馬太福音 第 12 章

1

(THR) Tng hit sî, Iâ-so͘ tī an-hioh-jı̍t tùi be̍h-hn̂g keng-kè; I ê ha̍k-seng iau, chiū tiah be̍h-sūi lâi chia̍h.

(BCL) 當彼時，耶穌佇安息日對麥園經過。伊的學生枵，就摘麥穗來食。

2

(THR) Nā-sī Hoat-lī-sài lâng khòaⁿ-kìⁿ chiū kā I kóng, Lí khòaⁿ, lí ê ha̍k-seng kiâⁿ an-hioh-jı̍t só͘ m̄ eng-kai kiâⁿ ê sū.

(BCL) 若是法利賽人看見，就給伊講：「你看，你的學生行安息日所呣應該行的事！」

3

(THR) Iâ-so͘ chiū kā in kóng, Tāi-pı̍t kap kun-tè ê lâng iau ê sî só͘ kiâⁿ ê, lín bô tha̍k-tio̍h mah?

(BCL) 耶穌就給講：「大衛及跟隨的人枵的時所行的，恁無讀著嗎？

4

(THR) Chiū-sī i jı̍p Siōng-tè ê chhù, chia̍h pâi-lia̍t ê piáⁿ; che m̄ sī i kap kun-tè ê lâng só͘ thang chia̍h ê, to̍k-to̍k chè-si thang nā-tiāⁿ.

(BCL) 就是伊入上帝的厝，食排列的餅，這呣是伊及跟隨的人所通食的，獨獨祭司通若定。

5

(THR) Á-sī lín ia̍h m̄ bat tha̍k lu̍t-hoat só͘ kì-chài, tng an-hioh-jı̍t chè-si tī tiān-nı̍h hōan-tio̍h an-hioh ia̍h sī bô chōe mah?

(BCL) 抑是，恁亦呣曾讀律法所記載，當安息日，祭司佇殿裡犯著安息亦是無罪嗎？

6

(THR) To̍k-to̍k góa kā lín kóng, tī chia ū pí tiān khah tōa ê.

(BCL) 獨獨我給恁講，佇遮有比殿卡大的。

7

(THR) Chóng-sī lín nā chai, Góa ài lîn-bín, bô ài chè-sū, chit kù ê ì-gī, chiū bô chek-chōe bô chōe ê lâng.

(BCL) 總是恁若知，『我愛憐憫，無愛祭祀。』此句的意義，就無責罪無罪的人。

8

(THR) In-ūi Jîn-chú sī an-hioh-jı̍t ê chú.

(BCL) 因為人子是安息日的主。」

9

(THR) Iâ-so͘ lī-khui hia, jı̍p in ê hōe-tn̂g; tú-tn̄g ū lâng chı̍t chhiú ko͘-tâ.

(BCL) 耶穌離開遐，入的會堂。抵當有人一手枯焦。

10

(THR) Lâng mn̄g I kóng, An-hioh-jı̍t hêng i, thang mah? ì-sù ài beh kò I.

(BCL) 人問伊講：「安息日行醫通嗎？」意思愛欲告伊。

11

(THR) I chiū kā in kóng, Lín tiong-kan sím-mı̍h lâng ū chı̍t chiah iûⁿ, nā tī an-hioh-jı̍t po̍ah-lo̍h khiⁿ, bô kā i lia̍h-khí-lâi mah?

(BCL) 伊就給講：「恁中間甚麼人有一隻羊，若佇安息日跋落坑，無給伊掠起來嗎？

12

(THR) Hô-hòng lâng pí iûⁿ ke jōa kùi-khì ah! Só͘-í an-hioh-jı̍t kiâⁿ hó-sū sī thang.

(BCL) 何況人比羊加偌貴氣啊！所以，安息日行好事是通。」

13

(THR) Chiū kā hit lâng kóng, Chhun lí ê chhiú. I chiū chhun, sûi-sî hó-hó, chhin-chhiūⁿ pa̍t ki chhiú.

(BCL) 就給彼人講：「伸你的手！」伊就伸，隨時好好，親像別支手。

14

(THR) Hoat-lī-sài lâng chhut-khì, saⁿ-kap kè-bô͘ kong-kek Iâ-so͘, khòaⁿ thang cháiⁿ-iūⁿ bia̍t I.

