馬可福音 第 15 章

1

(THR) Kàu thiⁿ-kng hiah-ê chè-si-thâu, tiúⁿ-ló, keng-ha̍k-sū kap chôan kong-hōe saⁿ-kap gī-lūn, pa̍k Iâ-so͘, tòa I khì, kau hō͘ Pí-lia̍p-to.

(BCL) 到天光，許個祭司頭、長老、經學士及全公會相及議論，縛耶穌，帶伊去交互彼拉多。

2

(THR) . Pí-lia̍p-to mn̄g I kóng, Lí sī Iû-thài lâng ê ông mah? I ìn kóng, Lí kóng, chiū-sī.

(BCL) 彼拉多問伊講：「你是猶太人的王嗎？」伊應講：「你講就是。」

3

(THR) . Chè-si-thâu ēng chōe-chōe hāng kò I.

(BCL) 祭司頭用多多項告伊。

4

(THR) . Pí-lia̍p-to koh mn̄g I kóng, Lí lóng bô ìn mah? Lí khòaⁿ, in kò lí hiah chōe hāng.

(BCL) 彼拉多閣問伊講：「你攏無應嗎？你看，告你許多項。」

5

(THR) . Nā-sī Iâ-so͘ iáu-kú bô ìn; tì-kàu Pí-lia̍p-to kî-kòai.

(BCL) 若是耶穌猶久無應，致到彼拉多奇怪。

6

(THR) . Kàu choeh-kî chóng-tok éng ū pàng chı̍t ê hōan-lâng hō͘ in, chiàu in só͘ kiû ê.

(BCL) 到節期，總督應有放一個犯人互，照所求的。

7

(THR) . Ū chı̍t lâng, miâ Pa-lia̍p-pa, kap hiah ê chok-lōan ê lâng tâng siū pa̍k, in tī chok-lōan ê sî bat thâi-sí lâng.

(BCL) 有一人名巴拉巴，及許個作亂的人同受縛。佇作亂的時，曾死人。

8

(THR) . chèng lâng chiū khí-khì, kiû Pí-lia̍p-to chiàu siông lâi kiâⁿ.

(BCL) 眾人就起，去求彼拉多照常來行。

9

(THR) . Pí-lia̍p-to ìn kóng, Lín ài góa pàng Iû-thài lâng ê ông hō͘ lín mah?

(BCL) 彼拉多應講：「恁愛我放猶太人的王互恁嗎？」

10

(THR) . In-ūi chai hiah ê chè-si-thâu sī ūi-tio̍h òan-tò͘, chiah kè-sàng I.

(BCL) 因為知，許個祭司頭是為著怨妒才解送伊。

11

(THR) . Nā-sī hiah ê chè-si-thâu sái-sō chèng lâng, lêng-khó͘ kiû pâng Pa-lia̍p-pa hō͘ in.

(BCL) 若是許個祭司頭使唆眾人，寧可求放巴拉巴互。

12

(THR) . Pí-lia̍p-to koh ìn kóng, Án-ni chiū lín só͘ kiò chòe Iû-thài lâng ê ông ê, góa tio̍h cháiⁿ-iūⁿ pān I?

(BCL) 彼拉多閣應講：「按呢，就恁所叫做猶太人的王的，我著怎樣辦伊？」

13

(THR) . In koh âu-kiò kóng, Tèng I tī sı̍p-jī-kè.

(BCL) 閣喉叫講：「釘伊佇十字架！」

14

(THR) . Pí-lia̍p-to kā in kóng, Cháiⁿ-iūⁿ ah, I chòe sím-mı̍h pháiⁿ? Chóng-sī in ná tōa siaⁿ âu-kiò kóng, Tèng I tī sı̍p-jī-kè.

(BCL) 彼拉多給講：「怎樣啊？伊做甚麼歹？」總是愈大聲喉叫講：「釘伊佇十字架！」

15

(THR) . Pí-lia̍p-to in-ūi ài hō͘ chèng lâng hoaⁿ-hí, chiū pàng Pa-lia̍p-pa hō͘ in; í-keng piⁿ-phah Iâ-so͘, chiū hoat-kau khì tèng sı̍p-jī-kè.

(BCL) 彼拉多因為愛互眾人歡喜，就放巴拉巴互，已經鞭拍耶穌，就發交去釘十字架。

16

(THR) . Peng-teng thoa I jı̍p īⁿ-lāi, chiū-sī kong-tn̂g, chiū hōe-chôe thong iâⁿ,

(BCL) 兵丁拖伊入院內，就是公堂就會齊通營。

17

(THR) . ēng chí-sek ê phàu hō͘ I chhēng, koh pīⁿ chhì-á ê bián-liû kā I tì,

(BCL) 用紫色的袍互伊穿，閣編莿仔的冕旒給伊戴，

18

(THR) . chiū kā I chhéng-an, kóng, Iû-thài lâng ê ông, pêng-an!

