約伯記 第 28 章

1

(THR) Chhut-gûn ū i ê khòng, Só͘ thòan-liān ê kim iā ū i ê só͘-chāi teh chhut.

(BCL) 出銀有伊的礦；所鍛煉的金也有伊的所在出。

2

(THR) Thih sī tùi tōe--nih chhú--chhut-lâi, Tâng sī tùi chio̍h iûⁿ--chhut-lâi.

(BCL) 鐵是對地裡取出來；銅是對石鎔出來。

3

(THR) Lâng siau-bô hit ê o͘-àm, Chhē kàu chīn tóe; Ū o͘-àm kap sí-ìm tiong ê chio̍h.

(BCL) 人消無彼個黑暗，尋到盡底，有黑暗及死蔭中的石，

4

(THR) I lī-khui lâng kià-kha ê só͘-chāi, khui hia̍t; Kiâⁿ tī hí(**hit) téng-bīn ê lâng bô siūⁿ-tio̍h i; In lī-khui lâng, tūi tī hia̍t-tiong, hìⁿ-lâi hìⁿ-khì.

(BCL) 伊離開人寄腳的所在開穴，行佇彼頂面的人無想著伊；離開人，墜佇穴中甩來甩去。

5

(THR) Lūn-kàu tōe, bí-niû tùi hia chhut; I ê ē-tóe chhin-chhiūⁿ hō͘ hé kā i péng--khí-lâi.

(BCL) 論到地，米糧對遐出，伊的下底親像互火給伊反起來。

6

(THR) I ê chio̍h-tiong ū lâm-pó-chio̍h, I iā ū kim-soa.

(BCL) 伊的石中有藍寶石，伊也有金沙。

7

(THR) Hit tiâu lō͘ eng-chiáu m̄-bat; Sió-eng ê ba̍k-chiu iā bô khòaⁿ-kìⁿ.

(BCL) 彼條路鷹鳥呣識；小鷹的目睭也無看見。

8

(THR) Ok-siù m̄-bat ta̍h-tio̍h i, Béng-sai iā m̄-bat tùi hia kè.

(BCL) 惡獸呣曾踏著伊；猛獅也呣曾對遐過。

9

(THR) I chhun-chhiú phah tēng-chio̍h, Tùi soaⁿ ê kun-ki kā i péng--khí-lâi.

(BCL) 伊伸手拍石，對山的根基給伊反起來，

10

(THR) I tī chio̍h-thâu tiong khui-kau, Chhin-ba̍k khòaⁿ-kìⁿ ta̍k-iūⁿ ê pó-mı̍h.

(BCL) 伊佇石頭中開溝，親目看見逐樣的寶物。

11

(THR) I that-ba̍t chúi hō͘ i bōe tih--lo̍h-lâi; Koh the̍h-chhut ún-ba̍t ê mı̍h, hō͘ i kìⁿ kng.

(BCL) 伊塞密水互伊滴落來，閣提出隱密的物互伊見光。

12

(THR) Chóng-sī tì-hūi tùi toh-lo̍h ōe chhē-tio̍h? Chhong-bêng ê só͘-chāi tī toh-lo̍h?

(BCL) 總是，智慧對叨落會尋著？聰明的所在佇叨落？

13

(THR) I ê kè-chîⁿ bô lâng chai, Tī o̍ah-lâng ê tōe iā bô tè(**teh) thang chhē.

(BCL) 伊的價錢無人知，佇活人的地也無地通尋。

14

(THR) Chhim-ian kóng, Bô tī góa chia; Tōa-hái kóng, Bô kap góa tī-teh.

(BCL) 深淵講：無佇我遮；大海講：無及我佇。

15

(THR) Bōe-ōe ēng n̂g-kim lâi tit-tio̍h i; Iā bōe-ōe phêng gûn chòe i ê kè-chîⁿ.

(BCL) 會用黃金來得著伊，也會秤銀做伊的價錢。

16

(THR) O-hui ê kim bōe ta̍t-tio̍h i; Pó-kùi ê phek-ge̍k kap lâm-pó-chio̍h iā bōe.

(BCL) 俄斐的金值著伊，寶貴的碧玉，及藍寶石也；

17

(THR) N̂g-kim kap po-lê bōe pí-tit i; Hó-kim ê khì-kū bô kàu-gia̍h kap i ōaⁿ.

(BCL) 黃金及玻璃比得伊；好金的器具無夠額及伊換。

18

(THR) Sian-hô chúi-chiⁿ lóng bô kàu-gia̍h thang kóng; In-ūi tit-tio̍h tì-hūi iâⁿ-kè chin-chu.

(BCL) 珊瑚、水晶攏無夠額通講；因為得著智慧贏過真珠。

19

(THR) Kó͘-sı̍t ê n̂g-ge̍k bōe pí-tit i; Chiok-siâⁿ ê kim m̄-ta̍t-tio̍h i.

(BCL) 古實的黃玉比得伊；足成的金呣值著伊。

20

(THR) Án-ni tì-hūi tùi toh-lo̍h lâi? Chhong-bêng ê só͘-chāi tī toh-lo̍h?

(BCL) 按呢智慧對叨落來？聰明的所在佇叨落？

21

(THR) Kì-jiân tùi it-chhè ū o̍ah-miā-ê ê ba̍k-chiu ún-ba̍t; Tùi khong-tiong ê pe-chiáu jia-iám.

(BCL) 既然對一切有活命者的目睭隱密，對空中的飛鳥遮掩。

22

(THR) A-pa-tùn kap Sí-sit kóng, Góan hī-khang thiaⁿ-kìⁿ i ê hong-siaⁿ.

(BCL) 亞巴頓及死失講：阮耳孔聽見伊的風聲。

23

(THR) Siōng-tè bêng-pe̍k tì-hūi ê lō͘, Iā chai i ê só͘-chāi.

(BCL) 上帝明白智慧的路，也知伊的所在。

24

(THR) In-ūi I kàm-chhat kàu tōe ê ke̍k-thâu, Piàn-khòaⁿ phó͘-thiⁿ-ē.

(BCL) 因為伊鑑察到地的極頭，遍看普天下，

25

(THR) Tiāⁿ-tio̍h hong ê khin-tāng, Koh niû chúi ê chōe-chió.

(BCL) 定著風的輕重，閣量水的多少；

26

(THR) I kā hō͘-chúi tiāⁿ-tio̍h lē, Kā lûi-tiān tiāⁿ-tio̍h i ê lō͘;

(BCL) 伊給雨水定著例，給雷電定著伊的路。

27

(THR) Hit-sî I khòaⁿ-kìⁿ i, lâi kóng-bêng i, I chō-chiâⁿ i, koh cha-chhat i.

(BCL) 彼時伊看見伊，來講明伊；伊造成伊，閣查察伊。

28

(THR) I tùi lâng kóng, Khòaⁿ ah, kèng-ùi Chú chiū-sī tì-hūi, Lī-khui pháiⁿ chiū-sī chhong-bêng.

(BCL) 伊對人講：看啊，敬畏主就是智慧；離開歹就是聰明。

Bible Color Mark

• 台語漢字羅馬本
• 巴克禮全羅