詩篇 第 101 章

1

(THR) Tāi-pı̍t ê si.1) Góa beh chhiùⁿ chû-ài kap kong-pêng ê koa; Iâ-hô-hoa ah, góa beh ǹg Lí chhiùⁿ o-ló ê koa.

(BCL) 〔大衛的詩。〕我欲唱慈愛及公平的歌；耶和華啊，我欲向你唱謳咾的歌！

2

(THR) Góa beh ēng tì-hūi kiâⁿ tī ôan-chôan ê lō͘; Lí beh siáⁿ-sî kàu góa chia? Góa beh ēng ôan-chôan ê sim kiâⁿ tī góa ê ke-lāi.

(BCL) 我欲用智慧行佇完全的路。你欲啥時到我遮？我欲用完全的心行佇我的家內。

3

(THR) Siâ-phiah ê sū, góa lóng m̄ pâi tī góa ê ba̍k-chêng; Pōe-tō ê lâng só͘ chòe ê sū, góa chin òan-hūn; M̄ hō͘ i liâm-tio̍h góa.

(BCL) 邪僻的事，我攏呣排佇我的目前；悖道的人所做的事，我真怨恨，呣互伊粘著我。

4

(THR) Oan-khiau ê sim tek-khak hō͘ i lī-khui góa; It-chhè ê pháiⁿ góa m̄-bat i.

(BCL) 彎曲的心，的確互伊離開我；一切的歹，我呣識伊。

5

(THR) Àm-tiong húi-pòng i ê chhù-piⁿ--ê, góa beh bia̍t i; Ba̍k-chiu-kho͘ tōa ê, sim kiau-ngō͘ ê lâng, góa bô iông-ún i.

(BCL) 暗中誹謗伊的厝邊者，我欲滅伊；目睭箍大的，心驕傲的人，我無容允伊。

6

(THR) Góa ê ba̍k-chiu beh khòaⁿ kok-lāi sêng-sı̍t ê lâng, hō͘ in kap góa saⁿ-kap tòa; Kiâⁿ tī ôan-chôan ê lō͘--ê, i beh ho̍k-sāi góa.

(BCL) 我的目睭欲看國內誠實的人，互及我相及住；行佇完全的路者，伊欲服事我。

7

(THR) Kiâⁿ khúi-chà ê lâng bōe-tit-thang tòa góa ê ke-lāi; Kóng pe̍h-chha̍t-ōe ê lâng bōe-tit-thang khiā-tiâu tī góa ê ba̍k-chiu-chêng.

(BCL) 行詭詐的人，得通住我的家內；講白賊話的人，得通徛住佇我的目睭前。

8

(THR) Ta̍k chá-khí góa beh bia̍t-bô kok-lāi ê pháiⁿ-lâng; Thang chiong it-chhè chòe-pháiⁿ ê lâng, tùi Iâ-hô-hoa ê siâⁿ tû--khì.

(BCL) 逐早起我欲滅無國內的歹人，通將一切做歹的人對耶和華的城除去。

Bible Color Mark

• 台語漢字羅馬本
• 巴克禮全羅