約書亞記 第 13 章

1

(THR) Iok-su-a hè-siū chōe, nî-lāu, Iâ-hô-hoa tùi i kóng, Lí hè-siū chōe, nî-lāu, eng-kai chhú ê tōe, iáu ū chhun chin-chōe;

(BCL) 約書亞歲壽多年老，耶和華對伊講：「你歲壽多年老，應該取的地，猶有剩真多，

2

(THR) só͘ chhun ê tōe, chiū-sī Hui-lī-sū lâng ê chôan-kéng, kap Ki-su̍t lâng ê chôan-tōe;

(BCL) 所剩的地就是非利士人的全境，及基述人的全地。

3

(THR) tùi Ai-kı̍p thâu-chêng ê Se-hat, ǹg-pak kàu Í-kek-lûn ê kéng-kài, che chiū sǹg-chòe Ka-lâm lâng ê tōe; Hui-lī-sū lâng gō͘ ê siú-léng, chiū-sī Ka-sat lâng, A-sı̍t-tu̍t lâng, A-sı̍t-ki-lûn lâng, Ka-tek lâng, Í-kek-lûn lâng; koh ū lâm-hng A-ōe lâng;

(BCL) 對埃及頭前的西曷向北，到以革倫的境界，這就算做迦南人的地。非利士人五個首領就是迦薩人、亞實突人、亞實基倫人、迦特人、以革倫人，閣有南方亞衛人。

4

(THR) Ka-lâm lâng ê chôan-tōe, Se-tùn lâng ê Bí-a-la̍h, kàu A-hut, tı̍t-kàu A-mô͘-lī lâng ê kau-kài;

(BCL) 迦南人的全地，西頓人的米亞拉到亞弗，直到亞摩利人的交界。

5

(THR) koh ū Ka-pa-le̍k lâng ê tōe, kap ǹg jı̍t-chhut ka-nn̂g ê Lī-pa-lùn, tùi Hek-bûn soaⁿ-kha ê Pa-le̍k-ka-tek, kàu Hap-má ê lō͘-kháu;

(BCL) 閣有迦巴勒人的地，及向日出整個的黎巴嫩，對黑門山腳的巴力迦得，到哈馬的路口。

6

(THR) khiā-khí soaⁿ-tōe lóng-chóng ê peh-sìⁿ, tùi Lī-pa-lùn kàu Bí-su-lī-hut-má-im, Se-tùn ê chèng-lâng, Góa beh tī Í-sek-lia̍t lâng ê bīn-chêng kóaⁿ in chhut-khì; lí thang chiàu Góa só͘ bēng-lēng lí ê, pun hiah ê tōe hō͘ Í-sek-lia̍t lâng chòe-gia̍p.

(BCL) 徛起山地攏總的百姓，對黎巴嫩到米斯利弗瑪音，西頓的眾人，我欲佇以色列人的面前趕出去。你通照我所命令你的，分許個地互以色列人做業。

7

(THR) Taⁿ lí tio̍h chiong chit ê tōe pun hō͘ káu chi-phài kap Má-ná-se pòaⁿ-chi-phài chòe-gia̍p.

(BCL) 今你著將此個地分互九支派及瑪拿西半支派做業。

8

(THR) Liû-piān, Ka-tek, nn̄g chi-phài, kap Má-ná-se iáu pòaⁿ-chi-phài, saⁿ-kap tit-tio̍h Mô͘-se só͘ siúⁿ-sù ê gia̍p, tī Iok-tàn tang-sì hit-pêng, chiū-sī chiàu Iâ-hô-hoa ê lô͘-po̍k Mô͘-se só͘ hō͘ in ê.

(BCL) 流便、迦得二支派及瑪拿西猶半支派，相及得著摩西所賞賜的業，佇約但東勢彼旁，就是照耶和華的奴僕摩西所互的：

9

(THR) Sī tùi A-lùn soaⁿ-kok-piⁿ ê A-lô-jíⁿ, kap soaⁿ-kok-tiong ê siâⁿ, í-kı̍p Bí-tí-pa ê chôan pîⁿ-iûⁿ, tı̍t-kàu Tí-pún;

(BCL) 是對亞嫩山谷邊的亞羅珥及山谷中的城，以及米底巴的全平洋，直到底本，

10

(THR) kap tiàm tī Hi-sı̍t-pún chòe-ông, A-mô͘-lī lâng ê ông Se-hông chiah ê siâⁿ, kàu A-bûn lâng ê kau-kài;

