馬太福音 第 7 章

1

(THR) Bo̍h-tit phoe-phêng lâng, chiah bián tú-tio̍h phoe-phêng.

(BCL) 「莫得批評人，才免抵著批評。

2

(THR) In-ūi lín ēng sím-mı̍h phoe-phêng lâi phoe-phêng, ia̍h beh án-ni siū phoe-phêng; lín ēng sím-mı̍h niû lâi niû, ia̍h beh án-ni niû hō͘ lín.

(BCL) 因為恁用甚麼批評來批評，亦欲按呢受批評；恁用甚麼量來量，亦欲按呢量互恁。

3

(THR) Koh lí cháiⁿ-iūⁿ khòaⁿ-kìⁿ hiaⁿ-tī ba̍k-chiu-lāi ê chháu-á-iù, ia̍h bô siūⁿ lí ba̍k-chiu-lāi ê îⁿ-á-chhâ ah?

(BCL) 閣你怎樣看見兄弟目睭內的草仔幼，亦無想你目睭內的楹仔柴啊？

4

(THR) Beh cháiⁿ-iūⁿ kā lí ê hiaⁿ-tī kóng, Lí ba̍k-chiu-lāi ê chháu-á-iù hō͘ góa kā lí the̍h-khí-lâi, ia̍h lí ba̍k-chiu-lāi kèng-jiân ū îⁿ-á-chhâ ah?

(BCL) 欲怎樣給你的兄弟講：『你目睭內的草仔幼互我給你提起來』，亦你目睭內竟然有楹仔柴啊？

5

(THR) Ké-hó ê lâng ah, tāi-seng the̍h-khì lí ba̍k-chiu-lāi ê îⁿ-á-chhâ, chiah ōe bêng-bêng khòaⁿ-kìⁿ thang the̍h-khì hiaⁿ-tī ba̍k-chiu-lāi ê chháu-á-iù.

(BCL) 假好的人啊！代先提去你目睭內的楹仔柴，才會明明看見，通提去兄弟目睭內的草仔幼。

6

(THR) Bo̍h-tit ēng sèng ê mı̍h hō͘ káu, ia̍h bo̍h-tit ēng lín ê chin-chu hiat tī ti ê thâu-chêng; kiaⁿ-liáu in ēng kha ta̍h i, o̍at-lìn-tńg lâi kā lín.

(BCL) 莫得用聖的物互狗，亦莫得用恁的真珠佇豬的頭前，驚了用腳踏伊，越輪轉來咬恁。」

7

(THR) Kiû chiū hō͘ lín, chhē chiū tú-tio̍h, phah mn̂g chiū kā lín khui.

(BCL) 「求，就互恁；尋，就抵著；拍門，就給恁開。

8

(THR) In-ūi kìⁿ-nā kiû ê tit-tio̍h; chhē ê tú-tio̍h; phah mn̂g ê, chiū kā i khui.

(BCL) 因為見若求的，得著；尋的，抵著；拍門的，就給伊開。

9

(THR) Lín tiong-kan ū sím-mı̍h lâng, i ê kiáⁿ kā i thó piáⁿ, kiám beh ēng chio̍h-thâu hō͘ i?

(BCL) 恁中間有甚麼人，伊的子給伊討餅，豈欲用石頭互伊？

10

(THR) á-sī beh tı̍h hî, kiám beh ēng chôa hō͘ i?

(BCL) 抑是欲揲魚，豈欲用蛇互伊？

11

(THR) Lín chiah-ê sui-jiân pháiⁿ, iáu-kú ōe hiáu-tit ēng hó mı̍h hō͘ lín ê kiáⁿ-jî, hô-hòng lín tī thiⁿ-nı̍h ê Pē, kiám bô beh ēng hó mı̍h hō͘ kiû I ê lâng mah?

(BCL) 恁諸個雖然歹，猶久會曉得用好物互恁的子兒，何況恁佇天裡的父，豈無欲用好物互求伊的人嗎？

12

(THR) Só͘-í lín kìⁿ-nā ài lâng khóan-thāi lín ê, lín ia̍h tio̍h án-ni khóan-thāi lâng; in-ūi che sī lu̍t-hoat kap sian-ti.

(BCL) 所以，恁見若愛人款待恁的，恁亦著按呢款待人，因為這是律法及先知。」

13

(THR) Lín tio̍h tùi hit ê o̍eh mn̂g jı̍p; in-ūi thàu kàu bia̍t-bô ê, hit ê mn̂g khoah, hit ê lō͘ tōa tiâu, tùi hia jı̍p ê lâng chōe.

(BCL) 「恁著對彼個狹門入。因為透到滅無的，彼個門闊，彼個路大條，對遐入的人多；

14

(THR) Thàu kàu o̍ah ê, hit ê mn̂g o̍eh, hit ê lō͘ sòe tiâu, chhē-tio̍h ê lâng chió.

