路加福音 第 6 章

1

(THR) Ū chı̍t ê an-hioh-jı̍t Iâ-so͘ tùi be̍h-hn̂g keng-kè, I ê ha̍k-seng tiah be̍h-sūi, ēng chhiú jê i lâi chia̍h.

(BCL) 有一個安息日，耶穌對麥園經過。伊的學生摘麥穗，用手揉伊來食。

2

(THR) Ū Hoat-lī-sài kúi-nā lâng kóng, An-hioh-jı̍t só͘ m̄ eng-kai kiâⁿ ê, lín siáⁿ-sū kiâⁿ i?

(BCL) 有法利賽幾若人講：「安息日所呣應該行的，恁啥事行伊？」

3

(THR) Iâ-so͘ ìn kóng, Tāi-pı̍t kap kun-tè ê lâng iau ê sî só͘ kiâⁿ ê, lín bē tha̍k-tio̍h mah?

(BCL) 耶穌應講：「大衛及跟隨的人枵的時所行的，恁未讀著嗎？

4

(THR) I jı̍p Siōng-tè ê chhù, the̍h pâi-lia̍t ê piáⁿ lâi chia̍h, koh hō͘ i kun-tè ê lâng; chit hō piáⁿ, nā m̄ sī chè-si, chiū lóng m̄ eng-kai chia̍h.

(BCL) 伊入上帝的厝，提排列的餅來食，閣互伊跟隨的人，此號餅若呣是祭司，就攏呣應該食。」

5

(THR) Koh kā in kóng, Jîn-chú iā sī an-hioh-jı̍t ê Chú.

(BCL) 閣給講：「人子也是安息日的主。」

6

(THR) Koh chı̍t ê an-hioh-jı̍t, Iâ-so͘ jı̍p hōe-tn̂g kà-sī; tī hia ū chı̍t lâng i ê chiàⁿ chhiú ko͘-tâ.

(BCL) 閣一個安息日，耶穌入會堂教示，佇遐有一人伊的正手枯焦。

7

(THR) Keng-ha̍k-sū kap Hoat-lī-sài lâng tng khòaⁿ I tī an-hioh-jı̍t beh i-pīⁿ á bô; ì-sù sī ài chhē phāng thang kò I.

(BCL) 經學士及法利賽人當看伊佇安息日欲醫病抑無，意思是愛尋縫通告伊。

8

(THR) Iâ-so͘ chai in ê ì-sù, chiū kā hit-ê chhiú ko͘-tâ ê lâng kóng, khí-lâi, khiā tī tiong-ng; i chiū khí-lâi khiā.

(BCL) 耶穌知的意思，就給彼個手枯焦的人講：「起來！徛佇中央。」伊就起來徛。

9

(THR) Iâ-so͘ chiū tùi in kóng, Góa mn̄g lín, tī an-hioh-jı̍t kiâⁿ hó sū kiâⁿ pháiⁿ sū, kiù sìⁿ-miā hāi sìⁿ-miā, tá-lo̍h chı̍t hāng khah ha̍p-gî ah?

(BCL) 耶穌就對講：「我問恁，佇安息日行好事行歹事，救生命害生命，叨落一項卡合宜啊？」

10

(THR) Chiū sì-kòe khòaⁿ chèng lâng, kā hit lâng kóng, Chhun lí ê chhiú. I chhun-chhut-khì; chhiú chiū hó-hó.

(BCL) 就四界看眾人，給彼人講：「伸你的手！」伊伸出去，手就好好。

11

(THR) Hiah ê lâng móa-sim siū-khì; saⁿ-kap gī-lūn tio̍h cháiⁿ-iūⁿ lâi pān Iâ-so͘.

(BCL) 許個人滿心受氣，相及議論著怎樣來辦耶穌。

12

(THR) Tng hit sî Iâ-so͘ chhut-khì soaⁿ-nı̍h kî-tó, thong mî kî-kiû Siōng-tè.

(BCL) 當彼時，耶穌出去山裡祈禱，通暝祈求上帝；

13

(THR) Kàu thiⁿ-kng chiū kiò I ê ha̍k-seng lâi; tùi in tiong-kan kéng cha̍p-jī lâng, chheng in chòe sù-tô͘;

(BCL) 到天光，就叫伊的學生來，對中間揀十二人，稱做使徒。

14

(THR) ū Se-bûn, Iâ-so͘ koh hō i ê miâ chòe Pí-tek, kap i ê hiaⁿ-tī An-tek-lia̍t, koh ū Ngá-kok kap Iok-hān, Hui-le̍k kap Pa-to-lô-mái;

(BCL) 有西門（耶穌閣號伊的名做彼得），及伊的兄弟安得烈，閣有雅各及約翰，腓力及巴多羅買，

15

(THR) Má-thài kap To-má, A-le̍k-hui ê kiáⁿ Ngá-kok kap chheng chòe Se-lô-tí ê Se-bûn,

(BCL) 馬太及多馬，亞勒腓的子雅各及稱做西羅底的西門，

16

(THR) Ngá-kok ê kiáⁿ Iû-tāi, kap bōe sian-siⁿ ê Ka-lio̍k lâng Iû-tāi.

