民數記 第 6 章

1

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

2

(THR) Lí tio̍h hoan-hù Í-sek-lia̍t lâng kā in kóng, Bô-lūn lâm-lú hē te̍k-pia̍t ê gōan, chiū-sī Ná-sè-jíⁿ lâng ê gōan, ka-kī hun-piat kui hō͘ Iâ-hô-hoa,

(BCL) 「你著吩咐以色列人給講：無論男女下特別的願，就是拿細耳人的願，家己分別歸互耶和華。

3

(THR) i chiū tio̍h lī-khui chiú kap kāu-chiú, iā m̄-thang lim sím-mı̍h chiú ê chhò͘, kap kāu-chiú ê chhò͘, m̄-thang lim sím-mı̍h phû-tô ê chiap, iā m̄-thang chia̍h chhiⁿ ê phû-tô, kap ta ê phû-tô.

(BCL) 伊就著離開酒及厚酒，也呣通飲甚麼酒的醋及厚酒的醋；呣通飲甚麼葡萄的汁，也呣通食青的葡萄及乾的葡萄。

4

(THR) Tī it-chhè ka-kī hun-piat ê jı̍t, kìⁿ-nā phû-tô-chhiū só͘ chhut ê, tùi hu̍t kàu phê, lóng m̄-thang chia̍h.

(BCL) 佇一切家己分別的日，見若葡萄樹所出的，對核到皮，攏呣通食。

5

(THR) Tī i hē-gōan ka-kī hun-piat hiah ê jı̍t, m̄-thang hō͘ thì-thâu-to kàu i ê thâu-khak; kàu i ka-kī hun-piat kui hō͘ Iâ-hô-hoa ê jı̍t móa, i tio̍h chòe-sèng, chhut-chāi i ê thâu-mn̂g hoat-tn̂g.

(BCL) 「佇伊下願家己分別許個日，呣通互剃頭刀到伊的頭殼，到伊家己分別歸互耶和華的日滿，伊著做聖，出在伊的頭毛發長。

6

(THR) Tī i ka-kī hun-piat kui Iâ-hô-hoa hiah ê jı̍t, m̄-thang óa-kūn sin-si.

(BCL) 佇伊家己分別歸耶和華許個日，呣通倚近身屍。

7

(THR) I ê lāu-pē, á-sī lāu-bú, á-sī hiaⁿ-tī, á-sī chí-bē, sí ê sî, i m̄-thang ūi-tio̍h in hō͘ ka-kī bô chheng-khì; in-ūi i ka-kī hun-piat kui Siōng-tè ê pîn-kù sī tī i ê thâu-khak.

(BCL) 伊的老父抑是老母抑是兄弟抑是姊妹死的時，伊呣通為著互家己無清氣，因為伊家己分別歸上帝的憑據是佇伊的頭殼。

8

(THR) Tī i ka-kī hun-piat hiah ê jı̍t, i sī kui tī Iâ-hô-hoa chòe-sèng.

(BCL) 佇伊家己分別許個日伊是歸佇耶和華做聖。

9

(THR) Nā tī i ê sin-piⁿ hut-jiân ū lâng sí, tì-kàu bak-tio̍h i ka-kī hun-piat ê thâu-khak, chiū i tio̍h tī ka-kī chheng-khì ê jı̍t thì-thâu, chiū-sī tī tē-chhit jı̍t thì i.

(BCL) 「若佇伊的身邊忽然有人死，致到染著伊家己分別的頭殼，就伊著佇家己清氣的日，剃頭，就是佇第七日剃伊。

10

(THR) Tē-poeh jı̍t i tio̍h ēng nn̄g chiah ka-chui, á-sī nn̄g chiah chíⁿ-á-kiáⁿ, tòa kàu hōe-bō͘ mn̂g-kháu, kau-tài chè-si.

(BCL) 第八日，伊著用二隻鳩鵻抑是二隻鴿仔子帶到會幕門口，交代祭司。

11

(THR) Chè-si tio̍h hiàn chı̍t-chiah chòe sio̍k-chōe-chè, chı̍t-chiah chòe sio-chè, kā i sio̍k-chōe; in-ūi i tùi sin-si lâi ū chōe; koh tio̍h tī hit-jı̍t hō͘ i ê thâu-khak chòe-sèng.

(BCL) 祭司著獻一隻做贖罪祭，一隻做燒祭，給伊贖罪因為伊對身屍來有罪，閣著佇彼日互伊的頭殼做聖。

12

(THR) I tio̍h koh ēng i hun-piat ê jı̍t, hun-piat lâi kui Iâ-hô-hoa, koh tio̍h khan chı̍t chiah bē-móa-nî ê iûⁿ-káng-á, chòe pó͘-kè-sit ê chè; chóng-sī í-chêng ê jı̍t bô sǹg-siàu, in-ūi i ê ka-kī hun-piat í-keng siū bak lâ-sâm.

(BCL) 伊著閣用伊分別的日分別來歸耶和華，閣著牽一隻未滿年的羊仔做補過失的祭；總是以前的日無算數，因為伊的家己分別已經受染垃墋。

13

(THR) Ná-sè-jíⁿ lâng ka-kī hun-piat ê jı̍t í-keng móa, hit ê lē chiū-sī án-ni; lâng tio̍h chhōa i kàu hōe-bō͘ ê mn̂g-kháu.