(BCL) 及踮佇希實本做王亞摩利人的王西宏諸個城，到亞捫人的交界；

11

(THR) koh ū Ki-lia̍t tōe, Ki-su̍t lâng, Má-ka lâng ê tōe-kài, kap ka-nn̂g ê Hek-bûn soaⁿ, ka-nn̂g ê Pa-san, kàu Sat-ka;

(BCL) 閣有基列地、基述人、瑪迦人的地界，及整個的黑門山、整個的巴珊，到撒迦；

12

(THR) koh Pa-san ông Go̍k ê chôan-kok, i tī A-su-tha-lio̍k kap Í-tek-lâi chòe-ông; i sī Lī-ho̍at-im cho̍k só͘ chhun-ê; in-ūi chiah-ê lóng sī Mô͘-se só͘ phah ê, só͘ kóaⁿ ê.

(BCL) 閣巴珊王噩的全國──伊佇亞斯他錄及以得來做王（伊是利乏音族所剩的）。因為諸個攏是摩西所拍的、所趕的。

13

(THR) Chóng-sī Í-sek-lia̍t lâng bô kóaⁿ Ki-su̍t lâng, Má-ka lâng; kàu kin-á-jı̍t Ki-su̍t, Má-ka iû-gôan tiàm tī Í-sek-lia̍t lâng ê tiong-kan.

(BCL) 總是以色列人無趕基述人、瑪迦人；到今仔日基述、瑪迦猶原踮佇以色列人的中間。

14

(THR) To̍k-to̍k bô pun gia̍p hō͘ Lī-bī ê chi-phài; Iâ-hô-hoa Í-sek-lia̍t ê Siōng-tè sio-chè ê chè-mı̍h chòe in ê gia̍p, chiàu I só͘ tùi i kóng ê.

(BCL) 獨獨無分業互利未的支派。耶和華──以色列的上帝燒祭的祭物做的業，照伊所對伊講的。

15

(THR) Mô͘-se pun hō͘ Liû-piān chi-phài ê, chiàu in ê chong-cho̍k.

(BCL) 摩西分互流便支派的照的宗族。

16

(THR) In ê kéng-kài sī A-lùn soaⁿ-kok-piⁿ ê A-lô-jíⁿ, kap soaⁿ-kok-tiong ê siâⁿ, óa-kūn Bí-tí-pa ê chôan pîⁿ-iûⁿ,

(BCL) 的境界是亞嫩山谷邊的亞羅珥及山谷中的城，倚近米底巴的全平洋；

17

(THR) Hi-sı̍t-pún kap i pîⁿ-iûⁿ hiah ê siâⁿ, Tí-pún, Pa-bo̍at-pa-le̍k, Pek-pa-le̍k-bián;

(BCL) 希實本及伊平洋許個城，底本、巴末巴力、伯巴力勉、

18

(THR) Ngá-cha̍p, Ki-tí-bo̍k, Bí-hoat-ap;

(BCL) 雅雜、基底莫、米法押、

19

(THR) Ki-lia̍t-têng, Se-pí-má, kap soaⁿ-kok tiong ê soaⁿ Sè-lia̍t-hap-sa-hat;

(BCL) 基列亭、西比瑪、及山谷中的山細列哈沙轄、

20

(THR) Pek-pì-jíⁿ, Pì-su-ka ê soaⁿ-phiâⁿ, Pek-iâ-se-bo̍at;

(BCL) 伯毗珥、毗斯迦的山坪、伯耶西末；

21

(THR) koh pîⁿ-iûⁿ hiah ê siâⁿ, tī Hi-sı̍t-pún chòe-ông ê A-mô͘-lī lâng ê ông Se-hông ê chôan-kok; Mô͘-se phah i kap Bí-tiân hiah ê siú-léng, chiū-sī Í-bī, Lī-kim, So͘-jíⁿ, Hō͘-jíⁿ, Lī-pa; chiah-ê lóng sī tiàm tī hit só͘-chāi chòe siú-léng, sio̍k tī Se-hông ê.

(BCL) 閣平洋許個城，佇希實本做王的亞摩利人的王西宏的全國。摩西拍伊及米甸許個首領，就是以未、利金、蘇珥、戶珥、利巴諸個；攏是踮佇彼所在做首領屬佇西宏的。

22

(THR) Í-sek-lia̍t lâng thâi hiah ê lâng ê sî, iā ēng to thâi Pí-jíⁿ ê kiáⁿ, su̍t-sū Pa-lân.

(BCL) 以色列人許個人的時，也用刀比珥的子術士巴蘭。

23

(THR) Liû-piān lâng ê kéng-kài, i ê gia̍p tī Iok-tàn kap hô-piⁿ ê tōe. Che sī Liû-piān lâng ê gia̍p, chiàu in ê chong-cho̍k, chiah ê siâⁿ, chiah ê hiuⁿ-siā.

