約伯記 第 20 章

1

(THR) Ná-má lâng Só-hoat ìn kóng,

(BCL) 拿瑪人瑣法應講：

2

(THR) Góa ê sim-lāi tio̍h-kip, Só͘-í góa ê sim-su pek góa tio̍h ìn.

(BCL) 我的心內著急，所以我的心思迫我著應。

3

(THR) Góa thiaⁿ-kìⁿ hit ê lêng-jio̍k Góa ê chek-pī, Góa tì-hūi ê sim kà góa ìn.

(BCL) 我聽見彼個凌辱我的責備；我智慧的心教我應。

4

(THR) Lí kiám m̄-chai tùi kó͘-chá, Tùi ū lâng tī sè-kan í-lâi;

(BCL) 你豈呣知對古早，對有人佇世間以來，

5

(THR) Pháiⁿ-lâng ê tāi-ia̍t bô kú-tn̂g, Bô kèng-khiân ê lâng ê hoaⁿ-hí ba̍k-nih-kú nā-tiāⁿ?

(BCL) 歹人的大悅無久長，無敬虔的人的歡喜目　久若定？

6

(THR) I ê kôaiⁿ sui-jiân tú-thiⁿ, I ê thâu-khak sui-jiân kàu hûn--nih;

(BCL) 伊的高雖然抵天，伊的頭殼雖然到雲裡，

7

(THR) I kàu-bé beh bia̍t-bô, chhin-chhiūⁿ i ê pùn chı̍t-iūⁿ; Pêng-sò͘ khòaⁿ-kìⁿ i ê lâng beh kóng, I tī toh-lo̍h ah?

(BCL) 伊到尾欲滅無，親像伊的糞一樣；平素看見伊的人欲講：伊佇叨落啊？

8

(THR) I beh chhin-chhiūⁿ bîn-bāng pe--khì, bô thang chhē-tio̍h; I beh siū kóaⁿ-cháu, chhin-chhiūⁿ mî--sî ê īⁿ-siōng.

(BCL) 伊欲親像眠夢飛去，無通尋著，伊欲受趕走，親像暝時的異象。

9

(THR) Pêng-sò͘ khòaⁿ-kìⁿ i ê, i ê ba̍k-chiu bōe koh khòaⁿ-kìⁿ i; I ê pún só͘-chāi iā bô koh khòaⁿ-kìⁿ i.

(BCL) 平素看見伊的，伊的目睭閣看見伊；伊的本所在也無閣看見伊，

10

(THR) I ê kiáⁿ-jî beh tùi sòng-hiong lâng kiû-un, I ê chhiú beh hêng hè-châi.

(BCL) 伊的子兒欲對喪鄉人求恩；伊的手欲還貨財。

11

(THR) I ê kut móa-móa ū siàu-liân ê la̍t; Chóng-sī beh kap i saⁿ-kap tó tī thô͘--nih.

(BCL) 伊的骨滿滿有少年的力，總是欲及伊相及倒佇土裡。

12

(THR) Chōe-ok tī i ê chhùi sui-jiân tiⁿ, Sui-jiân i khǹg tī i ê chı̍h-ē;

(BCL) 罪惡佇伊的嘴雖然甜，雖然伊囥佇伊的舌下，

13

(THR) Sui-jiân pó-sioh, m̄-khéng pàng-sak, Tiāⁿ-tiāⁿ kâm tī i ê chhùi;

(BCL) 雖然保惜呣肯放拺，定定含佇伊的嘴；

14

(THR) I ê chia̍h-mı̍h kàu i ê tn̂g-á chiū piàn, Chiâⁿ-chòe to̍k-chôa ê táⁿ tī i ê lāi-bīn.

(BCL) 伊的食物到伊的腸仔就變，成做毒蛇的膽佇伊的內面。

15

(THR) I thun-chia̍h châi-pó, beh koh thò͘-chhut; Siōng-tè beh tùi i ê pak-tó͘ jîm--chhut-lâi.

(BCL) 伊吞食財寶，欲閣吐出；上帝欲對伊的腹肚撏出來。

16

(THR) I beh suh to̍k-chôa ê to̍k; Chôa ê chı̍h iā beh hāi-sí i.

