士師記 第 12 章

1

(THR) Í-hoat-liân lâng chū-chı̍p kàu pak-hng, tùi Iâ-hut-tha kóng, Lí kè-khì kap A-bûn lâng kau-chiàn, siáⁿ-sū bô kiò góan kap lí khì ah? góan beh ēng hé sio lí kap lí ê chhù.

(BCL) 以法蓮人聚集，到北方，對耶弗他講：「你過去及亞捫人交戰，啥事無叫阮及你去啊？阮欲用火燒你及你的厝。」

2

(THR) Iâ-hut-tha tùi in kóng, Góa kap góa ê peh-sìⁿ kap A-bûn lâng tōa kè-kàu; góa chio lín lâi, lín kéng-jiân bô kiù góa thoat-lī in ê chhiú;

(BCL) 耶弗他對講：「我及我的百姓及亞捫人大計較；我招恁來，恁竟然無救我脫離的手。

3

(THR) góa khòaⁿ-kìⁿ lín bô lâi kiù góa, góa chiū piàⁿ-miā chìn-chêng khì kong-kek A-bûn lâng; Iâ-hô-hoa chiong in kau tī góa ê chhiú, lín kin-á-jı̍t siáⁿ-sū lâi góa chia, beh kap góa kau-chiàn ah?

(BCL) 我看見恁無來救我，我就拼命進前去攻擊亞捫人，耶和華將交佇我的手。恁今仔日啥事來我遮欲及我交戰啊？」

4

(THR) Iâ-hut-tha chiū chū-chı̍p Ki-lia̍t ê chèng-lâng, kap Í-hoat-liân lâng kau-chiàn; Ki-lia̍t lâng phah-sí Í-hoat-liân lâng, in-ūi in kóng, Lín Ki-lia̍t lâng tī Í-hoat-liân Má-ná-se ê tiong-kan, sī Í-hoat-liân tô-cháu ê lâng.

(BCL) 耶弗他就聚集基列的眾人，及以法蓮人交戰。基列人拍死以法蓮人，因為講：「恁基列人佇以法蓮、瑪拿西的中間，是以法蓮逃走的人。」

5

(THR) Ki-lia̍t lâng tī Í-hoat-liân lâng ê thâu-chêng pé-siú Iok-tàn ê tō͘-kháu; Í-hoat-liân tô-cháu-ê nā kóng, Chhiáⁿ hō͘ góan kè-khì, Ki-lia̍t lâng chiū mn̄g i kóng, Lí sī Í-hoat-liân lâng á m̄-sī?

(BCL) 基列人佇以法蓮人的頭前，把守約但的渡口。以法蓮逃走的若講：「請互阮過去。」基列人就問伊講：「你是以法蓮人抑呣是？」

6

(THR) I nā kóng, M̄-sī, chiū kā i kóng, Lí kóng Sī-pò͘-lia̍t; i kóng chòe Se-pò͘-lia̍t, in-ūi in ê im kóng bōe chiàⁿ; in chiū lia̍h i, thâi tī Iok-tàn ê tō͘-kháu; hit-sî Í-hoat-liân lâng siū-thâi-ê, sì-bān nn̄g-chheng lâng.

(BCL) 伊若講：「呣是」，就給伊講：「你講『示播列』。」伊講做『西播列』，因為的音講正。就掠伊，佇約但的渡口。彼時以法蓮人受的四萬二千人。

7

(THR) Iâ-hut-tha chòe Í-sek-lia̍t ê sū-su la̍k-nî. Ki-lia̍t lâng Iâ-hut-tha sí, bâi-chòng tī Ki-lia̍t ê chı̍t ê siâⁿ.

(BCL) 耶弗他做以色列的士師六年。基列人耶弗他死，埋葬佇基列的一個城。

8

(THR) Iâ-hut-tha liáu-āu, ū Pek-lī-hêng lâng Í-pí-chàn chòe Í-sek-lia̍t ê sū-su;

(BCL) 耶弗他了後，有伯利恆人以比讚做以色列的士師。

9

(THR) i ū saⁿ-cha̍p ê kiáⁿ, koh saⁿ-cha̍p ê cha-bó͘-kiáⁿ kè tī gōa-kháu, iā tùi gōa-kháu kā i ê kiáⁿ chhōa saⁿ-cha̍p ê sim-pū; i chòe Í-sek-lia̍t ê sū-su chhit-nî.

(BCL) 伊有三十個子，閣三十個查某子；嫁佇外口。也對外口給伊的子娶三十個媳婦。伊做以色列的士師七年。

10

(THR) Í-pí-chàn sí, bâi-chòng tī Pek-lī-hêng.

(BCL) 以比讚死，埋葬佇伯利恆。

11

(THR) I liáu-āu, ū Se-pò͘-lûn lâng Í-lûn chòe Í-sek-lia̍t ê sū-su; i chòe Í-sek-lia̍t ê sū-su cha̍p-nî.

(BCL) 伊了後，有西布倫人以倫做以色列的士師，伊做以色列的士師十年。

12

(THR) Se-pò͘-lûn lâng Í-lûn sí, bâi-chòng tī Se-pò͘-lûn tōe ê A-ngá-lūn.

(BCL) 西布倫人以倫死，埋葬佇西布倫地的亞雅崙。

13

(THR) I liáu-āu, ū Pí-la̍h-tûn lâng, Hi-lia̍t ê kiáⁿ Ap-tùn, chòe Í-sek-lia̍t ê sū-su;

(BCL) 伊了後，有比拉頓人希列的子押頓做以色列的士師。

14

(THR) i ū sì-cha̍p ê kiáⁿ, saⁿ-cha̍p ê sun, khiâ chhit-cha̍p chiah lû-á; i chòe Í-sek-lia̍t ê sū-su poeh-nî.

(BCL) 伊有四十個子，三十個孫，騎七十隻驢仔。伊做以色列的士師八年。

15

(THR) Pí-la̍h-tùn lâng Hi-lia̍t ê kiáⁿ Ap-tùn sí, bâi-chòng tī Í-hoat-liân tōe ê Pí-la̍h-tùn, tī A-má-le̍k lâng ê soaⁿ-tōe.

(BCL) 比拉頓人希列的子押頓死，埋葬佇以法蓮地的比拉頓，佇亞瑪力人的山地。

Bible Color Mark

• 台語漢字羅馬本
• 巴克禮全羅