馬太福音 第 8 章

1

(THR) Iâ-so͘ í-keng lo̍h soaⁿ, kui tōa tīn ê lâng tè I.

(BCL) 耶穌已經落山，歸大陣的人隨伊。

2

(THR) Tú-tn̄g ū chı̍t ê thái-ko ê chiū-kūn lâi pài I kóng, Chú ah, lí nā khéng, chiū ōe hō͘ góa chheng-khì.

(BCL) 抵當有一個癩的就近來拜伊，講：「主啊，你若肯，就會互我清氣。」

3

(THR) I chiū chhun chhiú bong i kóng, Góa khéng, lí thang chheng-khì; i ê thái-ko liâm-piⁿ chheng-khì.

(BCL) 伊就伸手摸伊，講：「我肯，你通清氣！」伊的癩連鞭清氣。

4

(THR) Iâ-so͘ koh kā i kóng, Kín-sīn bo̍h-tit kā lâng kóng; to̍k-to̍k khì, chiong pún-sin hō͘ chè-si giām, ia̍h tio̍h hiàn Mô͘-se só͘ hoan-hù ê lé-mı̍h, lâi chòe chèng-kù tī lâng.

(BCL) 耶穌閣給伊講：「謹慎莫得給人講，獨獨去，將本身互祭司驗，亦著獻摩西所吩咐的禮物，來做證據佇人。」

5

(THR) Í-keng jı̍p Ka-pek-lông, ū pé-chóng chiū-kūn I, lâi kiû I kóng,

(BCL) 已經入迦百農，有百總就近伊，來求伊講：

6

(THR) Chú ah, góa ê lô͘-po̍k piàn-sūi, tó tī chhù-lāi, kan-khó͘ kàu ke̍k.

(BCL) 「主啊，我的奴僕半　，倒佇厝內艱苦到極。」

7

(THR) I chiū kā i kóng, Góa lâi khì i i.

(BCL) 伊就給伊講：「我來去醫伊。」

8

(THR) Pé-chóng ìn kóng, Chú ah, lí kàu góa tau, góa tng bōe khí; lí kan-ta kóng chı̍t kù ōe, góa ê lô͘-po̍k chiū ōe hó.

(BCL) 百總應講：「主啊，你到我兜，我當起；你干單講一句話，我的奴僕就會好。

9

(THR) In-ūi góa ia̍h sī hō͘ lâng kóan ê lâng, iā ū peng hō͘ góa kóan; kā chit-ê kóng, Khì, i chiū khì; kā hit-ê kóng, Lâi, i chiū lâi; kā góa ê lô͘-po̍k kóng, Kiâⁿ án-ni, i chiū kiâⁿ án-ni.

(BCL) 因為我亦是互人管的人，也有兵互我管；給此個講：『去！』伊就去；給彼個講：『來！』伊就來；給我的奴僕講：『行按呢！』伊就行按呢。」

10

(THR) Iâ-so͘ thiaⁿ-kìⁿ chiū kî-kòai, kā tè I ê lâng kóng, Góa sı̍t-chāi kā lín kóng, chhin-chhiūⁿ chit hō ê chhim sìn, liân Í-sek-lia̍t tiong, góa bē bat tú-tio̍h.

(BCL) 耶穌聽見就奇怪，給隨伊的人講：「我實在給恁講，親像此號的深信，連以色列中，我未曾抵著。

11

(THR) Góa koh kā lín kóng, tùi tang tùi sai, ū chōe-chōe lâng beh kàu, kap A-pek-la̍h-hán, Í-sat, Ngá-kok, chē toh tī thian-kok;

(BCL) 我閣給恁講，對東對西，有多多人欲到，及亞伯拉罕、以撒、雅各坐桌佇天國；

12

(THR) nā-sī kok ê chú-bîn beh tú-tio̍h kóaⁿ-chhut tī gōa-bīn ê o͘-àm; tī hia beh ū thî-khàu kā-gê chhiat-chhí.

(BCL) 若是國的子民欲抵著趕出佇外面的黑暗，佇遐欲有啼哭咬牙切齒。」

13

(THR) Iâ-so͘ chiū kā pé-chóng kóng, Khì ah, chiàu lí ê sìn kā lí chiâⁿ; tú-tú hit sî, i ê lô͘-po̍k chiū hó.

(BCL) 耶穌就給百總講：「去啊！照你的信給你成。」抵抵彼時，伊的奴僕就好。

14

(THR) Iâ-so͘ jı̍p Pí-tek ê ke, khòaⁿ-kìⁿ i ê tiūⁿ-ḿ, hōan-tio̍h jia̍t-pīⁿ tó-teh.

(BCL) 耶穌入彼得的家，看見伊的丈姆患著熱病倒。

15

(THR) Chiū bong i ê chhiú, jia̍t chiū thè; hū-jîn-lâng chiū khí-lâi su-hāu I.

(BCL) 就摸伊的手，熱就退；婦仁人就起來伺候伊。

16

(THR) Kàu hông-hun-àm, ū lâng chhōa chōe-chōe hōan-tio̍h kúi ê chiū-kūn I; I ēng chı̍t kù ōe kóaⁿ-chhut hiah ê sîn; koh i-hó it-chhè ū pīⁿ ê lâng;

(BCL) 到黃昏暗，有人導多多患著鬼者就近伊，伊用一句話趕出許個神，閣醫好一切有病的人。

17

(THR) chiū-sī beh èng-giām sian-ti Í-sài-a só͘ kóng ê, kóng, I pún-sin thòe-siū lán ê lóan-jio̍k, tam-tng lán ê pīⁿ-chèng.

