路加福音 第 1 章

1

(THR) In-ūi ū chōe-chōe lâng chiong lán tiong-kan í-keng chiâⁿ ê sū bat kia̍h pit lâi pâi-lia̍t chòe tōan;

(BCL) 因為有多多人將咱中間已經成的事，曾抬筆來排列做傳，

2

(THR) chiū-sī chiàu hiah ê chòe tō-lí ê chhe-ēng ê lâng, tùi khí-thâu chhin-ba̍k khòaⁿ-kìⁿ, lâi thôan hō͘ lán ê;

(BCL) 就是照許個做道理的差用的人，對起頭親目看見來傳互咱的。

3

(THR) góa í-keng tùi khí-thâu siông-sè chhâ-khó lóng-chóng ê sū, chiū siūⁿ tio̍h chiàu chhù-sū siá i, lâi kià hō͘ Thê-o-hui-lô tāi-jîn,

(BCL) 我已經對起頭詳細查考攏總的事，就想著照次序寫伊來寄互提阿非羅大人，

4

(THR) hō͘ lí chai só͘ ha̍k-sı̍p ê ê khak-sı̍t.

(BCL) 互你知所學習的的確實。

5

(THR) Tng Iû-thài ông Hi-lu̍t ê sî, ū sio̍k A-pí-a pan ê chè-si, miâ Sat-ka-lī-a; i ê bó͘ sī A-lûn ê hō͘-è, miâ kiò Í-lī-sa-pek.

(BCL) 當猶太王希律的時，有屬亞比雅班的祭司，名撒迦利亞；伊的某是亞倫的後裔，名叫以利沙白。

6

(THR) In nn̄g lâng tī Siōng-tè ê bīn-chêng sī gī ê lâng, chiàu Chú it-chhè ê kài-bēng lé-gî lâi kiâⁿ, bô thang hiâm.

(BCL) 二人佇上帝的面前是義的人，照主一切的誡命禮儀來行，無通嫌，

7

(THR) Chóng-sī in bô kiáⁿ, in-ūi Í-lī-sa-pek bōe hôai-īn, nn̄g lâng nî-hè iū-koh lāu.

(BCL) 總是無子；因為以利沙白懷孕，二人年歲又閣老。

8

(THR) Hit sî Sat-ka-lī-a chiàu i ê pan-lia̍t kiâⁿ chè-si ê chit tī Siōng-tè ê bīn-chêng,

(BCL) 彼時撒迦利亞照伊的班列行祭司的職佇上帝的面前，

9

(THR) chiàu chè-si chit-hūn ê lē thiu-chhiam tit-tio̍h jı̍p Chú ê tiān sio hiuⁿ;

(BCL) 照祭司職份的例抽籤，得著入主的殿燒香。

10

(THR) tng sio hiuⁿ ê sî, peh-sìⁿ kui tīn tī gōa-bīn kî-tó.

(BCL) 當燒香的時，百姓歸陣佇外面祈禱。

11

(THR) Chú ê thiⁿ-sài chhut-hiān hō͘ i khòaⁿ, khiā tī hiuⁿ-tôaⁿ ê chiàⁿ-pêng.

(BCL) 主的天使出現互伊看，徛佇香壇的正旁。

12

(THR) Sat-ka-lī-a khòaⁿ-kìⁿ, chiū gông-ngia̍h, kiaⁿ-hiâⁿ.

(BCL) 撒迦利亞看見，就卬愕驚惶。

13

(THR) Thiⁿ-sài tùi i kóng, Sat-ka-lī-a ah, bo̍h-tit kiaⁿ, in-ūi lí ê kî-tó í-keng thiaⁿ-kìⁿ lah; lí ê bó͘ Í-lī-sa-pek beh siⁿ kiáⁿ, lí tio̍h kā i hō miâ kiò Iok-hān.

