馬太福音 第 27 章

1

(THR) Kàu thiⁿ-kng, chèng chè-si-thâu kap peh-sìⁿ ê tiúⁿ-ló saⁿ-kap kè-bô͘ kong-kek Iâ-so͘, ài hō͘ I sí.

(BCL) 到天光，眾祭司頭及百姓的長老相及計謀攻擊耶穌愛互伊死，

2

(THR) Í-keng pa̍k I, chiū tòa-khì kau hō͘ chóng-tok Pí-lia̍p-to.

(BCL) 已經縛伊，就帶去，交互總督彼拉多。

3

(THR) Hit sî bōe I ê Iû-tāi khòaⁿ-kìⁿ Iâ-so͘ siū tēng-chōe, chiū thè-hóe, chiong hiah ê saⁿ-cha̍p gûn hêng chiah ê chè-si-thâu kap tiúⁿ-ló,

(BCL) 彼時，賣伊的猶大看見耶穌受定罪，就退悔，將許個三十銀還諸個祭司頭及長老，講：

4

(THR) kóng, Góa bōe bô chōe ê ê huih, ū chōe lah. In kóng, Kap góan siáⁿ kan-sia̍p? Lí ka-kī táⁿ-sǹg.

(BCL) 「我賣無罪者的血有罪啦。」講：「及阮啥干涉？你家己打算。」

5

(THR) Iû-tāi hiat hiah ê gûn tī tiān-nı̍h, thè-khì ka-kī tiàu-sí.

(BCL) 猶大許個銀佇殿裡，退去家己吊死。

6

(THR) Hiah ê chè-si-thâu the̍h hit ê gûn, kóng, Che sī huih ê kè, m̄-thang lok tī khò͘-pâng.

(BCL) 許個祭司頭提彼個銀，講：「這是血的價，呣通橐佇庫房。」

7

(THR) In chiū chham-siông, chiong hit ê gûn khì bóe sio-hûi lâng ê hn̂g, thang bâi-chòng chhut-gōa lâng.

(BCL) 就參詳，將彼個銀去買燒磁人的園，通埋葬出外人。

8

(THR) Só͘-í hit khu hn̂g kàu taⁿ chheng chòe Huih-hn̂g.

(BCL) 所以彼區園到今稱做「血園」。

9

(THR) Tùi án-ni èng-giām chá thok sian-ti Iâ-lī-bí só͘ kóng ê, kóng, In the̍h siū-kó͘-ê ê kè-gûn saⁿ-cha̍p, chiū-sī Í-sek-lia̍t ê kiáⁿ-sun tiong ū lâng só͘ kó͘ ê;

(BCL) 對按呢應驗早託先知耶利米所講的，講：「提受估者的價銀三十，就是以色列的子孫中有人所估的，

10

(THR) ēng i lâi bóe sio-hûi-ê ê hn̂g, chiàu Chú só͘ bēng-lēng góa ê.

(BCL) 用伊來買燒磁者的園；照主所命令我的。」

11

(THR) Iâ-so͘ khiā tī chóng-tok ê bīn-chêng; chóng-tok mn̄g I kóng, Lí sī Iû-thài lâng ê ông mah? Iâ-so͘ kā i kóng, Lí kóng, chiū-sī.

(BCL) 耶穌徛佇總督的面前；總督問伊講：「你是猶太人的王嗎？」耶穌給伊講：「你講就是。」

12

(THR) I hō͘ hiah ê chè-si-thâu tiúⁿ-ló kò, I iā bô ìn.

(BCL) 伊互許個祭司頭長老告，伊也無應。

13

(THR) Hit sî Pí-lia̍p-to kā I kóng, Hiah ê lâng kan-chèng lí kàu hiah chōe hāng, lí bô thiaⁿ-kìⁿ mah?

(BCL) 彼時彼拉多給伊講：「許個人干證你到許多項，你無聽見嗎？」

14

(THR) Iâ-so͘ bô ìn i chı̍t kù ōe, tì-kàu chóng-tok tōa kî-kòai.