(BCL) 法利賽人出去，相及計謀攻擊耶穌，看通怎樣滅伊。

15

(THR) Iâ-so͘ chai, chiū thè-khì, lī-khui hia; ū chōe-chōe lâng tè I, chiū lóng kā in i;

(BCL) 耶穌知，就退去，離開遐，有多多人隨伊。就攏給醫；

16

(THR) ia̍h kéng-kài in bo̍h-tit chiong I pò-iông;

(BCL) 亦警戒，莫得將伊報揚。

17

(THR) sī beh èng-giām thok sian-ti Í-sài-a só͘ kóng ê, kóng,

(BCL) 是欲應驗託先知以賽亞所講的，講：

18

(THR) Lí khòaⁿ, góa ê lô͘-po̍k, góa só͘ kéng ê, Góa só͘ thiàⁿ ê, góa ê sim só͘ hoaⁿ-hí ê; Góa beh chiong góa ê Sîn hù-hō͘ I. I beh ēng phòaⁿ-tòan thong-ti gōa-pang.

(BCL) 你看，我的奴僕，我所揀的、我所疼的、我的心所歡喜的，我欲將我的神付互伊；伊欲用判斷通知外邦。

19

(THR) I bô beh saⁿ-chiⁿ, bô beh soan-jióng; Tī koe-chhī bô lâng thiaⁿ-kìⁿ I ê siaⁿ.

(BCL) 伊無欲相爭，無欲喧嚷；佇街市無人聽見伊的聲。

20

(THR) Siū-siong ê lô͘-tek, I bô beh at-chı̍h, Beh hoa ê hé-chhiⁿ, I bô phah-sit, Kàu hō͘ kong-gī ōe tek-sèng.

(BCL) 受傷的蘆竹，伊無欲遏折；欲熄的火星，伊無拍熄；到互公義會得勝。

21

(THR) Gōa-pang ia̍h beh khò I ê miâ lâi ǹg-bāng.

(BCL) 外邦亦欲靠伊的名來向望。

22

(THR) Hit sî ū chhōa chı̍t ê hōan-tio̍h kúi, chhiⁿ-mî kòa é-káu ê lâi chiū-kūn I. I chiū i-hó i, hō͘ é-káu ê kóng ōe, sòa ōe khòaⁿ-kìⁿ.

(BCL) 彼時，有導一個患著鬼、睛暝掛啞口者來就近伊，伊就醫好伊，互啞口者講話，續會看見。

23

(THR) Chèng lâng lóng gông-ngia̍h, kóng, chit-ê chóng-bô sī Tāi-pı̍t ê hō͘-è o͘h?

(BCL) 眾人攏卬愕，講：「此個總無是大衛的後裔哦？」

24

(THR) Nā-sī Hoat-lī-sài lâng thiaⁿ-kìⁿ chiū kóng, Chit lâng kóaⁿ kúi bô m̄ sī khò kúi-ông Pia̍t-se-pok.

(BCL) 若是法利賽人聽見，就講：「此人趕鬼無呣是靠鬼王別西卜。」

25

(THR) Iâ-so͘ chai in ê ì-sù, chiū kā in kóng, Kìⁿ-nā kok ka-kī cheng-piàⁿ, ōe tì-kàu pha-hng; kìⁿ-nā siâⁿ á-sī ke ka-kī cheng-piàⁿ, tek-khak khiā bōe tiâu.

(BCL) 耶穌知的意思，就給講：「見若國家己爭拼，會致到拋荒；見若城抑是家家己爭拼，的確徛住；

26

(THR) Nā Sat-tàn kóaⁿ Sat-tàn, sī ka-kī cheng-piàⁿ, i ê kok thài-thó khiā ōe tiâu?

(BCL) 若撒但趕撒但，是家己爭拼，伊的國豈可徛會住？

27

(THR) Siat-sú góa khò Pia̍t-se-pok kóaⁿ kúi, chiū lín ê chú-tē kóaⁿ kúi óa-khò chī-chūi ah? Án-ni in beh gí-tòan lín.

(BCL) 設使我靠別西卜趕鬼，就恁的子弟趕鬼倚靠是誰啊？按呢，欲擬斷恁。

28

(THR) To̍k-to̍k góa nā khò Siōng-tè ê Sîn kóaⁿ kúi, chiū Siōng-tè ê kok í-keng kàu lín lah.

