馬可福音 第 10 章

1

(THR) Iâ-so͘ tùi hia khí-sin kàu Iû-thài ê tōe-kài, kàu Iok-tàn hô gōa; chōe-chōe tīn ê lâng koh chū-chı̍p chiū-kūn I; I chiàu siông koh kà-sī in.

(BCL) 耶穌對遐起身，到猶太的地界到約但河外。多多陣的人閣聚集就近伊，伊照常閣教示。

2

(THR) . Ū Hoat-lī-sài lâng chiū-kūn I, mn̄g kóng, Lâng lî-chhut i ê bó͘, thang mah? sī teh chhì I.

(BCL) 有法利賽人就近伊問講：「人離出伊的某通嗎？」是試伊。

3

(THR) . Iâ-so͘ ìn kóng, Mô͘-se bēng-lēng lín cháiⁿ-iūⁿ?

(BCL) 耶穌應講：「摩西命令恁怎樣？」

4

(THR) . In kóng, Mô͘-se chún lâng siá lî-chu, lâi lî i.

(BCL) 講：「摩西准人寫離書來離伊。」

5

(THR) . Nā-sī Iâ-so͘ kā in kóng, Mô͘-se in-ūi lín ê sim ngī, chiah siá chit ê bēng-lēng hō͘ lín;

(BCL) 若是耶穌給講：「摩西因為恁的心硬，才寫此個命令互恁；

6

(THR) . chóng-sī tùi chō-hòa ê khí-thâu, Chú chhòng-chō in ū lâm ū lú.

(BCL) 總是對造化的起頭，主創造有男有女。

7

(THR) . In-ūi án-ni lâng beh lī-khui pē-bú, kiat-liân i ê bó͘, nn̄g ê beh chiâⁿ-chòe chı̍t thé;

(BCL) 因為按呢，人欲離開父母，結聯伊的某，二個欲成做一體。

8

(THR) . Chhin-chhiūⁿ án-ni, bô chòe nn̄g ê, sī chòe chı̍t thé.

(BCL) 親像按呢，無做二個，是做一體。

9

(THR) . Só͘-í Siōng-tè só͘ phòe-ha̍p ê, lâng m̄ thang pun-khui i.

(BCL) 所以，上帝所配合的，人呣通分開伊。」

10

(THR) . Jı̍p chhù ha̍k-seng koh chiong chit ê tāi-chì mn̄g I.

(BCL) 入厝，學生閣將此個代誌問伊。

11

(THR) . I kā in kóng, Hōan-nā lî-chhut i ê bó͘ lâi chhōa pa̍t-ê ê, sī kiâⁿ kan-îm lâi ko͘-hū i;

(BCL) 伊給講：「凡若離出伊的某來娶別個的，是行姦淫，來辜負伊；

12

(THR) . bó͘ nā khì-sak i ê tiōng-hu lâi kè pa̍t-ê, iā sī kiâⁿ kan-îm.

(BCL) 某若棄拺伊的丈夫來嫁別個，也是行姦淫。」

13

(THR) . Ū lâng tòa sòe-kiáⁿ chiū-kūn Iâ-so͘ beh hō͘ I bong in; ha̍k-seng chek-pī in.

(BCL) 有人帶細子就近耶穌，欲互伊摸，學生責備。

14

(THR) . Iâ-so͘ khòaⁿ-kìⁿ án-ni, tōa bô hoaⁿ-hí, kā ha̍k-seng kóng, Iông-ún sòe-kiáⁿ chiū-kūn góa, bo̍h-tit kìm in; in-ūi Siōng-tè ê kok sī chit hō lâng ê.

(BCL) 耶穌看見按呢大無歡喜，給學生講：「容允細子就近我，莫得禁；因為上帝的國，是此號人的。

15

(THR) . Góa sı̍t-chāi kā lín kóng, Hōan-nā sêng-chiap Siōng-tè ê kok bô chhin-chhiūⁿ sòe-kiáⁿ ê, koat-tòan bōe tit jı̍p-khì.

(BCL) 我實在給恁講，凡若承接上帝的國，無親像細子的，決斷得入去。」

16

(THR) . Chiū phō in, kā in hōaⁿ chhiú, chiok-hok in.