(BCL) 耶穌無應伊一句話，致到總督大奇怪。

15

(THR) Kàu choeh-kî chóng-tok chiàu-lē pàng chı̍t-ê hōan-lâng hō͘ chèng lâng, sī chiàu in só͘ ài ê.

(BCL) 到節期總督照例放一個犯人互眾人，是照所愛的。

16

(THR) Hit sî ū chhut-miâ ê hōan-lâng, miâ kiò Pa-lia̍p-pa.

(BCL) 彼時有出名的犯人名叫巴拉巴。

17

(THR) In í-keng chū-chı̍p, Pí-lia̍p-to kā in kóng, Lín ài góa pàng chī-chūi hō͘ lín? sī Pa-lia̍p-pa, á-sī chheng chòe Ki-tok ê Iâ-so͘?

(BCL) 已經聚集，彼拉多給講：「恁愛我放是誰互恁？是巴拉巴？抑是稱做基督的耶穌？」

18

(THR) In-ūi chai in ūi-tio̍h òan-tò͘ chiah kè/2-sàng Iâ-so͘.

(BCL) 因為知為著怨妒才解送耶穌。

19

(THR) I chē tn̂g ê sî, i ê bó͘ chhe lâng kā i kóng, Chit ê gī lâng lí m̄-thang kan-sia̍p-tio̍h; in-ūi góa kin-á-jı̍t tī bîn-bāng tiong ūi-tio̍h I chōe-chōe kan-khó͘.

(BCL) 伊坐堂的時，伊的某差人給伊講：「此個義人你呣通干涉著，因為我今仔日佇眠夢中為著伊多多艱苦。」

20

(THR) Chiah ê chè-si-thâu kap tiúⁿ-ló kiau-so chèng lâng, kiû pàng Pa-lia̍p-pa, bia̍t Iâ-so͘.

(BCL) 諸個祭司頭及長老教唆眾人，求放巴拉巴，滅耶穌。

21

(THR) Chóng-tok ìn kóng, Chit nn̄g lâng lín ài góa pàng tá-lo̍h chı̍t-ê hō͘ lín? In kóng, Pa-lia̍p-pa. Pí-lia̍p-to kā in kóng,

(BCL) 總督應講：「此二人，恁愛我放叨落一個互恁？」講：「巴拉巴。」

22

(THR) Án-ni, chiū chheng chòe Ki-tok ê Iâ-so͘, góa tio̍h cháiⁿ-iūⁿ pān I? In lóng kóng, Tèng I sı̍p-jī-kè.

(BCL) 彼拉多給講：「按呢，就稱做基督的耶穌我著怎樣辦伊？」攏講：「釘伊十字架！」

23

(THR) Chóng-tok kóng, Cháiⁿ-iūⁿ, I ū kiâⁿ sím-mı̍h pháiⁿ? In tōa siaⁿ hoah kóng, Tèng I sı̍p-jī-kè.

(BCL) 總督講：「怎樣？伊有行甚麼歹？」大聲喝講：「釘伊十字架！」

24

(THR) Pí-lia̍p-to khòaⁿ-kìⁿ bô chhái-kang, hóan-tńg ná jiáu-lōan, chiū phâng chúi, tī chèng lâng ê bīn-chêng sóe chhiú, kóng, Tī chit ê gī lâng ê huih góa bô chōe, lín ka-kī táⁿ-sǹg.

(BCL) 彼拉多看見無採工，反轉愈擾亂，就捧水佇眾人的面前洗手，講：「佇此個義人的血，我無罪，恁家己打算。」

25

(THR) Peh-sìⁿ lóng ìn i kóng, I ê huih kui tī góan kap góan ê kiáⁿ-sun.

(BCL) 百姓攏應伊講：「伊的血歸佇阮及阮的子孫。」

26

(THR) I chiū pàng Pa-lia̍p-pa hō͘ in. Í-keng piⁿ-phah Iâ-so͘, chiū hoat-kau khì tèng sı̍p-jī-kè.

