約翰福音 第 9 章

1

(THR) Iâ-so͘ kiâⁿ kè ê sî, khòaⁿ-kìⁿ chı̍t lâng chhut-sì chiū chhiⁿ-mî.

(BCL) 耶穌行過的時，看見一人出世就睛暝。

2

(THR) . I ê ha̍k-seng mn̄g I kóng, Lia̍p-pí, chit lâng chhut-sì chiū chhiⁿ-mî, tùi chī-chūi hōan-chōe, sī i pún-sin, á-sī i ê pē-bú ah?

(BCL) 伊的學生問伊講：「拉比，此人出世就睛暝，對是誰犯罪？是伊本身？抑是伊的父母啊？」

3

(THR) . Iâ-so͘ ìn kóng, Chit lâng bô hōan-chōe, i ê pē-bú ia̍h bô; to̍k-to̍k beh ēng i lâi hián-bêng Siōng-tè ê só͘ chòe.

(BCL) 耶穌應講：「此人無犯罪，伊的父母亦無，獨獨欲用伊來顯明上帝的所做。

4

(THR) . Sî iáu sī jı̍t-sî, lán tio̍h chòe chhe góa ê ê kang; mî-sî beh kàu, hit tia̍p chiū bô lâng ōe chòe kang.

(BCL) 時猶是日時，咱著做差我者的工；暝時欲到，彼霎就無人會做工。

5

(THR) . Góa tī sè-kan ê sî, sī sè-kan ê kng.

(BCL) 我佇世間的時，是世間的光。」

6

(THR) . Chiah ê ōe kóng-liáu, chiū phùi nōa tī thô͘-kha, ēng nōa kiáu thô͘, ēng thô͘ kô͘ chhiⁿ-mî lâng ê ba̍k-chiu, kā i kóng, Khì sóe tī Se-lô-a ê tî. (Se-lô-a, hoan-e̍k chiū-sī Hōng-chhe).

(BCL) 諸個話講了，就呸涎佇土腳，用涎攪土，用土糊睛暝人的目睭，

7

(THR) . I chiū khì sóe, tò-tńg-lâi í-keng ōe khòaⁿ-kìⁿ.

(BCL) 給伊講：「去洗佇西羅亞的池（西羅亞翻譯就是奉差）。」伊就去洗，倒轉來已經會看見。

8

(THR) . I ê chhù-piⁿ kap pêng-sò͘ khòaⁿ-kìⁿ i chòe khit-chia̍h ê, kóng, chit lâng kiám m̄ sī chē-teh lâi kiû-khit ê mah?

(BCL) 伊的厝邊及平素看見伊做乞食的，講：「此人豈呣是坐來求乞的嗎？」

9

(THR) . Ū lâng kóng, Chiū-sī i; ū lâng kóng, M̄ sī, sī chhin-chhiūⁿ i nā-tiāⁿ. I ka-kī kóng, Góa chiū-sī.

(BCL) 有人講：「就是伊」；有人講：「呣是，是親像伊若定。」，伊家己講：「我就是。」

10

(THR) . In chiū kā i kóng, Lí ê ba̍k-chiu cháiⁿ-iūⁿ tit-tio̍h khui?

(BCL) 就給伊講：「你的目睭怎樣得著開？」

11

(THR) . I ìn kóng, Hit ê miâ kiò Iâ-so͘ ê kiáu thô͘ kô͘ góa ê ba̍k-chiu, kā góa kóng, Khì Se-lô-a sóe; góa sûi-sî khì sóe, chiū tit-tio̍h khòaⁿ-kìⁿ.

(BCL) 伊應講：「彼個名叫耶穌的，攪土糊我的目睭，給我講：『去西羅亞洗。』我隨時去洗，就得著看見。」

12

(THR) . In chiū kā i kóng, Hit lâng tī tá-lo̍h? I kóng, Góa m̄ chai.

(BCL) 就給伊講：「彼人佇叨落？」伊講：「我呣知。」

13

(THR) . In chhōa hit-ê pêng-sò͘ chhiⁿ-mî ê khì kìⁿ Hoat-lī-sài lâng.

(BCL) 導彼個平素睛暝的去見法利賽人。

14

(THR) . Iâ-so͘ kiáu thô͘ lâi khui i ê ba̍k-chiu ê jı̍t sī an-hioh-jı̍t.

(BCL) 耶穌攪土來開伊的目睭的日是安息日。

15

(THR) . Só͘-í Hoat-lī-sài lâng ia̍h mn̄g i sī cháiⁿ-iūⁿ tit-tio̍h khòaⁿ-kìⁿ. I chiū kā in kóng, I chiong thô͘-bê hē tī góa ê ba̍k-chiu, góa khì sóe, chiū khòaⁿ-kìⁿ.

