民數記 第 9 章

1

(THR) Chhut Ai-kı̍p jī-nî chiaⁿ-ge̍h, Iâ-hô-hoa tī Se-nái khòng-iá, bēng-lēng Mô͘-se kóng,

(BCL) 出埃及二年正月，耶和華佇西奈曠野命令摩西講：

2

(THR) Í-sek-lia̍t lâng eng-kai tī tiāⁿ-tio̍h ê jı̍t-kî siú pôaⁿ-kè-choeh;

(BCL) 「以色列人應該佇定著的日期守過節，

3

(THR) tī pún-ge̍h cha̍p-sì jı̍t hông-hun ê sî, lín tio̍h tī só͘ tiāⁿ-tio̍h ê jı̍t siú i, chiàu i it-chhè ê lu̍t-lē, it-chhè ê hoat-tō͘ lâi siú i.

(BCL) 佇本月十四日黃昏的時，恁著佇所定著的日守伊，照伊一切的律例一切的法度來守伊。」

4

(THR) Tùi án-ni Mô͘-se hoan-hù Í-sek-lia̍t lâng siú pôaⁿ-kè-choeh.

(BCL) 對按呢摩西吩咐以色列人守過節。

5

(THR) Chiaⁿ-ge̍h cha̍p-sì jı̍t hông-hun ê sî, in chiū tī Se-nái ê khòng-iá, siú pôaⁿ-kè-choeh; kìⁿ-nā Iâ-hô-hoa só͘ bēng-lēng Mô͘-se ê, Í-sek-lia̍t lâng lóng chiàu án-ni kiâⁿ.

(BCL) 正月十四日黃昏的時，就佇西奈的曠野，守過節。見若耶和華所命令摩西的，以色列人攏照按呢行。

6

(THR) Ū kúi-nā lâng hō͘ lâng ê sin-si bak lâ-sâm, bōe-ōe tī hit-jı̍t siú pôaⁿ-kè-choeh; tng hit-jı̍t in kàu Mô͘-se A-lûn ê bīn-chêng.

(BCL) 有幾若人互人的身屍染垃墋，會佇彼日守過節。當彼日到摩西、亞倫的面前，

7

(THR) Hiah ê lâng kā in kóng, Góan in-ūi hō͘ lâng ê sin-si bak lâ-sâm, siáⁿ-sū chó͘-tòng góan bōe thang tī Í-sek-lia̍t tiong, tī só͘ tiāⁿ-tio̍h ê jı̍t-kî hiàn lé-mı̍h hō͘ Iâ-hô-hoa ah?

(BCL) 許個人給講：「阮因為互人的身屍染垃墋，啥事阻擋阮、通佇以色列中佇所定著的日期獻禮物互耶和華啊？」

8

(THR) Mô͘-se kā in kóng, Lín khiā-teh thèng-hāu, góa beh thiaⁿ Iâ-hô-hoa cháiⁿ-iūⁿ hoan-hù lín.

(BCL) 摩西給講：「恁徛聽候，我欲聽耶和華怎樣吩咐恁。」

9

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

10

(THR) Lí tio̍h hoan-hù Í-sek-lia̍t lâng kóng, He̍k-sī lín á-sī lín ê hō͘-è ê tiong-kan, nā ū lâng hō͘ sin-si bak lâ-sâm, á-sī hn̄g-hn̄g tī lō͘-nı̍h, iû-gôan tio̍h siú Iâ-hô-hoa ê pôaⁿ-kè-choeh.

(BCL) 「你著吩咐以色列人講：或是恁抑是恁的後裔的中間，若有人互身屍染垃墋，抑是遠遠佇路裡，猶原著守耶和華的過節。

11

(THR) In tio̍h tī jī-ge̍h cha̍p-sì jı̍t hông-hun ê sî lâi siú i, chham bô-kàⁿ piáⁿ kap khó͘-chhài lâi chia̍h.

(BCL) 著佇二月十四日黃昏的時，來守伊。參無酵餅及苦菜來食。

12

(THR) M̄-thang lâu chı̍t-tiám-á kàu keh chá-khí, iûⁿ-á ê kut chı̍t-ki iā m̄-thang phah-chı̍h; in tio̍h chiàu pôaⁿ-kè-choeh chiah ê lu̍t-lē lâi siú i.

(BCL) 呣通留一點仔到隔早起；羊仔的骨一支也呣通拍折。著照過節諸個律例來守伊。

13

(THR) Chóng-sī lâng nā chheng-khì iā m̄-sī tī lō͘-tiong, nā ka-kī the-sî m̄ siú pôaⁿ-kè-choeh, tio̍h tùi i ê peh-sìⁿ-tiong chián-tû hit ê lâng, in-ūi i tī só͘ tiāⁿ-tio̍h ê jı̍t bô hiàn lé-mı̍h hō͘ Iâ-hô-hoa, hit-lâng tio̍h tam-tng i ê chōe.