(BCL) 伊就放巴拉巴互，已經鞭拍耶穌，就發交去釘十字架。

27

(THR) Hit sî chóng-tok ê peng tòa Iâ-so͘ jı̍p kong-tn̂g, chū-chı̍p thong iâⁿ ûi I.

(BCL) 彼時總督的兵帶耶穌入公堂，聚集通營圍伊。

28

(THR) Thǹg I ê saⁿ, chiong âng phàu kā I chhēng;

(BCL) 褪伊的衫，將紅袍給伊穿，

29

(THR) ēng chhì-á pīⁿ/0 bián-liû, tì tī I ê thâu-khak, ēng lô͘-tek hē tī I ê chiàⁿ-chhiú, kūi tī I ê bīn-chêng hì-lāng I kóng, Iû-thài lâng ê ông, pêng-an.

(BCL) 用莿仔編冕旒，戴佇伊的頭殼，用蘆竹下佇伊的正手，跪佇伊的面前戲弄伊講：「猶太人的王，平安！」

30

(THR) Chiū kā I phùi-nōa, kia̍h hit ki lô͘-tek, lâi sut I ê thâu-khak.

(BCL) 就給伊呸涎，抬彼枝蘆竹來捽伊的頭殼。

31

(THR) Hì-lāng soah, hit niá phàu chiū kā I thǹg-khí-lâi, chiong I ka-kī ê saⁿ kā I chhēng, tòa I khì tèng sı̍p-jī-kè.

(BCL) 戲弄息，彼領袍就給伊褪起來，將伊家己的衫給伊穿，帶伊去，釘十字架。

32

(THR) Chhut-lâi ê sî tú-tio̍h chı̍t ê Kó͘-lī-nāi lâng miâ Se-bûn, bián-kióng i saⁿ-kap khì, hō͘ i giâ Iâ-so͘ ê sı̍p-jī-kè.

(BCL) 出來的時，抵著一個古利奈人名西門，勉強伊相及去，互伊夯耶穌的十字架。

33

(THR) Kàu chı̍t só͘-chāi, miâ Kok-kok-thaⁿ, chiū-sī thâu-khak-óaⁿ ê só͘-chāi, chiū ēng khó͘-táⁿ só͘ tiâu-hô ê chiú hō͘ I lim;

(BCL) 到一所在名各各他，就是「頭殼碗」的所在。就用苦膽所調和的酒互伊飲；

34

(THR) I chhì-khòaⁿ, chiū m̄ lim.

(BCL) 伊試看，就呣飲。

35

(THR) Í-keng tèng I tī sı̍p-jī-kè, chiū chòe-khau pun I ê i-ho̍k;

(BCL) 已經釘伊佇十字架，就做鬮分伊的衣服，

36

(THR) koh chē tī hia kò͘-siú I.

(BCL) 閣坐佇遐顧守伊。

37

(THR) Chiū hē chám-tiâu tī I ê thâu-khak ê téng-bīn, siá kóng, Chit-ê sī Iû-thài lâng ê ông, Iâ-so͘.

(BCL) 就下斬條佇伊頭殼的頂面，寫講：「此個是猶太人的王耶穌。」

38

(THR) Hit sî ū nn̄g ê chha̍t kap I tâng tèng tī sı̍p-jī-kè, chı̍t-ê tī chiàⁿ-pêng, chı̍t-ê tī tò-pêng.

(BCL) 彼時，有二個賊及伊同釘佇十字架，一個佇正旁，一個佇倒旁。

39

(THR) Keng-kè ê lâng ki-chhì I, iô thâu kóng,

(BCL) 經過的人譏刺伊，搖頭，講：

40

(THR) Lí húi-hōai tiān, saⁿ jı̍t koh khí ê, tio̍h kiù ka-kī; lí nā sī Siōng-tè ê Kiáⁿ, tio̍h tùi sı̍p-jī-kè lo̍h-lâi.