(BCL) 所以法利賽人亦問伊是怎樣得著看見。伊就給講：「伊將土糜下佇我的目睭，我去洗，就看見。」

16

(THR) . Hoat-lī-sài lâng tiong ū-ê kóng, Chit lâng bô siú an-hioh-jı̍t, m̄ sī tùi Siōng-tè lâi. Ū-ê kóng, Ū chōe ê lâng thái ōe kiâⁿ chit hō sîn-jiah ah? In tùi án-ni hun-pêng.

(BCL) 法利賽人中有的講：「此人無守安息日，呣是對上帝來。」有的講：「有罪的人豈會行此號神蹟啊？」對按呢分旁。

17

(THR) . In koh kā chhiⁿ-mî lâng kóng, I í-keng khui lí ê ba̍k-chiu, lí kóng I sī sím-mı̍h hō lâng? I kóng, Sī sian-ti lâng.

(BCL) 閣給睛暝人講：「伊已經開你的目睭，你講伊是甚麼號人？」伊講：「是先知人。」

18

(THR) . Iû-thài lâng m̄ sìn i pêng-sò͘ chhiⁿ-mî, ōe koh khòaⁿ-kìⁿ; kàu kiò tit-tio̍h khòaⁿ-kìⁿ ê ê pē-bú lâi,

(BCL) 猶太人呣信伊平素睛暝，會閣看見，到叫得著看見者的父母來，

19

(THR) . chiū mn̄g in kóng, Chit-ê sī lín ê kiáⁿ, chiū-sī lín só͘ kóng chhut-sì chhiⁿ-mî ê mah? taⁿ i cháiⁿ-iūⁿ ōe khòaⁿ-kìⁿ?

(BCL) 就問講：「此個是恁的子，就是恁所講出世睛暝的嗎？今伊怎樣會看見？」

20

(THR) . I ê pē-bú ìn kóng, I sī góan ê kiáⁿ, chhut-sì chhiⁿ-mî, góan chai; taⁿ i cháiⁿ-iūⁿ tit-tio̍h khòaⁿ-kìⁿ, góan m̄ chai;

(BCL) 伊的父母應講：「伊是阮的子，出世睛暝，阮知。

21

(THR) . chī-chūi khui i ê ba̍k-chiu, góan ia̍h m̄ chai; i tōa-hàn lah; mn̄g i, i beh ka-kī kóng.

(BCL) 今伊怎樣得著看見，阮呣知；是誰開伊的目睭，阮亦呣知。伊大漢啦，問伊，伊欲家己講。」

22

(THR) . I ê pē-bú kóng án-ni, sī in-ūi kiaⁿ Iû-thài lâng; in-ūi Iû-thài lâng í-keng ū tēng iok, nā ū jīn Iâ-so͘ chòe Ki-tok ê, tio̍h kek-chhut hōe-tn̂g.

(BCL) 伊的父母講按呢，是因為驚猶太人；因為猶太人已經有定約，若有認耶穌做基督的，著革出會堂。

23

(THR) . Só͘-í i ê pē-bú kóng, I tōa-hàn lah; thang mn̄g i.

(BCL) 所以伊的父母講：「伊大漢啦，通問伊。」

24

(THR) . In chiū koh kiò pêng-sò͘ chhiⁿ-mî ê, kā i kóng, Tio̍h kui êng-kng Siōng-tè; góan chai chit lâng sī ū chōe ê lâng.

(BCL) 就閣叫平素睛暝者，給伊講：「著歸榮光上帝，阮知此人是有罪的人。」

25

(THR) . I chiū ìn kóng, I sī ū chōe ê lâng á m̄ sī, góa m̄ chai; chí-ū chai chı̍t hāng, chiū-sī góa chêng chhiⁿ-mî, hiān-kim ōe khòaⁿ-kìⁿ.

(BCL) 伊就應講：「伊是有罪的人抑呣是，我呣知；只有知一項，就是我前睛暝，現今會看見。」

26

(THR) . In chiū kā i kóng, I kā lí chòe sím-mı̍h? àn-cháiⁿ-iūⁿ khui lí ê ba̍k-chiu?

(BCL) 就給伊講：「伊給你做甚麼？按怎樣開你的目睭？」

27

(THR) . Ìn kóng, Góa í-keng kā lín kóng, lín m̄ thiaⁿ; siáⁿ-sū ài koh thiaⁿ? kiám sī lín ia̍h ài chòe I ê ha̍k-seng mah?

