民數記 第 28 章

1

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

2

(THR) Lí tio̍h bēng-lēng Í-sek-lia̍t lâng kóng, Góa ê lé-mı̍h, chiū-sī hiàn-hō͘ Góa chòe phang-phang chiah ê hé-chè ê chia̍h-mı̍h, lín tio̍h chiàu jı̍t-kî kín-sīn hiàn hō͘ Góa.

(BCL) 「你著命令以色列人講：『我的禮物，就是獻互我做芳芳諸個火祭的食物，恁著照日期謹慎獻互我』；

3

(THR) Koh tio̍h kā in kóng, Lín tio̍h hiàn hō͘ Iâ-hô-hoa ê hé-chè, chiū-sī bô hâ-chhû bē-móa-nî ê iûⁿ-káng-á, ta̍k-jı̍t nn̄g-chiah, chòe kú-tn̂g hiàn ê sio-chè.

(BCL) 閣著給講：恁著獻互耶和華的火祭，就是無瑕疵、未滿年的羊仔，逐日二隻，做久長獻的燒祭。

4

(THR) Chá-khí-sî tio̍h hiàn iûⁿ-á chı̍t-chiah, hông-hun ê sî tio̍h hiàn iûⁿ-á chı̍t-chiah.

(BCL) 早起時著獻羊仔一隻，黃昏的時著獻羊仔一隻；

5

(THR) Koh tio̍h hiàn iù-mī-hún i-hoat cha̍p-hūn-chı̍t, kap tiau-hô khoeh-hó ê iû chı̍t-him sì-hūn-chı̍t chòe sò͘-chè.

(BCL) 閣著獻幼麵粉伊法十份一，及調和夾好的油一欣四份一，做素祭。

6

(THR) Che sī tī Se-nái soaⁿ só͘ tiāⁿ-tio̍h chòe siông-siông hiàn ê sio-chè, chiū-sī hiàn hō͘ Iâ-hô-hoa chòe phang-phang ê hé-chè.

(BCL) 這是佇西奈山所定著做常常獻的燒祭，就是獻互耶和華做芳芳的火祭。

7

(THR) Ūi-tio̍h chí chı̍t chiah iûⁿ-á, tio̍h sòa hiàn kòan-tiān ê chiú, chı̍t-him sì-hūn ê chı̍t-hūn; tī sèng-só͘ tiong, lí tio̍h chiong kāu ê chiú hiàn hō͘ Iâ-hô-hoa chòe kòan-tiān.

(BCL) 為著此一隻羊仔，著續獻灌奠的酒一欣四份的一份。佇聖所中，你著將厚的酒獻互耶和華做灌奠。

8

(THR) Ê-hng sî, tio̍h hiàn tē-jī chiah iûⁿ-á, chhin-chhiūⁿ chá-khí-sî ê sò͘-chè, iā chhin-chhiūⁿ i ê kòan-tiān, hiàn i hō͘ Iâ-hô-hoa chòe phang-phang ê hé-chè.

(BCL) 下昏時，著獻第二隻羊仔，親像早起時的素祭也親像伊的灌奠，獻伊互耶和華做芳芳的火祭。」

9

(THR) Koh tī an-hioh-jı̍t tio̍h hiàn nn̄g-chiah bô hâ-chhû bē-móa-nî ê iûⁿ-káng-á, iā ēng tiau-hô iû ê iù-mī-hún i-hoat cha̍p-hūn ê nn̄g-hūn, chòe sò͘-chè, kap i ê kòan-tiān.

(BCL) 「閣佇安息日，著獻二隻無瑕疵、未滿年的羊仔，也用調和油的幼麵粉伊法十份的二份做素祭，及伊的灌奠。

10

(THR) Che sī ta̍k ê an-hioh-jı̍t ê sio-chè, hit ê siông-siông hiàn ê sio-chè, kap i ê kòan-tiān í-gōa.

(BCL) 這是逐個安息日的燒祭；彼個常常獻的燒祭，及伊的灌奠以外。」

11

(THR) Ta̍k-ge̍h ê chhoe-it, lín tio̍h hiàn sio-chè hō͘ Iâ-hô-hoa, chiū-sī gû-káng-á nn̄g-chiah, mî-iûⁿ-káng chı̍t-chiah, bô hâ-chhû bē-móa-nî ê iûⁿ-káng-á chhit-chiah.

