士師記 第 11 章

1

(THR) Ki-lia̍t lâng Iâ-hut-tha sī chı̍t ê tōa kôan-lêng ê ióng-sū, sī kī-lú ê kiáⁿ; Iâ-hut-tha sī Ki-lia̍t só͘ siⁿ ê.

(BCL) 基列人耶弗他是一個大權能的勇士，是妓女的子。耶弗他是基列所生的。

2

(THR) Ki-lia̍t ê bó͘ iā kā i siⁿ kúi-nā ê kiáⁿ; i ê bó͘ só͘ siⁿ ê kiáⁿ í-keng tōa-hàn, chiū kek-tio̍k Iâ-hut-tha, kā i kóng, Lí m̄-thang tī góan lāu-pē ê ke sêng-chiap gia̍p, in-ūi lí sī pa̍t ê hū-jîn-lâng ê kiáⁿ.

(BCL) 基列的某也給伊生幾若個子：伊的某所生的子已經大漢，就革逐耶弗他，給伊講：「你呣通佇阮老父的家承接業，因為你是別個婦仁人的子。」

3

(THR) Iâ-hut-tha chiū cháu, siám-pī i ê hiaⁿ-tī, khì tiàm tī Tô-pek ê tōe; ū húi-lūi chū-chı̍p tī Iâ-hut-tha hia, tè i chhut-jı̍p.

(BCL) 耶弗他就走閃避伊的兄弟，去踮佇陀伯的地，有匪類聚集佇耶弗他遐，隨伊出入。

4

(THR) Kè ū hiah-kú, A-bûn lâng kap Í-sek-lia̍t kau-chiàn.

(BCL) 過有許久，亞捫人及以色列交戰。

5

(THR) A-bûn lâng kap Í-sek-lia̍t kau-chiàn ê sî, Ki-lia̍t ê tiúⁿ-ló khì beh chio Iâ-hut-tha tùi Tô-pek ê tōe lâi;

(BCL) 亞捫人及以色列交戰的時，基列的長老去，欲招耶弗他對陀伯的地來；

6

(THR) tùi Iâ-hut-tha kóng, Chhiáⁿ lí lâi chòe góan ê gôan-sòe, góan chiū thang kap A-bûn lâng kau-chiàn.

(BCL) 對耶弗他講：「請你來做阮的元帥，阮就通及亞捫人交戰。」

7

(THR) Iâ-hut-tha ìn Ki-lia̍t ê tiúⁿ-ló kóng, Chêng lín kiám m̄-sī òan-hūn góa, kóaⁿ góa chhut lāu-pē ê ke mah? taⁿ lín tú-tio̍h hōan-lān, siáⁿ-sū lâi góa chia ah?

(BCL) 耶弗他應基列的長老講：「前恁豈呣是怨恨我、趕我出老父的家嗎？今恁抵著患難啥事來我遮啊？」

8

(THR) Ki-lia̍t ê tiúⁿ-ló ìn Iâ-hut-tha kóng, Góan taⁿ só͘-í kui-ǹg lí, sī ài lí kap góan khì, kap A-bûn lâng kau-chiàn; lí thang chòe góan ê thâu, lâi kóan-hat Ki-lia̍t it-chhè khiā-khí ê peh-sìⁿ.

(BCL) 基列的長老應耶弗他講：「阮今所以歸向你，是愛你及阮去，及亞捫人交戰；你通做阮的頭來管轄基列一切徛起的百姓。」

9

(THR) Iâ-hut-tha tùi Ki-lia̍t ê tiúⁿ-ló kóng, Lín chhōa góa tò--khì, kap A-bûn lâng kau-chiàn, Iâ-hô-hoa chiong in kau tī góa ê bīn-chêng, góa chin-chiàⁿ beh chòe lín ê thâu mah?

(BCL) 耶弗他對基列的長老講：「恁導我倒去，及亞捫人交戰，耶和華將交佇我的面前，我真正欲做恁的頭嗎？」

10

(THR) Ki-lia̍t ê tiúⁿ-ló ìn Iâ-hut-tha kóng, Iâ-hô-hoa tī lán tiong-kan chòe kan-chèng, góan tek-khak chiàu lí ê ōe kiâⁿ.

(BCL) 基列的長老應耶弗他講：「耶和華佇咱中間做干證，阮的確照你的話行。」

11

(THR) Iâ-hut-tha chiū kap Ki-lia̍t ê tiúⁿ-ló tò--khì; peh-sìⁿ chiū lı̍p i chòe-thâu, chòe gôan-sòe. Iâ-hut-tha tī Bí-su-pa chiong ka-kī it-chhè ê ōe pâi-lia̍t tī Iâ-hô-hoa ê bīn-chêng.

