馬太福音 第 20 章

1

(THR) In-ūi thian-kok chhin-chhiūⁿ ke-chú thàu-chá chhut-khì chhiàⁿ kang jı̍p i ê phû-tô-hn̂g;

(BCL) 「因為天國親像家主透早出去倩工入伊的葡萄園，

2

(THR) kap chòe-kang ê lâng iok chı̍t jı̍t chı̍t chîⁿ gûn; chiū chhe in jı̍p i ê hn̂g.

(BCL) 及做工的人約一日一錢銀，就差入伊的園。

3

(THR) Káu tiám ê sî chhut-khì, koh khòaⁿ-kìⁿ ū êng-êng khiā tī koe-chhī-nı̍h ê, chiū kā in kóng,

(BCL) 九點的時出去，閣看見有閒閒徛佇街市裡的，

4

(THR) Lín ia̍h khì phû-tô-hn̂g, góa beh chiàu kong-tō hō͘ lín; in chiū khì.

(BCL) 就給講：『恁亦去葡萄園，我欲照公道互恁。』就去。

5

(THR) Cha̍p-jī tiám kap saⁿ tiám ê sî koh chhut-khì, iā án-ni chòe.

(BCL) 十二點及三點的時閣出去，也按呢做。

6

(THR) Gō͘ tiám ê sî chhut-khì, koh tú-tio̍h ū lâng khiā-teh, chiū kā in kóng, Lín siáⁿ-sū thong jı̍t êng-êng khiā tī chia ah?

(BCL) 五點的時出去，閣抵著有人徛，就給講：『恁啥事通日閒閒徛佇遮啊？』

7

(THR) In kā i kóng, In-ūi bô lâng chhiàⁿ góan. I kā in kóng, Lín iā khì phû-tô-hn̂g.

(BCL) 給伊講：『因為無人倩阮。』伊給講：『恁也去葡萄園。』

8

(THR) Kàu jı̍t àm, hn̂g-chú kā i ê kóan-ke kóng, Kiò chòe-kang ê, hō͘ in kang-chîⁿ, tùi lō͘-bé lâi ê khí, kàu tāi-seng lâi ê ûi-chí.

(BCL) 到日暗，園主給伊的管家講：『叫做工者，互工錢，對路尾來的起，到代先來的為止。』

9

(THR) Hiah-ê gō͘ tiám cheng só͘ chhiàⁿ ê kàu, ta̍k-ê niá chı̍t chîⁿ gûn.

(BCL) 許個五點鐘所倩者到，逐個領一錢銀。

10

(THR) Tāi-seng chhiàⁿ ê kàu, in phah-sǹg beh niá khah chōe; m̄-kú in iā ta̍k-ê niá chı̍t chîⁿ gûn.

(BCL) 代先倩者到，拍算欲領卡多，呣拘也逐個領一錢銀。

11

(THR) Niá liáu, chiū tùi ke-chú nga̍uh-nga̍uh-liām kóng,

(BCL) 領了，就對家主耦耦唸講：

12

(THR) Góan thong jı̍t thoa-bôa siū jo̍ah; hiah-ê lō͘-bé chhiàⁿ ê, chòe kang chı̍t tiám-cheng kú, kèng-jiân hō͘ in kap góan pîⁿ.

(BCL) 『阮通日拖磨受熱，許個路尾倩的，做工一點鐘久，竟然互及阮平？』

13

(THR) I chiū tùi in chı̍t lâng ìn kóng, Pêng-iú ah, góa m̄ sī bô kong-tō khóan-thāi lí; lí kiám m̄ sī kap góa iok chı̍t chîⁿ gûn mah?

(BCL) 伊就對一人應講：『朋友啊，我呣是無公道款待你，你豈呣是及我約一錢銀嗎？

14

(THR) Lí-ê lí the̍h, chòe lí khì. Góa beh hō͘ chit-ê lō͘-bé ê kap lí pîⁿ.

(BCL) 你的你提，做你去！我欲互此個路尾的及你平。

15

(THR) Ēng góa ê mı̍h, kiâⁿ góa só͘ ài, kiám bōe chòe-tit? Á-sī in-ūi góa chòe hó, lí teh ba̍k-chhiah mah?

(BCL) 用我的物行我所愛豈做得？抑是因為我做好，你目赤嗎？』

16

(THR) Chhin-chhiūⁿ án-ni, lō͘-bé ê beh chòe tāi-seng, tāi-seng ê beh chòe lō͘-bé.

(BCL) 親像按呢，路尾的，欲做代先；代先的，欲路尾。」

17

(THR) Iâ-so͘ chiūⁿ Iâ-lō͘-sat-léng ê sî tī lō͘-nı̍h chhōa cha̍p-jī ê ha̍k-seng kàu piⁿ-á, kā in kóng,

(BCL) 耶穌上耶路撒冷的時，佇路裡導十二個學生到邊仔，給講：

18

(THR) Taⁿ lán chiūⁿ Iâ-lō͘-sat-léng; Jîn-chú beh siū ké-sàng hō͘ chiah ê chè-si-thâu kap keng-ha̍k-sū, in beh gí I sí-chōe;

(BCL) 「今咱上耶路撒冷，人子欲受解送互諸個祭司頭及經學士。欲擬伊死罪，

19

(THR) iā beh ké-sàng I hō͘ gōa-pang lâng, tì-kàu hì-lāng I, piⁿ phah I, tèng I tī sı̍p-jī-kè; tē saⁿ jı̍t I beh koh-o̍ah.