(BCL) 「逐月的初一，恁著獻燒祭互耶和華，就是牛仔二隻，綿羊一隻，無瑕疵、未滿年的羊仔七隻。

12

(THR) Ūi ta̍k chiah gû-káng-á, tio̍h ēng tiau-hô iû ê iù-mī-hún i-hoat cha̍p-hūn ê saⁿ-hūn, chòe sò͘-chè; ūi hit chiah iûⁿ-káng, iā tio̍h ēng tiau-hô iû ê iù-mī-hún i-hoat cha̍p-hūn ê nn̄g-hūn, chòe sò͘-chè.

(BCL) 為逐隻牛仔，著用調和油的幼麵粉伊法十份的三份做素祭；為彼隻羊也著用調和油的幼麵粉伊法十份的二份做素祭；

13

(THR) Ūi-tio̍h ta̍k chiah iûⁿ-á tio̍h ēng tiau-hô iû ê iù-mī-hún cha̍p-hūn ê chı̍t-hūn, chòe sò͘-chè, kap phang-phang ê sio-chè; sī hiàn hō͘ Iâ-hô-hoa ê hé-chè.

(BCL) 為著逐隻羊仔著用調和油的幼麵粉十份的一份做素祭及芳芳的燒祭，是獻互耶和華的火祭。

14

(THR) I ê kòan-tiān tio̍h ēng chiú, ūi-tio̍h chı̍t chiah gû-káng-á ēng pòaⁿ-him, ūi-tio̍h chı̍t chiah iûⁿ-káng ēng chı̍t-him ê saⁿ-hūn-chı̍t, ūi-tio̍h chı̍t chiah iûⁿ-á chiū ēng chı̍t-him ê sì-hūn-chı̍t; che sī ta̍k-ge̍h ê sio-chè, chı̍t-nî ê tiong-kan, ta̍k-ge̍h tio̍h án-ni.

(BCL) 伊的灌奠著用酒，為著一隻牛仔用半欣，為著一隻羊用一欣的三份一，為著一隻羊仔就用一欣的四份一。這是逐月的燒祭，一年的中間逐月著按呢。

15

(THR) Koh tio̍h ēng chı̍t chiah soaⁿ-iûⁿ-káng chòe sio̍k-chōe-chè, hiàn hō͘ Iâ-hô-hoa; tio̍h tī siông-siông hiàn ê sio-chè, kap i ê kòan-tiān, í-gōa lâi hiàn i.

(BCL) 閣著用一隻山羊做贖罪祭，獻互耶和華；著佇常常獻的燒祭及伊的灌奠以外來獻伊。」

16

(THR) Chiaⁿ-ge̍h cha̍p-sì jı̍t sī Iâ-hô-hoa ê pôaⁿ-kè-choeh.

(BCL) 「正月十四日是耶和華的過節。

17

(THR) Chit-ge̍h cha̍p-gō͘ jı̍t sī choeh-iân; tio̍h chia̍h bô-kàⁿ-piáⁿ chhit-jı̍t kú.

(BCL) 此月十五日是節筵，著食無酵餅七日久。

18

(THR) Tī i ê thâu-chı̍t jı̍t tio̍h ū sèng-hōe, lóng m̄-thang chòe lô-tōng ê kang.

(BCL) 佇伊的頭一日著有聖會；攏呣通做勞動的工。

19

(THR) Lí tio̍h hiàn hé-chè chòe sio-chè hō͘ Iâ-hô-hoa, chiū-sī gû-káng-á nn̄g-chiah, mî-iûⁿ-káng chı̍t-chiah, bē-móa-nî ê iûⁿ-káng-á chhit-chiah; lín lóng tio̍h ēng bô hâ-chhû ê.

(BCL) 你著獻火祭做燒祭互耶和華，就是牛仔二隻，綿羊一隻，未滿年的羊仔七隻，恁攏著用無瑕疵的。

20

(THR) In ê sò͘-chè, ēng tiau-hô iû ê iù-mī-hún, ūi-tio̍h chı̍t chiah gû-káng hiàn cha̍p-hūn-saⁿ, ūi-tio̍h chı̍t chiah iûⁿ-káng hiàn cha̍p-hūn-nn̄g.

