利未記 第 9 章

1

(THR) Kàu tē-poeh jı̍t, Mô͘-se tiàu A-lûn kap i ê kiáⁿ, í-kı̍p Í-sek-lia̍t hiah ê tiúⁿ-ló lâi.

(BCL) 到第八日，摩西召亞倫及伊的子，以及以色列許個長老來，

2

(THR) Tùi A-lûn kóng, Lí tio̍h chhú chı̍t-chiah sòe chiah gû-káng-á, chòe sio̍k-chōe-chè, chı̍t chiah mî-iûⁿ-káng chòe sio-chè, tio̍h bô hâ-chhû-ê, hiàn tī Iâ-hô-hoa ê bīn-chêng.

(BCL) 對亞倫講：「你著取一隻細隻牛仔做贖罪祭，一隻綿羊做燒祭，著無瑕疵的，獻佇耶和華的面前。

3

(THR) Lí iā tio̍h hoan-hù Í-sek-lia̍t lâng kóng, Lín tio̍h chhú chı̍t chiah soaⁿ-iûⁿ-káng chòe sio̍k-chōe-chè; koh chhú chı̍t chiah gû-á-kiáⁿ, kap chı̍t chiah mî-iûⁿ-á, lóng tio̍h bē-móa-nî, koh tio̍h bô hâ-chhû ê, chòe sio-chè.

(BCL) 你也著吩咐以色列人講：『恁著取一隻山羊做贖罪祭，閣取一隻牛仔子及一隻綿羊仔，攏著未滿年、閣著無瑕疵的，做燒祭，

4

(THR) Koh chhú chı̍t chiah gû-káng, chı̍t chiah mî-iûⁿ-káng, chòe siā-un-chè, hiàn tī Iâ-hô-hoa ê bīn-chêng, kap chhú tiau-hô iû ê sò͘-chè; in-ūi kin-á-jı̍t Iâ-hô-hoa beh hián-hiān hō͘ lín khòaⁿ.

(BCL) 閣取一隻牛，一隻綿羊做謝恩祭，獻佇耶和華的面前，及取調和油的素祭，因為今仔日耶和華欲顯現互恁看。』

5

(THR) In chiū chiàu Mô͘-se só͘ bēng-lēng-ê tòa kàu hōe-bō͘ chêng; hōe-chiòng lóng kūn-óa lâi khiā tī Iâ-hô-hoa ê bīn-chêng.

(BCL) 就照摩西所命令的，帶到會幕前；會眾攏近倚來，徛佇耶和華的面前。

6

(THR) Mô͘-se kóng, Che sī Iâ-hô-hoa bēng-lēng lín só͘ tio̍h kiâⁿ ê; Iâ-hô-hoa ê êng-kng chiū beh hián-hiān hō͘ lín khòaⁿ.

(BCL) 摩西講：「這是耶和華命令恁所著行的；耶和華的榮光就欲顯現互恁看。」

7

(THR) Mô͘-se tùi A-lûn kóng, Lí tio̍h kàu tôaⁿ-chêng, hiàn lí ê sio̍k-chōe-chè, kap lí ê sio-chè, ūi pún-sin kap peh-sìⁿ sio̍k-chōe; koh hiàn peh-sìⁿ ê lé-mı̍h, thòe in sio̍k-chōe, lóng chiàu Iâ-hô-hoa só͘ bēng-lēng-ê.

(BCL) 摩西對亞倫講：「你著到壇前，獻你的贖罪祭及你的燒祭，為本身及百姓贖罪，閣獻百姓的禮物，替贖罪；攏照耶和華所命令的。」

8

(THR) A-lûn chiū kàu tôaⁿ-chêng, thâi hit chiah gû-á-kiáⁿ, ūi pún-sin chòe sio̍k-chōe-chè ê.

(BCL) 亞倫就到壇前，彼隻牛仔子為本身做贖罪祭的。

9

(THR) A-lûn chiah ê kiáⁿ phâng hit ê huih hō͘ i; i chiū ēng chńg-thâu-á ùn huih, boah tī tôaⁿ-téng hiah ê kak; koh ēng huih tò tī tôaⁿ-kha-nı̍h.

(BCL) 亞倫諸個子捧彼個血互伊，伊就用指頭仔搵血，抹佇壇頂許個角，閣用血倒佇壇腳裡。

10

(THR) To̍k-to̍k sio̍k-chōe-chè ê iû kap io-chí, kap koaⁿ-nı̍h ê bāng-se, i lóng sio tī tôaⁿ-téng; chiàu Iâ-hô-hoa só͘ bēng-lēng Mô͘-se ê.

(BCL) 獨獨贖罪祭的油及腰子，及肝裡的網紗，伊攏燒佇壇頂，照耶和華所命令摩西的；

11

(THR) I koh ēng hé chiong bah kap phê sio tī iâⁿ-gōa.

