路加福音 第 23 章

1

(THR) In chôan-hōe ê lâng lóng khí-lâi, tòa I kàu Pí-lia̍p-to ê bīn-chêng;

(BCL) 全會的人攏起來，帶伊到彼拉多的面前，

2

(THR) kò I kóng, Góan khòaⁿ chit lâng bê-he̍k góan ê peh-sìⁿ, kìm lâng la̍p sè hō͘ Kai-sat, ka-kī chheng chòe Ki-tok, chòe ông.

(BCL) 告伊講：「阮看此人迷惑阮的百姓，禁人納稅互該撒，家己稱做基督，做王。」

3

(THR) Pí-lia̍p-to mn̄g I kóng, Lí sī Iû-thài lâng ê ông mah? Ìn i kóng, Lí kóng, chiū-sī.

(BCL) 彼拉多問伊講：「你是猶太人的王嗎」？應伊講：「你講就是。」

4

(THR) Pí-lia̍p-to tùi hiah ê chè-si-thâu kap kui tīn ê lâng kóng, Góa khòaⁿ chit lâng bô chōe.

(BCL) 彼拉多對許個祭司頭及歸陣的人講：「我看此人無罪。」

5

(THR) Chóng-sī in ná chhut-la̍t kóng, I iô-tāng peh-sìⁿ, piàn Iû-thài thôan kàu, tùi Ka-lī-lī khí kàu chia.

(BCL) 總是愈出力講：「伊搖動百姓，遍猶太傳教，對加利利起，到遮。」

6

(THR) Pí-lia̍p-to chı̍t-ē thiaⁿ-kìⁿ, chiū mn̄g khòaⁿ chit lâng sī Ka-lī-lī lâng á m̄ sī.

(BCL) 彼拉多一下聽見，就問：「看此人是加利利人抑呣是？」

7

(THR) Í-keng chai I sio̍k tī Hi-lu̍t só͘ kóan-hat, chiū sàng I hō͘ Hi-lu̍t; hit sî Hi-lu̍t iā tī Iâ-lō͘-sat-léng.

(BCL) 已經知伊屬佇希律所管轄，就送伊互希律。彼時希律也佇耶路撒冷。

8

(THR) Hi-lu̍t khòaⁿ-kìⁿ Iâ-so͘ chiū chin hoaⁿ-hí, sī kú-kú ài khòaⁿ-kìⁿ I, in-ūi bat thiaⁿ-kìⁿ I ê sū, koh ǹg-bāng khòaⁿ-kìⁿ I kiâⁿ sîn-jiah.

(BCL) 希律看見耶穌，就真歡喜；是久久愛看見伊，因為曾聽見伊的事，閣向望看見伊行神蹟，

9

(THR) Chiū ēng chōe-chōe ōe mn̄g I; nā-sī Iâ-so͘ bô ìn i chı̍t kù.

(BCL) 就用多多話問伊，若是耶穌無應伊一句。

10

(THR) Hiah ê chè-si-thâu kap keng-ha̍k-sū khiā-teh, chhut-la̍t kò I.

(BCL) 許個祭司頭及經學士徛，出力告伊。

11

(THR) Hi-lu̍t kap i ê peng ba̍k-tē-bô I, hì-lāng I; ēng súi ê saⁿ kā I chhēng, koh sàng hêng Pí-lia̍p-to.

(BCL) 希律及伊的兵目底無伊，戲弄伊，用娞的衫給伊穿，閣送還彼拉多。

12

(THR) Hi-lu̍t kap Pí-lia̍p-to pêng-sî kiat-òan, hit jı̍t chiū chòe pêng-iú.

(BCL) 希律及彼拉多平時結怨，彼日就做朋友。

13

(THR) Pí-lia̍p-to tiàu hiah ê chè-si-thâu, kap iú-si chham peh-sìⁿ lâi,

(BCL) 彼拉多召許個祭司頭及有司參百姓來，

14

(THR) tùi in kóng, Lín tòa chit ê lâng kàu góa chia, kóng I sī bê-he̍k peh-sìⁿ ê; lí khòaⁿ, góa tī lín ê bīn-chêng í-keng sím-mn̄g I; chóng-sī lūn-kàu lín só͘ kò I ê sū, góa chhâ-chhut I lóng bô chōe.