(BCL) 流便人的境界，伊的業佇約但及河邊的地。這是流便人的業照的宗族諸個城，諸個鄉社。

24

(THR) Mô͘-se pun hō͘ Ka-tek lâng, chiàu Ka-tek chi-phài ê chong-cho̍k.

(BCL) 摩西分互迦得人照迦得支派的宗族。

25

(THR) In ê kéng-kài sī Ngá-siā kap Ki-lia̍t it-chhè ê siâⁿ, kap A-bûn lâng chı̍t-pòaⁿ ê tōe, kàu La̍h-pa thâu-chêng ê A-lô-jíⁿ.

(BCL) 的境界是雅謝及基列一切的城，及亞捫人一半的地，到拉巴頭前的亞羅珥；

26

(THR) Tùi Hi-sı̍t-pún kàu La̍h-bo̍at-bí-su-pa, kap Pí-to-lêng, koh tùi Má-hap-liām, kàu Tí-phek ê kéng-kài;

(BCL) 對希實本到拉抹米斯巴及比多寧，閣對瑪哈念到底璧的境界，

27

(THR) kap soaⁿ-kok-tiong ê Pek-a-lân, Pek-lêng-la̍h, So͘-kat, Sat-hun, chiū-sī Hi-sı̍t-pún ông Se-hông kok-lāi só͘ chhun ê tōe, í-kı̍p Iok-tàn hô kap hô-piⁿ ê tōe, tı̍t-kàu Ki-nî-lia̍t hái ê ke̍k-thâu, tī Iok-tàn hit-pêng ê tang-sì.

(BCL) 及山谷中的伯亞蘭、伯寧拉、疏割、撒分，就是希實本王西宏國內所剩的地，以及約但河及河邊的地，直到基尼烈海的極頭，佇約但彼旁的東勢。

28

(THR) Che sī Ka-tek lâng chiàu i ê chong-cho̍k só͘ tit-tio̍h chòe-gia̍p chiah ê siâⁿ, kap hiuⁿ-siā.

(BCL) 這是迦得人照伊的宗族所得著做業諸個城，及鄉社。

29

(THR) Mô͘-se pun hō͘ Má-ná-se pòaⁿ-chi-phài-ê, sī chiàu Má-ná-se lâng pòaⁿ-chi-phài ê chong-cho̍k.

(BCL) 摩西分互瑪拿西半支派的，是照瑪拿西人半支派的宗族。

30

(THR) In ê kéng-kài sī tùi Má-hap-liām khí, pau-hâm Pa-san chôan-tōe, chiū-sī Pa-san ông Go̍k ê chôan-kok, kap tī Pa-san Gāi-jíⁿ it-chhè ê siâⁿ, kiōng la̍k-cha̍p ê siâⁿ;

(BCL) 的境界是對瑪哈念起，包含巴珊全地，就是巴珊王噩的全國，及佇巴珊、睚珥一切的城，共六十個城。

31

(THR) Ki-lia̍t ê chı̍t-pòaⁿ, kap A-su-tha-lio̍k, Í-tek-lâi, sī sio̍k Pa-san ông Go̍k ê kok ê siâⁿ, sī hō͘ Má-ná-se ê kiáⁿ, Má-kiat, chiū-sī Má-kiat ê kiáⁿ-sun ê chı̍t-pòaⁿ, chiàu i ê chong-cho̍k.

(BCL) 基列的一半，及亞斯他錄、以得來，是屬巴珊王噩的國的城，是互瑪拿西的子瑪吉就是瑪吉的子孫的一半，照伊的宗族。

32

(THR) Téng-bīn sī Mô͘-se tī Iok-tàn hit-pêng tang-sì, Iâ-lī-ko tùi-bīn Mô͘-ap ê pîⁿ-iûⁿ, só͘ pun ê gia̍p.

(BCL) 頂面是摩西佇約但彼旁東勢耶利哥對面摩押的平洋，所分的業。

33

(THR) To̍k-to̍k Lī-bī chi-phài, Mô͘-se bô pun-gia̍p hō͘ in; Iâ-hô-hoa Í-sek-lia̍t ê Siōng-tè sī chòe in ê sán-gia̍p, chiàu I só͘ kā in kóng ê.

(BCL) 獨獨利未支派，摩西無分業互。耶和華──以色列的上帝是做的產業，照伊所給講的。

Bible Color Mark

• 台語漢字羅馬本
• 巴克禮全羅