猶大書 第 1 章

1

(THR) Iâ-so͘ Ki-tok ê lô͘-po̍k, Ngá-kok ê hiaⁿ-tī, Iû-tāi, phoe kià hō͘ siū tiàu ê, tī Pē Siōng-tè tit-tio̍h thiàⁿ, ūi-tio̍h Iâ-so͘ Ki-tok lâi pó-siú ê;

(BCL) 耶穌基督的奴僕，雅各的兄弟猶大，批寄互受召的、佇父上帝得著疼、為著耶穌基督來保守者。

2

(THR) Gōan lîn-bín, pêng-an, thiàⁿ-thàng, ke-thiⁿ chōe-chōe hō͘ lín.

(BCL) 願憐憫、平安、疼痛、加添多多互恁。

3

(THR) Só͘ thiàⁿ ê hiaⁿ-tī ah, góa pún chin tì-ì beh siá phoe hō͘ lín, gī-lūn lán saⁿ-kap ū hūn ê chín-kiù, tng hit sî chiū put-tek-put tio̍h siá phoe khó͘-khǹg lín, ūi-tio̍h chòe chı̍t-ē kau-tāi tī sèng-tô͘ ê tō-lí, lâi chhut-la̍t kau-chiàn.

(BCL) 所疼的兄弟啊，我本真致意欲寫批互恁，議論咱相及有份的拯救，當彼時就不得不著寫批苦勸恁，為著做一下交代佇聖徒的道理來出力交戰。

4

(THR) In-ūi ū kúi-nā lâng àm-chīⁿ jı̍p-lâi, chiū-sī chá tāi-seng tiāⁿ-tio̍h beh siū chit ê sím-phòaⁿ ê; in sī put-khiân ê lâng, chiong lán ê Siōng-tè ê un hóan-tńg chòe hòng-chhiòng ê in-iû, iā m̄ jīn to̍k-it ê Chú-cháiⁿ, lán ê Chú Iâ-so͘ Ki-tok.

(BCL) 因為有幾若人暗靜入來，就是早代先定著欲受此個審判的，是不虔的人，將咱的上帝的恩反轉做放縱的因由，也呣認獨一的主宰──咱的主耶穌基督。

5

(THR) Lín sī í-keng bat bān sū ê lâng, taⁿ góa ài hō͘ lín ōe kì-tit, chiū-sī Chú í-keng kiù peh-sìⁿ chhut Ai-kı̍p tōe, āu-lâi bia̍t-bô hiah ê m̄ sìn ê.

(BCL) 恁是已經識萬事的人，今我愛互恁會記得，就是主已經救百姓出埃及地，後來滅無許個呣信的。

6

(THR) Koh ū thiⁿ-sài bô siú in ê pún-chit, lī-khui ka-kī khiā-khí ê só͘-chāi, Chú ēng éng-óan ê só-liān, kìm-siú in tī o͘-àm ê ē-bīn, kàu tī tōa jı̍t-kî ê sím-phòaⁿ.

(BCL) 閣有天使無守的本質、離開家己徛起的所在，主用永遠的鎖鍊禁收佇黑暗的下面，到佇大日期的審判。

7

(THR) Chhin-chhiūⁿ Só͘-to-má, Gô͘-mô͘-la̍h, í-kı̍p sì-ûi ê siâⁿ, iā tâng in ê khóan lâi kiâⁿ îm-lōan, thàn ge̍k-sèng ê sek-io̍k, chiū siū éng-óan ê hé ê hêng-ho̍at. hē-teh chòe kàm-kài.

(BCL) 親像所多瑪、蛾摩拉以及四圍的城，也同的款來行淫亂，趁逆性的色慾，就受永遠的火的刑罰，下做鑑戒。

8

(THR) Nā-sī chiah ê lâng iā chhin-chhiūⁿ án-ni, tī in ê bîn-bāng phah lâ-sâm jio̍k-thé, iā biáu-sī pān chèng-sū ê, siat-to̍k chun-kùi ê.

(BCL) 若是諸個人也親像按呢，佇的眠夢拍垃墋肉體，也藐視辦政事的，褻瀆尊貴的。

9

(THR) Chì-tōa ê thiⁿ-sài, Bí-ka-le̍k, kap Mô͘-kúi saⁿ-chiⁿ ê sî, ūi-tio̍h Mô͘-se ê sin-si piān-lūn, siōng-chhiáⁿ m̄ káⁿ ēng pòng-to̍k ê ōe chek-chōe i, chí-ū kóng, Gōan Chú chek-pī lí.

(BCL) 至大的天使米迦勒及魔鬼相爭的時，為著摩西的身屍辯論，尚且呣敢用謗瀆的話責罪伊，只有講：「願主責備你！」

10

(THR) To̍k-to̍k chiah ê lâng siat-to̍k kìⁿ-nā in só͘ m̄ chai ê; koh in pún-sèng só͘ ōe hiáu-tit ê, chhin-chhiūⁿ bô lêng-sèng ê o̍ah mı̍h, tī chiah-ê ka-kī pāi-hōai.

(BCL) 獨獨諸個人褻瀆見若所呣知的。閣本性所會曉得的親像無靈性的活物，佇諸個家己敗壞。

11

(THR) In ū chai-ē ah! in-ūi in ū kiâⁿ Kai-ún ê lō͘, ūi-tio̍h châi-lī cháu-chông tī Pa-lân ê chhò-gō͘, siū bia̍t-bô tī Ko-lat ê ûi-ke̍h.

