約翰福音 第 20 章

1

(THR) Chhit jı̍t ê thâu chı̍t jı̍t, chheng chá, thiⁿ iáu-bē kng, Bo̍at-tāi-lia̍p ê Má-lī-a kàu bōng, khòaⁿ-kìⁿ chio̍h í-keng tùi bōng sóa khui.

(BCL) 七日的頭一日清早，天猶未光，抹大拉的馬利亞到墓，看見石已經對墓徙開，

2

(THR) . Chiū cháu-khì chiū-kūn Se-bûn Pí-tek, kap pa̍t ê ha̍k-seng, chiū-sī Iâ-so͘ só͘ thiàⁿ hit ê, kā in kóng, Ū lâng chiong Chú î chhut bōng, góan m̄ chai hē tī tá-lo̍h.

(BCL) 就走去就近西門彼得及別個學生，就是耶穌所疼彼個，給講：「有人將主移出墓，阮呣知下佇叨落。」

3

(THR) . Só͘-í Pí-tek kap hit ê pa̍t ê ha̍k-seng chhut-khì kàu bōng.

(BCL) 所以彼得及彼個別個學生出去，到墓。

4

(THR) . Nn̄g lâng pîⁿ-pîⁿ cháu; hit ê pa̍t ê ha̍k-seng cháu chòe thâu, pí Pí-tek khah kín, tāi-seng kàu bōng;

(BCL) 二人平平走，彼個別個學生走做頭比彼得卡緊，代先到墓，

5

(THR) . àⁿ-lo̍h khòaⁿ bōng lāi, khòaⁿ-kìⁿ iù-tōe pò͘ hē-teh; to̍k-to̍k bô jı̍p-khì.

(BCL) 俯落看墓內，看見幼苧布下，獨獨無入去。

6

(THR) . Se-bûn Pí-tek tè-āu kàu, jı̍p bōng; khòaⁿ-kìⁿ iù-tōe pò͘ hē-teh,

(BCL) 西門彼得隨後到，入墓，看見幼苧布下，

7

(THR) . koh khòaⁿ-kìⁿ pau thâu-khak ê kun, bô kap iù-tōe pò͘ chòe chı̍t ūi, sī lēng-gōa tī chı̍t só͘-chāi kńg teh.

(BCL) 閣看見包頭殼的巾無及幼苧布做一位，是另外佇一所在捲。

8

(THR) . Hit sî hit ê tāi-seng kàu bōng ê ha̍k-seng ia̍h jı̍p-khì, khòaⁿ-kìⁿ chiū sìn.

(BCL) 彼時彼個代先到墓的學生亦入去，看見就信。（

9

(THR) . In-ūi in iáu-bē bêng-pe̍k sèng-keng ê ōe, kóng I tek-khak tio̍h tùi sí-lâng tiong koh-o̍ah.

(BCL) 因為猶未明白聖經的話，講伊的確著對死人中復活。）

10

(THR) . Tùi án-ni nn̄g ê ha̍k-seng tò-khì ka-kī ê ke.

(BCL) 對按呢二個學生倒去家己的家。

11

(THR) . To̍k-to̍k Má-lī-a khiā tī bōng gōa teh thî-khàu; khàu ê sî, àⁿ-lo̍h khòaⁿ bōng lāi;

(BCL) 獨獨馬利亞徛佇墓外啼哭。哭的時，俯落看墓內，

12

(THR) . khòaⁿ-kìⁿ nn̄g ê thiⁿ-sài chhēng pe̍h saⁿ, chē tī Iâ-so͘ ê sin-si só͘ bat an-tì ê só͘-chāi, chı̍t-ê tī thâu, chı̍t-ê tī kha.

(BCL) 看見二個天使，穿白衫，坐佇耶穌的身屍所曾安置的所在，一個佇頭，一個佇腳。

13

(THR) . In chiū kā i kóng, Hū-jîn-lâng ah, Siáⁿ-sū khàu? ìn i kóng, In-ūi lâng chiong góa ê Chú î khì, góa m̄ chai hē I tī sím-mı̍h só͘-chāi.