(BCL) 天使對伊講：「撒迦利亞啊，莫得驚，因為你的祈禱已經聽見啦。你的某以利沙白欲生子，你著給伊號名叫約翰。

14

(THR) Lí beh hoaⁿ-hí koh khòai-lo̍k; chōe-chōe lâng iā beh ūi-tio̍h i chhut-sì lâi hoaⁿ-hí.

(BCL) 你欲歡喜閣快樂；多多人也欲為著伊出世，來歡喜。

15

(THR) In-ūi i tī Chú ê bīn-chêng beh chòe tōa, phû-tô chiú kap it-chhè ê chiú lóng bô lim; tùi lāu-bú ê thai chiū hō͘ Sèng Sîn chhiong-móa.

(BCL) 因為伊佇主的面前欲做大，葡萄酒及一切的酒攏無飲，對老母的胎就互聖神充滿。

16

(THR) I beh hō͘ Í-sek-lia̍t hō͘-è chōe-chōe lâng o̍at-tńg lâi kui Chú, chiū-sī in ê Siōng-tè.

(BCL) 伊欲互以色列後裔多多人越轉，來歸主──就是的上帝。

17

(THR) I beh ēng Í-lī-a ê sim-sîn kap châi-lêng kiâⁿ chòe-thâu tī Chú ê bīn-chêng, hō͘ chòe pē ê o̍at-tńg sim ǹg tī kiáⁿ, hō͘ pōe-ge̍k ê lâng thàn gī lâng ê tì-hūi, ūi-tio̍h Chú pī-pān ha̍p-ēng ê peh-sìⁿ.

(BCL) 伊欲用以利亞的心神及才能，行做頭佇主的面前，互做父的越轉心向佇子，互悖逆的人趁義人的智慧，為著主備辦合用的百姓。」

18

(THR) Sat-ka-lī-a tùi thiⁿ-sài kóng, Góa tùi cháiⁿ-iūⁿ ōe chai chit ê sū ah? In-ūi góa í-keng lāu, góa ê bó͘ nî-hè iā lāu lah.

(BCL) 撒迦利亞對天使講：「我對怎樣會知此個事啊？因為我已經老，我的某年歲也老啦。」

19

(THR) Thiⁿ-sài ìn i kóng, Góa chiū-sī Ka-pek-lia̍t, khiā tī Siōng-tè ê bīn-chêng ê, hōng-chhe kap lí kóng ōe, pò lí chiah ê hó siau-sit.

(BCL) 天使應伊講：「我就是加百列，徛佇上帝的面前的，奉差及你講話，報你諸個好消息。

20

(THR) Taⁿ lí beh chēng-chēng bōe kóng ōe, kàu chiah ê sū tit-tio̍h chiâⁿ ê jı̍t, in-ūi lí m̄ sìn góa ê ōe, chiū-sī hiah-ê kàu kî beh èng-giām ê ōe.

(BCL) 今你欲靜靜講話，到諸個事得著成的日；因為你呣信我的話，就是許個到期欲應驗的話。」

21

(THR) Peh-sìⁿ thèng-hāu Sat-ka-lī-a, kî-kòai i kú-kú tī tiān-lāi;

(BCL) 百姓聽候撒迦利亞，奇怪伊久久佇殿內。

22

(THR) kàu chhut-lâi bōe kap in kóng ōe, chiū chai i tī tiān-nı̍h ū khòaⁿ-kìⁿ īⁿ-siōng; i chiū tùi in pí ì-sù, kèng-jiân sī é-káu.

(BCL) 到出來，及講話，就知伊佇殿裡有看見異象；伊就對比意思，竟然是啞口。

23

(THR) Kàu i chiàu chit-hūn ho̍k-sāi ê jı̍t móa, chiū tò-khì in tau.

(BCL) 到伊照職份服事的日滿，就倒去兜。

24

(THR) Chiah ê jı̍t liáu-āu, i ê bó͘ Í-lī-sa-pek ū-sin, tiàm ba̍t gō͘ ge̍h jı̍t,

(BCL) 諸個日了後，伊的某以利沙白有娠，密五月日，

25

(THR) kóng, Chú tī khòaⁿ-kò͘ góa ê jı̍t khóan-thāi góa chhin-chhiūⁿ án-ni, lâi sóe góa ê kiàn-siàu tī lâng ê tiong-kan.