(BCL) 「你毀壞殿，三日閣起的，著救家己！你若是上帝的子，著對十字架落來！」

41

(THR) Hiah ê chè-si-thâu kap keng-ha̍k-sū í-kı̍p tiúⁿ-ló iā sī án-ni hì-lāng I, kóng,

(BCL) 許個祭司頭及經學士以及長老也是按呢戲弄伊，講：

42

(THR) I bat kiù pa̍t lâng, bōe-ōe kiù ka-kī. I chòe Í-sek-lia̍t ê ông, taⁿ tio̍h tùi sı̍p-jī-kè lo̍h-lâi, góan chiū beh sìn I.

(BCL) 「伊曾救別人，會救家己。伊做以色列的王，今著對十字架落來，阮就欲信伊。

43

(THR) I óa-khò Siōng-tè, Siōng-tè nā hoaⁿ-hí I, taⁿ chiū tio̍h kiù I; in-ūi I kóng, Góa chiū-sī Siōng-tè ê Kiáⁿ.

(BCL) 伊倚靠上帝，上帝若歡喜伊，今就著救伊；因為伊講：『我就是上帝的子。』」

44

(THR) Kap I tâng tèng hit nn̄g ê chha̍t iā sī án-ni mē I.

(BCL) 及伊同釘彼二個賊也是按呢罵伊。

45

(THR) Tùi jı̍t-tiong-tàu kàu saⁿ tiám, piàn tōe o͘-àm.

(BCL) 對日中晝到三點，遍地黑暗。

46

(THR) Chha-put-to saⁿ tiám, Iâ-so͘ tōa siaⁿ âu-kiò kóng, Í-lī, Í-lī, lia̍p-má sat-pok-tāi-nî, chiū-sī kóng, Góa ê Siōng-tè, góa ê Siōng-tè, lí siáⁿ-sū pàng-lī góa?

(BCL) 差不多三點，耶穌大聲喉叫講：「以利！以利！拉馬撒僕大尼？」就是講：「我的上帝！我的上帝！你啥事放離我？」

47

(THR) Piⁿ-thâu khiā ê ū lâng thiaⁿ-kìⁿ chiū kóng, I teh kiò Í-lī-a.

(BCL) 邊頭徛的有人聽見就講：「伊叫以利亞！」

48

(THR) Tiong-kan chı̍t lâng chek-sî cháu-khì, the̍h hái-jiông, chìm chhò͘, hâ tī lô͘-tek-á bé, hō͘ I suh.

(BCL) 中間一人即時走去，提海絨浸醋，縖佇蘆竹仔尾，互伊吸。

49

(THR) Kî-û ê kóng, Chhiáⁿ bān, khòaⁿ Í-lī-a lâi kiù I á bô.

(BCL) 其餘的講：「且慢，看以利亞來救伊抑無。」

50

(THR) Iâ-so͘ koh tōa siaⁿ âu-kiò, chiū tn̄g khùi.

(BCL) 耶穌閣大聲喉叫，就斷氣。

51

(THR) Hut-jiân tiān-lāi ê tiùⁿ, tùi téng kàu ē, lı̍h chòe nn̄g pêng; tōe tāng, chio̍h-pôaⁿ lı̍h;

(BCL) 忽然，殿內的帳對頂到下裂做二旁，地動，石磐裂，

52

(THR) bōng khui, í-keng teh khùn ê sèng-tô͘, in ê sin-khu chōe-chōe khí-lâi, tùi in ê bōng chhut;

(BCL) 墓開，已經睏的聖徒，的身軀多多起來，對的墓出。

53

(THR) kàu Iâ-so͘ koh-o̍ah liáu-āu, in jı̍p sèng siâⁿ, chhut-hiān tī chōe-chōe lâng.

(BCL) 到耶穌復活了後，入聖城，出現佇多多人。

54

(THR) Pé-chóng kap saⁿ-tâng kò͘-siú Iâ-so͘ ê, khòaⁿ-kìⁿ tōe-tāng, kap só͘ keng-kè ê sū, put-chí kiaⁿ, kóng, Chit-ê kó-jiân sī Siōng-tè ê Kiáⁿ.