(BCL) 透到活的，彼個門狹，彼個路細條，尋著的人少。」

15

(THR) Kín-sīn tî-hông ké ê sian-ti, in chiū-kūn lín, gōa-bīn sī iûⁿ-ko, lāi-bīn sī hiông-ok ê chhâi-lông.

(BCL) 「謹慎持防假的先知。就近恁，外面是羊羔，內面是兇惡的豺狼。

16

(THR) Lín beh tùi in ê ké-chí lâi bat i; kiám tùi chhì-phè bán phû-tô, tùi chı̍t-lê bán bû-hoa-kó mah?

(BCL) 恁欲對的果子來識伊。豈對莿帕挽葡萄？對蒺蔾挽無花果嗎？

17

(THR) Án-ni kìⁿ-nā hó chhiū kiat hó ké-chí; pháiⁿ chhiū kiat pháiⁿ ké-chí.

(BCL) 按呢，見若好樹結好果子，歹樹結歹果子。

18

(THR) Hó chhiū bōe kiat pháiⁿ ké-chí, pháiⁿ chhiū bōe kiat hó ké-chí.

(BCL) 好樹結歹果子；歹樹結好果子。

19

(THR) Kìⁿ-nā chhiū bô kiat hó ké-chí ê, chiū chhò i, hiat-lo̍h hé.

(BCL) 見若樹無結好果子的就剉伊，落火。

20

(THR) Só͘-í lín beh tùi in ê ké-chí lâi bat i.

(BCL) 所以，恁欲對的果子來識伊。」

21

(THR) Kìⁿ-nā chheng-ho͘ góa kóng, Chú ah, Chú ah ê, bô it-chīn jı̍p thian-kok; to̍k-to̍k kiâⁿ góa tī thiⁿ-nı̍h ê Pē ê chí-ì ê, chiah ōe.

(BCL) 「見若稱呼我講：『主啊，主啊』的，無一盡入天國；獨獨行我佇天裡的父的旨意的才會。

22

(THR) Tng hit jı̍t chōe-chōe lâng beh kā góa kóng, Chú ah, Chú ah, góan kiám m̄ sī ēng lí ê miâ thôan kàu, ēng lí ê miâ kóaⁿ kúi, ēng lí ê miâ kiâⁿ chōe-chōe kôan-lêng mah?

(BCL) 當彼日多多人欲給我講：『主啊，主啊，阮豈呣是用你的名傳教，用你的名趕鬼，用你的名行多多權能嗎？』

23

(THR) Chiū hit sî góa beh bêng-bêng kā in kóng, Góa lóng m̄ bat lín; chòe put-hoat ê, tio̍h lī-khui góa khì.

(BCL) 就彼時我欲明明給講：『我攏呣識恁，做不法的，著離開我去！』」

24

(THR) Só͘-í kìⁿ-nā thiaⁿ góa chiah ê ōe lâi kiâⁿ ê, beh pí-phēng tì-sek ê lâng, khí i ê chhù tī chio̍h-pôaⁿ téng;

(BCL) 「所以，見若聽我諸個話來行的，欲比並智識的人，起伊的厝佇石磐頂；

25

(THR) hō͘ lo̍h, tōa chúi kàu, hong chhe, chhiong-tio̍h hit keng chhù, ia̍h bô tó; in-ūi tōe-ki tī chio̍h-pôaⁿ téng.

(BCL) 雨落，大水到，風吹，沖著彼間厝，亦無倒，因為地基佇石磐頂。

26

(THR) Kìⁿ-nā thiaⁿ góa chiah ê ōe, bô kiâⁿ ê, beh pí-phēng gōng lâng, khí i ê chhù tī soa téng;

(BCL) 見若聽我諸個話無行的，欲比並戇人，起伊的厝佇沙頂；

27

(THR) hō͘ lo̍h, tōa chúi kàu, hong chhe, chhiong-tio̍h hit keng chhù, chiū tó; koh i ê tó sī siong-tiōng.

(BCL) 雨落，大水到，風吹，沖著彼間厝，就倒，閣伊的倒是傷重。」

28

(THR) Iâ-so͘ kóng chiah ê ōe soah, chèng lâng kî-kòai I ê kà-sī.

(BCL) 耶穌講諸個話息，眾人奇怪伊的教示；

29

(THR) In-ūi I kà-sī lâng, chhin-chhiūⁿ ū kôan-lêng ê, bô chhin-chhiūⁿ in ê keng-ha̍k-sū.

(BCL) 因為伊教示人，親像有權能的，無親像的經學士。

Bible Color Mark

• 台語漢字羅馬本
• 巴克禮全羅