(BCL) 就給伊講：「婦仁人啊，啥事哭？」應伊講：「因為人將我的主移去，我呣知下伊佇甚麼所在。」

14

(THR) . Í-keng kóng chiah ê ōe, chiū hoan-sin ǹg āu-bīn, khòaⁿ-kìⁿ Iâ-so͘ teh khiā, iā m̄ chai I sī Iâ-so͘.

(BCL) 已經講諸個話，就翻身向後面，看見耶穌徛，也呣知伊是耶穌。

15

(THR) . Iâ-so͘ kā i kóng, Hū-jîn-lâng ah, siáⁿ-sū thî-khàu? lí chhē chī-chūi? Má-lī-a phah-sǹg I sī kò͘ hn̂g ê, chiū kā I kóng, Thâu-ke ah, lí nā ū kng I khì, chhiáⁿ kā góa kóng hē I tī sím-mı̍h só͘-chāi, góa chiū khì siu I.

(BCL) 耶穌給伊講：「婦仁人啊，啥事啼哭？你尋是誰？」馬利亞拍算伊是顧園的，就給伊講：「頭家啊，你若有扛伊去，請給我講，下伊佇甚麼所在，我就去收伊。」

16

(THR) . Iâ-so͘ kā i kóng, Má-lī-a ah. I chiū o̍at-tńg-sin, ēng Hi-pek-lâi ê ōe kā I kóng, Lia̍p-pho-nî; ì-sù chiū-sī, Sian-siⁿ.

(BCL) 耶穌給伊講：「馬利亞啊！」伊就越轉身，用希伯來的話給伊講：「拉波尼！」（意思就是先生。）

17

(THR) . Iâ-so͘ kā i kóng, Bo̍h-tit bong góa; in-ūi góa iáu-bē chiūⁿ-khì kìⁿ Pē; lí tio̍h khì chhē góa ê hiaⁿ-tī kā in kóng, Góa chiūⁿ-khì kìⁿ góa ê Pē, ia̍h sī lín ê Pē; kìⁿ góa ê Siōng-tè, ia̍h sī lín ê Siōng-tè.

(BCL) 耶穌給伊講：「莫得摸我，因為我猶未上去見父。你著去尋我的兄弟，給講，我上去見我的父，亦是恁的父，見我的上帝，亦是恁的上帝。」

18

(THR) . Bo̍at-tāi-lia̍p ê Má-lī-a chiū khì kā ha̍k-seng kóng, Góa í-keng khòaⁿ-kìⁿ Chú; koh kóng, Chú ēng chiah ê ōe kā i kóng.

(BCL) 抹大拉的馬利亞就去給學生講：「我已經看見主。」閣講主用諸個話給伊講。

19

(THR) . Hit jı̍t chiū-sī chhit jı̍t ê thâu chı̍t jı̍t, í-keng àm, ha̍k-seng in-ūi kiaⁿ Iû-thài lâng, chiū tī in só͘ tòa ê só͘-chāi koaiⁿ mn̂g; Iâ-so͘ kàu, khiā tī tiong-kan, kā in kóng, Gōan lín pêng-an.

(BCL) 彼日（就是七日的頭一日）已經暗，學生因為驚猶太人，就佇所住的所在關門。耶穌到，徛佇中間，給講：「願恁平安！」

20

(THR) . Í-keng kóng chit ê ōe, chiū ēng chhiú kap hia̍p-ē hō͘ in khòaⁿ. Ha̍k-seng khòaⁿ-kìⁿ Chú, chiū hoaⁿ-hí.

(BCL) 已經講此個話，就用手及脅下互看。學生看見主，就歡喜。

21

(THR) . Iâ-so͘ koh kā in kóng, Gōan lín pêng-an; góa chhe lín, chhin-chhiūⁿ Pē ū chhe góa.

