約伯記 第 1 章

1

(THR) Ou-su ê tōe bat ū chı̍t-lâng miâ-kiò Iok-pek, hit-lâng ôan-chôan koh chèng-tı̍t, kèng-ùi Siōng-tè, lī-khui chiah ê pháiⁿ.

(BCL) 烏斯的地曾有一人名叫約伯；彼人完全閣正直，敬畏上帝，離開諸個歹。

2

(THR) I siⁿ chhit ê kiáⁿ, saⁿ ê cha-bó͘-kiáⁿ.

(BCL) 伊生七個子，三個查某子。

3

(THR) I ê ke-gia̍p ū iûⁿ chhit-chheng, lo̍k-tô saⁿ-chheng, gû gō͘-pah tùi, lû-bú gō͘-pah chiah; iā ū chōe-chōe chhe-ēng ê lâng; án-ni chit-lâng tī tang-hng chèng-lâng ê tiong-kan sī chòe tē-it-tōa.

(BCL) 伊的家業有羊七千，駱駝三千，牛五百對，驢母五百隻，也有多多差用的人。按呢此人佇東方眾人的中間是最第一大。

4

(THR) I hiah ê kiáⁿ khì siat iân-sia̍h tī ta̍k-lâng ê chhù, chiàu i ê jı̍t-chí; koh chhe lâng khì chhiáⁿ in saⁿ ê chí-bē lâi kap in lim-chia̍h.

(BCL) 伊許個子去設筵席佇逐人的厝照伊的日子，閣差人去請三個姊妹來，及飲食。

5

(THR) Iân-sia̍h ê jı̍t í-keng móa, Iok-pek chhe lâng kiò in lâi hō͘ in sèng-kiat; koh thàu-chá khí-lâi, chiàu in chèng-lâng ê siàu-gia̍h hiàn sio-chè; in-ūi Iok-pek kóng, Kiám-chhái góa ê kiáⁿ ū hōan-chōe, sim-lāi khì-cho̍at Siōng-tè. Iok-pek siông-siông án-ni kiâⁿ.

(BCL) 筵席的日已經滿，約伯差人叫來互聖潔。閣透早起來，照眾人的數額獻燒祭；因為約伯講：「豈採我的子有犯罪，心內棄絕上帝。」約伯常常按呢行。

6

(THR) Ū chı̍t-jı̍t, Siōng-tè ê chèng-kiáⁿ lâi, ka-kī khiā tī Iâ-hô-hoa ê bīn-chêng, Sat-tàn iā lâi tī in tiong-kan.

(BCL) 有一日，上帝的眾子來家己徛佇耶和華的面前，撒但也來佇中間。

7

(THR) Iâ-hô-hoa tùi Sat-tàn kóng, Lí tùi toh-lo̍h lâi? Sat-tàn chiū ìn Iâ-hô-hoa kóng, Góa tī tōe-chiūⁿ kiâⁿ-lâi kiâⁿ-khì, piàn-kiâⁿ tī-hia, tùi hia lâi.

(BCL) 耶和華對撒但講：「你對叨落來？」撒但就應耶和華講：「我佇地上行來行去，遍行佇遐，對遐來。」

8

(THR) Iâ-hô-hoa tùi Sat-tàn kóng, Lí ū liû-sim tī Góa ê lô͘-po̍k Iok-pek mah? In-ūi tōe-chiūⁿ bô lâng chhin-chhiūⁿ i ôan-chôan koh chèng-tı̍t, kèng-ùi Siōng-tè, lī-khui chiah ê pháiⁿ.

(BCL) 耶和華對撒但講：「你有留心佇我的奴僕約伯嗎？因為地上無人親像伊完全閣正直，敬畏上帝，離開諸個歹。」

9

(THR) Sat-tàn ìn Iâ-hô-hoa kóng, Iok-pek kèng-ùi Siōng-tè, kiám bô in-toaⁿ mah?

(BCL) 撒但應耶和華講：「約伯敬畏上帝，豈無因端嗎？

10

(THR) Lí kiám-m̄-sī ēng lî-pa ûi i, koh ûi i ê ke, kap ûi i sì-bīn it-chhè só͘-ū-ê mah? I ê chhiú só͘ chòe-ê, Lí sù-hok i, i ê ke-gia̍p iā tī tōe--nih ke-thiⁿ chōe-chōe.

(BCL) 你豈呣是用籬笆圍伊閣圍伊的家，及圍伊四面一切所有的嗎？伊的手所做的你賜福伊；伊的家業也佇地裡加添多多。

11

(THR) Taⁿ Lí nā chhun Lí ê chhiú, kha̍p-tio̍h i lóng-chóng só͘-ū-ê, i tek-khak tng-bīn khì-cho̍at Lí.

