約珥書 第 1 章

1

(THR) Iâ-hô-hoa ê ōe lîm-kàu Pí-thó͘-jíⁿ ê kiáⁿ Iok-jíⁿ--ê.

(BCL) 耶和華的話臨到毗土珥的子約珥者。

2

(THR) Lāu-tōa lâng ah, lín tio̍h thiaⁿ chit-ê, chit só͘-chāi khiā-khí ê peh-sìⁿ ah, lín tio̍h àⁿ hī-khang, tng lín ê jı̍t á-sī lín ê lia̍t-chó͘ ê jı̍t, bat ū chit ê sū mah?

(BCL) 老大人啊，恁著聽此個；此所在徛起的百姓啊，恁著俯耳孔。當恁的日，抑是恁的列祖的日，曾有此個事嗎？

3

(THR) Lín tio̍h chiong chit ê sū thôan hō͘ lín ê kiáⁿ, kiáⁿ thôan hō͘ sun, sun thôan hō͘ āu-tāi.

(BCL) 恁著將此個事傳互恁的子，子傳互孫，孫傳互後代。

4

(THR) Chháu-meh chia̍h chhun--ê, tē-jī-chéng ê chháu-meh lâi chia̍h i; tē-jī-chéng chia̍h-chhun--ê, tē-saⁿ-chéng ê chháu-meh lâi chia̍h i; tē-saⁿ-chéng chia̍h-chhun-ê, tē-sì-chéng ê chháu-meh lâi chia̍h--i.

(BCL) 草蜢食剩的，第二種的草蜢來食伊；第二種食剩的，第三種的草蜢來食伊；第三種食剩的，第四種的草蜢來食伊。

5

(THR) Chiú-chùi ê lâng ah, lín tio̍h chhíⁿ lâi thî-khàu; hò͘ⁿ-chiú ê lâng ah, tio̍h ūi-tio̍h tiⁿ-chiú lâi thî-khàu; in-ūi bô chiú thang koh kàu lí ê chhùi lah.

(BCL) 酒醉的人啊，恁著醒來啼哭；好酒的人啊，著為著甜酒來啼哭，因為無酒通閣到你的嘴啦。

6

(THR) In-ūi ū chı̍t-cho̍k chiūⁿ--lâi góa ê tōe, kiông-béng koh bōe-sǹg-tit; i ê khí chhin-chhiūⁿ sai ê khí, i ê gê chhin-chhiūⁿ bú ê sai ê gê;

(BCL) 因為有一族上來我的地，強猛閣算得；伊的齒親像獅的齒，伊的牙親像母的獅的牙。

7

(THR) i húi-hōai góa ê phû-tô-chhiū, pak góa ê bû-hoa-kó chhiū, hō͘ i kng liu-liu, lâi khì-sak i; i ê ki piàn-chòe pe̍h.

(BCL) 伊毀壞我的葡萄樹，剝我的無花果樹，互伊光溜溜，來棄拺伊，伊的枝變做白。

8

(THR) Lí tio̍h thî-khàu, chhin-chhiūⁿ chāi-sek-lú io hâ môa-pò͘, ūi-tio̍h siàu-liân ê sî ê tiōng-hu thî-khàu.

(BCL) 你著啼哭，親像在室女腰縖麻布，為著少年的時的丈夫啼哭。

9

(THR) Sò͘-chè kap tiān-chiú, lóng bô thang kàu Iâ-hô-hoa ê tiān; ho̍k-sāi Iâ-hô-hoa ê chè-si lóng pi-ai.

(BCL) 素祭及奠酒攏無通到耶和華的殿；服事耶和華的祭司攏悲哀。

10

(THR) Chhân pha-hng, tōe pi-ai; in-ūi gō͘-kak húi-hōai, sin-chiú ta--khì, iû iā khiàm-kheh.

(BCL) 田拋荒，地悲哀；因為五穀毀壞，新酒乾去，油也欠缺。

11

(THR) Choh-chhân lâng ah, lín tio̍h kiàn-siàu, siu-lí phû-tô-hn̂g--ê ah, lín tio̍h ai-kiò, ūi-tio̍h sió-be̍h kap tōa-be̍h ê iân-kò͘; in-ūi chhân-hn̂g ê siu-sêng lóng bô--khì.