(BCL) 對講：「恁帶此個人到我遮，講伊是迷惑百姓的。你看，我佇恁的面前已經審問伊，總是論到恁所告伊的事，我查出伊攏無罪；

15

(THR) Hi-lu̍t iā sī án-ni; in-ūi ū chiong I sàng hêng lán; iā lí khòaⁿ, I só͘ kiâⁿ bô chı̍t hāng eng-kai sí ê sū.

(BCL) 希律也是按呢，因為有將伊送還咱。也你看伊所行無一項應該死的事。

16

(THR) Só͘-í góa beh phah lâi tháu-pàng I.

(BCL) 所以，我欲拍，來解放伊。」

17

(THR)

(BCL) ｛到節期，總督必須放一個犯人互。〔台語羅馬譯本無此節！〕｝

18

(THR) In chı̍t chôe âu-kiò kóng, Tio̍h tû-khì chit ê lâng, pàng Pa-lia̍p-pa hō͘ góan.

(BCL) 一齊喉叫講：「著除去此個人！放巴拉巴互阮！」

19

(THR) Chit ê Pa-lia̍p-pa, in-ūi tī siâⁿ-lāi chok-lōan koh thâi-sí lâng, chiah koaiⁿ lo̍h kaⁿ.

(BCL) 此個巴拉巴，因為佇城內作亂閣死人，才關落監。

20

(THR) Pí-lia̍p-to ài pàng Iâ-so͘, chiū koh kap in kóng.

(BCL) 彼拉多愛放耶穌，就閣及講。

21

(THR) Nā-sī in kiò, Tèng I sı̍p-jī-kè, tèng I sı̍p-jī-kè.

(BCL) 若是叫：「釘伊十字架！釘伊十字架！」

22

(THR) Pí-lia̍p-to tē saⁿ pái tùi in kóng, Sī cháiⁿ-iūⁿ? I ū kiâⁿ sím-mı̍h pháiⁿ? Góa khòaⁿ I bô chı̍t hāng eng-kai sí ê chōe; só͘-í beh phah lâi tháu-pàng I.

(BCL) 彼拉多第三擺對講：「是怎樣？伊有行甚麼歹？我看伊無一項應該死的罪。所以，欲拍，來解放伊。」

23

(THR) In tōa siaⁿ pek-chhiat kiû tèng I tī sı̍p-jī-kè. In ê siaⁿ khah-iâⁿ.

(BCL) 大聲迫切，求釘伊佇十字架。的聲卡贏。

24

(THR) Pí-lia̍p-to gí-tòan chiàu in só͘ kiû ê lâi kiâⁿ:

(BCL) 彼拉多擬斷照所求的來行，

25

(THR) chiū tháu-pàng in só͘ kiû hit ê ūi-tio̍h chok-lōan sòa thâi-sí lâng koaiⁿ lo̍h kaⁿ ê; chiong Iâ-so͘ kau in, lâi sūn in ê ì-sù.

(BCL) 就解放所求彼個為著作亂、續死人關落監的，將耶穌交，來順的意思。

26

(THR) Tòa Iâ-so͘ khì ê sî, ū chı̍t ê Kó͘-lī-nāi ê lâng, Se-bûn, tùi hiuⁿ-ē lâi, in chiū khiú i lâi, chiong sı̍p-jī-kè khòa tī i ê keng-thâu, hō͘ i giâ lâi tè Iâ-so͘.

(BCL) 帶耶穌去的時，有一個古利奈的人西門，對鄉下來；就伊來，將十字架靠佇伊的肩頭，互伊夯來隨耶穌。

27

(THR) Tè I ê lâng ū peh-sìⁿ kap hū-jîn-lâng chōe-chōe, hū-jîn-lâng ūi-tio̍h I tûi heng ai-siong.

(BCL) 隨伊的人，有百姓及婦仁人多多；婦仁人為著伊搥胸哀傷。

28

(THR) Iâ-so͘ o̍at thâu tùi in kóng, Iâ-lō͘-sat-léng ê hū-jîn-lâng ah, bo̍h-tit ūi-tio̍h góa thî-khàu, tio̍h ūi-tio̍h lín ka-kī kap ka-kī ê kiáⁿ-jî lâi thî-khàu:

(BCL) 耶穌越頭對講：「耶路撒冷的婦仁人啊，莫得為著我啼哭，著為著恁家己及家己的子兒來啼哭。

29

(THR) in-ūi sî beh kàu, lâng beh kóng, Bōe-ōe hôai-īn ê hū-jîn-lâng, bē bat seng-sán ê thai, bē bat hō͘ gín-ná suh ê lin-thâu, ū hok-khì.

