利未記 第 10 章

1

(THR) A-lûn ê kiáⁿ Ná-tap, A-pí-hō͘, ta̍k-ê the̍h ka-kī ê hiuⁿ-lô͘, tóe hé, kap hiuⁿ, tī Iâ-hô-hoa ê bīn-chêng hiàn pa̍t-hō ê hé, sī I só͘ bô bēng-lēng in ê.

(BCL) 亞倫的子拿答、亞比戶逐個提家己的香爐，貯火，及香，佇耶和華的面前獻別號的火，是伊所無命令的，

2

(THR) Chiū ū hé tùi Iâ-hô-hoa ê bīn-chêng hoat-chhut, lâi sio in; in chiū sí tī Iâ-hô-hoa ê bīn-chêng.

(BCL) 就有火對耶和華的面前發出，來燒，就死佇耶和華的面前。

3

(THR) Mô͘-se tùi A-lûn kóng, Che sī Iâ-hô-hoa só͘ kóng ê; I kóng, Góa beh tī chhin-kūn Góa ê lâng, hián-bêng chòe-sèng; tī chèng peh-sìⁿ ê bīn-chêng, Góa beh tit-tio̍h êng-kng. A-lûn iā chēng-chēng.

(BCL) 摩西對亞倫講：「這是耶和華所講的，伊講：『我欲佇親近我的人顯明做聖；佇眾百姓的面前，我欲得著榮光。』」亞倫也靜靜。

4

(THR) Mô͘-se kiò A-lûn ê chek Ou-siat ê kiáⁿ, Bí-sa-lī, Í-lī-sat-hóan lâi, kā in kóng, Chìn-chêng lâi chiong lín ê chhin-lâng tùi sèng-só͘ ê bīn-chêng kng kàu iâⁿ-gōa.

(BCL) 摩西叫亞倫的叔烏設的子米沙利、以利撒反來，給講：「進前來，將恁的親人對聖所的面前扛到營外。」

5

(THR) In nn̄g lâng chìn-chêng lâi, chiū in só͘ chhēng ê saⁿ kng-chhut iâⁿ-gōa; sī chiàu Mô͘-se só͘ bēng-lēng-ê.

(BCL) 二人進前來，就所穿的衫扛出營外，是照摩西所命令的。

6

(THR) Mô͘-se tùi A-lûn kap i ê kiáⁿ Í-lī-a-sat Í-tha-má kóng, M̄-thang phah-sòaⁿ thâu-mn̂g, iā m̄-thang thiah-lı̍h saⁿ; bián-tit lín sí, koh bián-tit Iâ-hô-hoa siū-khì hōe-chiòng; to̍k-to̍k lín ê hiaⁿ-tī Í-sek-lia̍t chôan-ke, ūi-tio̍h Iâ-hô-hoa só͘ hoat-chhut ê hé lâi ai-khàu.

(BCL) 摩西對亞倫及伊的子以利亞撒、以他瑪講：「呣通拍散頭毛，也呣通拆裂衫，免得恁死，閣免得耶和華受氣會眾；獨獨恁的兄弟以色列全家為著耶和華所發出的火來哀哭。

7

(THR) Lín iā m̄-thang chhut hōe-bō͘ mn̂g, kiaⁿ-liáu lín ōe sí; in-ūi Iâ-hô-hoa ê iû boah tī lín ê seng-khu; in chiū chiàu Mô͘-se ê ōe lâi kiâⁿ.

(BCL) 恁也呣通出會幕門，驚了恁會死，因為耶和華的油抹佇恁的身軀。」就照摩西的話來行。

8

(THR) Iâ-hô-hoa hoan-hù A-lûn kóng,

(BCL) 耶和華吩咐亞倫講：

9

(THR) Lí kap lí ê kiáⁿ jı̍p hōe-bō͘ ê sî, po̍h-chiú kāu-chiú, lóng m̄-thang lim, bián-tit lín sí, che beh chòe lín ta̍k sè-tāi éng-óan ê lē;

(BCL) 「你及你的子入會幕的時，薄酒、厚酒攏呣通飲，免得恁死；這欲做恁逐世代永遠的例。

10

(THR) hō͘ lín thang hun-piat sèng kap bô sèng-ê, bô chheng-khì kap chheng-khì-ê;

(BCL) 互恁通分別聖及無聖者，無清氣及清氣者。

11

(THR) koh hō͘ lín thang chiong Iâ-hô-hoa thok-tiōng Mô͘-se hoan-hù Í-sek-lia̍t lâng it-chhè ê lu̍t-lē kà-sī in.

(BCL) 閣互恁通將耶和華託仗摩西吩咐以色列人一切的律例教示。」

12

(THR) Mô͘-se tùi A-lûn kap i só͘ chhun ê kiáⁿ Í-lī-a-sat Í-tha-má kóng, Lín the̍h Iâ-hô-hoa hé-chè só͘ chhun ê sò͘-chè, tio̍h tī tôaⁿ-piⁿ chia̍h i, m̄-thang chham kàⁿ; in-ūi sī chì-sèng-ê.