(BCL) 耶弗他就及基列的長老倒去，百姓就立伊做頭、做元帥。耶弗他佇米斯巴將家己一切的話排列佇耶和華的面前。

12

(THR) Iâ-hut-tha chhe hiah ê sù-chiá khì kìⁿ A-bûn lâng ê ông kóng, Lí kap góa sím-mı̍h kan-sia̍p, kéng-jiân lâi góa chia kong-kek góa ê tōe ah?

(BCL) 耶弗他差許個使者去見亞捫人的王，講：「你及我甚麼干涉，竟然來我遮攻擊我的地啊？」

13

(THR) A-bûn lâng ê ông ìn Iâ-hut-tha ê sù-chiá kóng, In-ūi Í-sek-lia̍t lâng tùi Ai-kı̍p chiūⁿ-lâi ê sî, chiàm góa ê tōe, tùi A-lùn kàu Ngá-phok, tı̍t-kàu Iok-tàn; taⁿ lín tio̍h gōan-gōan chiong chiah ê tōe hêng góa.

(BCL) 亞捫人的王應耶弗他的使者講：「因為以色列人對埃及上來的時佔我的地，對亞嫩到雅博，直到約但。今恁著願願將諸個地還我！」

14

(THR) Iâ-hut-tha koh chhe sù-chiá khì kìⁿ A-bûn lâng ê ông, kā i kóng,

(BCL) 耶弗他閣差使者去見亞捫人的王，

15

(THR) Iâ-hut-tha án-ni kóng, Í-sek-lia̍t lâng pēng bô chiàm Mô͘-ap tōe, kap A-bûn lâng ê tōe.

(BCL) 給伊講：「耶弗他按呢講，以色列人並無佔摩押地及亞捫人的地。

16

(THR) Í-sek-lia̍t lâng tùi Ai-kı̍p chiūⁿ-lâi, keng-kè khòng-iá kàu Âng-hái, lâi kàu Ka-te-su;

(BCL) 以色列人對埃及上來經過曠野到紅海，來到加低斯，

17

(THR) hit-sî Í-sek-lia̍t chiū chhe sù-chiá khì kìⁿ Í-tong ông kóng, Kiû lí chún góan keng-kè lí ê tōe; chóng-sī Í-tong ông m̄ thiaⁿ i. Koh chhe sù-chiá khì kìⁿ Mô͘-ap ông, i iā m̄-chún; Í-sek-lia̍t lâng chiū tiàm tī Ka-te-su.

(BCL) 彼時以色列就差使者去見以東王，講：『求你准阮經過你的地。』總是以東王呣聽伊。閣差使者去見摩押王，伊也呣准。以色列人就踮佇加低斯。

18

(THR) In koh keng-kè khòng-iá, se̍h Í-tong tōe kap Mô͘-ap tōe, tùi Mô͘-ap tōe ê tang--sì kè-lâi, tī A-lùn hit-pêng chat-iâⁿ; iā bô jı̍p Mô͘-ap ê kéng-lāi; in-ūi A-lùn hô sī Mô͘-ap ê kau-kài.

(BCL) 閣經過曠野，踅以東地及摩押地，對摩押地的東勢過來，佇亞嫩彼旁紮營，也無入摩押的境內，因為亞嫩河是摩押的交界。

19

(THR) Í-sek-lia̍t chhe lâng khì kìⁿ A-mô͘-lī ông Se-hông, chiū-sī Hi-sı̍t-pún ê ông, Í-sek-lia̍t tùi i kóng, Kiû lí chún góan kè lí ê tōe, khì góan ka-kī ê só͘-chāi.

(BCL) 以色列差人去見亞摩利王西宏，就是希實本的王，以色列對伊講：『求你准阮過你的地，去阮家己的所在。』

20

(THR) Chóng-sī Se-hông m̄-sìn Í-sek-lia̍t, m̄-hō͘ in keng-kè i ê kéng-kài; Se-hông chiū chū-chı̍p i ê chèng peh-sìⁿ, tī Ngá-cha̍p chat-iâⁿ, kap Í-sek-lia̍t lâng kau-chiàn.

(BCL) 總是西宏呣信以色列，呣互經過伊的境界，西宏就聚集伊的眾百姓佇雅雜紮營，及以色列人交戰。

21

(THR) Iâ-hô-hoa Í-sek-lia̍t ê Siōng-tè, ēng Se-hông kap i ê chèng peh-sìⁿ kau tī Í-sek-lia̍t lâng ê chhiú, in chiū phah in; tùi án-ni Í-sek-lia̍t chiū tit-tio̍h hit só͘-chāi khiā-khí ê A-mô͘-lī lâng chôan-tōe.

