ, Ki-tāi-lī tùi in kap sio̍k in ê lâng chiù-chōa, kóng, Bo̍h-tit kiaⁿ ho̍k-sāi Ka-le̍k-tí lâng; chòe lín khiā-khí chia, ho̍k-sāi Pa-pí-lûn ông, lín chiū ōe tit-tio̍h hok-khì.

(BCL) 沙番的孫亞希甘的子基大利對及屬的人咒誓講：「莫得驚服事迦勒底人，做恁徛起遮，服事巴比倫王，恁就會得著福氣。

10

(THR) Lūn-kàu góa, góa beh tiàm tī Bí-su-pa, su-hāu hiah ê ōe lâi lán chia ê Ka-le̍k-tí lâng; nā-sī lín chiah-ê, lín tio̍h chek-chū chiú, hē-thiⁿ ê ké-chí, kap iû, siu tī khì-kū lāi, khiā-khí tī lín só͘ chiàm ê siâⁿ.

(BCL) 論到我，我欲踮佇米斯巴伺候許個會來咱遮的迦勒底人；若是恁諸個恁著積聚酒，夏天的果子，及油，收佇器具內，徛起佇恁所佔的城。」

11

(THR) Koh ū tī Mô͘-ap, kap A-bûn cho̍k ê tiong-kan, tī Í-tong, kap lia̍t-kok tiong-kan it-chhè ê Iû-tāi lâng, thiaⁿ-kìⁿ Pa-pí-lûn ông ū lâu só͘ chhun ê Iû-tāi lâng, koh siat-lı̍p Sa-hoan ê sun, A-hi-kam ê kiáⁿ, Ki-tāi-lī kóan-hat in;

(BCL) 閣有佇摩押及亞捫族的中間，佇以東及列國中間一切的猶大人，聽見巴比倫王有留所剩的猶大人，閣設立沙番的孫亞希甘的子基大利管轄。

12

(THR) chiah ê it-chhè ê Iû-tāi lâng tùi in hō͘ lâng kóaⁿ-khì ê ta̍k só͘-chāi tò--lâi, kàu Iû-tāi tōe ê Bí-su-pa, Ki-tāi-lī hia, sòa chek-chū chōe-chōe chiú kap hē-thiⁿ ê ké-chí.

(BCL) 諸個一切的猶大人對互人趕去的逐所在倒來，到猶大地的米斯巴基大利遐，續積聚多多酒，及夏天的果子。

13

(THR) Ka-lī-a ê kiáⁿ, Iok-hap-lân, kap tī chhân-iá it-chhè ê kun-tiúⁿ lâi Bí-su-pa kìⁿ Ki-tāi-lī, tùi i kóng,

(BCL) 加利亞的子約哈難及佇田野一切的軍長來米斯巴見基大利，對伊講：

14

(THR) A-bûn-cho̍k ê ông, Pa-lī-su, ū chhe Nî-thàm-ngá ê kiáⁿ Í-sı̍t-má-lī lâi beh chhú lí ê sìⁿ-miā, lí chai mah? chóng-sī A-hi-kam ê kiáⁿ Ki-tāi-lī m̄-sìn in.

(BCL) 「亞捫族的王巴利斯有差尼探雅的子以實瑪利來欲取你的生命，你知嗎？」總是亞希甘的子基大利呣信。

15

(THR) Ka-lī-a ê kiáⁿ, Iok-hap-lân tī Bí-su-pa àm-chīⁿ tùi Ki-tāi-lí kóng, Kiû lí chún góa khì, góa beh thâi Nî-thàm-ngá ê kiáⁿ Í-sı̍t-má-lī, tek-khak bô lâng chai; kiám thang hō͘ i chhú lí ê sìⁿ-miā, tì-kàu kui-óa lí ê Iû-tāi lâng sì-sòaⁿ, hō͘ Iû-tāi só͘-chhun ê lâng lóng bia̍t-bô ah?

(BCL) 加利亞的子約哈難佇米斯巴暗靜對基大利講：「求你准我去，我欲尼探雅的子以實瑪利，的確無人知。豈通互伊取你的生命，致到歸倚你的猶大人四散，互猶大所剩的人攏滅無啊？」

16

(THR) A-hi-kam ê kiáⁿ Ki-tāi-lī kā Ka-lí-a ê kiáⁿ Iok-hap-lân kóng, Lí m̄-thang chòe chit ê sū; lí só͘ kóng Í-sı̍t-má-lī ê sū sī bô-iáⁿ.

(BCL) 亞希甘的子基大利給加利亞的子約哈難講：「你呣通做此個事，你所講以實瑪利的事是無影。」

Bible Color Mark

• 台語漢字羅馬本
• 巴克禮全羅