(BCL) 就給伊請安講：「猶太人的王，平安！」

19

(THR) . Koh ēng lô͘-tek sut I ê thâu-khak, kā I phùi-nōa, kūi-lo̍h pài I.

(BCL) 閣用蘆竹捽伊的頭殼，給伊呸涎，跪落拜伊。

20

(THR) . Hì-lāng soah, hit niá chí-sek ê phàu chiū kā I thǹg-khí-lâi, chiong I ka-kī ê saⁿ kā I chhēng-lo̍h-khì; tòa I chhut, beh tèng I sı̍p-jī-kè.

(BCL) 戲弄息，彼領紫色的袍就給伊褪起來，將伊家己的衫給伊穿落去，帶伊出，欲釘伊十字架。

21

(THR) . Ū Kó͘-lī-nāi lâng Se-bûn, chiū-sī A-le̍k-san-tāi kap Ló͘-hu ê lāu-pē, tùi soaⁿ-tiûⁿ lâi àn hia kè, in bián-kióng i saⁿ-kap khì, lâi giâ Iâ-so͘ ê sı̍p-jī-kè.

(BCL) 有古利奈人西門，就是亞力山大及魯孚的老父，對山場來，按遐過，勉強伊相及去，來夯耶穌的十字架。

22

(THR) . In tòa Iâ-so͘ kàu Kok-kok-thaⁿ ê só͘-chāi, hoan-e̍k chiū-sī Thâu-khak-óaⁿ ê só͘-chāi;

(BCL) 帶耶穌到各各他的所在（翻譯就是頭殼碗的所在），

23

(THR) . ēng kiáu bu̍t-io̍h ê chiú hō͘ I; Iâ-so͘ m̄ siū.

(BCL) 用攪沒藥的酒互伊，耶穌呣受。

24

(THR) . Chiū tèng I tī sı̍p-jī-kè, pun I ê i-ho̍k, liam-khau khòaⁿ sím-mı̍h lâng tit-tio̍h sím-mı̍h.

(BCL) 就釘伊佇十字架，分伊的衣服，拈鬮看甚麼人得著甚麼。

25

(THR) . Hit sî káu tiám cheng, chiū tèng I tī sı̍p-jī-kè.

(BCL) 彼時九點鐘就釘伊佇十字架。

26

(THR) . Ēng chám-tiâu siá I ê chōe-chōng, kóng, Iû-thài lâng ê ông.

(BCL) 用斬條寫伊的罪狀，講：「猶太人的王。」

27

(THR) . Iā ū nn̄g ê chha̍t kap I tâng tèng sı̍p-jī-kè, chı̍t-ê tī chiàⁿ-pêng, chı̍t-ê tī tò-pêng.

(BCL) 也有二個賊及伊同釘十字架，一個佇正旁，一個佇倒旁。

28

(THR) .

(BCL) ｛這應驗經上的話說：『算伊及不法的人同列。』〔台語羅馬譯本無此節！〕｝

29

(THR) . Keng-kè ê lâng siat-to̍k I, iô thâu kóng, Āi ah, lí húi-hōai tiān, saⁿ jı̍t khí i ê,

(BCL) 經過的人褻瀆伊，搖頭講：「唉啊！你毀壞殿，三日起伊的，

30

(THR) . taⁿ tio̍h kiù ka-kī, tùi sı̍p-jī-kè lo̍h-lâi.

(BCL) 今著救家己，對十字架落來！」

31

(THR) . Hiah ê chè-si-thâu kap keng-ha̍k-sū iā sī án-ni thí-chhiò I, saⁿ-kap kóng, I bat kiù pa̍t lâng, iā bōe-ōe kiù ka-kī.

(BCL) 許個祭司頭及經學士也是按呢恥笑伊，相及講：「伊曾救別人，也會救家己。

32

(THR) . Í-sek-lia̍t ê ông Ki-tok taⁿ tio̍h tùi sı̍p-jī-kè lo̍h-lâi hō͘ góan khòaⁿ lâi sìn I. Tâng tèng tī sı̍p-jī-kè ê iā mē I.

(BCL) 以色列的王基督，今著對十字架落來，互阮看，來信伊。」同釘佇十字架者也罵伊。

33

(THR) . Jı̍t tiong-tàu chôan tōe o͘-àm, kàu saⁿ tiám cheng ê sî;

(BCL) 日中晝，全地黑暗，到三點鐘的時。

34

(THR) . saⁿ tiám cheng ê sî Iâ-so͘ tōa siaⁿ kiò kóng, Í-lô-i, Í-lô-i, lia̍p-má sat-pak-tāi-nî, hoan-e̍k chiū-sī, Góa ê Siōng-tè, góa ê Siōng-tè, lí siáⁿ-sū pàng-lī góa.