(BCL) 應講：「我已經給恁講，恁呣聽，啥事愛閣聽？豈是恁亦愛做伊的學生嗎？」

28

(THR) . In chiū mē i, kóng, Lí chiū-sī I ê ha̍k-seng; góan sī Mô͘-se ê ha̍k-seng.

(BCL) 就罵伊講：「你就是伊的學生；阮是摩西的學生。

29

(THR) . Siōng-tè ū tùi Mô͘-se kóng ōe, sī góan só͘ chai; to̍k-to̍k chit lâng, góan m̄ chai I tùi tá-lo̍h lâi.

(BCL) 上帝有對摩西講話是阮所知；獨獨此人，阮呣知伊對叨落來！」

30

(THR) . Hit lâng ìn kóng, Che chiū kî lah, I khui góa ê ba̍k-chiu, ia̍h lín m̄ chai I tùi tá-lo̍h lâi.

(BCL) 彼人應講：「這就奇啦！伊開我的目睭，亦恁呣知伊對叨落來。

31

(THR) . Lán chai Siōng-tè bô thiaⁿ ū chōe ê lâng; to̍k-to̍k lâng nā kèng-pài Siōng-tè lâi kiâⁿ I ê chí-ì, I chiū thiaⁿ i.

(BCL) 咱知上帝無聽有罪的人，獨獨人若敬拜上帝，來行伊的旨意，伊就聽伊。

32

(THR) . Tùi kó͘-chá í-lâi, bē bat thiaⁿ-kìⁿ chhut-sì chhiⁿ-mî ê, ū lâng khui i ê ba̍k-chiu.

(BCL) 對古早以來，未曾聽見出世晴暝者，有人開伊的目睭。

33

(THR) . Chit lâng nā m̄ sī tùi Siōng-tè lâi, chiū bô só͘ ōe chòe.

(BCL) 此人若呣是對上帝來，就無所會做。」

34

(THR) . In chiū ìn i, kóng, Lí chôan-jiân chhut-sì tī chōe-ok tiong, hóan-tńg kà-sī góan mah? Chiū kek i chhut.

(BCL) 就應伊講：「你全然出世佇罪惡中，反轉教示阮嗎？」就革伊出。

35

(THR) . Iâ-so͘ thiaⁿ-kìⁿ in kek i chhut; āu-lâi chhē-tio̍h i, chiū kóng, Lí sìn Siōng-tè ê Kiáⁿ mah?

(BCL) 耶穌聽見革伊出，後來尋著伊，就講：「你信上帝的子嗎？」

36

(THR) . I ìn kóng, Chú ah, I sī chī-chūi, hō͘ góa sìn I?

(BCL) 伊應講：「主啊，伊是是誰，互我信伊？」

37

(THR) . Iâ-so͘ kā i kóng, Lí bat khòaⁿ-kìⁿ I, hiān-chāi kap lí kóng ōe ê, chiū-sī.

(BCL) 耶穌給伊講：「你曾看見伊，現在及你講話的就是。」

38

(THR) . I chiū kóng, Chú ah, góa sìn. Chiū pài I.

(BCL) 伊就講：「主啊，我信！」就拜伊。

39

(THR) . Iâ-so͘ kóng, Góa in-ūi sím-phòaⁿ lîm-kàu chit sè-kan, hō͘ bōe khòaⁿ-kìⁿ ê lâng khòaⁿ-kìⁿ; iā khòaⁿ-kìⁿ ê lâng pìⁿ-chòe chhiⁿ-mî.

(BCL) 耶穌講：「我因為審判臨到此世間，互看見的人，看見；也看見的人，變做睛暝。」

40

(THR) . Kap I saⁿ-kap tī-teh ê Hoat-lī-sài lâng thiaⁿ-kìⁿ chiah ê ōe, chiū kā I kóng, Chóng bô góan ia̍h chhiⁿ-mî mah?

(BCL) 及伊相及佇的法利賽人聽見諸個話，就給伊講：「總無阮亦睛暝嗎？」

41

(THR) . Iâ-so͘ kā in kóng, Lín nā chhiⁿ-mî, chiū bô chōe; taⁿ lín kóng, Góan khòaⁿ-kìⁿ; chiū lín ê chōe tiāⁿ-tiāⁿ tī-teh.

(BCL) 耶穌給講：「恁若睛暝，就無罪；今恁講『阮看見』，就恁的罪定定佇。」

Bible Color Mark

• 台語漢字羅馬本
• 巴克禮全羅