(BCL) 獨獨我若靠上帝的神趕鬼，就上帝的國已經到恁啦。

29

(THR) Lâng cháiⁿ-iūⁿ ōe jı̍p béng lâng ê chhù, kiap i ê ke-hé? kiám m̄ tio̍h tāi-seng pa̍k béng lâng, jiân-āu kiap i ê chhù mah?

(BCL) 人怎樣會入猛人的厝，劫伊的家伙？豈呣著代先縛猛人，然後劫伊的厝嗎？

30

(THR) Bô tâng góa ê, chiū-sī tùi-te̍k góa; bô kap góa siu-khioh ê, chiū-sī teh phah-sòaⁿ.

(BCL) 無同我的，就是對敵我；無及我收拾的，就是拍散。」

31

(THR) Só͘-í góa kā lín kóng, Kìⁿ-nā chōe-ok pòng-to̍k, lóng beh sià-bián i; to̍k-to̍k pòng-to̍k Sèng Sîn ê, bô beh sià-bián i.

(BCL) 所以我給恁講：「見若罪惡謗瀆攏欲赦免伊，獨獨謗瀆聖神的，無欲赦免伊。

32

(THR) Kìⁿ-nā kóng ōe kong-kek Jîn-chú ê, beh sià-bián i; to̍k-to̍k kìⁿ-nā kóng ōe kong-kek Sèng Sîn ê, put-lūn kim-sè lâi-sè, bô beh sià-bián i.

(BCL) 見若講話攻擊人子的，欲赦免伊；獨獨見若講話攻擊聖神的，不論今世來世，無欲赦免伊。」

33

(THR) Lín tio̍h lia̍h hit ê chhiū chòe hó, i ê ké-chí ia̍h chòe hó; he̍k-sī lia̍h hit ê chhiū chòe pháiⁿ, i ê ké-chí ia̍h chòe pháiⁿ; in-ūi tùi ké-chí lâi bat chhiū.

(BCL) 「恁著掠彼個樹做好，伊的果子亦做好；或是掠彼個樹做歹，伊的果子亦做歹；因為對果子來識樹。

34

(THR) To̍k-chôa ê lūi ah, lín í-keng sī pháiⁿ, thài ōe kóng hó ōe? in-ūi sī tùi sim só͘ chhiong-móa ê, chhùi chiū kóng chhut.

(BCL) 毒蛇的類啊！恁已經是歹，豈會講好話？因為是對心所充滿的，嘴就講出。

35

(THR) Hó lâng tùi só͘ chek-chū ê hó, lâi hoat-chhut chiah ê hó; pháiⁿ lâng tùi só͘ chek-chū ê pháiⁿ, lâi hoat-chhut chiah ê pháiⁿ.

(BCL) 好人對所積聚的好，來發出諸個好；歹人對所積聚的歹，來發出諸個歹。

36

(THR) Góa kā lín kóng, kìⁿ-nā lâng só͘ kóng ê êng-á-ōe, in tī sím-phòaⁿ ê jı̍t, ta̍k kù tio̍h sò͘-bêng.

(BCL) 我給恁講，見若人所講的閒仔話，佇審判日，逐句著訴明；

37

(THR) In-ūi tùi lí ê ōe beh chheng lí chòe gī; ia̍h tùi lí ê ōe beh gí lí ū chōe.

(BCL) 因為對你的話欲稱你做義，亦對你的話欲擬你有罪。」

38

(THR) Hit sî ū keng-ha̍k-sū kap Hoat-lī-sài kúi-nā lâng ìn I kóng, Sian-siⁿ ah, góan ài tùi lí khòaⁿ chı̍t ê sîn-jiah.

(BCL) 彼時，有經學士及法利賽幾若人應伊講：「先生啊，阮愛對你看一個神蹟。」

39

(THR) Nā-sī I ìn kóng, Ok-to̍k kan-îm ê sè-tāi kiû sîn-jiah; tû sian-ti Iok-ná ê sîn-jiah í-gōa, bô beh sîn-jiah hō͘ in;

(BCL) 若是伊應講：「惡毒姦淫的世代求神蹟，除先知約拿的神蹟以外，無欲神蹟互。

40

(THR) in-ūi chhin-chhiūⁿ Iok-ná saⁿ jı̍t saⁿ mî tī tōa hî ê pak-tó͘ lāi, Jîn-chú ia̍h beh án-ni saⁿ jı̍t saⁿ mî tī tōe-lāi.

