約伯記 第 19 章

1

(THR) Iok-pek ìn kóng,

(BCL) 約伯應講：

2

(THR) Lín hō͘ góa ê sim iu-khó͘, Ēng ōe siong-hāi góa, beh kàu tī-sî ah?

(BCL) 恁互我的心憂苦，用話傷害我欲到底時啊？

3

(THR) Lín che cha̍p-pái lêng-jio̍k góa, Lín pháiⁿ khóan-thāi góa, iā bô ka-kī kiàn-siàu.

(BCL) 恁這十擺凌辱我；恁歹款待我也無家己見誚。

4

(THR) Góa nā kó-jiân ū kè-sit, Che kè-sit sī chāi-tī góa ka-kī.

(BCL) 我若果然有過失，這過失是在佇我家己。

5

(THR) Lín kó-jiân beh tùi góa khoa-kháu tōa, Koh ēng góa ê lêng-jio̍k chek-pī góa;

(BCL) 恁果然欲對我誇口大，閣用我的凌辱責備我，

6

(THR) Chiū tio̍h chai che sī Siōng-tè óng-khut góa, Ēng I ê lô-bāng ûi góa.

(BCL) 就著知這是上帝枉屈我，用伊的羅網圍我。

7

(THR) Khòaⁿ ah, góa in-ūi oan-óng lâi âu-kiò, iā bô tit-tio̍h thiaⁿ, Góa háu-kiù, iā bô tit-tio̍h kong-tòan.

(BCL) 看啊，我因為冤枉來喉叫，也無得著聽；我哮救，也無得著公斷。

8

(THR) I ûi-cha̍h góa ê lō͘, hō͘ góa bōe-tit kè-khì, Koh hō͘ góa ê lō͘-kèng o͘-àm.

(BCL) 伊圍截我的路，互我得過去；閣互我的路徑黑暗。

9

(THR) I thǹg--khì góa ê êng-kng, Liù--khì góa ê thâu-khak-téng ê bián-liû.

(BCL) 伊褪去我的榮光，去我頭殼頂的冕旒。

10

(THR) I tī sì-ûi húi-hōai góa, góa chiū bô--khì; Góa ê ǹg-bāng pu̍ih--khí-lâi, chhin-chhiūⁿ pu̍ih chhiū.

(BCL) 伊佇四圍毀壞我，我就無去，我的向望拔起來親像拔樹。

11

(THR) I ê siū-khì lia̍t-lia̍t kong-kek góa, I lia̍h góa chòe I ê tùi-te̍k ê chı̍t-ê.

(BCL) 伊的受氣烈烈攻擊我，伊掠我做伊的對敵的一個。

12

(THR) I ê kun-peng chı̍t-chôe lâi, chō in ê lō͘ lâi kong-kek góa, Chat-iâⁿ tī góa ê pò͘-pîⁿ ê sì-ûi.

(BCL) 伊的軍兵一齊來，造的路來攻擊我，紮營佇我的布棚的四圍。

13

(THR) I hō͘ góa ê hiaⁿ-tī keh-khui hn̄g-hn̄g, Saⁿ-bat ê lâng kap góa chhiⁿ-so͘.

(BCL) 伊互我的兄弟隔開遠遠，相識的人及我生疏。

14

(THR) Góa ê chhin-lâng kap góa tōan-cho̍at, Góa chhin-bı̍t ê pêng-iú lóng bōe kì-tit góa.

(BCL) 我的親人及我斷絕；我親密的朋友攏記得我。

15

(THR) Kià-kha tī góa chhù-lāi ê lâng, í-kı̍p góa ê lú-pī, lóng khòaⁿ góa chòe gōa-lâng; In khòaⁿ góa chòe gōa-pang lâng.

(BCL) 寄腳佇我厝內的人，以及我的女婢攏看我做外人；看我做外邦人。

16

(THR) Góa kiò góa ê lô͘-po̍k, i m̄ ìn, Góa tio̍h chhin-chhùi kiû i.

