詩篇 第 19 章

1

(THR) Tāi-pı̍t ê si; kau hō͘ Ga̍k-koaⁿ.1) Chiah ê thiⁿ kóng-khí Siōng-tè ê êng-kng, Kiong-chhong pò-iông I ê chhiú só͘ chòe--ê.

(BCL) 〔大衛的詩，交互樂官。〕諸個天講起上帝的榮光；穹蒼報揚伊的手所做的。

2

(THR) Chit-jı̍t tùi hit-jı̍t hoat-chhut giân-gú, Chit-mî tùi hit-mî thôan-chhut chai-bat.

(BCL) 此日對彼日發出言語；此暝對彼暝傳出知識。

3

(THR) Bô giân bô gú; In ê siaⁿ bô thang thiaⁿ-kìⁿ.

(BCL) 無言無語，的聲無通聽見。

4

(THR) In ê chún-chîn piàn tī thiⁿ-ē, In ê giân-gú kàu tī tōe-ke̍k. Siōng-tè tī in tiong-kan ūi-tio̍h jı̍t-thâu an-tì tiùⁿ-pâng.

(BCL) 的準繩遍佇天下，的言語到佇地極。上帝佇中間為著日頭安置帳房；

5

(THR) Jı̍t-thâu chhin-chhiūⁿ sin-kiáⁿ-sài chhut i ê pâng, Ia̍h chhin-chhiūⁿ béng-ióng ê lâng hoaⁿ-hí cháu i ê lō͘.

(BCL) 日頭親像新子婿出伊的房，亦親像猛勇的人歡喜走伊的路。

6

(THR) I tùi thiⁿ ê chit-pêng chhut, Se̍h kàu thiⁿ ê hit-pêng; Bô chı̍t-hāng-mı̍h khǹg-ba̍t, bô tit-tio̍h i ê jia̍t-khì.

(BCL) 伊對天的此旁出，踅到天的彼旁，無一項物囥密，無得著伊的熱氣。

7

(THR) Iâ-hô-hoa ê lu̍t-hoat chiâu-chn̂g, ōe hō͘ lâng ê sim-sîn o̍ah--khí-lâi; Iâ-hô-hoa ê kan-chèng khak-sı̍t, ōe hō͘ gōng-lâng ū tì-hūi.

(BCL) 耶和華的律法齊全，會互人的心神活起來；耶和華的干證確實，會互戇人有智慧。

8

(THR) Iâ-hô-hoa ê kà-sī chèng-tı̍t, ōe hō͘ lâng ê sim hoaⁿ-hí; Iâ-hô-hoa ê bēng-lēng chheng-kiat, ōe hō͘ lâng ê ba̍k-chiu kng-bêng.

(BCL) 耶和華的教示正直，會互人的心歡喜；耶和華的命令清潔，會互人的目睭光明。

9

(THR) Keng-ùi Iâ-hô-hoa ê tō-lí sī chheng-khì, éng-óan chûn-chāi; Iâ-hô-hoa ê phòaⁿ-tòan chin-sı̍t, it-khài sī kong-gī.

(BCL) 敬畏耶和華的道理是清氣，永遠存在；耶和華的判斷真實，一概是公義

10

(THR) Pí kim, pí chōe-chōe hó kim, khah thang him-bō͘; Pí bı̍t, pí phang-pâng tih--lo̍h-lâi ê bı̍t khah-tiⁿ.

(BCL) --比金，比多多好金卡通欣慕；比蜜，比蜂房滴落來的蜜卡甜。

11

(THR) Koh Lí ê lô͘-po̍k tùi chiah-ê siū kéng-kài; Siú chiah-ê ū tōa siúⁿ-sù.

(BCL) 閣你的奴僕對諸個受警戒，守諸個有大賞賜。

12

(THR) Chī-chūi ōe chai i ê sit-chhò ah? Kiû Lí tû--khì góa àm-chīⁿ ê kè-sit.

(BCL) 是誰會知伊的失錯啊？求你除去我暗靜的過失。

13

(THR) Kiû Lí chó͘-chí Lí ê lô͘-po̍k, bô kò͘-ì hōan-chōe; M̄-chún hit ê chōe-ok kóan-hat góa; Góa chiū ôan-chôan, bián hōan tōa-chōe.

(BCL) 求你阻止你的奴僕無故意犯罪，呣准彼個罪惡管轄我，我就完全，免犯大罪。

14

(THR) Iâ-hô-hoa góa ê chio̍h-pôaⁿ, kiù-sio̍k góa ê Chú ah; Gōan góa ê chhùi só͘ kóng--ê, sim só͘ siūⁿ--ê, tī Lí ê bīn-chêng tit-tio̍h chiap-la̍p.

(BCL) 耶和華──我的石磐，救贖我的主啊，願我的嘴所講的、心所想的佇你的面前得著接納。

Bible Color Mark

• 台語漢字羅馬本
• 巴克禮全羅