(BCL) 因為親像約拿三日三暝佇大魚的腹肚內，人子亦欲按呢三日三暝佇地內。

41

(THR) Nî-nî-bî lâng tng sím-phòaⁿ ê sî, beh kap chit sè-tāi ê lâng saⁿ-kap khí-lâi, sòa gí in ê chōe; in-ūi in tùi Iok-ná só͘ thôan lâi hóan-hóe; hô-hòng tī chia ū pí Iok-ná khah tōa ê.

(BCL) 尼尼微人當審判的時，欲及此世代的人相及起來，續擬的罪，因為對約拿所傳來反悔。何況佇遮有比約拿卡大的！

42

(THR) Lâm-hng ê lú-ông, tng sím-phòaⁿ ê sî beh kap chit sè-tāi ê lâng saⁿ-kap khí-lâi, sòa gí in ê chōe; in-ūi i tùi tōe ê ke̍k-thâu lâi, beh thiaⁿ Só͘-lô-bûn tì-sek ê ōe, hô-hòng tī chia ū pí Só͘-lô-bûn khah tōa ê.

(BCL) 南方的女王當審判的時，欲及此世代的人相及起來，續擬的罪；因為伊對地的極頭來，欲聽所羅門智識的話。何況佇遮有比所羅門卡大的！」

43

(THR) Siâ-sîn í-keng lī-khui lâng, keng-kè bô chúi ê tōe, kiû an-hioh ia̍h bô tit-tio̍h.

(BCL) 「邪神已經離開人，經過無水的地，求安息，亦無得著。

44

(THR) Chiū kóng, Góa beh tò-khì só͘ chhut-lâi ê chhù; kàu tè, chiū khòaⁿ-kìⁿ khang-khang, piàⁿ-sàu, siu-chéng;

(BCL) 就講：『我欲倒去所出來的厝。』到地，就看見空空，傾掃，修整，就去，閣帶七個神比家己卡歹的，入去徛起，

45

(THR) chiū khì, koh tòa chhit ê sîn, pí ka-kī khah pháiⁿ ê, jı̍p-khì khiā-khí; hit lâng lō͘-bé ê kéng-hóng, pí khí-thâu ê khah chhám. Chit ê pháiⁿ ê sè-tāi ia̍h beh chhin-chhiūⁿ án-ni.

(BCL) 彼人路尾的景況比起頭的卡慘。此個歹的世代亦欲親像按呢。」

46

(THR) I iáu tùi chèng lâng kóng ōe ê sî, tú-tn̄g I ê lāu-bú kap I ê hiaⁿ-tī khiā tī gōa-bīn, ài beh kap I kóng ōe.

(BCL) 伊猶對眾人講話的時，抵當伊的老母及伊的兄弟徛佇外面，愛欲及伊講話。

47

(THR) Ū lâng kā I kóng, Lí khòaⁿ, lí ê lāu-bú kap lí ê hiaⁿ-tī khiā tī gōa-bīn, ài beh kap lí kóng ōe.

(BCL) 有人給伊講：「你看，你的老母及你的兄弟徛佇外面，愛欲及你講話。」

48

(THR) Chiū ìn hit ê kā I kóng ê kóng, Sím-mı̍h lâng sī góa ê lāu-bú? sím-mı̍h lâng sī góa ê hiaⁿ-tī ah?

(BCL) 就應彼個給伊講的講：「甚麼人是我的老母？甚麼人是我的兄弟啊？」

49

(THR) Chiū chhun chhiú kí I ê ha̍k-seng kóng, Lí khòaⁿ, góa ê lāu-bú kap góa ê hiaⁿ-tī.

(BCL) 就伸手指伊的學生，講：「你看，我的老母及我的兄弟。

50

(THR) In-ūi kìⁿ-nā kiâⁿ góa tī thiⁿ-nı̍h ê Pē ê chí-ì ê, chiū-sī góa ê hiaⁿ-tī, chí-bē, kap lāu-bú.

(BCL) 因為見若行我佇天裡的父的旨意的，就是我的兄弟姊妹及老母。」

Bible Color Mark

• 台語漢字羅馬本
• 巴克禮全羅