(BCL) 因為時欲到，人欲講：『會懷孕的婦仁人，未曾生產的胎，未曾互囝仔吸的奶頭，有福氣！』

30

(THR) Hit sî lâng chiū beh tùi soaⁿ kóng, Teh góan; iā tùi soaⁿ-á kóng, Khàm góan.

(BCL) 彼時，人就欲對山講：壓阮！也對山仔講：蓋阮！

31

(THR) In-ūi tī chhiⁿ ê chhiū-ba̍k nā kiâⁿ án-ni, chiū tī ta ê chhiū-ba̍k beh cháiⁿ-iūⁿ ah?

(BCL) 「因為佇青的樹木若行按呢，就佇乾的樹木欲怎樣啊？」

32

(THR) Koh ū nn̄g ê hōan-lâng hō͘ lâng tòa-khì, kap Iâ-so͘ tâng siū sí.

(BCL) 閣有二個犯人，互人帶去及耶穌同受死。

33

(THR) Kàu chı̍t só͘-chāi miâ kiò Thâu-khak-óaⁿ, chiū tī hia tèng I tī sı̍p-jī-kè; koh tèng hiah ê hōan-lâng, chı̍t-ê tī chiàⁿ pêng, chı̍t-ê tī tò pêng.

(BCL) 到一所在，名叫「頭殼碗」，就佇遐釘伊佇十字架，閣釘許個犯人：一個佇正旁，一個佇倒旁。

34

(THR) Iâ-so͘ kóng, Pē ah, sià-bián in, in-ūi in só͘ chòe ê, in m̄ chai. Lâng chiū liam-khau pun I ê saⁿ.

(BCL) 耶穌講：「父啊！赦免；因為所做的，呣知。」人就拈鬮分伊的衫。

35

(THR) Hiah ê iú-si ki-chhì I kóng, I bat kiù pa̍t lâng; nā sī chòe Siōng-tè ê Ki-tok, siū kéng-sóan ê, tio̍h kiù ka-kī.

(BCL) 許個有司譏刺伊，講：「伊曾救別人；若是做上帝的基督，受揀選的，著救家己！」

36

(THR) Peng-teng iā hì-lāng I, kūn-óa ēng chhò͘ hō͘ I,

(BCL) 兵丁也戲弄伊，近倚用醋互伊，

37

(THR) kóng, Lí nā sī Iû-thài lâng ê ông, tio̍h kiù ka-kī.

(BCL) 講：「你若是猶太人的王，著救家己！」

38

(THR) Tī I ê téng-bīn ū chám-tiâu siá kóng, Chit-ê sī Iû-thài lâng ê ông.

(BCL) 佇伊的頂面有斬條寫講：「此個是猶太人的王。」

39

(THR) Siū tiàu-teh ê hōan-lâng chı̍t-ê siat-to̍k I, kóng, Lí kiám m̄ sī Ki-tok mah? Tio̍h kiù ka-kī kap góan.

(BCL) 受吊的犯人一個褻瀆伊，講：「你豈呣是基督嗎？著救家己及阮！」

40

(THR) Tē jī ê ìn lâi chek-pī i, kóng, Lí kì-jiân tâng siū chōe, liân Siōng-tè iā m̄ kiaⁿ mah?

(BCL) 第二個應來責備伊，講：「你既然同受罪，連上帝也呣驚嗎？

41

(THR) Lán siū chōe sī kong-tō; in-ūi lán só͘ siū ê ha̍p tī lán só͘ kiâⁿ; nā-sī chit lâng só͘ kiâⁿ ê, bô chı̍t hāng m̄ tio̍h.

(BCL) 咱受罪是公道，因為咱所受的合佇咱所行，若是此人所行的無一項呣著。」

42

(THR) Chiū kóng, Iâ-so͘ ah, lí tī lí ê kok lâi ê sî, tio̍h kì-tit góa.