(BCL) 的素祭，用調和油的幼麵粉；為著一隻牛獻十份三；為著一隻羊獻十份二；

21

(THR) Ūi-tio̍h hí chhit chiah iûⁿ-á, ta̍k chiah tio̍h hiàn cha̍p-hūn-chı̍t.

(BCL) 為著彼七隻羊仔，逐隻著獻十份一。

22

(THR) Koh hiàn chı̍t chiah soaⁿ-iûⁿ-káng chòe sio̍k-chōe-chè, kā lín sio̍k-chōe.

(BCL) 閣獻一隻山羊做贖罪祭，給恁贖罪。

23

(THR) Lín hiàn chiah-ê, tio̍h tī chá-khí-sî ê sio-chè, chiū-sī siông-siông hiàn ê sio-chè í-gōa.

(BCL) 恁獻諸個，著佇早起時的燒祭，就是常常獻的燒祭以外。

24

(THR) Liân-liân chhit-jı̍t kú, ta̍k-jı̍t chiàu chit ê lē, ēng phang-phang ê hé-chè ê chia̍h-mı̍h, hiàn hō͘ Iâ-hô-hoa; tio̍h tī siông-siông hiàn ê sio-chè, kap i ê kòan-tiān, í-gōa lâi hiàn.

(BCL) 連連七日久，逐日照此個例用芳芳的火祭的食物獻互耶和華，著佇常常獻的燒祭及伊的灌奠，以外來獻。

25

(THR) Tē-chhit jı̍t lín tio̍h ū sèng-hōe, lóng m̄-thang chòe sím-mı̍h lô-tōng ê kâng.

(BCL) 第七日恁著有聖會，攏呣通做甚麼勞動的工。」

26

(THR) Chhit ê chhit jı̍t choeh, khí-thâu-se̍k ê thó͘-sán, lín hiàn sin ê sò͘-chè hō͘ Iâ-hô-hoa ê jı̍t, tio̍h ū sèng-hōe, lóng m̄-thang chòe lô-tōng ê kang.

(BCL) 「七個七日節，起頭熟的土產，恁獻新的素祭互耶和華的日，著有聖會；攏呣通做勞動的工。

27

(THR) Lín tio̍h hiàn phang-phang ê sio-chè hō͘ Iâ-hô-hoa, chiū-sī gû-káng-á nn̄g-chiah, mî-iûⁿ-káng-á chı̍t-chiah, bē-móa-nî ê iûⁿ-káng-á chhit-chiah.

(BCL) 恁著獻芳芳的燒祭互耶和華，就是牛仔二隻，綿羊仔一隻，未滿年的羊仔七隻。

28

(THR) In ê sò͘-chè, ēng tiau-hô iû ê iù-mī-hún, ūi-tio̍h chı̍t chiah gû-káng hiàn cha̍p-hūn-saⁿ, ūi-tio̍h chı̍t chiah iûⁿ-káng hiàn cha̍p-hūn-nn̄g.

(BCL) 的素祭用調和油的幼麵粉；為著一隻牛獻十份三；為著一隻羊獻十份二；

29

(THR) Ūi-tio̍h hí chhit chiah iûⁿ-á, ta̍k-chiah tio̍h hiàn cha̍p-hūn-chı̍t.

(BCL) 為著彼七隻羊仔，逐隻著獻十份一。

30

(THR) Koh hiàn chı̍t chiah soaⁿ-iûⁿ-káng, kā lín sio̍k-chōe.

(BCL) 閣獻一隻山羊給恁贖罪。

31

(THR) Lín tio̍h hiàn chiah-ê, kap i ê kòan-tiān, tī siông-siông hiàn ê sio-chè kap i ê sò͘-chè í-gōa, lín lóng tio̍h ēng bô hâ-chhû-ê.

(BCL) 恁著獻諸個，及伊的灌奠佇常常獻的燒祭及伊的素祭以外，恁攏著用無瑕疵的。」

Bible Color Mark

• 台語漢字羅馬本
• 巴克禮全羅