(BCL) 三點鐘的時耶穌大聲叫講：「以羅伊！以羅伊！拉馬撒巴大尼？」（翻譯就是：我的上帝！我的上帝！你啥事放離我？）

35

(THR) . Piⁿ-thâu khiā ê ū lâng thiaⁿ-kìⁿ, chiū kóng, Lí khòaⁿ, I teh kiò Í-lī-a.

(BCL) 邊頭徛者，有人聽見就講：「你看，伊叫以利亞！」

36

(THR) . Ū chı̍t lâng cháu-khì ēng hái-jiông chìm chhò͘, hâ tī lô͘-tek-á bé, hō͘ i suh, kóng, Chhiáⁿ bān, chhì-khòaⁿ Í-lī-a lâi kiù I lo̍h-lâi á bô.

(BCL) 有一人走去，用海絨浸醋，縖佇蘆竹仔尾，互伊吸，講：「且慢，試看以利亞來救伊落來抑無。」

37

(THR) . Iâ-so͘ tōa siaⁿ kiò, khùi chiū tn̄g.

(BCL) 耶穌大聲叫，氣就斷。

38

(THR) . Tiān-lāi ê tiùⁿ-lî tùi téng kàu ē lı̍h chòe nn̄g pêng.

(BCL) 殿內的帳簾對頂到下裂做二旁。

39

(THR) . Pé-chóng khiā tī Iâ-so͘ ê tùi-bīn, khòaⁿ-kìⁿ I án-ni khùi tn̄g, chiū kóng, Chit lâng chin-chiàⁿ sī Siōng-tè ê Kiáⁿ.

(BCL) 百總徛佇耶穌的對面看見伊按呢氣斷，就講：「此人真正是上帝的子！」

40

(THR) . Koh ū kúi-nā ê hū-jîn-lâng tùi hn̄g-hn̄g teh khòaⁿ, chiông-tiong ū Bo̍at-tāi-lia̍p ê Má-lī-a, kap sió Ngá-kok Iok-se ê lāu-bú Má-lī-a, í-kı̍p Sat-lô-bí,

(BCL) 閣有幾若個婦仁人對遠遠看；從中有抹大拉的馬利亞，及小雅各、約西的老母馬利亞，以及撒羅米，

41

(THR) . chiū-sī Iâ-so͘ tī Ka-lī-lī ê sî, kun-tè lâi ho̍k-sāi I ê, iā ū chōe-chōe hū-jîn-lâng kap Iâ-so͘ tâng chiūⁿ Iâ-lō͘-sat-léng ê, lóng hn̄g-hn̄g teh khòaⁿ.

(BCL) 就是耶穌佇加利利的時，跟隨來服事伊者，也有多多婦仁人及耶穌同上耶路撒冷的，攏遠遠看。

42

(THR) . Í-keng àm, in-ūi hit jı̍t sī pī-pān choeh ê jı̍t, chiū-sī an-hioh-jı̍t chêng ê chı̍t jı̍t,

(BCL) 已經暗，因為彼日是備辦節的日，就是安息日前的一日，

43

(THR) . ū A-lī-má-thài ê Iok-sek lâi, i sī chun-kùi ê gī-ôan, pún-sin iā sī him-bō͘ siōng-tè ê kok ê, hó-táⁿ jı̍p-khì kìⁿ Pí-lia̍p-to, kiû Iâ-so͘ ê sin-si.

(BCL) 有亞利馬太的約瑟來，伊是尊貴的議員，本身也是欣慕上帝的國的。好膽入去見彼拉多，求耶穌的身屍；

44

(THR) . Pí-lia̍p-to kî-kòai I í-keng sí; kiò pé-chóng lâi mn̄g khòaⁿ I sí kú bē.

(BCL) 彼拉多奇怪伊已經死，叫百總來問，看伊死久未。

45

(THR) . Í-keng tùi pé-chóng tit-tio̍h chai, chiū ēng sin-si hō͘ Iok-sek.

(BCL) 已經對百總得著知，就用身屍互約瑟。

46

(THR) . Iok-sek bóe iù-tōe pò͘, siu Iâ-so͘ lo̍h-lâi; ēng iù-tōe pò͘ pau I, hē tī chio̍h-pôaⁿ só͘ phah ê bōng; iā kō chı̍t tè chio̍h tī bōng-mn̂g.

(BCL) 約瑟買幼苧布，收耶穌落來，用幼苧布包伊，下佇石磐所拍的墓，也翱一塊石佇墓門。

47

(THR) . Bo̍at-tāi-lia̍p ê Má-lī-a, kap Iok-se ê lāu-bú Má-lī-a, khòaⁿ-kìⁿ I só͘ bâi-chòng ê só͘-chāi.

(BCL) 抹大拉的馬利亞，及約西的老母馬利亞，看見伊所埋葬的所在。

Bible Color Mark

• 台語漢字羅馬本
• 巴克禮全羅