(BCL) 就是欲應驗先知以賽亞所講的，講：伊本身替受咱的軟弱，擔當咱的病症。

18

(THR) Iâ-so͘ khòaⁿ-kìⁿ kui tōa tīn ê lâng ûi I, chiū hoan-hù kè-khì hit pêng hōaⁿ.

(BCL) 耶穌看見歸大陣的人圍伊，就吩咐過去彼旁岸。

19

(THR) Ū chı̍t ê keng-ha̍k-sū lâi, kā I kóng, Sian-siⁿ ah, lí bô lūn tá-lo̍h khì, góa beh tè lí.

(BCL) 有一個經學士來，給伊講：「先生啊，你無論叨落去，我欲隨你。」

20

(THR) Iâ-so͘ chiū kā i kóng, Hô͘-lî ū khang, thiⁿ-tiong ê pe-chiáu ū siū; to̍k-to̍k Jîn-chú bô khòa thâu-khak ê só͘-chāi.

(BCL) 耶穌就給伊講：「狐狸有孔，天中的飛鳥有巢，獨獨人子無靠頭殼的所在。」

21

(THR) Koh chı̍t ê ha̍k-seng kā I kóng, Chú ah, hō͘ góa seng tò-khì bâi-chòng góa ê lāu-pē.

(BCL) 閣一個學生給伊講：「主啊，互我先倒去埋葬我的老父。」

22

(THR) To̍k-to̍k Iâ-so͘ kā i kóng,, Lí tè góa, chhut-chāi sí lâng khì bâi-chòng in ê sí lâng.

(BCL) 獨獨耶穌給伊講：「你隨我；出在死人去埋葬的死人！」

23

(THR) Í-keng lo̍h chûn, I ê ha̍k-seng tè I.

(BCL) 已經落船，伊的學生隨伊。

24

(THR) Hut-jiân hái-nı̍h khí tōa hong-éng, tì-kàu chûn hō͘ éng khàm; nā-sī Iâ-so͘ teh khùn.

(BCL) 忽然海裡起大風湧，致到船互湧蓋；若是耶穌睏。

25

(THR) Ha̍k-seng chiū-kūn lâi kiò I khí-lâi, kóng, Chú ah, kiù o͘h, beh bô miā lah!

(BCL) 學生就近來叫伊起來，講：「主啊，救哦，欲無命啦！」

26

(THR) I chiū kā in kóng, Sió-sìn ê lâng ah, cháiⁿ-iūⁿ hiah bô táⁿ? Chiū khí-lâi, chek-pī hong kap hái, chiū tōa pîⁿ-tiāⁿ.

(BCL) 伊就給講：「小信的人啊，怎樣許無膽？」就起來，責備風及海，就大平定。

27

(THR) Hiah ê lâng kî-kòai kóng, chit-ê sī sím-mı̍h hō lâng, hong kap hái ia̍h sūn I?

(BCL) 許個人奇怪，講：「此個是甚麼號人？風及海亦順伊！」

28

(THR) Í-keng kè-khì hit pêng hōaⁿ, kàu Ka-tāi-lia̍p lâng ê tōe; ū hōan-tio̍h kúi ê, nn̄g lâng, tùi thióng-bōng chhut-lâi, tú-tio̍h I, sè-bīn hiông kài-kài; tì-kàu bô lâng káⁿ tùi hit tiâu lō͘ kè.

(BCL) 已經過去彼旁岸，到加大拉人的地，有患著鬼者，二人，對塚墓出來抵著伊，勢面雄介介，致到無人敢對彼條路過。

29

(THR) In hut-jiân âu-kiò kóng, Siōng-tè ê Kiáⁿ ah, góan kap lí ū sím-mı̍h kan-sia̍p? sî bē kàu, lí lâi chia sī beh khó͘-chhó͘ góan mah?

(BCL) 忽然喉叫講：「上帝的子啊，阮及你有甚麼干涉？時未到，你來遮是欲苦楚阮嗎？」

30

(THR) Lī in hn̄g-hn̄g ū tōa kûn ê ti teh thó-chia̍h;

(BCL) 離遠遠，有大群的豬討食。

31

(THR) hiah ê kúi kiû I kóng, Lí nā kóaⁿ góan, chiū chhe góan jı̍p ti kûn.

(BCL) 許個鬼求伊，講：「你若趕阮，就差阮入豬群！」

32

(THR) I chiū kā in kóng, Khì ah. Kúi chiū chhut-lâi, khì jı̍p ti; hut-jiân chôan-kûn chông lo̍h soaⁿ-khàm, jı̍p hái, sí tī chúi-nı̍h.

(BCL) 伊就給講：「去啊！」鬼就出來，去入豬。忽然全群落山崁，入海死佇水裡。

33

(THR) Kò͘ ti ê cháu khì jı̍p siâⁿ; chiong chiah ê sū, í-kı̍p hōan-tio̍h kúi ê lâng só͘ tú-tio̍h ê, lóng kā lâng kóng.

(BCL) 顧豬者走去入城；將諸個事以及患著鬼的人所抵著的攏給人講。

34

(THR) Thong siâⁿ ê lâng chhut-khì, chhē-tio̍h Iâ-so͘; í-keng kìⁿ-tio̍h, chiū kiû I lī-khui in ê tōe-kài.

(BCL) 通城的人出去尋著耶穌，已經見著，就求伊離開的地界。

Bible Color Mark

• 台語漢字羅馬本
• 巴克禮全羅