(BCL) 講：「主佇看顧我的日，款待我親像按呢，來洗我的見誚佇人的中間。」

26

(THR) Kàu la̍k ge̍h jı̍t thiⁿ-sài Ka-pek-lia̍t hōng Siōng-tè só͘ chhe kàu Ka-lī-lī chı̍t ê siâⁿ, miâ kiò Ná-sat-le̍k,

(BCL) 到六月日，天使加百列奉上帝所差到加利利一個城名叫拿撒勒，

27

(THR) chiū-kūn chı̍t ê chāi-sek-lú, sī í-keng phòe tiāⁿ-tio̍h hō͘ Tāi-pı̍t ke ê chı̍t lâng, miâ kiò Iok-sek; chit ê chāi-sek-lú miâ kiò Má-lī-a.

(BCL) 就近一個在室女，是已經配定著互大衛家的一人，名叫約瑟。此個在室女名叫馬利亞；

28

(THR) Thiⁿ-sài jı̍p-khì tùi i kóng, Tit-tio̍h tōa un ê lâng ah, pêng-an; Chú kap lí tī-teh.

(BCL) 天使入去，對伊講：「得著大恩的人啊，平安，主及你佇！」

29

(THR) Má-lī-a put-chí gông-ngia̍h i ê ōe, siūⁿ chit ê chhéng-an sī sím-mı̍h ì-sù.

(BCL) 馬利亞不止卬愕伊的話，想此個請安是甚麼意思。

30

(THR) Thiⁿ-sài kā i kóng, Má-lī-a ah, bo̍h-tit kiaⁿ, in-ūi lí tit-tio̍h Siōng-tè ê un-tián.

(BCL) 天使給伊講：「馬利亞啊，莫得驚！因為你得著上帝的恩典。

31

(THR) Taⁿ lí beh hôai-īn siⁿ kiáⁿ, tio̍h kā I hō miâ kiò Iâ-so͘.

(BCL) 今你欲懷孕生子，著給伊號名叫耶穌。

32

(THR) I beh chòe tōa, chheng chòe Chì-kôaiⁿ-ê ê Kiáⁿ; Chú Siōng-tè beh ēng I ê chó͘ Tāi-pı̍t ê ūi hō͘ I.

(BCL) 伊欲做大，稱做至高者的子；主上帝欲用伊的祖大衛的位互伊。

33

(THR) I beh chòe ông tī Ngá-kok ê ke kàu tāi-tāi, I ê kok iā bô kiông-chīn.

(BCL) 伊欲做王佇雅各的家，到代代；伊的國也無窮盡。」

34

(THR) Má-lī-a tùi thiⁿ-sài kóng, Góa bē ū kè lâng, cháiⁿ-iūⁿ beh ū chit ê sū?

(BCL) 馬利亞對天使講：「我未有嫁人，怎樣欲有此個事？」

35

(THR) Thiⁿ-sài ìn i kóng, Sèng Sîn beh lîm-kàu lí, Chì-kôaiⁿ-ê ê kôan-lêng beh tì-ìm lí; só͘-í tùi lí siⁿ-ê beh chheng chòe Sèng, chòe Siōng-tè ê Kiáⁿ.

(BCL) 天使應伊講：「聖神欲臨到你，至高者的權能欲致蔭你，所以對你生的欲稱做聖做上帝的子。

36

(THR) Koh lí ê chhin-chhek Í-lī-sa-pek í-keng lāu, iā hôai-īn; pêng-sò͘ chheng chòe bōe hôai-īn ê, taⁿ ū-sin la̍k ge̍h jı̍t lah;

(BCL) 閣你的親戚以利沙白，已經老也懷孕，平素稱做boe懷孕的，今有娠六月日啦。

37

(THR) in-ūi Siōng-tè só͘ kóng ê ōe, bô chı̍t kù bô la̍t.