(BCL) 就抱，給按手，祝福。

17

(THR) . Iâ-so͘ chhut-khì tī lō͘-nı̍h, ū chı̍t lâng cháu chìn-chêng lâi kūi I, mn̄g kóng, Hó ê sian-siⁿ ah, góa tio̍h cháiⁿ-iūⁿ chòe, chiah thang sêng-chiap éng-o̍ah?

(BCL) 耶穌出去佇路裡，有一人走進前，來跪伊，問講：「好的先生啊，我著怎樣做才通承接永活？」

18

(THR) . Iâ-so͘ kā i kóng, Lí siáⁿ-sū chheng-ho͘ góa sī hó ah? Bô chı̍t-ê hó, to̍k-to̍k Siōng-tè nā-tiāⁿ.

(BCL) 耶穌給伊講：「你啥事稱呼我是好啊？無一個好，獨獨上帝若定。

19

(THR) . Chiah ê kài lí í-keng chai, Bo̍h-tit thâi-sí lâng, Bo̍h-tit kan-îm, Bo̍h-tit thau-the̍h, Bo̍h-tit lām-sám chòe kan-chèng, Bo̍h-tit khek-khui lâng, Tio̍h kèng lí ê pē-bú.

(BCL) 諸個誡你已經知：莫得死人；莫得姦淫；莫得偷提；莫得濫糝做干證；莫得剋虧人；著敬你的父母。」

20

(THR) . I ìn kóng, Sian-siⁿ ah, chiah-ê góa tùi sòe-hàn lóng siú i.

(BCL) 伊應講：「先生啊，諸個我對細漢攏守伊。」

21

(THR) . Iâ-so͘ khòaⁿ i, thiàⁿ i, chiū kā i kóng, Lí iáu khiàm chı̍t hāng; tio̍h khì bōe lī hōan só͘ ū ê, lâi hō͘ sòng-hiong lâng, chiū beh ū châi-pó tī thiⁿ-nı̍h, koh lâi tè góa.

(BCL) 耶穌看伊，疼伊，就給伊講：「你猶欠一項：著去賣你凡所有的，來互喪鄉人，就欲有財寶佇天裡；閣來隨我。」

22

(THR) . I thiaⁿ chit ê ōe, bīn chiū sit-sek, iu-būn chiū khì. In-ūi i sán-gia̍p chin chōe.

(BCL) 伊聽此個話，面就失色，憂悶就去，因為伊產業真多。

23

(THR) . Iâ-so͘ sì-kòe khòaⁿ, kā I ê ha̍k-seng kóng, Pù lâng jı̍p Siōng-tè ê kok oh---ah.

(BCL) 耶穌四界看，給伊的學生講：「富人入上帝的國啊！」

24

(THR) . Ha̍k-seng kî-kòai I ê ōe; Iâ-so͘ koh ìn kóng, Sòe-kiáⁿ ah, óa-khò chîⁿ-châi ê lâng jı̍p Siōng-tè ê kok oh--ah.

(BCL) 學生奇怪伊的話。耶穌閣應講：「細子啊，倚靠錢財的人入上帝的國啊！

25

(THR) . Lo̍k-tô chhng-kè chiam-phīⁿ pí pù lâng jı̍p Siōng-tè ê kok iáu khah khòai.

(BCL) 駱駝穿過針鼻比富人入上帝的國猶卡快。」

26

(THR) . Ha̍k-seng it-hoat gông-ngia̍h, kā I kóng, Án-ni chī-chūi ōe tit-tio̍h kiù ah?

(BCL) 學生益發卬愕，給伊講：「按呢是誰會得著救啊？」

27

(THR) . Iâ-so͘ khòaⁿ in kóng, Chāi lâng sī bōe-ōe, chāi Siōng-tè chiū m̄ sī án-ni; in-ūi chāi Siōng-tè bān sū lóng ōe.

(BCL) 耶穌看，講：「在人是會，在上帝就呣是按呢，因為在上帝萬事攏會。」

28

(THR) . Pí-tek chiū kā I kóng, Góan bat pàng-sak it-chhè lâi tè lí.

