士師記 第 7 章

1

(THR) Iâ-lō͘-pa-le̍k chiū-sī Ki-tiân, i kap it-chhè tè i ê lâng, chá-chá khí-lâi, tī Hap-lu̍t chúi-chôaⁿ-piⁿ chat-iâⁿ; Bí-tiân iâⁿ tī in pak--sì ê soaⁿ-kok, óa-kūn Mô͘-lī soaⁿ.

(BCL) 耶路巴力就是基甸，伊及一切隨伊的人早早起來，佇哈律水泉邊紮營。米甸營佇北勢的山谷，倚近摩利山。

2

(THR) Iâ-hô-hoa tùi Ki-tiân kóng, Góa ēng Bí-tiân kau tī peh-sìⁿ ê chhiú, m̄-kú tè lí ê lâng siuⁿ-chōe, kiaⁿ-liáu Í-sek-lia̍t lâng tùi tī Góa lâi ka-kī khoa-kháu, kóng, Sī góa ka-kī ê chhiú kiù góa.

(BCL) 耶和華對基甸講：「我用米甸交佇百姓的手，呣拘隨你的人甚多，驚了以色列人對佇我來家己誇口，講：『是我家己的手救我。』

3

(THR) Taⁿ lí tio̍h soan-pò͘ hō͘ peh-sìⁿ thiaⁿ, kìⁿ-nā kiaⁿ-hiâⁿ lún-neh ê lâng, thang lī-khui Ki-lia̍t soaⁿ tò--khì; tùi án-ni peh-sìⁿ tiong ū nn̄g-bān nn̄g-chheng lâng tò--khì; iáu ū chhun chı̍t-bān.

(BCL) 今你著宣佈互百姓聽：『見若驚惶懾的人，通離開基列山倒去。』」對按呢百姓中有二萬二千人倒去，猶有剩一萬。

4

(THR) Iâ-hô-hoa tùi Ki-tiân kóng, Lâng iáu-kú siuⁿ-chōe; lí tio̍h chhōa in lo̍h-khì kàu chúi-piⁿ, Góa beh tī-hia kā lí chhì in; kìⁿ-nā Góa kí sím-mı̍h lâng tùi lí kóng, Chit-lâng thang kap lí khì, hit-lâng chiū thang kap lí khì; Góa kí sím-mı̍h lâng kā lí kóng, Chit-lâng m̄-thang kap lí khì, hit-lâng chiū m̄-thang khì.

(BCL) 耶和華對基甸講：「人猶久甚多；你著導落去到水邊，我欲佇遐給你試。見若我指甚麼人對你講：『此人通及你去』，彼人就通及你去；我指甚麼人給你講：『此人呣通及你去』，彼人就呣通去。」

5

(THR) Ki-tiân chiū chhōa peh-sìⁿ lo̍h-khì kàu chúi-piⁿ; Iâ-hô-hoa tùi Ki-tiân kóng, Kìⁿ-nā ēng chı̍h nà chúi, chhin-chhiūⁿ káu teh nà, hit-lâng tio̍h hō͘ i lēng-gōa khiā-teh, kìⁿ-nā kūi--lo̍h-khì lim-chúi-ê, iā tio̍h hō͘ i lēng-gōa khiā-teh.

(BCL) 基甸就導百姓落去到水邊。耶和華對基甸講：「見若用舌餂水，親像狗餂，彼人著互伊另外徛；見若跪落去飲水的，也著互伊另外徛。」

6

(THR) Ēng chhiú óa-chhùi lâi nà-chúi ê, ū saⁿ-pah lâng; kî-û hiah ê peh-sìⁿ lóng kūi--lo̍h-khì lim-chúi.

(BCL) 用手倚嘴來餂水的有三百人，其餘許個百姓攏跪落去飲水。

7

(THR) Iâ-hô-hoa kā Ki-tiân kóng, Góa beh ēng chiah ê nà-chúi ê saⁿ-pah lâng kiù lín, chiong Bí-tiân lâng kau tī lí ê chhiú; chèng peh-sìⁿ lóng thang tò--khì i ê só͘-chāi.

(BCL) 耶和華給基甸講：「我欲用諸個餂水的三百人救恁，將米甸人交佇你的手；眾百姓攏通倒去伊的所在。」

8

(THR) Peh-sìⁿ chhiú--nih chiū tòa kan-niû kap in ê sàu-kak; Ki-tiân chhe Í-sek-lia̍t chèng-lâng ta̍k-lâng tò-khì in ê pò͘-pîⁿ; chí-ū lâu chí saⁿ-pah lâng; Bí-tiân ê iâⁿ chat tī i ē-bīn ê soaⁿ-kok.