(BCL) 「拿細耳人家己分別的日已經滿彼個例就是按呢：人著導伊到會幕的門口，

14

(THR) I tio̍h chiong i ê lé-mı̍h hiàn hō͘ Iâ-hô-hoa, chiū-sī chı̍t-chiah bô hâ-chhû bē-móa-nî ê mî-iûⁿ-káng-á, chòe sio-chè, chı̍t-chiah bô hâ-chhû bē-móa-nî ê mî-iûⁿ-bú-á, chòe sio̍k-chōe chè, kap chı̍t-chiah bô hâ-chhû ê mî-iûⁿ-káng, chòe siā-un ê chè;

(BCL) 伊著將伊的禮物獻互耶和華，就是一隻無瑕疵、未滿年的綿羊仔做燒祭，一隻無瑕疵、未滿年的綿羊母仔做贖罪祭，及一隻無瑕疵的綿羊做謝恩的祭，

15

(THR) koh chı̍t-kheng ê bô-kàⁿ piáⁿ, chiū-sī tiau-hô iû iù-mī-hún chòe ê piáⁿ, kap boah-iû bô-kàⁿ ê po̍h-piáⁿ, í-kı̍p i ê sò͘-chè, kap kòan-tiān ê chè.

(BCL) 閣一筐的無酵餅就是調和油幼麵粉做的餅，及抹油無酵的薄餅，以及伊的素祭及灌奠的祭。

16

(THR) Chè-si tio̍h the̍h chiah-ê kàu Iâ-hô-hoa ê bīn-chêng, lâi hiàn hit-lâng ê sio̍k-chōe chè, kap sio-chè.

(BCL) 祭司著提諸個到耶和華的面前來獻彼人的贖罪祭及燒祭；

17

(THR) I iā tio̍h chiong hit chiah iûⁿ-káng, kap hit kheng bô-kàⁿ piáⁿ, hiàn hō͘ Iâ-hô-hoa chòe siā-un ê chè; chè-si iā tio̍h sòa hiàn i ê sò͘-chè kap kòan-tiān.

(BCL) 伊也著將彼隻羊及彼筐無酵餅獻互耶和華做謝恩的祭，祭司也著續獻伊的素祭及灌奠。

18

(THR) Ná-sè-jíⁿ lâng tio̍h tī hōe-bō͘ mn̂g-kháu thì ka-kī hun-piat ê thâu, chiong ka-kī hun-piat ê thâu-mn̂g, hē tī siā-un-chè ē-bīn ê hé-téng.

(BCL) 拿細耳人著佇會幕門口剃家己分別的頭，將家己分別的頭毛下佇謝恩祭下面的火頂。

19

(THR) Ná-sè-jíⁿ lâng thì i ka-kī hun-piat ê thâu-mn̂g liáu-āu, chè-si chiū tio̍h chhú í-keng chú ê iûⁿ-káng chı̍t ki chêng-thúi, koh tùi kheng-á-lāi the̍h chı̍t ê bô-kàⁿ piáⁿ, kap chı̍t ê bô-kàⁿ ê po̍h-piáⁿ, lóng hē tī i ê chhiú.

(BCL) 拿細耳人剃伊家己分別的頭毛了後，祭司就著取已經煮的羊一支前腿，閣對筐仔內提一個無酵餅及一個無酵的薄餅，攏下佇伊的手。

20

(THR) Chè-si tio̍h the̍h chiah-ê chòe iô-chè, iô tī Iâ-hô-hoa ê bīn-chêng; che kap só͘ iô ê heng, só͘ kú ê thúi, lóng chòe sèng-mı̍h, kui hō͘ chè-si; jiân-āu Ná-sè-jíⁿ lâng thang lim-chiú.

(BCL) 祭司著提諸個做搖祭，搖佇耶和華的面前；這及所搖的胸、所舉的腿攏做聖物，歸互祭司。然後拿細耳人通飲酒。

21

(THR) Hē-gōan ê Ná-sè-jíⁿ lâng ūi-tio̍h i hun-piat ka-kī só͘ hiàn ê lé-mı̍h, kap i í-gōa só͘ ōe tit-tio̍h-ê, hiàn hō͘ Iâ-hô-hoa, chiū-sī chit ê lē; i án-ni hē-gōan chiū tio̍h chiàu hun-piat ka-kī ê lē lâi kiâⁿ.

(BCL) 「下願的拿細耳人為著伊分別家己所獻的禮物，及伊以外所會得著的，獻互耶和華，就是此個例。伊按呢下願就著照分別家己的例來行。」

22

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

23

(THR) Lí tio̍h hoan-hù A-lûn kap i ê kiáⁿ kóng, Lín tio̍h án-ni kā Í-sek-lia̍t lâng chiok-hok, tùi in kóng:　　

(BCL) 「你著吩咐亞倫及伊的子講：恁著按呢給以色列人祝福，對講：

24

(THR) Gōan Iâ-hô-hoa sù-hok lí, pó-hō͘ lí;　　

(BCL) 『願耶和華賜福你，保護你。

25

(THR) Gōan Iâ-hô-hoa hō͘ I ê bīn ê kng chiò lí, si-un hō͘ lí;　　

(BCL) 願耶和華互伊的面的光照你，施恩互你。

26

(THR) Gōan Iâ-hô-hoa hoaⁿ-hí ê bīn khòaⁿ lí, siúⁿ-sù lí pêng-an.

(BCL) 願耶和華歡喜的面看你，賞賜你平安。』

27

(THR) Án-ni in beh ēng Góa ê miâ hē tī Í-sek-lia̍t lâng ê téng-bīn; Góa iā beh sù-hok in.

(BCL) 按呢欲用我的名下佇以色列人的頂面；我也欲賜福。」

Bible Color Mark

• 台語漢字羅馬本
• 巴克禮全羅