(BCL) 我叫我的奴僕，伊呣應，我著親嘴求伊。

17

(THR) Góa chhùi ê khì-bī hō͘ góa ê bó͘ iàm-chiān; Kap góa siâng-pak-ê iā iàm-chiān góa ê chhàu-bī.

(BCL) 我嘴的氣味，互我的某厭賤；及我像腹的，也厭賤我的臭味。

18

(THR) Liân gín-ná iā khòaⁿ-khin góa; góa nā khí-lâi, in lóng ki-chhì góa.

(BCL) 連囝仔也看輕我；我若起來，攏譏刺我。

19

(THR) Góa chhin-bı̍t ê pêng-iú lóng iàm-chiān góa; Góa pêng-jı̍t só͘ thiàⁿ ê lâng, tùi góa pìⁿ-bīn.

(BCL) 我親密的朋友攏厭賤我；我平日所疼的人對我變面。

20

(THR) Góa ê phê mo͘h tī góa ê kut; Góa chí-ū chhun chhùi-khí-hōaⁿ.

(BCL) 我的皮佇我的骨；我只有剩嘴齒岸。

21

(THR) Góa ê pêng-iú ah, lín tio̍h khó-lîn góa, khó-lîn góa; In-ūi Siōng-tè ê chhiú bong--tio̍h góa.

(BCL) 我的朋友啊，恁著可憐我！可憐我！因為上帝的手摸著我。

22

(THR) Lín siáⁿ-sū chhin-chhiūⁿ Siōng-tè khún-pek góa, Lia̍h góa ê bah chòe bô thang pá-chiok mah?

(BCL) 恁啥事親像上帝窘迫我，掠我的肉做無通飽足嗎？

23

(THR) Taⁿ gōan chiong góa ê ōe siá--khí-lâi, Koh kì tī chheh--nih;

(BCL) 今願將我的話寫起來，閣記佇冊裡；

24

(THR) Ēng thih-chām ēng iân khek-tiâu tī chio̍h--nih; Hō͘ i éng-éng tī-teh.

(BCL) 用鐵鏨，用鉛刻住佇石裡，互伊永永佇，

25

(THR) In-ūi góa chai kiù-sio̍k góa--ê sī o̍ah-ê; Jı̍t-āu i beh khiā tī thô͘ ê téng-bīn;

(BCL) 因為我知救贖我者是活的，日後伊欲徛佇土的頂面。

26

(THR) Góa chit ê phê pāi-hōai liáu-āu, Góa beh tī jio̍k-thé ê gōa-bīn tit-tio̍h kìⁿ Siōng-tè.

(BCL) 我此個皮敗壞了後，我欲佇肉體的外面得著見上帝。

27

(THR) Góa pún-sin beh khòaⁿ-kìⁿ I sī ūi-góa--ê, Góa chhin-ba̍k khòaⁿ-kìⁿ I m̄-sī gōa-lâng; Góa ê sim-tn̂g tī góa ê lāi-bīn kàu iûⁿ--khì.

(BCL) 我本身欲看見伊是為我者，我親目看見伊，呣是外人。我的心腸佇我的內面到溶去！

28

(THR) Lín nā kóng, Góan beh cháiⁿ-iūⁿ khún-pek i! Tāi-chì ê kun-pún chāi-tī góa;

(BCL) 恁若講：阮欲怎樣窘迫伊？代誌的根本在佇我；

29

(THR) Lín tio̍h kiaⁿ to-kiàm, in-ūi siū-khì chiū ū to-kiàm ê hêng-ho̍at, Hō͘ lín chai ū sím-phòaⁿ.

(BCL) 恁著驚刀劍；因為受氣就有刀劍的刑罰，互恁知有審判。

Bible Color Mark

• 台語漢字羅馬本
• 巴克禮全羅