(BCL) 總是人若清氣也呣是佇路中若家己推辭呣守過節，著對伊的百姓中剪除彼個人；因為伊佇所定著的日無獻禮物互耶和華，彼人著擔當伊的罪。

14

(THR) Nā ū gōa-lâng kià-kha tī lín tiong-kan, ài siú Iâ-hô-hoa ê pôaⁿ-kè-choeh, i tio̍h chiàu pôaⁿ-kè-choeh ê lu̍t-lē hoat-tō͘ lâi kiâⁿ; chhut-gōa lâng kap pún-tōe lâng tio̍h tâng chı̍t ê lu̍t-lē lâi kiâⁿ.

(BCL) 若有外人寄腳佇恁中間，愛守耶和華的過節，伊著照過節的律例法度來行，出外人及本地人，著同一個律例來行。」

15

(THR) Khí hōe-bō͘ hit-jı̍t, ū hûn jia i ê hōe-bō͘, chiū-sī chèng-kù ê pò͘-pîⁿ; tùi ê-hng kàu chá-khí, ū chhin-chhiūⁿ hé ê khóan-sit khàm tī hōe-bō͘.

(BCL) 起會幕彼日，有雲遮伊的會幕，就是證據的布棚；對下昏到早起，有親像火的款式，蓋佇會幕。

16

(THR) Siông-siông sī án-ni; hûn jia i, mî-sî chhin-chhiūⁿ hé ê khóan-sit.

(BCL) 常常是按呢，雲遮伊，暝時親像火的款式。

17

(THR) Hûn tùi pò͘-pîⁿ siu chiūⁿ-khì, Í-sek-lia̍t lâng chiū khí-sin; hûn thêng ê só͘-chāi, Í-sek-lia̍t lâng chiū chat-iâⁿ tī-hia.

(BCL) 雲對布棚收上去，以色列人就起身；雲停的所在，以色列人就紮營佇遐。

18

(THR) Í-sek-lia̍t lâng chiàu Iâ-hô-hoa ê bēng-lēng khí-sin, iā chiàu Iâ-hô-hoa ê bēng-lēng an-iâⁿ; hûn thêng tī hōe-bō͘-téng ê sî, in iû-gôan an-iâⁿ tī-hia.

(BCL) 以色列人照耶和華的命令起身，也照耶和華的命令安營。雲停佇會幕頂的時，猶原安營佇遐。

19

(THR) Hûn tī hōe-bō͘-téng thêng chōe-chōe jı̍t, Í-sek-lia̍t lâng chiū siú Iâ-hô-hoa só͘ kau-tài ê, bô khí-sin.

(BCL) 雲佇會幕頂停多多日，以色列人就守耶和華所交代的無起身。

20

(THR) Ū-sî hûn tī hōe-bō͘-téng kúi-nā jı̍t, in chiàu Iâ-hô-hoa ê bēng-lēng iû-gôan an-iâⁿ tī-hia, iā chiàu Iâ-hô-hoa ê bēng-lēng khí-sin.

(BCL) 有時雲佇會幕頂幾若日，照耶和華的命令猶原安營佇遐，也照耶和華的命令起身。

21

(THR) Ū-sî hûn jia-teh tùi ê-hng kàu chá-khí, chá-khí sî hûn siu chiūⁿ-khì, in chiū khí-sin; bô-lūn jı̍t-sî mî-sî hûn siu chiūⁿ-khì, in chiū khí-sin.

(BCL) 有時雲遮對下昏到早起；早起時雲收上去，就起身。無論日時暝時，雲收上去，就起身。

22

(THR) Hûn thêng tī hōe-bō͘, bô-lūn sī nn̄g-jı̍t, sī chı̍t-ge̍h-jı̍t, sī chı̍t-nî, Í-sek-lia̍t lâng iû-gôan an-iâⁿ tī-hia, bô khí-sin; chóng-sī hûn siu chiūⁿ-khì, in chiū khí-sin.

(BCL) 雲停佇會幕，無論是二日，是一月日，是一年，以色列人猶原安營佇遐無起身；總是雲收上去，就起身。

23

(THR) In thàn Iâ-hô-hoa ê bēng-lēng an-iâⁿ, iā thàn Iâ-hô-hoa ê bēng-lēng khí-sin; in siú Iâ-hô-hoa só͘ kau-tài ê, lóng chiàu Iâ-hô-hoa thok Mô͘-se só͘ bēng-lēng ê.

(BCL) 趁耶和華的命令安營，也趁耶和華的命令起身。守耶和華所交代的，攏照耶和華託摩西所命令的。

Bible Color Mark

• 台語漢字羅馬本
• 巴克禮全羅