(BCL) 彼得就給伊講：「阮曾放拺一切來隨你。」

29

(THR) . Iâ-so͘ kóng, Góa sı̍t-chāi kā lín kóng, Bô ū lâng ūi-tio̍h góa kap hok-im ê iân-kò͘ pàng-sak chhù-the̍h, hiaⁿ-tī, chí-bē, lāu-bú, lāu-pē, kiáⁿ-jî, chhân-hn̂g,

(BCL) 耶穌講：「我實在給恁講，無有人為著我及福音的緣故放拺厝宅、兄弟、姊妹、老母、老父、子兒、田園，

30

(THR) . chiū tī hiān-sî bô tit-tio̍h pah pē, chiū-sī chhù-the̍h, hiaⁿ-tī, chí-bē, bú-chhin, kiáⁿ-jî, chhân-hn̂g, kiam ū khún-tio̍k, koh tī lâi-sè beh tit-tio̍h éng-o̍ah.

(BCL) 就佇現時無得著百倍，就是厝宅、兄弟、姊妹、母親、子兒、田園，兼有窘逐，閣佇來世欲得著永活。

31

(THR) . Chóng-sī tāi-seng ê chōe-chōe beh chòe lō͘-bé, lō͘-bé ê iā beh chòe tāi-seng.

(BCL) 總是，代先的多多，欲做路尾，路尾的，也欲做代先。」

32

(THR) . In chiūⁿ Iâ-lō͘-sat-léng, tī lō͘-nı̍h Iâ-so͘ kiâⁿ tī thâu-chêng, ha̍k-seng gông-ngia̍h, tè ê lâng kiaⁿ-hiâⁿ. Iâ-so͘ koh tòa cha̍p-jī ê ha̍k-seng, chiong I só͘ beh tú-tio̍h ê sū kā in kóng,

(BCL) 上耶路撒冷。佇路裡耶穌行佇頭前，學生卬愕，隨的人驚惶。耶穌閣帶十二個學生，將伊所欲抵著的事給講：

33

(THR) . Taⁿ lán chiūⁿ Iâ-lō͘-sat-léng, Jîn-chú beh siū kè-sàng hō͘ chiah ê chè-si-thâu, kap keng-ha̍k-sū; in beh gí I sí-chōe, iā beh kè-sàng I hō͘ gōa-pang-lâng;

(BCL) 「今咱上耶路撒冷，人子欲受解送互諸個祭司頭及經學士，欲擬伊死罪，也欲解送伊互外邦人。

34

(THR) . in beh hì-lāng I, phùi-nōa I, piⁿ-phah I, hāi-sí I; kè saⁿ jı̍t I beh koh-o̍ah.

(BCL) 欲戲弄伊，呸涎伊，鞭拍伊，害死伊。過三日伊欲復活。」

35

(THR) . Se-pí-thài ê kiáⁿ Ngá-kok kap Iok-hān chiū-kūn lâi kā I kóng, Sian-siⁿ ah, kìⁿ-nā góan só͘ tùi lí kiû ê, ài lí kā góan kiâⁿ i.

(BCL) 西庇太的子雅各及約翰就近，來給伊講：「先生啊，見若阮所對你求的，愛你給阮行伊。」

36

(THR) . I chiū kā in kóng, Ài góa kā lín kiâⁿ sím-mı̍h ah?

(BCL) 伊就給講：「愛我給恁行甚麼啊？」

37

(THR) . In kā I kóng, Chún góan tī lí ê êng-kng, chı̍t-ê chē lí ê chiàⁿ-pêng, chı̍t-ê chē lí ê tò-pêng.

(BCL) 給伊講：「准阮佇你的榮光，一個坐你的正旁，一個坐你的倒旁。」

38

(THR) . Nā-sī Iâ-so͘ kā in kóng, Lín só͘ kiû ê, lín m̄ chai. Góa só͘ lim ê poe , lín ōe lim mah? góa só͘ siū ê sóe, lín ōe siū mah?

(BCL) 若是耶穌給講：「恁所求的恁呣知。我所飲的杯，恁會飲嗎？我所受的洗，恁會受嗎？」

39

(THR) . In kóng, Ōe. I kā in kóng, Góa só͘ lim ê poe, lín beh lim i, góa só͘ siū ê sóe, lín beh siū i;

(BCL) 講：「會。」伊給講：「我所飲的杯，恁欲飲伊；我所受的洗，恁欲受伊；

40

(THR) . chóng-sī chē góa ê chiàⁿ-pêng tò-pêng m̄ sī góa ōe thang hō͘ lâng, to̍k-to̍k ūi-tio̍h sím-mı̍h lâng pī-pān ê chiū hō͘ i.