(BCL) 耶和華──以色列的上帝用西宏及伊的眾百姓交佇以色列人的手，就拍，對按呢以色列就得著彼所在徛起的亞摩利人全地；

22

(THR) In tit-tio̍h A-mô͘-lī lâng ê chôan kéng-kài, tùi A-lùn kàu Ngá-phok, tùi khòng-iá kàu Iok-tàn.

(BCL) 得著亞摩利人的全境界，對亞嫩到雅博，對曠野到約但。

23

(THR) Iâ-hô-hoa Í-sek-lia̍t ê Siōng-tè tī I peh-sìⁿ Í-sek-lia̍t ê bīn-chêng, kóaⁿ-chhut A-mô͘-lī lâng; lí iā beh tit-tio̍h in ê tōe mah?

(BCL) 耶和華──以色列的上帝佇伊百姓以色列的面前趕出亞摩利人，你也欲得著的地嗎？

24

(THR) Lí ê siōng-tè Ki-bo̍at só͘ siúⁿ-sù lí tit-tio̍h-ê, lí bô tit-tio̍h i lâi chòe-gia̍p mah? Iâ-hô-hoa góan ê Siōng-tè kìⁿ-nā tùi góan ê bīn-chêng só͘ kóaⁿ-chhut-ê, góan beh tit-tio̍h i.

(BCL) 你的上帝基抹所賞賜你得著的你無得著伊來做業嗎？耶和華──阮的上帝見若對阮的面前所趕出的，阮欲得著伊。

25

(THR) Lí kiám iâⁿ-kè Mô͘-ap ông Se-phoat ê kiáⁿ Pa-le̍k mah? i kiám bat kap Í-sek-lia̍t lâng kè-kàu mah? kiám bat kap in kau-chiàn mah?

(BCL) 你豈贏過摩押王西撥的子巴勒嗎？伊豈曾及以色列人計較嗎？豈曾及交戰嗎？

26

(THR) Í-sek-lia̍t lâng tiàm tī Hi-sı̍t-pún kap i ê hiuⁿ-siā, A-lô-jíⁿ kap i ê hiuⁿ-siā, kap A-lùn hô-piⁿ hiah ê siâⁿ, í-keng ū saⁿ-pah nî, lín tī hit-sî siáⁿ-sū bô chhú in tò-tńg ah?

(BCL) 以色列人踮佇希實本及伊的鄉社，亞羅珥及伊的鄉社，及亞嫩河邊許個城，已經有三百年；恁佇彼時啥事無取倒轉啊？

27

(THR) Góa bô tek-chōe lí, lí hóan-tńg kap góa kau-chiàn, sı̍t-chāi bû-lí; gōan sím-phòaⁿ ê Iâ-hô-hoa kin-á-jı̍t tī Í-sek-lia̍t kap A-bûn ê tiong-kan lâi phòaⁿ-tòan.

(BCL) 我無得罪你，你反轉及我交戰，實在無理。願審判的耶和華今仔日佇以色列及亞捫的中間來判斷。」

28

(THR) Chóng-sī A-bûn lâng ê ông m̄-khéng thiaⁿ Iâ-hut-tha chhe lâng tùi i kóng ê ōe.

(BCL) 總是亞捫人的王呣肯聽耶弗他差人對伊講的話。

29

(THR) Iâ-hô-hoa ê Sîn lîm-kàu Iâ-hut-tha; i chiū keng-kè Ki-lia̍t kap Má-ná-se, koh keng-kè kàu Ki-lia̍t ê Bí-su-pa, koh tùi Ki-lia̍t ê Bí-su-pa keng-kè kàu A-bûn lâng hia.

(BCL) 耶和華的神臨到耶弗他，伊就經過基列及瑪拿西，閣經過到基列的米斯巴，閣對基列的米斯巴經過到亞捫人遐。

30

(THR) Iâ-hut-tha chiū tùi Iâ-hô-hoa hē-gōan, kóng, Lí nā chiong A-bûn lâng kau tī góa ê chhiú,

(BCL) 耶弗他就對耶和華下願，講：「你若將亞捫人交佇我的手，

31

(THR) góa tùi A-bûn lâng hia pêng-an tò-lâi ê sî, kìⁿ-nā tùi góa ê chhù ê mn̂g chhut-lâi ngiâ-chih góa-ê, beh kui tī Iâ-hô-hoa, góa beh hiàn i chòe sio-chè.