(BCL) 作田人啊，恁著見誚；修理葡萄園者啊，恁著哀叫；為著小麥及大麥的緣故，因為田園的收成攏無去。

12

(THR) Phû-tô-chhiū ta--khì, bû-hoa-kó chhiū ko͘-tâ, sia̍h-liû, chó-chhiū, pîn-kó, liân chhân-iá it-chhè ê chhiū-ba̍k, iā lóng ko͘-tâ; jîn-kan ê khòai-lo̍k lóng siau-bô.

(BCL) 葡萄樹乾去；無花果樹枯焦。石榴、棗樹、蘋果，連田野一切的樹木也攏枯焦；人間的快樂攏消無。

13

(THR) Chè-si ah, lín tio̍h hâ môa-pò͘ thî-khàu; tī chè-tôaⁿ ho̍k-sāi--ê ah, lín tio̍h ai-kiò; chòe góa ê Siōng-tè chhe-ēng ê lâng ah, lín tio̍h lâi, chhēng môa-pò͘ kè-mî; in-ūi sò͘-chè kap tiān-chiú, lóng bô thang hiàn tī lín ê Siōng-tè ê tiān.

(BCL) 祭司啊，恁著縖麻布啼哭；佇祭壇服事的啊，恁著哀叫；做我的上帝差用的人啊，恁著來穿麻布過暝，因為素祭及奠酒攏無通獻佇恁的上帝的殿。

14

(THR) Lín tio̍h siat chı̍t ê kìm-chia̍h ê sèng-jı̍t, tiàu-chı̍p giâm-siok-hōe, chio-chı̍p lāu-tōa, kap kok-lāi it-chhè khiā-khí ê peh-sìⁿ, kàu Iâ-hô-hoa lín Siōng-tè ê tiān, ai-kiû Iâ-hô-hoa.

(BCL) 恁著設一個禁食的聖日，召集嚴肅會，招集老大及國內一切徛起的百姓，到耶和華──恁上帝的殿，哀求耶和華。

15

(THR) Chhám ah, hit-jı̍t, in-ūi Iâ-hô-hoa ê jı̍t kūn lah, chhin-chhiūⁿ húi-bia̍t beh tùi Chôan-lêng--ê lâi.

(BCL) 慘啊！彼日，因為耶和華的日近啦。親像毀滅欲對全能者來。

16

(THR) Chia̍h-mı̍h kiám-m̄-sī tùi lán ê ba̍k-chêng tōan-cho̍at mah? Hoaⁿ-hí khòai-lo̍k kiám-m̄-sī tùi lán ê Siōng-tè ê tiān thêng-chí mah?

(BCL) 食物豈呣是對咱的目前斷絕嗎？歡喜快樂豈呣是對咱的上帝的殿停止嗎？

17

(THR) Chéng-chí nōa tī thô͘-lāi; chhek-chhng hong-hòe; chhek-siāⁿ tó-hōai; in-ūi gō͘-kak ta-la--khì.

(BCL) 種子爛佇土內；粟倉荒廢，粟倒壞；因為五穀乾拉去。

18

(THR) Cheng-siⁿ ai-háu kàu cháiⁿ-iūⁿ! gû-kûn hun-lōan, in-ūi bô chháu; iûⁿ-kûn iā khùn-khó͘.

(BCL) 精牲哀哮到怎樣；牛群紛亂，因為無草；羊群也困苦。

19

(THR) Iâ-hô-hoa ah, góa kiû-kiò Lí; in-ūi hé sio-bia̍t khòng-iá ê chháu-tiûⁿ, hé-iām sio-chīn chhân-iá ê chhiū-ba̍k.

(BCL) 耶和華啊，我求叫你，因為火燒滅曠野的草場；火焰燒盡田野的樹木。

20

(THR) Chhân-iá ê cháu-siù ǹg Lí teh chhóan; in-ūi khoe-chúi ta--khì, hé iā sio-bia̍t khòng-iá ê chháu-tiûⁿ.

(BCL) 田野的走獸向你喘；因為溪水乾去，火也燒滅曠野的草場。

Bible Color Mark

• 台語漢字羅馬本
• 巴克禮全羅