(BCL) 雅各的子猶大，及賣先生的加略人猶大。

17

(THR) Iâ-so͘ kap in lo̍h-lâi khiā tī pîⁿ ê só͘-chāi, ū I chōe-chōe ê ha̍k-seng kap kui tōa tīn ê peh-sìⁿ, tùi Iû-thài chôan-tōe kap Iâ-lō͘-sat-léng í-kı̍p Chhui-lô Se-tùn iân hái-kîⁿ ê tōe lâi beh thiaⁿ I, iā beh tit-tio̍h i-hó in ê pīⁿ;

(BCL) 耶穌及落來，徛佇平的所在；有伊多多的學生及歸大陣的百姓，對猶太全地及耶路撒冷，以及推羅、西頓沿海墘的地來，欲聽伊，也欲得著醫好的病；

18

(THR) koh ū hō͘ siâ-sîn só͘ thiau-lân ê iā tit-tio̍h i-hó.

(BCL) 閣有互邪神所刁難的，也得著醫好。

19

(THR) Chèng lâng lóng ài bong I, in-ūi ū kôan-lêng tùi I chhut, lâi i-hó in tāi-ke.

(BCL) 眾人攏愛摸伊；因為有權能對伊出，來醫好大家。

20

(THR) Iâ-so͘ kia̍h ba̍k khòaⁿ I ê ha̍k-seng, kóng, Lín sòng-hiong ê lâng ū hok-khì ah, in-ūi Siōng-tè ê kok sī lín ê.

(BCL) 耶穌抬目看伊的學生，講：恁喪鄉的人有福氣啊！因為上帝的國是恁的。

21

(THR) Lín hiān-chāi teh iau ê lâng ū hok-khì ah; in-ūi lín beh tit-tio̍h pá. Lín hiān-chāi thî-khàu ê lâng ū hok-khì ah, in-ūi lín teh-beh chhiò.

(BCL) 恁現在枵的人有福氣啊！因為恁欲得著飽。恁現在啼哭的人有福氣啊！因為恁欲笑。

22

(THR) Lâng ūi-tio̍h Jîn-chú lâi òan-hūn lín, kū-cho̍at lín, lóe-mē lín, lia̍h lín ê miâ chòe pháiⁿ lâi khì-sak i, lín chiū ū hok-khì ah.

(BCL) 「人為著人子來怨恨恁，拒絕恁，詈罵恁，掠恁的名做歹，來棄拺伊，恁就有福氣啊！

23

(THR) Tng hit jı̍t lín tio̍h hoaⁿ-hí tiô-thiàu; in-ūi tī thiⁿ-nı̍h lín ê pò-siúⁿ sī tōa, sī in ê chó͘ khóan-thāi sian-ti iā sī án-ni.

(BCL) 當彼日，恁著歡喜趒跳，因為佇天裡恁的報賞是大。是的祖款待先知也是按呢。

24

(THR) Nā-sī lín hó-gia̍h lâng ū chai-ē ah! in-ūi lín í-keng siū-tio̍h lín ê an-ùi.

(BCL) 若是恁好額人有災禍啊！因為恁已經受著恁的安慰。

25

(THR) Lín hiān-chāi pá ê lâng ū chai-ē ah! in-ūi lín teh-beh iau. Lín hiān-chāi chhiò ê lâng ū chai-ē ah! in-ūi lín beh ai-siong thî-khàu.

(BCL) 恁現在飽的人有災禍啊！因為恁欲枵。恁現在笑的人有災禍啊！因為恁欲哀傷啼哭。

26

(THR) Lín hō͘ chèng lâng o-ló ê ū chai-ē ah! in-ūi in ê chó͘ khóan-thāi ké ê sian-ti iā sī án-ni.

(BCL) 「恁互眾人謳咾的有災禍啊！因為的祖款待假的先知也是按呢。」

27

(THR) Nā-sī góa kā lín teh thiaⁿ ê lâng kóng, Tùi-te̍k lín ê tio̍h thiàⁿ in; òan-hūn lín ê, tio̍h hó khóan-thāi in;

(BCL) 「若是我給恁聽的人講，對敵恁的，著疼！怨恨恁的，著好款待！

28

(THR) lóe-mē lín ê, tio̍h kā in chiok-hok; lêng-jio̍k lín ê, tio̍h thòe in kî-tó.

