約書亞記 第 14 章

1

(THR) Í-sek-lia̍t lâng tī Ka-lâm tōe só͘ tit-tio̍h ê gia̍p, chiū-sī chè-si Í-lī-a-sat, kap Lùn ê kiáⁿ Iok-su-a, kap Í-sek-lia̍t ta̍k chi-phài ê cho̍k-tiúⁿ, só͘ pun hō͘ in ê, lóng kì tī ē-tóe.

(BCL) 以色列人佇迦南地所得著的業，就是祭司以利亞撒及嫩的子約書亞，及以色列逐支派的族長所分互的，攏記佇下底，

2

(THR) Sī chiàu Iâ-hô-hoa thok Mô͘-se só͘ bēng-lēng ê, liam-khau pun hō͘ káu chi-phài koh pòaⁿ-chi-phài.

(BCL) 是照耶和華託摩西所命令的，拈鬮分互九支派閣半支派。

3

(THR) In-ūi Mô͘-se tī Iok-tàn hô hit-pêng, í-keng pun-gia̍p hō͘ nn̄g ê chi-phài koh pòaⁿ-chi-phài; to̍k-to̍k tī in tiong-kan bô pun-gia̍p hō͘ Lī-bī lâng.

(BCL) 因為摩西佇約但河彼旁已經分業互二個支派閣半支派，獨獨佇中間無分業互利未人。

4

(THR) In-ūi Iok-sak ê kiáⁿ-sun sī nn̄g chi-phài, chiū-sī Má-ná-se kap Í-hoat-liân; chóng-sī bô ēng tōe pun hō͘ Lī-bī lâng chòe-gia̍p; chí-ū hō͘ in siâⁿ thang khiā-khí, kap siâⁿ ê kau-iá, thang chòe cheng-siⁿ kap châi-bu̍t ê lō͘-ēng.

(BCL) 因為約瑟的子孫是二支派，就是瑪拿西及以法蓮，總是無用地分互利未人做業，只有互城通徛起，及城的郊野，通做精牲及財物的路用。

5

(THR) Í-sek-lia̍t lâng chiàu Iâ-hô-hoa só͘ bēng-lēng Mô͘-se ê khì kiâⁿ, lâi pun hit ê tōe.

(BCL) 以色列人照耶和華所命令摩西的去行，來分彼個地。

6

(THR) Hit-sî Iû-tāi lâng tī Kiat-kah kìⁿ Iok-su-a; ū Ki-nî-sé cho̍k, Iâ-hu-nî ê kiáⁿ Ka-le̍k, kā i kóng, Chá tī Ka-te-su-pa-nî-a, Iâ-hô-hoa tùi Siōng-tè ê lô͘-po̍k Mô͘-se só͘ kóng, koan-hē lí góa ê tāi-chì ê, lí lóng chai.

(BCL) 彼時，猶大人佇吉甲見約書亞，有基尼洗族耶孚尼的子迦勒給伊講：「早佇加低斯巴尼亞，耶和華對上帝的奴僕摩西所講，關係你我的代誌的，你攏知。

7

(THR) Iâ-hô-hoa ê lô͘-po̍k Mô͘-se tùi Ka-te-su-pa-nî-a chhe góa thau-khòaⁿ chit ê tōe, hit-sî góa tú-á sì-cha̍p hè; góa chīn góa ê sim hê-hok i.

(BCL) 耶和華的奴僕摩西對加低斯巴尼亞差我偷看此個地，彼時我抵仔四十歲；我盡我的心回覆伊。

8

(THR) Chóng-sī kap góa chiūⁿ-khì hiah ê hiaⁿ-tī hō͘ peh-sìⁿ sim sit-chì; to̍k-to̍k góa choan-sim tè Iâ-hô-hoa góa ê Siōng-tè.