(BCL) 我對亞捫人遐平安倒來的時，見若對我的厝的門出來迎接我的，欲歸佇耶和華，我欲獻伊做燒祭。」

32

(THR) Tùi án-ni Iâ-hut-tha khì A-bûn lâng hia, kap in kau-chiàn; Iâ-hô-hoa chiong in kau tī i ê chhiú;

(BCL) 對按呢耶弗他去亞捫人遐，及交戰；耶和華將交佇伊的手，

33

(THR) i chiū phah in, tōa-tōa thâi-sí in, tùi A-lô-jíⁿ kàu Bí-le̍k, tı̍t-kàu A-pī-le̍k-ki-la̍h-bêng, kiōng jī-cha̍p ê siâⁿ; án-ni A-bûn lâng chiū khut-ho̍k tī Í-sek-lia̍t lâng.

(BCL) 伊就拍大大死，對亞羅珥到米匿，直到亞備勒基拉明，共二十個城。按呢亞捫人就屈服佇以色列人。

34

(THR) Iâ-hut-tha tò-lâi Bí-su-pa kàu ka-kī ê chhù, hit-sî i ê cha-bó͘-kiáⁿ kia̍h lin-long-kó͘ thiàu-bú chhut-lâi ngiâ-chih i; chit-ê sī i to̍k-siⁿ ê, í-gōa bô kiáⁿ, bô cha-bó͘-kiáⁿ.

(BCL) 耶弗他倒來米斯巴到家己的厝，彼時，伊的查某子抬鈴瓏鼓跳舞出來迎接伊，此個是伊獨生的，以外無子無查某子。

35

(THR) Iâ-hut-tha khòaⁿ-kìⁿ i, chiū thiah-lı̍h saⁿ kóng, Ai--ah, góa ê cha-bó͘-kiáⁿ, lí hō͘ góa chin-chhám, lí iā sī hō͘ góa chin tōa kan-lân; in-ūi góa í-keng tùi Iâ-hô-hoa khui-chhùi, bōe-ōe siu tò-tńg.

(BCL) 耶弗他看見伊，就拆裂衫講：「唉啊，我的查某子，你互我真慘，你也是互我真大艱難；因為我已經對耶和華開嘴，會收倒轉。」

36

(THR) I ìn kóng, Góa ê pē ah, lí í-keng tùi Iâ-hô-hoa khui-chhùi, chiū tio̍h chiàu lí ê chhùi só͘ kóng-chhut-ê kiâⁿ tī góa; in-ūi Iâ-hô-hoa í-keng ūi-tio̍h lí pò-siû lí ê tùi-te̍k A-bûn lâng.

(BCL) 伊應講：「我的父啊，你已經對耶和華開嘴，就著照你的嘴所講出的行佇我，因為耶和華已經為著你報仇你的對敵亞捫人」；

37

(THR) Koh tùi i ê lāu-pē kóng, Ū chit kiāⁿ sū kiû lí ún-chún, iông-ún góa nn̄g-ge̍h-jı̍t, hō͘ góa kap góa ê tâng-phòaⁿ khì soaⁿ--nih, thang thî-khàu góa chòe chāi-sek-lú.

(BCL) 閣對伊的老父講：「有一件事求你允准：容允我二月日，互我及我的同伴去山裡，通啼哭我做在室女。」

38

(THR) I kóng, Lí khì ah. Chiū chhe i khì nn̄g-ge̍h-jı̍t; i kap tâng-phōaⁿ khì, tī soaⁿ--nih ūi-tio̍h i chòe chāi-sek-lú thî-khàu;

(BCL) 伊講：「你去啊！」就差伊去二月日。伊及同伴去，佇山裡為著伊做在室女啼哭。

39

(THR) nn̄g-ge̍h-jı̍t í-keng móa, i tò-lâi kàu lāu-pē hia, lāu-pē chiū chiàu i só͘ hē ê gōan khóan-thāi i; i lóng bô chhin-kūn ta-po͘-lâng.

(BCL) 二月日已經滿，伊倒來到老父遐，老父就照伊所下的願款待伊。伊攏無親近查甫人。

40

(THR) Āu-lâi Í-sek-lia̍t tiong ū chit ê lē, ta̍k-nî Í-sek-lia̍t chiah ê cha-bó͘-gín-ná khì tui-tō Ki-lia̍t lâng Iâ-hut-tha ê cha-bó͘-kiáⁿ, múi-nî sì jı̍t.

(BCL) 後來以色列中有此個例，逐年以色列諸個查某囝仔去追悼基列人耶弗他的查某子每年四日。

Bible Color Mark

• 台語漢字羅馬本
• 巴克禮全羅