(BCL) 今你若伸你的手磕著伊攏總所有的；伊的確當面棄絕你。」

12

(THR) Iâ-hô-hoa tùi Sat-tàn kóng, Khòaⁿ ah, i it-chhè só͘-ū-ê lóng tī lí ê chhiú-thâu, to̍k-to̍k m̄-thang hē chhiú tī i ê seng-khu. Sat-tàn chiū tùi Iâ-hô-hoa ê bīn-chêng chhut-khì.

(BCL) 耶和華對撒但講：「看啊，伊一切所有的攏佇你的手頭；獨獨呣通下手佇伊的身軀。」撒但就對耶和華的面前出去。

13

(THR) Ū chı̍t-jı̍t Iok-pek ê kiáⁿ cha-bó͘-kiáⁿ tú-á tī in tōa-hiaⁿ ê ke teh chia̍h, teh lim-chiú,

(BCL) 有一日，約伯的子查某子抵仔佇大兄的家食飲酒，

14

(THR) ū sù-chiá lâi Iok-pek hia, kā i kóng, Gû teh lôe-chhân, lû-bú tī piⁿ-á chia̍h-chháu;

(BCL) 有使者來約伯遐，給伊講：「牛犁田，驢母佇邊仔食草，

15

(THR) Sī-pa ê lâng hut-jiân kàu, chhiúⁿ i, ēng to thâi-sí hiah ê lô͘-po̍k; chí-ū góa chı̍t-lâng cháu-lī lâi pò lí.

(BCL) 示巴的人忽然到，搶伊，用刀死許個奴僕；只有我一人走離，來報你。」

16

(THR) I iáu teh kóng ê sî, koh ū chı̍t-ê lâi, kóng, Siōng-tè ê hé tùi thiⁿ kàng-lo̍h, sio iûⁿ-kûn, kap hiah ê lô͘-po̍k, lâi bia̍t--in; chí-ū góa chı̍t-lâng cháu-lī lâi pò lí.

(BCL) 伊猶講的時，閣有一個來講：「上帝的火對天降落，燒羊群及許個奴僕來滅；只有我一人走離，來報你。」

17

(THR) I iáu teh kóng ê sî, koh ū chı̍t-ê lâi, kóng, Ka-le̍k-tí lâng pun-chòe saⁿ-tūi, hut-jiân lâi, phah lo̍k-tô lâi chhiúⁿ i, sòa ēng to thâi-sí hiah ê lô͘-po̍k; chí-ū góa chı̍t-lâng cháu-lī lâi pò lí.

(BCL) 伊猶講的時，閣有一個來講：「迦勒底人分做三隊忽然來，拍駱駝來搶伊，續用刀死許個奴僕；只有我一人走離，來報你。」

18

(THR) I iáu teh kóng ê sî, koh ū chı̍t-ê lâi, kóng, Lí ê kiáⁿ, lí ê cha-bó͘-kiáⁿ, tī in tōa-hiaⁿ ê ke teh chia̍h teh lim-chiú;

(BCL) 伊猶講的時，閣有一個來，講：「你的子你的查某子佇大兄的家食飲酒，

19

(THR) hut-jiân ū tōa-hong tùi khòng-iá chhe--lâi, phah chhù ê sì-kak-thâu, chhù tó teh tī siàu-liân lâng ê téng-bīn, in chiū lóng sí; chí-ū góa chı̍t-lâng cháu-lī lâi pò lí.

(BCL) 忽然，有大風對曠野吹來，拍厝的四角頭，厝倒壓佇少年人的頂面，就攏死；只有我一人走離，來報你。」

20

(THR) Iok-pek chiū khí-lâi, thiah-lı̍h gōa-saⁿ, thì-thâu, phak tī tōe--nih lâi pài;

(BCL) 約伯就起來，拆裂外衫，剃頭，仆佇地裡來拜，

21

(THR) kóng, Góa thǹg-theh chhut lāu-bú ê thai, iā beh thǹg-theh tò-khì hia; Iâ-hô-hoa siúⁿ-sù, Iâ-hô-hoa the̍h-khì, tio̍h o-ló Iâ-hô-hoa ê miâ.

(BCL) 講：「我褪裼出老母的胎，也欲褪裼倒去遐；耶和華賞賜，耶和華提去。著謳咾耶和華的名。」

22

(THR) Tī che it-chhè ê sū, Iok-pek pēng bô hōan-chōe, iā bô lia̍h Siōng-tè chòe bô-ha̍p.

(BCL) 佇這一切的事約伯並無犯罪，也無掠上帝做無合。

Bible Color Mark

• 台語漢字羅馬本
• 巴克禮全羅