(BCL) 總是，及我上去許個兄弟互百姓心失志；獨獨我全心隨耶和華──我的上帝。

9

(THR) Tng-jı̍t Mô͘-se chiù-chōa kóng, Lí ê kha só͘ ta̍h ê tōe, tiāⁿ-tio̍h beh kui lí kap lí ê kiáⁿ-sun, éng-óan chòe-gia̍p; in-ūi lí choan-sim kun-tè Iâ-hô-hoa góa ê Siōng-tè.

(BCL) 當日摩西咒誓講：『你的腳所踏的地定著欲歸你及你的子孫永遠做業，因為你全心跟隨耶和華──我的上帝。』

10

(THR) Khòaⁿ ah, Iâ-hô-hoa chiàu I só͘ kóng ê, hō͘ góa o̍ah-teh í-keng sì-cha̍p-gō͘ nî, chiū-sī tùi Í-sek-lia̍t lâng kiâⁿ tī khòng-iá, Iâ-hô-hoa kā Mô͘-se kóng che ōe ê sî; khòaⁿ ah, hiān-kim góa poeh-cha̍p-gō͘ hè lah.

(BCL) 看啊，耶和華照伊所講的，互我活已經四十五年；就是對以色列人行佇曠野，耶和華給摩西講這話的時。看啊，現今我八十五歲啦，

11

(THR) Góa iáu-kú ióng-kiāⁿ, chhin-chhiūⁿ Mô͘-se chhe góa khì hit-jı̍t chı̍t-iūⁿ, bô-lūn sī cheng-chiàn, sī chhut-jı̍p, góa ê khùi-la̍t hit-sî cháiⁿ-iūⁿ, hiān-chāi góa ê khùi-la̍t iā sī án-ni.

(BCL) 我猶久勇健，親像摩西差我去彼日一樣；無論是爭戰，是出入，我的氣力彼時怎樣，現在我的氣力也是按呢。

12

(THR) Kiû lí ēng Iâ-hô-hoa hit-jı̍t só͘ kóng ê soaⁿ-tōe hō͘ góa; in-ūi hit-jı̍t lí iā ū thiaⁿ-kìⁿ; tī-hia ū A-la̍p cho̍k ê lâng, i ê siâⁿ khoah-tōa kian-kò͘; nā Iâ-hô-hoa kap góa tī-teh, góa chiū beh kóaⁿ in chhut, chiàu Iâ-hô-hoa só͘ kóng ê.

(BCL) 求你用耶和華彼日所講的山地互我；因為彼日你也有聽見，佇遐有亞衲族的人，伊的城闊大堅固。若耶和華及我佇，我就欲趕出，照耶和華所講的。」

13

(THR) Iok-su-a chiū kā i chiok-hok, ēng Hi-pek-lûn hō͘ Iâ-hu-nî ê kiáⁿ Ka-le̍k chòe-gia̍p.

(BCL) 約書亞就給伊祝福，用希伯崙互耶孚尼的子迦勒做業。

14

(THR) Só͘-í Hi-pek-lûn chòe Ki-nî-sé cho̍k Iâ-hu-nî ê kiáⁿ Ka-le̍k ê sán-gia̍p, tı̍t-kàu kin-á-jı̍t; in-ūi i choan-sim kun-tè Iâ-hô-hoa Í-sek-lia̍t ê Siōng-tè.

(BCL) 所以希伯崙做基尼洗族耶孚尼的子迦勒的產業，直到今仔日，因為伊全心跟隨耶和華──以色列的上帝。

15

(THR) Hi-pek-lûn chêng kiò Ki-lia̍t-a-pa; chit ê A-pa sī A-la̍p cho̍k-tiong tē-it tōa ê lâng. Tùi án-ni kok-lāi thài-pêng, bô koh kau-chiàn.

(BCL) 希伯崙前叫基列亞巴；此個亞巴是亞衲族中第一大的人。對按呢國內太平，無閣交戰。

Bible Color Mark

• 台語漢字羅馬本
• 巴克禮全羅