(BCL) 詈罵恁的，著給祝福！凌辱恁的，著替祈禱！

29

(THR) Lâng siàn lí chit pêng ê chhùi-phóe, chiū tio̍h o̍at hit pêng ǹg i. Lâng the̍h lín ê gōa-saⁿ, liân lāi-saⁿ iā bo̍h-tit tòng i.

(BCL) 人搧你此旁的嘴，就著越彼旁向伊。人提恁的外衫，連內衫也莫得擋伊。

30

(THR) Hōan-nā kiû lí ê tio̍h hō͘ i; the̍h lí ê mı̍h ê, bo̍h-tit koh kā i thó.

(BCL) 凡若求你的，著互伊。提你的物的，莫得閣給伊討。

31

(THR) Lín ài lâng cháiⁿ-iūⁿ khóan-thāi lín, iā tio̍h án-ni khóan-thāi lâng.

(BCL) 恁愛人怎樣款待恁，也著按呢款待人。

32

(THR) Lín nā thiàⁿ hiah-ê thiàⁿ lín ê, ū sím-mı̍h un-hūi? in-ūi pháiⁿ lâng iā sī thiàⁿ hiah-ê thiàⁿ in ê lâng.

(BCL) 恁若疼許個疼恁的，有甚麼恩惠？因為歹人也是疼許個疼的人。

33

(THR) Lín nā hó khóan-thāi hiah-ê hó khóan-thāi lín ê, ū sím-mı̍h un-hūi? in-ūi pháiⁿ lâng iā sī án-ni kiâⁿ.

(BCL) 恁若好款待許個好款待恁的，有甚麼恩惠？因為歹人也是按呢行。

34

(THR) Lín nā chioh hiah-ê ū thang ǹg-bāng i hêng ê, ū sím-mı̍h un-hūi? in-ūi pháiⁿ lâng iā chioh pháiⁿ lâng, ài in chiàu siàu-gia̍h lâi hêng.

(BCL) 恁若借許個，有通向望伊還的，有甚麼恩惠？因為歹人也借歹人，愛照數額來還。

35

(THR) Nā-sī lín tio̍h thiàⁿ lín ê tùi-te̍k hó khóan-thāi in; chioh lâng iā bô cho̍at-bāng; lín ê pò-siúⁿ chiū tōa, koh lín beh chòe Chì-kôaiⁿ-ê ê kiáⁿ-jî; in-ūi I hó khóan-thāi bông-un kap pháiⁿ ê lâng.

(BCL) 若是恁著疼恁的對敵，好款待，借人也無絕望，恁的報賞就大，閣恁欲做至高者的子兒，因為伊好款待忘恩及歹的人。

36

(THR) Só͘-í lín tio̍h ū lîn-bín, chhin-chhiūⁿ lín ê Pē ê lîn-bín chı̍t iūⁿ.

(BCL) 所以恁著有憐憫，親像恁的父的憐憫一樣。」

37

(THR) Bo̍h-tit phoe-phêng lâng, chiū bô tú-tio̍h phoe-phêng; bo̍h-tit chek-chōe lâng, chiū bô tú-tio̍h chek-chōe; lín pàng lâng soah, chiū beh pàng lín soah;

(BCL) 「莫得批評人，就無抵著批評；莫得責罪人，就無抵著責罪；恁放人息，就欲放恁息；

38

(THR) hō͘ lâng, chiū beh hō͘ lín; beh ēng chiok-gia̍h ê táu, jı̍h, iô, hō͘ i cha̍t kàu pôaⁿ-chhut-lâi, piàⁿ tī lín ê saⁿ-á-phè. In-ūi lín ēng sím-mı̍h niû lâi niû, iā beh án-ni tò niû hō͘ lín.

(BCL) 互人，就欲互恁，欲用足額的斗，扼、搖，互伊實到出來，傾佇恁的衫仔帕；因為恁用甚麼量來量，也欲按呢倒量互恁。」

39

(THR) Koh ēng phì-jū kā in kóng, Chhiⁿ-mî ê ōe kā chhiⁿ-mî ê chhōa lō͘ mah? Nn̄g-ê kiám bōe lóng po̍ah-lo̍h hām-khiⁿ mah?