(BCL) 因為，上帝所講的話，無一句無力。」

38

(THR) Má-lī-a kóng, Góa sī Chú ê lú-pī; gōan chiàu lí ê ōe èng-giām tī góa. Thiⁿ-sài chiū lī-khui i khì.

(BCL) 馬利亞講：「我是主的女婢，願照你的話應驗佇我。」天使就離開伊去。

39

(THR) Tī chiah ê jı̍t ê tiong-kan Má-lī-a khí-sin, kóaⁿ-kín khì soaⁿ-tōe, kàu Iû-thài chı̍t ê siâⁿ,

(BCL) 佇諸個日的中間，馬利亞起身，趕緊去山地，到猶大一個城；

40

(THR) jı̍p Sat-ka-lī-a ê chhù, chhéng-an Í-lī-sa-pek.

(BCL) 入撒迦利亞的厝，請安以利沙白。

41

(THR) Í-lī-sa-pek chı̍t-ē thiaⁿ-kìⁿ Má-lī-a chhéng-an, thai-īn tī pak-tó͘ lāi chiū tiô-thiàu. Í-lī-sa-pek hō͘ Sèng Sîn chhiong-móa,

(BCL) 以利沙白一下聽見馬利亞請安，胎孕佇腹肚內就趒跳。以利沙白互聖神充滿，

42

(THR) chiū tōa siaⁿ kóng, Chèng hū-jîn-lâng ê tiong-kan lí tit-tio̍h hok-khì, lí só͘ hôai-īn ê iā tit-tio̍h hok-khì.

(BCL) 就大聲講：「眾婦仁人的中間你得著福氣，你所懷孕的也得著福氣！

43

(THR) Góa ê Chú ê lāu-bú lâi chiū-kūn góa, góa tùi tá-lo̍h ōe tit-tio̍h án-ni ah?

(BCL) 我的主的老母來就近我，我對叨落會得著按呢啊？

44

(THR) In-ūi lí chhéng-an ê siaⁿ chı̍t-ē jı̍p góa ê hī-khang, tī góa pak-tó͘ lāi ê thai chiū hoaⁿ-hí lâi tiô-thiàu.

(BCL) 因為你請安的聲一下入我的耳孔，佇我腹肚內的胎就歡喜來趒跳。

45

(THR) Sìn ê hū-jîn-lâng ū hok-khì ah, in-ūi Chú só͘ kā i kóng ê ōe beh èng-giām.

(BCL) 信的婦仁人有福氣啊！因為主所給伊講的話欲應驗。」

46

(THR) Má-lī-a kóng, Góa ê sim chun-kèng Chú chòe tōa,

(BCL) 馬利亞講：

47

(THR) Góa ê sîn in-ūi kiù góa ê Siōng-tè lâi hoaⁿ-hí.

(BCL) 我的心尊敬主做大；我的神因為救我的上帝來歡喜；

48

(THR) In-ūi I khòaⁿ-kò͘ lú-pī ê pi-bî; Tùi taⁿ í-āu bān sè-tāi beh kóng góa ū hok-khì.

(BCL) 因為伊看顧女婢的卑微；對今以後，萬世代欲講我有福氣。

49

(THR) In-ūi hit ê ū kôan-lêng ê ūi-tio̍h góa chòe tōa ê tāi-chì, I ê miâ sī sèng.

(BCL) 因為彼個有權能者，為著我做大的代誌；伊的名是聖。

50

(THR) Kèng-ùi I ê lâng I lîn-bín in, Kàu tāi-tāi.

(BCL) 敬畏伊的人伊憐憫，到代代。

51

(THR) I bat ēng I ê chhiú chhut khùi-la̍t, Sim-chì kiau-ngō͘ ê lâng I ū kóaⁿ-sòaⁿ in.