(BCL) 伊閣用火將肉及皮燒佇營外。

12

(THR) Chiū thâi sio-chè ê cheng-siⁿ; A-lûn chiah ê kiáⁿ phâng huih hō͘ i, i chiū hiù tī tôaⁿ-téng ê chiu-ûi.

(BCL) 就燒祭的精牲，亞倫諸個子捧血互伊，伊就灑佇壇頂的周圍，

13

(THR) In koh ēng sio-chè ê bah, chı̍t-tè chı̍t-tè liân thâu the̍h hō͘ i; i lóng sio tī tôaⁿ-téng.

(BCL) 閣用燒祭的肉一塊一塊連頭提互伊，伊攏燒佇壇頂；

14

(THR) I koh sóe chōng-hú kap thúi, sio tī tôaⁿ-téng sio-chè ê téng-bīn.

(BCL) 伊閣洗臟腑及腿，燒佇壇頂燒祭的頂面。

15

(THR) I tòa peh-sìⁿ ê lé-mı̍h, chiong hit-chiah chòe peh-sìⁿ sio̍k-chōe-chè ê soaⁿ-iûⁿ-káng thâi i, ūi-tio̍h chōe lâi hiàn, kap khí-thâu-ê tâng chı̍t-iūⁿ.

(BCL) 伊帶百姓的禮物，將彼隻做百姓贖罪祭的山羊伊，為著罪來獻，及起頭的同一樣；

16

(THR) Iā tòa sio-chè chiàu lē lâi hiàn.

(BCL) 也帶燒祭，照例來獻。

17

(THR) I koh tòa sò͘-chè, tùi hit tiong-kan mi chı̍t-pé; che sī tī chá-khí-sî ê sio-chè í-gōa.

(BCL) 伊閣帶素祭，對彼中間搣一把，這是佇早起時的燒祭以外。

18

(THR) Koh thâi gû-káng kap mî-iûⁿ-káng chòe peh-sìⁿ ê siā-un-chè; A-lûn chiah ê kiáⁿ phâng huih hō͘ i, i chiū hiù tī tôaⁿ-téng ê chiu-ûi.

(BCL) 閣牛及綿羊做百姓的謝恩祭。亞倫諸個子捧血互伊，伊就灑佇壇頂的周圍；

19

(THR) Koh the̍h gû-káng ê iû; kap mî-iûⁿ-káng pûi ê bé, í-kı̍p khàm chōng-hú ê iû, kap io-chí, kap koaⁿ-nı̍h ê bāng-se.

(BCL) 閣提牛的油及綿羊肥的尾，以及蓋臟腑的油及腰子，及肝裡的網紗；

20

(THR) In chiong chiah ê iû hē tī hiah ê heng ê téng-bīn, i chiū chiong iû sio tī tôaⁿ-téng.

(BCL) 將諸個油下佇許個胸的頂面，伊就將油燒佇壇頂。

21

(THR) Chiah ê heng kap chiàⁿ-thúi, A-lûn ēng i chòe iô-chè, tī Iâ-hô-hoa ê bīn-chêng iô i; lóng sī chiàu Mô͘-se só͘ bēng-lēng-ê.

(BCL) 諸個胸及正腿，亞倫用伊做搖祭，佇耶和華的面前搖伊；攏是照摩西所命令的。

22

(THR) A-lûn ǹg peh-sìⁿ kia̍h-khí chhiú, kā in chiok-hok; i í-keng hiàn sio̍k-chōe-chè, sio-chè, siā-un-chè, chiū lo̍h-lâi.

(BCL) 亞倫向百姓抬起手，給祝福。伊已經獻贖罪祭、燒祭、謝恩祭就落來。

23

(THR) Mô͘-se A-lûn chìn-jı̍p hōe-bō͘, koh chhut-lâi kā peh-sìⁿ chiok-hok; Iâ-hô-hoa ê êng-kng chiū hián-hiān hō͘ chèng peh-sìⁿ khòaⁿ-kìⁿ.

(BCL) 摩西、亞倫進入會幕，閣出來給百姓祝福，耶和華的榮光就顯現互眾百姓看見。

24

(THR) Ū hé tùi Iâ-hô-hoa ê bīn-chêng chhut-lâi, sio tôaⁿ-téng ê sio-chè, kap iû; chèng peh-sìⁿ khòaⁿ-kìⁿ, chiū chhut tōa hoaⁿ-hí ê siaⁿ, phak tī tōe-nı̍h.

(BCL) 有火對耶和華的面前出來，燒壇頂的燒祭及油；眾百姓看見，就出大歡喜的聲，仆佇地裡。

Bible Color Mark

• 台語漢字羅馬本
• 巴克禮全羅