(BCL) 百姓手裡就帶乾糧及的哨角；基甸差以色列眾人逐人倒去的布棚，只有留此三百人。米甸的營紮佇伊下面的山谷。

9

(THR) Siâng hit-mî Iâ-hô-hoa kā Ki-tiân kóng, Khí--lâi, lo̍h--khì kàu hit ê iâⁿ-pôaⁿ, in-ūi Góa í-keng chiong i kau tī lí ê chhiú.

(BCL) 像彼暝，耶和華給基甸講：「起來，落去到彼個營盤，因為我已經將伊交佇你的手。

10

(THR) Lí nā m̄-káⁿ lo̍h--khì, lí kap lí ê lô͘-po̍k Phó͘-la̍h tio̍h lo̍h--khì hit ê iâⁿ-pôaⁿ;

(BCL) 你若呣敢落去，你及你的奴僕普拉著落去彼個營盤。

11

(THR) lí beh thiaⁿ-kìⁿ in só͘ kóng ê; jiân-āu lí chiū ū tám-le̍k lo̍h--khì kàu iâⁿ-pôaⁿ. I chiū kap i ê lô͘-po̍k Phó͘-la̍h lo̍h--khì kàu iâⁿ-pôaⁿ, tòa kun-khì-ê ê piⁿ-á.

(BCL) 你欲聽見所講的，然後你就有膽力落去到營盤。」伊就及伊的奴僕普拉落去到營盤帶軍器者的邊仔。

12

(THR) Bí-tiân lâng, A-má-le̍k lâng, kap tang-hng ê chèng-lâng, lóng tó tī soaⁿ-kok, chhin-chhiūⁿ chháu-meh hiah-chōe; in ê lo̍k-tô bōe-sǹg--tit, chōe chhin-chhiūⁿ hái-kîⁿ ê soa.

(BCL) 米甸人、亞瑪力人，及東方的眾人，攏倒佇山谷，親像草蜢許多。的駱駝算得，多親像海墘的沙。

13

(THR) Ki-tiân í-keng kàu, ū lâng ēng bāng kā i ê tâng-phōaⁿ kóng, Góa bāng-kìⁿ chı̍t ê bāng; khòaⁿ ah, ū chı̍t ê tōa-be̍h-piáⁿ kō-jı̍p Bí-tiân ê iâⁿ, kàu chı̍t ê pò͘-pîⁿ, chhiong hō͘ i tó, hō͘ pò͘-pîⁿ péng-lìn-tńg, tó kàu pîⁿ-tōe.

(BCL) 基甸已經到，有人用夢給伊的同伴講：「我夢見一個夢，看啊，有一個大麥餅翱入米甸的營，到一個布棚，衝互伊倒，互布棚反輪轉倒到平地。」

14

(THR) I ê tâng-phōaⁿ ìn kóng, Che m̄-sī pa̍t-hāng, chiū-sī Í-sek-lia̍t lâng, Iok-a-si ê kiáⁿ Ki-tiân ê to; Siōng-tè í-keng chiong Bí-tiân kap i ê chôan-kun kau tī i ê chhiú.

(BCL) 伊的同伴應講：「這呣是別項，就是以色列人約阿施的子基甸的刀；上帝已經將米甸及伊的全軍交佇伊的手。」

15

(THR) Ki-tiân thiaⁿ-kìⁿ chit ê bāng ê ōe, kap i ê kóe-seh, chiū kèng-pài Siōng-tè; tò--lâi kàu Í-sek-lia̍t ê iâⁿ-tiong, kóng, Khí-lâi ah, in-ūi Iâ-hô-hoa í-keng chiong Bí-tiân ê kun-tūi kau tī lín ê chhiú lah.

(BCL) 基甸聽見此個夢的話及伊的解說，就敬拜上帝，倒來到以色列的營中，講：「起來啊！因為耶和華已經將米甸的軍隊交佇恁的手啦。」

16

(THR) I chiū pun saⁿ-pah lâng chòe saⁿ-tūi, ēng sàu-kak kap khang-àng kau tī ta̍k-lâng ê chhiú, àng-lāi lóng khǹg hé-pé;

(BCL) 伊就分三百人做三隊，用哨角及空甕交佇逐人的手（甕內攏囥火把），

17

(THR) kā in kóng, Lín tio̍h khòaⁿ góa ê iūⁿ lâi chòe; góa kàu hit ê iâⁿ-pôaⁿ-piⁿ, góa só͘-chòe-ê, lín iā tio̍h án-ni chòe.