(BCL) 總是坐我的正旁倒旁，呣是我會通互人，獨獨為著甚麼人備辦的，就互伊。」

41

(THR) . Cha̍p-ê ha̍k-seng thiaⁿ-kìⁿ, chiū siū-khì Ngá-kok kap Iok-hān.

(BCL) 十個學生聽見，就受氣雅各及約翰。

42

(THR) . Iâ-so͘ kiò in lâi kā in kóng, Lín chai gōa-pang só͘ chun chòe jîn-kun ê chòe chú lâi tī-lí in, in ê tāi-jîn kóan-hat in.

(BCL) 耶穌叫來，給講：「恁知，外邦所尊做人君的，做主來治理，的大人管轄。

43

(THR) . To̍k-to̍k lín tiong-kan m̄ sī án-ni; lín tiong-kan ài chòe tōa ê beh chòe lín ê chhe-ēng;

(BCL) 獨獨恁中間，呣是按呢。恁中間，愛做大的，欲做恁的差用；

44

(THR) . lín tiong-kan ài chòe thâu ê beh chòe chèng lâng ê lô͘-po̍k.

(BCL) 恁中間，愛做頭的，欲做眾人的奴僕。

45

(THR) . In-ūi Jîn-chú kàu m̄ sī beh chhe-ēng lâng, sī beh hō͘ lâng chhe-ēng, koh hiàn I ê sìⁿ-miā lâi sio̍k-hôe chōe-chōe lâng.

(BCL) 因為人子到，呣是欲差用人，是欲互人差用，閣獻伊的生命來贖回多多人。」

46

(THR) . In kàu Iâ-lī-ko; Iâ-so͘ kap I ê ha̍k-seng kap tōa tīn lâng chhut Iâ-lī-ko ê sî, ū Tí-mái ê kiáⁿ, Pa-tí-mái, chiū-sī chhiⁿ-mî chòe khit-chia̍h ê, chē tī lō͘-piⁿ;

(BCL) 到耶利哥；耶穌及伊的學生及大陣人出耶利哥的時，有底買的子巴底買，就是睛暝做乞食者，坐佇路邊。

47

(THR) . í-keng thiaⁿ-kìⁿ sī Ná-sat-le̍k lâng Iâ-so͘, chiū âu-kiò kóng, Tāi-pı̍t ê hō͘-è, Iâ-so͘, khó-lîn góa.

(BCL) 已經聽見是拿撒勒人耶穌，就喉叫講：「大衛的後裔耶穌！可憐我！」

48

(THR) . Chōe-chōe lâng chek-pī i, kah i chēng-chēng; nā-sī i it-hoat tōa siaⁿ âu-kiò kóng, Tāi-pı̍t ê hō͘-è ah, khó-lîn góa.

(BCL) 多多人責備伊，教伊靜靜。若是伊益發大聲喉叫講：「大衛的後裔啊，可憐我！」

49

(THR) . Iâ-so͘ thêng-kha kóng, Kiò i lâi. Chiū kiò chhiⁿ-mî lâng, kā i kóng, An lí ê sim, khí-lâi, I teh kiò lí ah.

(BCL) 耶穌停腳，講：「叫伊來。」就叫睛暝人，給伊講：「安你的心，起來！伊叫你啊。」

50

(THR) . I chiū pàng-sak i ê saⁿ, thiàu-khí-lâi khì chiū-kūn Iâ-so͘.

(BCL) 伊就放拺伊的衫，跳起來，去就近耶穌。

51

(THR) . Iâ-so͘ ìn i kóng, Ài góa kā lí chòe sím-mı̍h? Chhiⁿ-mî lâng kā I kóng, Lia̍p-pho-nî, góa ài tit-tio̍h khòaⁿ-kìⁿ.

(BCL) 耶穌應伊講：「愛我給你做甚麼？」睛暝人給伊講：「拉波尼，我愛得著看見。」

52

(THR) . Iâ-so͘ kā i kóng, Khì ah, lí ê sìn ū kiù lí lah. I liâm-piⁿ tit-tio̍h khòaⁿ-kìⁿ, chiū tī lō͘-nı̍h tè Iâ-so͘.

(BCL) 耶穌給伊講：去啊！你的信有救你啦。」伊連鞭得著看見，就佇路裡隨耶穌。

Bible Color Mark

• 台語漢字羅馬本
• 巴克禮全羅