(BCL) 百總及相同顧守耶穌的看見地動及所經過的事，不止驚，講：「此個果然是上帝的子！」

55

(THR) Ū chōe-chōe hū-jîn-lâng tī hia hn̄g-hn̄g teh khòaⁿ; in chiū-sī tùi Ka-lī-lī kun-tè Iâ-so͘ lâi ho̍k-sāi I ê;

(BCL) 有多多婦仁人佇遐，遠遠看；就是對加利利跟隨耶穌來服事伊的。

56

(THR) chiông-tiong ū Bo̍at-tāi-lia̍p ê Má-lī-a, Ngá-kok Iok-se ê lāu-bú Má-lī-a, kap Se-pí-thài ê kiáⁿ ê lāu-bú.

(BCL) 從中有抹大拉的馬利亞、雅各、約西的老母馬利亞，及西庇太的子的老母。

57

(THR) Í-keng àm, ū A-lī-má-thài ê hó-gia̍h lâng lâi, miâ chòe Iok-sek, i iā sī Iâ-so͘ ê ha̍k-seng.

(BCL) 已經暗，有亞利馬太的好額人來，名做約瑟，伊也是耶穌的學生。

58

(THR) Hit lâng khì kìⁿ Pí-lia̍p-to, kiû Iâ-so͘ ê sin-si; Pí-lia̍p-to hoan-hù tio̍h hō͘ i.

(BCL) 彼人去見彼拉多，求耶穌的身屍；彼拉多吩咐著互伊。

59

(THR) Iok-sek siu hit ê sin-si, ēng chheng-khì ê iù-pò͘ pau i;

(BCL) 約瑟收彼個身屍，用清氣的幼布包伊，

60

(THR) hē tī i ka-kī ê sin bōng, chiū-sī i tī chio̍h-pôaⁿ só͘ phah ê; chiū kō tōa tè chio̍h tī bōng-mn̂g, chiah khì.

(BCL) 下佇伊家己的新墓，就是伊佇石磐所拍的。就翱大塊石佇墓門，才去。

61

(THR) Ū Bo̍at-tāi-lia̍p ê Má-lī-a kap pa̍t ê Má-lī-a tī hia, chē tī bōng ê tùi-bīn.

(BCL) 有抹大拉的馬利亞及別個馬利亞佇遐，坐佇墓的對面。

62

(THR) Keh jı̍t, chiū-sī pī-pān choeh āu ê chı̍t jı̍t, hiah ê chè-si-thâu kap Hoat-lī-sài lâng chū-chı̍p kìⁿ Pí-lia̍p-to kóng,

(BCL) 隔日，就是備辦節後的一日，許個祭司頭及法利賽人聚集見彼拉多，講：

63

(THR) Tāi-jîn ah, góan kì-tit hit ê bê-he̍k lâng ê, o̍ah-teh ê sî bat kóng, Saⁿ jı̍t āu góa beh koh-o̍ah.

(BCL) 「大人啊，阮記得彼個迷惑人的，活的時曾講：『三日後我欲復活。』

64

(THR) Só͘-í chhiáⁿ lí bēng-lēng kò͘-siú hit ê bōng, kàu tē saⁿ jı̍t; kiaⁿ-liáu I ê ha̍k-seng lâi thau I khì, ia̍h kā peh-sìⁿ kóng, I tùi sí-lâng tiong koh-o̍ah; án-ni, chiū āu-lâi ê chha-biū, pí tāi-seng khah lī-hāi.

(BCL) 所以請你命令顧守彼個墓，到第三日，驚了伊的學生來偷伊去，亦給百姓講：『伊對死人中復活。』按呢，就後來的差謬比代先卡利害！」

65

(THR) Pí-lia̍p-to kā in kóng, Lín niá peng khì, chiàu lín só͘ chai-iáⁿ ê khì kò͘-siú.

(BCL) 彼拉多給講：「恁領兵去，照恁所知影的去顧守。」

66

(THR) In chiū khì, hong chio̍h kap siat peng, lâi kò͘-siú hit ê bōng.

(BCL) 就去，封石及設兵，來顧守彼個墓。

Bible Color Mark

• 台語漢字羅馬本
• 巴克禮全羅