(BCL) 有災禍啊！因為有行該隱的路，為著財利走佇巴蘭的錯誤，受滅無佇可拉的違逆。

12

(THR) In tī lín ê hô-ài-se̍k sī chòe àm ê chio̍h-ta, kap lín siâng toh, in iúⁿ-chhī ka-kī lóng bô kiaⁿ-ùi; in sī bô hō͘ ê hûn, hō͘ hong chhe kè-khì; sī chhiu-thiⁿ bô ké-chí ê chhiū, sí-liáu koh sí, kun-thâu lóng pu̍ih-khí-lâi;

(BCL) 佇恁的和愛席是做暗的石礁，及恁像桌。養飼家己，攏無驚畏；是無雨的雲，互風吹過去；是秋天無果子的樹，死了閣死，根頭攏拔起來；

13

(THR) sī hái ê kông éng, thò͘-chhut ka-kī thang kiàn-siàu ê phe̍h; sī lī-khui in ê só͘-chāi ê chhiⁿ, ū o͘-o͘ àm-àm lâu teh thèng-hāu in kàu tī éng-óan.

(BCL) 是海的狂湧，吐出家己通見誚的沫；是離開的所在的星，有黑黑暗暗留聽候到佇永遠。

14

(THR) A-tong tē chhit tāi ê sun Í-lo̍k chhàm-gú chiah ê lâng, kóng, Khòaⁿ ah! Chú kap I bān-bān ê sèng ê lâi,

(BCL) 亞當第七代的孫以諾讖語諸個人講：「看啊！主及伊萬萬個聖者來，

15

(THR) lâi sím-phòaⁿ chèng lâng, lâi chek-chōe it-chhè bô kèng-khiân ê lâng, ūi-tio̍h in ēng bô kèng-khiân só͘ kiâⁿ it-chhè bô kèng-khiân ê sū, kap kìⁿ-nā bô kèng-khiân ê chōe-jîn só͘ kóng hôaiⁿ-ok kong-kek I ê ōe.

(BCL) 來審判眾人，來責罪一切無敬虔的人，為著用無敬虔所行一切無敬虔的事，及見若無敬虔的罪人所講橫惡攻擊伊的話。」

16

(THR) Chiah ê lâng nga̍uh-nga̍uh liām, òan-chhoeh, chiàu in ê su-io̍k lâi kiâⁿ, in ê chhùi kóng khoa-kháu ê ōe, ūi-tio̍h châi-lī lâi thiám-mī lâng.

(BCL) 諸個人耦耦唸，怨慼，照的私慾來行，的嘴講誇口的話，為著財利來諂媚人。

17

(THR) Só͘ thiàⁿ ê hiaⁿ-tī ah, taⁿ lín tio̍h kì-tit lán ê Chú Iâ-so͘ Ki-tok ê sù-tô͘ só͘ tāi-seng kóng ê ōe;

(BCL) 所疼的兄弟啊，今恁著記得咱的主耶穌基督的使徒所代先講的話。

18

(THR) ū kā lín kóng, Lō͘-bé ê sî beh ū hì-hiok ê lâng chiàu in ka-kī bô kèng-khiân ê su-io̍k lâi kiâⁿ.

(BCL) 有給恁講，路尾的時欲有戲謔的人照家己無敬虔的私慾來行。

19

(THR) In hiah-ê sī hun-tóng ê, thàn hiat-khì, bô ū Sîn.

(BCL) 許個是分黨的、趁血氣、無有神。

20

(THR) Nā-sī só͘ thiàⁿ ê hiaⁿ-tī ah, tio̍h tī lín chì-sèng ê sìn ka-kī khí-chō, tī Sèng Sîn lâi kî-tó,

(BCL) 若是所疼的兄弟啊，著佇恁至聖的信家己起造，佇聖神來祈禱，

21

(THR) tio̍h tī Siōng-tè ê thiàⁿ ka-kī pó-siú, ǹg-bāng lán ê Chú Iâ-so͘ Ki-tok ê lîn-bín kàu éng-o̍ah.

(BCL) 著佇上帝的疼家己保守，向望咱的主耶穌基督的憐憫，到永活。

22

(THR) Ū giâu-gî ê, lín tio̍h lîn-bín i;

(BCL) 有僥疑者，恁著憐憫伊；

23

(THR) ū-ê, lín tio̍h chhiúⁿ in chhut hé lâi kiù in; ū-ê, lín tio̍h kiaⁿ-hiâⁿ lâi lîn-bín i; liân hit ê hō͘ jio̍k-thé phah lâ-sâm ê i-ho̍k, iā tio̍h iàm-ò͘ⁿ i.

(BCL) 有的，恁著搶出火，來救；有的，恁著驚惶來憐憫伊，連彼個互肉體拍垃墋的衣服也著厭惡伊。

24

(THR) Taⁿ ōe chiàu-kò͘ lín bô tio̍h-tak, iā hō͘ lín khiā tī I êng-kng ê bīn-chêng, bô hâ-chhû, ū khòai-lo̍k ê,

(BCL) 今會照顧恁無著觸、也互恁徛佇伊榮光的面前，無瑕疵、有快樂的，就是獨一的上帝──咱的救主，

25

(THR) chiū-sī to̍k-it ê Siōng-tè lán ê Kiù-chú, gōan êng-kng, ui-giâm, kôan-lêng, khùi-la̍t, tùi lán ê Chú Iâ-so͘ Ki-tok, lóng kui I, tùi bān kó͘ í-chêng, kap hiān-kim, tı̍t kàu bān sè. À-bēng.

(BCL) 願榮光、威嚴、權能、氣力，對咱的主耶穌基督攏歸伊，對萬古以前及現今，直到萬世。阿們！

Bible Color Mark

• 台語漢字羅馬本
• 巴克禮全羅