(BCL) 閣用譬喻給講：「睛暝的會給睛暝的導路嗎？二個豈攏跋落陷坑嗎？

40

(THR) Ha̍k-seng bōe-ōe pôaⁿ-kè sian-siⁿ; chóng-sī kìⁿ-nā chiâⁿ chòe chiâu-pī ê beh chhin-chhiūⁿ i ê sian-siⁿ.

(BCL) 學生會過先生；總是見若成做齊備的欲親像伊的先生。

41

(THR) Koh lí cháiⁿ-iūⁿ khòaⁿ-kìⁿ hiaⁿ-tī ba̍k-chiu lāi ê chháu-á-iù, iā bô siūⁿ lí ba̍k-chiu lāi ê îⁿ-á-chhâ ah?

(BCL) 閣你怎樣看見兄弟目睭內的草仔幼，也無想你目睭內的楹仔柴啊？

42

(THR) Á-sī beh thài ōe kā lí ê hiaⁿ-tī kóng, Hiaⁿ-tī ah, lí ba̍k-chiu lāi ê chháu-á-iù hō͘ góa kā lí the̍h-khì, iā pún-sin bô khòaⁿ-kìⁿ lí ba̍k-chiu lāi ê îⁿ-á-chhâ ah? Ké-hó ê lâng ah, tāi-seng the̍h-khì lí ba̍k-chiu lāi ê îⁿ-á-chhâ, chiah ōe bêng-bêng khòaⁿ-kìⁿ thang the̍h-khì hiaⁿ-tī ba̍k-chiu lāi ê chháu-á-iù.

(BCL) 抑是欲豈會給你的兄弟講：『兄弟啊，你目睭內的草仔幼互我給你提去』，也本身無看見你目睭內的楹仔柴啊？假好的人啊！代先提去你目睭內的楹仔柴，才會明明看見，通提去兄弟目睭內的草仔幼。」

43

(THR) In-ūi bô ū hó chhiū kiat pháiⁿ ké-chí; iā bô ū pháiⁿ chhiū kiat hó ké-chí.

(BCL) 「因為，無有好樹結歹果子，也無有歹樹結好果子。

44

(THR) In-ūi ta̍k châng chhiū tùi i ka-kī ê ké-chí lâi bat i; chhì-phè lāi bô lâng bán bû-hoa-kó, chháu-chhì lāi bô lâng tiah phû-tô.

(BCL) 因為逐欉樹對伊家己的果子，來識伊。莿帕內無人挽無花果，草茦內無人摘葡萄。

45

(THR) Hó lâng tùi i ê sim só͘ chek-chū ê hó lâi hoat-chhut hó; pháiⁿ lâng tùi i só͘ chek-chū ê pháiⁿ lâi hoat-chhut pháiⁿ; in-ūi tùi sim só͘ chhiong-móa ê, chhùi chiū kóng chhut.

(BCL) 好人對伊的心所積聚的好來發出好；歹人對伊所積聚的歹來發出歹；因為對心所充滿的，嘴就講出。」

46

(THR) Lín siáⁿ-sū chheng-ho͘ góa, Chú ah, Chú ah, iā bô kiâⁿ góa só͘ kóng ê ah?

(BCL) 「恁啥事稱呼我『主啊，主啊』也無行我所講的啊？

47

(THR) Kìⁿ-nā chiū-kūn góa, thiaⁿ góa chiah ê ōe lâi kiâⁿ i ê lâng, góa beh pò lín chai hit ê lâng chhin-chhiūⁿ sím-mı̍h.

(BCL) 見若就近我，聽我諸個話來行伊的人，我欲報恁知彼個人親像甚麼：

48

(THR) I sī chhin-chhiūⁿ lâng khí chhù, ku̍t hō͘ i chhim, hē tōe-ki tī chio̍h-pôaⁿ téng; tōa chúi chı̍t-ē kàu, khoe lâu chhiong-tio̍h chhù, bōe-ōe iô-tāng i, in-ūi i khí-tit hó.

(BCL) 伊是親像人起厝，掘互伊深，下地基佇石磐頂；大水一下到，溪流沖著厝，會搖動伊，因為伊起得好。

49

(THR) Nā-sī thiaⁿ-liáu bô kiâⁿ ê lâng, sī chhin-chhiūⁿ lâng khí chhù tī thô͘-téng, bô hē tōe-ki; khoe lâu chhiong-tio̍h i, chiū tó; hit keng chhù ê tó-hōai sī siong-tiōng.

(BCL) 若是聽了無行的人，是親像人起厝佇土頂，無下地基；溪流沖著伊，就倒，彼間厝的倒壞是傷重。」

Bible Color Mark

• 台語漢字羅馬本
• 巴克禮全羅