(BCL) 伊欲吸毒蛇的毒；蛇的舌也欲害死伊。

17

(THR) I bōe tit-tio̍h khòaⁿ-kìⁿ kang-hô, Lâu bı̍t kap lin ê khoe.

(BCL) 伊得著看見江河，流蜜及奶的溪。

18

(THR) I tio̍h-bôa só͘ tit-tio̍h--ê, tio̍h hêng lâng, bô thang chia̍h--lo̍h-khì, Bōe-ōe chiàu só͘ kau-e̍k ê châi-bu̍t lâi hoaⁿ-hí.

(BCL) 伊著磨所得著的著還人，無通食落去，會照所交易的財物來歡喜。

19

(THR) In-ūi i ap-chè sòng-hiong lâng, koh khì-sak i; Kiông-chiàm lâng ê chhù, iā bōe-ōe khí-chō.

(BCL) 因為伊壓制喪鄉人，閣棄拺伊；強佔人的厝也會起造。

20

(THR) In-ūi i ê sim-lāi bē-bat an-chēng, I só͘ hoaⁿ-hí-ê lóng bōe pó-chôan.

(BCL) 因為伊的心內未曾安靜，伊所歡喜的攏保全。

21

(THR) Bô chı̍t-kiāⁿ bô hō͘ i thun--lo̍h-khì, Só͘-í i ê hok-lo̍k bōe kú-tn̂g.

(BCL) 無一件無互伊吞落去，所以伊的福樂久長。

22

(THR) Tng i hó-gia̍h chhiong-chiok ê sî, beh kàu o̍eh-to̍eh ê só͘-chāi; Kan-khó͘ ê lâng lóng beh chhut-chhiú phah i.

(BCL) 當伊好額充足的時，欲到狹窄的所在；艱苦的人攏欲出手拍伊。

23

(THR) I ê pak-tó͘ beh pá ê sî, Siōng-tè beh kàng béng-lia̍t ê siū-khì tī i; I teh chia̍h ê sî, beh kàng siū-khì tī i ê téng-bīn.

(BCL) 伊的腹肚欲飽的時，上帝欲降猛烈的受氣佇伊；伊食的時，欲降受氣佇伊的頂面。

24

(THR) I siám-lī thih ê khì-kū, Tâng ê keng beh siā-thàu i.

(BCL) 伊閃離鐵的器具；銅的弓欲射透伊。

25

(THR) I chı̍t-ē pu̍ih i, chiū tùi i ê seng-khu chhut-lâi, Kng-nà-nà ê chìⁿ-bé beh tùi i ê táⁿ chhut; Kiaⁿ-hiâⁿ beh kàu tī i.

(BCL) 伊一下拔伊，就對伊的身軀出來；光爁爁的箭尾欲對伊的膽出，驚惶欲到佇伊。

26

(THR) It-chhè ê o͘-àm siu-khǹg ūi-tio̍h i ê châi-pó, Lâng só͘ bô pûn ê hé beh sio-bia̍t i; Koh beh sio-húi lâu tī i ê pò͘-pîⁿ ê.

(BCL) 一切的黑暗收囥為著伊的財寶；人所無歕的火欲燒滅伊，閣欲燒毀留佇伊的布棚的。

27

(THR) Thiⁿ beh hián-bêng i ê chōe-ok, Tōe beh khí-lâi kong-kek i.

(BCL) 天欲顯明伊的罪惡；地欲起來攻擊伊。

28

(THR) I ê ke-hé beh bô--khì, Lóng beh siau-bia̍t tī Siōng-tè siū-khì ê jı̍t.

(BCL) 伊的家伙欲無去；攏欲消滅佇上帝受氣的日。

29

(THR) Che chiū-sī pháiⁿ-lâng tùi Siōng-tè só͘ tit ê hūn-gia̍h; Sī Siōng-tè kā i tiāⁿ-tio̍h ê sán-gia̍p.

(BCL) 這就是歹人對上帝所得的份額，是上帝給伊定著的產業。

Bible Color Mark

• 台語漢字羅馬本
• 巴克禮全羅