(BCL) 伊曾用伊的手出氣力；心志驕傲的人伊有趕散。

52

(THR) Ū kôan-lêng ê lâng, I lut in ê ūi, Pi-bî ê lâng, I seng in chòe kôaiⁿ.

(BCL) 有權能的人伊　的位，卑微的人伊升做高；

53

(THR) Iau ê lâng I ēng hó mı̍h hō͘ in chia̍h kàu pá, Pù ê lâng, I hō͘ in khang-khang tò-khì.

(BCL) 枵的人伊用好物互食到飽，富的人伊互空空倒去。

54

(THR) I hû-chō͘ I ê lô͘-po̍k Í-sek-lia̍t, Lâi kì-liām lîn-bín,

(BCL) 伊扶助伊的奴僕以色列，

55

(THR) (Chiàu I tùi lán ê chó͘ só͘ kóng ê ōe), Lâi si-lo̍h hō͘ A-pek-la̍h-hán kap i ê hō͘-è kàu éng sè-tāi.

(BCL) 來紀念憐憫，照伊對咱的祖所講的話，來施落互亞伯拉罕及伊的後裔到永世代。

56

(THR) Má-lī-a kap i saⁿ-kap tòa iok-lio̍k ū saⁿ ge̍h jı̍t, chiah tò-khì in tau.

(BCL) 馬利亞及伊相及住，約略有三月日，才倒去兜。

57

(THR) Í-lī-sa-pek seng-sán ê kî í-keng kàu, chiū siⁿ kiáⁿ.

(BCL) 以利沙白生產的期已經到，就生子。

58

(THR) Chhù-piⁿ chhin-chhek thiaⁿ-kìⁿ Chú tōa lîn-bín i, chiū kap i saⁿ-kap hoaⁿ-hí.

(BCL) 厝邊親戚聽見主大憐憫伊，就及伊相及歡喜。

59

(THR) Kàu tē poeh jı̍t in lâi beh kā eⁿ-á kiâⁿ kat-lé, ài chiàu i ê lāu-pē ê miâ hō i chòe Sat-ka-lī-a.

(BCL) 到第八日，來欲給嬰仔行割禮，愛照伊的老父的名號伊做撒迦利亞。

60

(THR) I ê lāu-bú ìn kóng, Bô lah, tio̍h miâ i chòe Iok-hān.

(BCL) 伊的老母應講：「無啦！著名伊做約翰。」

61

(THR) In chiū tùi i kóng, Lí ê chhin-chhek tiong bô lâng hō chit ê miâ.

(BCL) 就對伊講：「你的親戚中無人號此個名。」

62

(THR) In chiū pí ì-sù mn̄g i ê lāu-pē, ài kā i hō sím-mı̍h miâ.

(BCL) 就比意思問伊的老父，愛給伊號甚麼名。

63

(THR) I ê lāu-pē thó siá-jī ê pán, siá kóng, I ê miâ sī Iok-hān. Tāi-ke kî-kòai.

(BCL) 伊的老父討寫字的板，寫講：「伊的名是約翰。」大家奇怪。

64

(THR) Sat-ka-lī-a ê chhùi liâm-piⁿ khui, chı̍h iā tháu, chiū kóng ōe lâi o-ló Siōng-tè.

(BCL) 撒迦利亞的嘴連鞭開，舌也解，就講話來謳咾上帝。

65

(THR) Sì-ûi khiā-khí ê lâng lóng kiaⁿ. Chiah ê it-chhè ê ōe piàn-piàn pò-iông tī Iû-thài ê soaⁿ-tōe.

(BCL) 四圍徛起的人攏驚；諸個一切的話遍遍報揚佇猶太的山地。

66

(THR) Thiaⁿ-kìⁿ ê lâng lóng chiong chiah ê sū khǹg tī sim-nı̍h, kóng, Án-ni, chit-ê eⁿ-á chiong-lâi beh cháiⁿ-iūⁿ? In-ūi Chú ê chhiú kap i tī-teh.