(BCL) 就講：「耶穌啊，你佇你的國來的時，著記得我！」

43

(THR) Iâ-so͘ chiū kā i kóng, Góa sı̍t-chāi kā lí kóng, Kin-á-jı̍t lí beh kap góa tī Lo̍k-hn̂g.

(BCL) 耶穌就給伊講：「我實在給你講，今仔日你欲及我佇樂園。」

44

(THR) Jı̍t tiong-tàu, chôan tōe o͘-àm; kàu saⁿ tiám cheng ê sî, jı̍t ê kng bô-khì;

(BCL) 日中晝，全地黑暗，到三點鐘的時，日的光無去；

45

(THR) tiān-lāi ê tiùⁿ tùi tiong lı̍h-khui.

(BCL) 殿內的帳對中裂開。

46

(THR) Iâ-so͘ tōa siaⁿ kiò, chiū kóng, Pē ah, góa ê sîn kau-tāi lí ê chhiú. Chiah ê ōe kóng soah, khùi chiū tn̄g.

(BCL) 耶穌大聲叫就講：「父啊！我的神交代你的手。」諸個話講息，氣就斷。

47

(THR) Pé-chóng khòaⁿ-kìⁿ chit ê tāi-chì, kui êng-kng Siōng-tè, kóng, Chit-ê chin-chiàⁿ sī gī ê lâng.

(BCL) 百總看見此個代誌，歸榮光上帝，講：「此個真正是義的人！」

48

(THR) Chū-chı̍p teh khòaⁿ ê chèng lâng khòaⁿ-kìⁿ chiah ê tāi-chì, lóng tûi heng tò-khì.

(BCL) 聚集看的眾人看見諸個代誌攏搥胸倒去。

49

(THR) Hiah-ê kap Iâ-so͘ saⁿ-bat ê, í-kı̍p hiah-ê tùi Ka-lī-lī tè I lâi ê hū-jîn-lâng, lóng hn̄g-hn̄g teh khiā, lâi khòaⁿ chiah ê sū.

(BCL) 許個及耶穌相識的，以及許個對加利利隨伊來的婦仁人，攏遠遠徛來看諸個事。

50

(THR) Ū chı̍t lâng miâ Iok-sek, i sī gī-ôan, chòe lâng hó koh gī;

(BCL) 有一人名約瑟，伊是議員，做人好閣義；

51

(THR) i bô tâng hiah ê lâng só͘ kè-bô͘ só͘ chòe ê, i sī sio̍k Iû-thài lâng ê A-lī-má-thài siâⁿ, pêng-sò͘ him-bō͘ Siōng-tè kok ê.

(BCL) 伊無同許個人所計謀所做的。伊是屬猶太人的亞利馬太城，平素欣慕上帝國的。

52

(THR) Chit lâng khì kìⁿ Pí-lia̍p-to, lâi kiû Iâ-so͘ ê sin-si.

(BCL) 此人去見彼拉多，來求耶穌的身屍，

53

(THR) Chiū siu I lo̍h-lâi, ēng iù-tōe pò͘ pau I, hē tī chio̍h chha̍k ê bōng, lóng bē bat bâi-chòng lâng ê.

(BCL) 就收伊落來，用幼苧布包伊，下佇石鑿的墓；攏未曾埋葬人的。

54

(THR) Hit jı̍t chiū-sī pī-pān choeh ê jı̍t, an-hioh-jı̍t kūn lah.

(BCL) 彼日就是備辦節的日，安息日近啦。

55

(THR) Tùi Ka-lī-lī kap Iâ-so͘ saⁿ-kap lâi hiah ê hū-jîn-lâng tè tī āu-bīn, khòaⁿ I ê bōng, kap cháiⁿ-iūⁿ hē I ê sin-si.

(BCL) 對加利利及耶穌相及來許個婦仁人隨佇後面，看伊的墓及怎樣下伊的身屍。

56

(THR) Chiū tò-khì pī-pān hiuⁿ-liāu hiuⁿ-iû; tng an-hioh-jı̍t chiàu kài-bēng lâi hioh.

(BCL) 就倒去，備辦香料香油。當安息日，照誡命來歇。

Bible Color Mark

• 台語漢字羅馬本
• 巴克禮全羅