(BCL) 給講：「恁著看我的樣來做：我到彼個營盤邊我所做的，恁也著按呢做。

18

(THR) Góa kap hiah ê kap góa tī-teh ê lâng pûn sàu-kak ê sî, lín iā tio̍h tī iâⁿ ê sì-ûi pûn sàu-kak, kóng, Ūi-tio̍h Iâ-hô-hoa iā ūi-tio̍h Ki-tiân.

(BCL) 我及許個及我佇的人歕哨角的時，恁也著佇營的四圍歕哨角，講：『為著耶和華也為著基甸！』」

19

(THR) Ki-tiân kap tè i ê chı̍t-pah lâng, tī saⁿ-kiⁿ-thâu, lâi kàu iâⁿ-piⁿ; hit-sî chiú-kiⁿ-ê tú-á ōaⁿ-pan; in chiū pûn sàu-kak, kòng-phòa chhiú--nih ê àng;

(BCL) 基甸及隨伊的一百人，佇三更頭，來到營邊，彼時守更的抵仔換班，就歕哨角，摃破手裡的甕。

20

(THR) saⁿ-tūi ê lâng chiū lóng pûn sàu-kak, kòng phòa àng, tò-chhiú kia̍h hé-pé, chiàⁿ-chhiú kia̍h sàu-kak, lâi pûn, hoah kóng, Iâ-hô-hoa kap Ki-tiân ê to.

(BCL) 三隊的人就攏歕哨角，摃破甕，倒手抬火把，正手抬哨角來歕，喝講：「耶和華及基甸的刀！」

21

(THR) In tī iâⁿ ê sì-ûi ta̍k-ê khiā ka-kī ê ūi; chôan-iâⁿ ê lâng lóng cháu; hoah-hiàm hō͘ in tô-cháu.

(BCL) 佇營的四圍逐個徛家己的位；全營的人攏走，喝喊互逃走。

22

(THR) Pûn saⁿ-pah ki sàu-kak ê sî, Iâ-hô-hoa hō͘ chôan-iâⁿ ê lâng ta̍k-ê ēng to saⁿ-thâi; kun-tūi cháu kàu Se-lī-la̍h ê Pek-hap-sī-tha, koh kàu A-pek-bí-hô-la̍h ê kài, kūn tī Tha-pa.

(BCL) 歕三百支哨角的時，耶和華互全營的人逐個用刀相，軍隊走到西利拉的伯哈示他，閣到亞伯米何拉的界近佇他巴。

23

(THR) Í-sek-lia̍t lâng chiū tùi Ná-hut-tha-lī, A-siat, kap Má-ná-se chū-chı̍p, lâi tui-kóaⁿ Bí-tiân.

(BCL) 以色列人就對拿弗他利、亞設，及瑪拿西聚集來追趕米甸。

24

(THR) Ki-tiân chhe lâng piàn-kiâⁿ Í-hoat-liân ê soaⁿ-tōe, kóng, Lín lo̍h-lâi kong-kek Bí-tiân, thàn in bē kàu, pé-siú hiah ê tō͘-thâu, tı̍t-kàu Pek-pa-la̍h, chiū-sī Iok-tàn. Tùi án-ni Í-hoat-liân ê chèng-lâng chū-chı̍p, pé-siú hiah ê tō͘-thâu, tı̍t-kàu Pek-pa-la̍h, chiū-sī Iok-tàn;

(BCL) 基甸差人遍行以法蓮的山地，講：「恁落來攻擊米甸，趁未到把守許個渡頭，直到伯巴拉就是約但。」對按呢以法蓮的眾人聚集，把守許個渡頭，直到伯巴拉就是約但，

25

(THR) iā lia̍h-tio̍h Bí-tiân nn̄g ê siú-léng, Gô-lı̍p kap Se-i-pek; thâi-sí Gô-lı̍p tī Gô-lı̍p ê chio̍h-pôaⁿ, thâi-sí Se-i-pek tī Se-i-pek ê chiú-khut hia; koh tui-kóaⁿ Bí-tiân lâng; tòa Gô-lı̍p kap Se-i-pek ê thâu-khak kàu Iok-tàn hit-pêng, Ki-tiân hia.

(BCL) 也掠著米甸二個首領：俄立及西伊伯；死俄立佇俄立的石磐，死西伊伯佇西伊伯的酒窟遐；閣追趕米甸人，帶俄立及西伊伯的頭殼到約但彼旁，基甸遐。

Bible Color Mark

• 台語漢字羅馬本
• 巴克禮全羅