馬可福音 第 16 章

1

(THR) An-hioh-jı̍t í-keng kè-sin, Bo̍at-tāi-lia̍p ê Má-lī-a kap Ngá-kok ê lāu-bú Má-lī-a, kap Sat-lô-bí, ū bóe hiuⁿ-liāu, beh lâi boah Iâ-so͘.

(BCL) 安息日已經過身，抹大拉的馬利亞及雅各的老母馬利亞及撒羅米，有買香料欲來抹耶穌。

2

(THR) . Chhit-jı̍t thâu chı̍t jı̍t, chin chá, jı̍t tú-á chhut, in kàu bōng;

(BCL) 七日頭一日真早，日抵仔出，到墓，

3

(THR) . saⁿ-kap kóng, Chī-chūi-á beh thòe lán kō hit tè chio̍h lī-khui bōng-mn̂g ah?

(BCL) 相及講：「是誰仔欲替咱翱彼塊石離開墓門啊？」

4

(THR) . Kia̍h ba̍k chiū khòaⁿ-kìⁿ hit tè chio̍h í-keng kō khui; in-ūi sī chin tōa tè.

(BCL) 抬目就看見，彼塊石已經翱開，因為是真大塊。

5

(THR) . Jı̍p bōng khòaⁿ-kìⁿ chı̍t ê siàu-liân lâng chē tī chiàⁿ-pêng, chhēng pe̍h saⁿ; chiū gông-ngia̍h.

(BCL) 入墓，看見一個少年人坐佇正旁，穿白衫，就卬愕。

6

(THR) . Siàu-liân lâng kā in kóng, M̄ bián gông-ngia̍h, lín sī chhē tèng sı̍p-jī-kè ê Ná-sat-le̍k lâng Iâ-so͘. I í-keng koh-o̍ah, bô tī chia; lí khòaⁿ, I bâi-chòng ê só͘-chāi.

(BCL) 少年人給講：「呣免卬愕！恁是尋釘十字架的拿撒勒人耶穌，伊已經復活，無佇遮。你看，伊埋葬的所在。

7

(THR) . Taⁿ tio̍h khì, kā I ê ha̍k-seng kap Pí-tek kóng, I tāi-seng lín khì Ka-lī-lī; lín tī hia beh khòaⁿ-kìⁿ I, chiàu I só͘ kā lín kóng ê.

(BCL) 今著去給伊的學生及彼得講：『伊代先恁去加利利。恁佇遐欲看見伊，照伊所給恁講的。』」

8

(THR) . Chiah ê hū-jîn-lâng chhut-khì lī-khui bōng, chiū cháu, in-ūi ngia̍uh-ngia̍uh-chhoah gông-ngia̍h; iā bô kā lâng kóng sím-mı̍h, in-ūi in chin kiaⁿ.

(BCL) 諸個婦仁人出去，離開墓就走，因為愕愕惙卬愕，也無給人講甚麼，因為真驚。

9

(THR) . Chhit-jı̍t ê thâu jı̍t chheng chá, Iâ-so͘ í-keng koh-o̍ah, tāi-seng chhut-hiān tī Bo̍at-tāi-lia̍p ê Má-lī-a, chiū-sī Iâ-so͘ chêng bat tùi i kóaⁿ-chhut chhit ê kúi ê.

(BCL) 七日的頭日清早，耶穌已經復活，代先出現佇抹大拉的馬利亞（就是耶穌前曾對伊趕出七個鬼的）。

10

(THR) . Pêng-sî kap Iâ-so͘ tâng tī-teh ê lâng hit sî teh iu-būn thî-khàu; Má-lī-a khì kā in kóng.

(BCL) 平時及耶穌同佇的人；彼時憂悶啼哭，馬利亞去給講。

11

(THR) . In thiaⁿ-kìⁿ I o̍ah, koh hō͘ Má-lī-a khòaⁿ-kìⁿ, kèng-jiân m̄ sìn.

(BCL) 聽見伊活，閣互馬利亞看見，竟然呣信。

12

(THR) . Í-āu in tiong-kan nn̄g lâng khì soaⁿ-tiûⁿ; teh kiâⁿ ê sî, Iâ-so͘ chhut-hiān hō͘ in khòaⁿ-kìⁿ, I ê iông-māu kap pêng-siông bô tâng.

(BCL) 以後，中間二人去山場。行的時，耶穌出現互看見，伊的容貌及平常無同。

13

(THR) . In khì kā kî-û ê kóng; chóng-sī in hiah ê lâng iā m̄ sìn.

(BCL) 去給其餘的講；總是許個人也呣信。

14

(THR) . Āu-lâi cha̍p-it ê ha̍k-seng chē teh chia̍h ê sî, Iâ-so͘ chhut-hiān hō͘ in khòaⁿ-kìⁿ, chek-pī in ê m̄ sìn kap ngī-sim; in-ūi ū lâng khòaⁿ-kìⁿ I í-keng koh-o̍ah, in iā m̄ sìn hiah ê lâng ê ōe.

(BCL) 後來，十一個學生坐食的時，耶穌出現互看見，責備的呣信及硬心，因為有人看見伊已經復活，也呣信許個人的話。

15

(THR) . Iâ-so͘ koh kā in kóng, Lín khì phó͘ thiⁿ-ē, thôan hok-im hō͘ bān peh-sìⁿ.

(BCL) 耶穌閣給講：「恁去普天下，傳福音互萬百姓。

16

(THR) . Sìn lâi siū sóe-lé ê, beh tit-tio̍h kiù; m̄ sìn ê, beh siū tēng-chōe.

(BCL) 信來受洗禮的，欲得著救；呣信的，欲受定罪。

17

(THR) . Sìn ê lâng beh ū chiah ê sîn-jiah tè in; chiū-sī thok-tiōng góa ê miâ kóaⁿ kúi, kóng sin ê khiuⁿ-kháu;

(BCL) 信的人欲有諸個神蹟隨，就是託仗我的名趕鬼；講新的腔口；

18

(THR) . lia̍h chôa, á-sī lim-tio̍h sím-mı̍h to̍k, iā lóng bô siong-hāi; koh ēng chhiú hōaⁿ phòa-pīⁿ ê lâng, in chiū hó.

(BCL) 掠蛇；抑是飲著甚麼毒也攏無傷害；閣用手按破病的人，就好。」

19

(THR) . Chú Iâ-so͘ kap in kóng soah, chiū tit-tio̍h chiap-la̍p chiūⁿ thiⁿ, chē tī Siōng-tè ê tōa pêng.

(BCL) 主耶穌及講息，就得著接納上天，坐佇上帝的大旁。

20

(THR) . Ha̍k-seng chhut-khì, ta̍k só͘-chāi soan-thôan, Chú kap in chòe kang, ēng tè in ê sîn-jiah chèng-bêng chit ê tō-lí. À-bēng.

Bible Color Mark

• 台語漢字羅馬本
• 巴克禮全羅