(BCL) 也欲解送伊互外邦人，致到戲弄伊，鞭拍伊，釘伊佇十字架；第三日伊欲復活。」

20

(THR) Hit sî Se-pí-thài ê kiáⁿ ê lāu-bú kap i ê kiáⁿ chiū-kūn lâi pài I, kiû chı̍t hāng sū.

(BCL) 彼時，西庇太的子的老母及伊的子就近來拜伊，求一項事。

21

(THR) I kā i kóng, Lí ài sím-mı̍h? Ìn kóng, Gōan lí chhut bēng-lēng, hō͘ góa chit nn̄g ê kiáⁿ tī lí ê kok, chı̍t-ê chē lí ê chiàⁿ-pêng, chı̍t-ê chē lí ê tò-pêng.

(BCL) 伊給伊講：「你愛甚麼？」應講：「願你出命令互我此二個子佇你的國，一個坐你的正旁，一個坐你的倒旁。」

22

(THR) Iâ-so͘ ìn kóng, Lín só͘ kiû ê, lín m̄ chai. Góa só͘ beh lim ê poe, lín ōe lim mah? Ìn kóng, Ōe.

(BCL) 耶穌應講：「恁所求的恁呣知；我所欲飲的杯，恁會飲嗎？」應講：「會。」

23

(THR) I kā in kóng, Góa ê poe lín kó-jiân beh lim; chóng-sī chē góa ê chiàⁿ-pêng tò-pêng, m̄ sī góa ōe thang hō͘ lâng, to̍k-to̍k sī góa ê Pē ūi-tio̍h sím-mı̍h lâng pī-pān ê, chiū hō͘ in.

(BCL) 伊給講：「我的杯，恁果然欲飲；總是坐我的正旁倒旁，呣是我會通互人，獨獨是我的父為著甚麼人備辦的，就互。」

24

(THR) Cha̍p ê ha̍k-seng thiaⁿ-kìⁿ, chiū siū-khì hit nn̄g ê hiaⁿ-tī.

(BCL) 十個學生聽見，就受氣彼二個兄弟。

25

(THR) Iâ-so͘ kiò in lâi kóng, Lín chai gōa-pang ê jîn-kun chòe chú lâi tī-lí in, in ê tāi-jîn kóan-hat in;

(BCL) 耶穌叫來，講：「恁知外邦的人君做主來治理，的大人管轄。

26

(THR) to̍k-to̍k lín tiong-kan m̄ sī án-ni; lín tiong-kan ài chòe tōa ê, beh chòe lín ê chhe-ēng;

(BCL) 獨獨恁中間呣是按呢；恁中間愛做大的，欲做恁的差用；

27

(THR) ài chòe thâu ê, beh chòe lín ê lô͘-po̍k.

(BCL) 愛做頭的，欲做恁的奴僕。

28

(THR) Chhin-chhiūⁿ Jîn-chú lâi, m̄ sī beh chhe-ēng lâng, sī beh hō͘ lâng chhe-ēng; koh hiàn I ê sìⁿ-miā, lâi sio̍k-hôe chōe-chōe lâng.

(BCL) 親像人子來，呣是欲差用人，是欲互人差用，閣獻伊的生命，來贖回多多人。」

29

(THR) In chhut Iâ-lī-ko ê sî, kui tōa tīn ê lâng tè I.

(BCL) 出耶利哥的時，歸大陣的人隨伊。

30

(THR) Tú-tn̄g ū nn̄g ê chhiⁿ-mî ê chē tī lō͘-piⁿ, thiaⁿ-kìⁿ Iâ-so͘ tùi hia kè, chiū hoah kóng, Chú, Tāi-pı̍t ê hō͘-è ah, lîn-bín góan.

(BCL) 抵當有二個睛暝的坐佇路邊，聽見耶穌對遐過，就喝講：「主，大衛的後裔啊？憐憫阮！」

31

(THR) Chèng lâng hiâm in, kah in chēng-chēng; nā-sī in koh khah tōa siaⁿ kiò kóng, Chú, Tāi-pı̍t ê hō͘-è ah, lîn-bín góan.

(BCL) 眾人嫌，教靜靜；若是閣卡大聲叫講：「主，大衛的後裔啊，憐憫阮！」

32

(THR) Iâ-so͘ thêng-kha, kiò in lâi kóng, Ài góa kā lín chòe sím-mı̍h?

(BCL) 耶穌停腳，叫來，講：「愛我給恁做甚麼？」

33

(THR) In kā I kóng, Chú ah, góan ài tit-tio̍h ba̍k-chiu khui.

(BCL) 給伊講：「主啊，阮愛得著目睭開！」

34

(THR) Iâ-so͘ khó-lîn in, bong in ê ba̍k-chiu; in liâm-piⁿ khòaⁿ-kìⁿ, chiū tè I.

(BCL) 耶穌可憐，摸的目睭，連鞭看見，就隨伊。

Bible Color Mark

• 台語漢字羅馬本
• 巴克禮全羅