(BCL) 摩西對亞倫及伊所剩的子以利亞撒、以他瑪講：「恁提耶和華火祭所剩的素祭，著佇壇邊食伊呣通參酵，因為是至聖者。

13

(THR) Lín tio̍h chia̍h i tī sèng ê só͘-chāi, in-ūi tī hiàn hō͘ Iâ-hô-hoa ê hé-chè-tiong, che sī lí ê hūn-gia̍h, kap lí ê kiáⁿ ê hūn-gia̍h; só͘ bēng-lēng góa ê chiū-sī án-ni.

(BCL) 恁著食伊佇聖的所在；因為佇獻互耶和華的火祭中，這是你的份額及你的子的份額；所命令我的就是按呢。

14

(THR) Só͘ iô ê heng, só͘ kú-khí ê thúi, lín tio̍h tī chheng-khì ê só͘-chāi chia̍h i, lí kap lí ê kiáⁿ, lí ê cha-bó͘-kiáⁿ, lóng tio̍h saⁿ-kap chia̍h; in-ūi chiah-ê sī tùi Í-sek-lia̍t lâng siā-un-chè-tiong hō͘ lí, chòe lí ê hūn-gia̍h, kap lí ê kiáⁿ ê hūn-gia̍h.

(BCL) 所搖的胸，所舉起的腿，恁著佇清氣的所在食伊。你及你的子你的查某子攏著相及食；因為諸個是對以色列人謝恩祭中互你，做你的份額及你的子的份額。

15

(THR) Só͘ kú-khí ê thúi, só͘ iô ê heng, in tio̍h kap hé-chè ê iû saⁿ-kap tòa-lâi, chòe iô-chè tī Iâ-hô-hoa ê bīn-chêng iô i; che tio̍h kui lí kap lí ê kiáⁿ, chòe éng-óan tit-tio̍h ê hūn-gia̍h; lóng sī chiàu Iâ-hô-hoa só͘ bēng-lēng ê.

(BCL) 所舉起的腿，所搖的胸，著及火祭的油相及帶來，做搖祭佇耶和華的面前搖伊；這著歸你及你的子，做永遠得著的份額，攏是照耶和華所命令的。」

16

(THR) Hit-sî Mô͘-se tì-ì chhē chòe sio̍k-chōe-chè ê soaⁿ-iûⁿ-káng; khòaⁿ ah, í-keng sio-khì; chiū siū-khì A-lûn só͘ chhun ê kiáⁿ Í-lī-a-sat Í-tha-má, kóng,

(BCL) 彼時摩西致意尋做贖罪祭的山羊，看啊，已經燒去，就受氣亞倫所剩的子以利亞撒、以他瑪講：

17

(THR) Chit ê sio̍k-chōe-chè í-keng sī chì-sèng-ê, I koh ēng hit-ê kui hō͘ lín, lâi tam-tng hōe-chiòng ê chōe-kòa, tī Iâ-hô-hoa ê bīn-chêng kā in sio̍k; lín siáⁿ-sū bô chia̍h i tī sèng ê só͘-chāi ah?

(BCL) 「此個贖罪祭已經是至聖者，伊閣用彼個歸互恁，來擔當會眾的罪過，佇耶和華的面前給贖，恁啥事無食伊佇聖的所在啊？

18

(THR) Khòaⁿ ah, hit ê huih bô tòa jı̍p sèng-só͘ lāi; lín pún tio̍h chia̍h i tī sèng-só͘; chiàu góa só͘ bēng-lēng-ê.

(BCL) 看啊，彼個血無帶入聖所內，恁本著食伊佇聖所，照我所命令的。」

19

(THR) A-lûn tùi Mô͘-se kóng, Khòaⁿ ah, kin-á-jı̍t in tī Iâ-hô-hoa ê bīn-chêng hiàn in ê sio̍k-chōe-chè, kap in ê sio-chè; góa koh tú-tio̍h chhin-chhiūⁿ án-ni; góa nā kin-á-jı̍t chia̍h sio̍k-chōe-chè, Iâ-hô-hoa kiám ōe khòaⁿ chòe-hó mah?

(BCL) 亞倫對摩西講：「看啊，今仔日佇耶和華的面前獻的贖罪祭及的燒祭，我閣抵著親像按呢，我若今仔日食贖罪祭，耶和華豈會看做好嗎？」

20

(THR) Mô͘-se thiaⁿ-kìⁿ, chiū lia̍h chit ê ōe chòe hó.

(BCL) 摩西聽見，就掠此個話做好。

Bible Color Mark

• 台語漢字羅馬本
• 巴克禮全羅