(BCL) 聽見的人攏將諸個事囥佇心裡，講：「按呢此個嬰仔將來欲怎樣？」因為主的手及伊佇。

67

(THR) I ê lāu-pē Sat-ka-lī-a chiū hō͘ Sèng Sîn chhiong-móa, chòe sian-ti lâi kóng,

(BCL) 伊的老父撒迦利亞就互聖神充滿，做先知來講：

68

(THR) Tio̍h o-ló Chú, Í-sek-lia̍t ê Siōng-tè, In-ūi I ū khòaⁿ-kò͘ I ê peh-sìⁿ lâi sio̍k-hôe i;

(BCL) 著謳咾主──以色列的上帝！因為伊有看顧伊的百姓，來贖回伊，

69

(THR) Thòe lán heng-khí chín-kiù ê kak, Tī I ê lô͘-po̍k Tāi-pı̍t ê ke.

(BCL) 替咱興起拯救的角，佇伊的奴僕大衛的家，

70

(THR) Chiàu I tùi ū sè-kan í-lâi ēng I sèng ê sian-ti ê chhùi só͘ kóng ê,

(BCL) 照伊對有世間以來用伊聖的先知的嘴所講的，

71

(THR) Chiū-sī kiù lán thoat-lī tùi-te̍k kap kìⁿ-nā òan-hūn lán ê lâng ê chhiú,

(BCL) 就是救咱脫離對敵，及見若怨恨咱的人的手，

72

(THR) Lâi kiâⁿ lîn-bín tī lán ê lia̍t-chó͘, Lâi kì-liām I sèng ê iok;

(BCL) 來行憐憫佇咱的列祖，來紀念伊聖的約──

73

(THR) Chiū-sī kap lán ê chó͘ A-pek-la̍h-hán só͘ chiù ê chōa,

(BCL) 就是及咱的祖亞伯拉罕所咒的誓───

74

(THR) Hō͘ lán í-keng thoat-lī chiah ê tùi-te̍k ê chhiú,

(BCL) 互咱已經脫離諸個對敵的手，

75

(THR) Chı̍t-sì-lâng tī I ê bīn-chêng ēng sèng ēng gī bô kiaⁿ lâi ho̍k-sāi I.

(BCL) 一世人佇伊的面前，用聖、用義無驚來服事伊。

76

(THR) Eⁿ-á ah, lí iā beh chheng chòe Chì-kôaiⁿ-ê ê sian-ti, In-ūi lí beh kiâⁿ tī Chú ê bīn-chêng lâi pī-pān I ê lō͘,

(BCL) 嬰仔啊！你也欲稱做至高者的先知；因為你欲行佇主的面前，來備辦伊的路，

77

(THR) Hō͘ I ê peh-sìⁿ tùi tit-tio̍h sià-chōe, Chiū chai chín-kiù ê un,

(BCL) 互伊的百姓對得著赦罪，就知拯救的恩。

78

(THR) Ūi-tio̍h lán ê Siōng-tè lîn-bín ê sim, Tùi án-ni hō͘ chá-khí sî ê jı̍t tùi téng-bīn lâi kàu tī lán,

(BCL) 為著咱的上帝憐憫的心，對按呢互早起時的日對頂面來到佇咱，

79

(THR) Lâi chiò hiah-ê chē tī o͘-àm kap sí-ìm tiong ê lâng, Chhōa lán ê kha jı̍p pêng-an ê lō͘.

(BCL) 來照許個坐佇黑暗及死蔭中的人，導咱的腳入平安的路。

80

(THR) Eⁿ-á chiām-chiām tōa, sim-sîn jı̍t-jı̍t ióng-chòng; tiàm tī khòng-iá kàu hián-bêng tī Í-sek-lia̍t ê jı̍t.

(BCL) 嬰仔漸漸大，心神日日勇壯，佇曠野，到顯明佇以色列的日。

Bible Color Mark

• 台語漢字羅馬本
• 巴克禮全羅