(BCL) 耶穌閣給講：「願恁平安！我差恁，親像父有差我。」

22

(THR) . Í-keng kóng chit ê ōe, chiū tùi in pûn khùi kóng, Lín siū Sèng Sîn;

(BCL) 已經講此個話，就對歕氣，講：「恁受聖神！

23

(THR) . lín sià sím-mı̍h lâng ê chōe, chiū sià-khì; lâu sím-mı̍h lâng ê chōe, chiū lâu-teh.

(BCL) 恁赦甚麼人的罪，就赦去，留甚麼人的罪，就留。」

24

(THR) . Ū To-má chheng chòe Té-thó͘-má ê, sī cha̍p-jī ha̍k-seng ê chı̍t-ê, Iâ-so͘ kàu ê sî, i bô saⁿ-kap tī-teh.

(BCL) 有多馬稱做低土馬的，是十二學生的一個；耶穌到的時，伊無相及佇。

25

(THR) . Kî-û ê ha̍k-seng chiū kā i kóng, Góan chiah-ê í-keng khòaⁿ-kìⁿ Chú lah. Nā-sī To-má kā in kóng, Góa nā bô khòaⁿ-kìⁿ I chhiú-tiong teng ê jiah, bô ēng góa ê chńg-thâu-á thàm I teng ê jiah, bô ēng góa ê chhiú thàm I ê hia̍p-ē, góa koat-tòan m̄ sìn.

(BCL) 其餘的學生就給伊講：「阮諸個已經看見主啦。」若是多馬給講：「我若無看見伊手中釘的跡，無用我的指頭仔探伊釘的跡，無用我的手探伊的脅下，我決斷呣信。」

26

(THR) . Kè poeh jı̍t, I ê ha̍k-seng koh-chài tī chhù-lāi, To-má ia̍h tī-teh. Mn̂g í-keng koaiⁿ, Iâ-so͘ kàu, khiā tī tiong-ng, kóng, Gōan lín pêng-an.

(BCL) 過八日，伊的學生閣再佇厝內，多馬亦佇，門已經關。耶穌到，徛佇中央講：「願恁平安！」

27

(THR) . Chiū kā To-má kóng, Chhun lí ê chńg-thâu-á lâi khòaⁿ góa ê chhiú; chhun lí ê chhiú thàm góa ê hia̍p-ē; bo̍h-tit chòe m̄ sìn ê, tio̍h chòe sìn ê.

(BCL) 就給多馬講：「伸你的指頭仔來，看我的手；伸你的手，探我的脅下。莫得做呣信的，著做信的！」

28

(THR) . To-má ìn kóng, Góa ê Chú ah, góa ê Siōng-tè ah.

(BCL) 多馬應講：「我的主啊！我的上帝啊！」

29

(THR) . Iâ-so͘ kā i kóng, Lí in-ūi khòaⁿ-kìⁿ góa chiah sìn; hiah ê bô khòaⁿ-kìⁿ lâi sìn ê lâng, ū hok-khì.

(BCL) 耶穌給伊講：「你因為看見我才信；許個無看見來信的人，有福氣。」

30

(THR) . Iâ-so͘ tī ha̍k-seng ê bīn-chêng, koh ū kiâⁿ chōe-chōe sîn-jiah, bô kì tī chit pún chheh ê;

(BCL) 耶穌佇學生的面前閣有行多多神蹟，無記佇此本冊的。

31

(THR) . to̍k-to̍k kì chiah-ê, hō͘ lín sìn Iâ-so͘ sī Ki-tok, sī Siōng-tè ê Kiáⁿ; sìn, chiū tī I ê miâ tit-tio̍h o̍ah.

(BCL) 獨獨記諸個互恁信耶穌是基督，是上帝的子，信就佇伊的名得著活。

Bible Color Mark

• 台語漢字羅馬本
• 巴克禮全羅