詩篇 第 27 章

1

(THR) Tāi-pı̍t ê si.1) Iâ-hô-hoa sī góa ê kng, sī góa ê chín-kiù; góa beh kiaⁿ chī-chūi? Iâ-hô-hoa sī góa o̍ah-miā ê khùi-la̍t; góa beh kiaⁿ chī-chūi?

(BCL) 〔大衛的詩。〕耶和華是我的光，是我的拯救，我欲驚是誰？耶和華是我活命的氣力，我欲驚是誰？

2

(THR) Hiah ê chòe pháiⁿ ê lâng, chiū-sī góa ê kiû-siû, góa ê tùi-te̍k, lâi kong-kek góa, beh chia̍h góa ê bah, Hit-sî in chiū tio̍h-tak po̍ah-tó.

(BCL) 許個做歹的人就是我的仇讎，我的對敵來攻擊我，欲食我的肉，彼時In就著觸跋倒。

3

(THR) Sui-jiân ū kun-peng chat-iâⁿ, beh kong-kek góa, Góa ê sim ia̍h bô kiaⁿ-hiâⁿ; Sui-jiân heng-khí to-peng kong-kek góa, Góa iû-gôan chū-chāi.

(BCL) 雖然有軍兵紮營欲攻擊我，我的心亦無驚惶；雖然興起刀兵攻擊我，我猶原自在。

4

(THR) Ū chı̍t hāng sū góa bat tùi Iâ-hô-hoa kiû, góa iû-gôan tì-ì ài tit-tio̍h; Chiū-sī chı̍t-sì-lâng khiā-khì Iâ-hô-hoa ê chhù, Khòaⁿ I ê êng-kng, siàu-liām I ê tiān.

(BCL) 有一項事，我曾對耶和華求，我猶原致意愛得著；就是一世人徛起耶和華的厝，看伊的榮光，數念伊的殿。

5

(THR) In-ūi hōan-lān ê jı̍t, I beh àm-chīⁿ pó-hō͘ góa tī I ê tiùⁿ-ûi lāi; Chiong góa khǹg tī I pò͘-pîⁿ khàm-ba̍t ê só͘-chāi; Kú-khí góa tī chio̍h-pôaⁿ-téng.

(BCL) 因為患難的日，伊欲暗靜保護我；佇伊的帳帷內，將我囥佇伊布棚蓋密的所在，舉起我佇石磐頂。

6

(THR) Taⁿ góa ê thâu-khak tit-tio̍h kia̍h-khí, khah-kôaiⁿ tī góa sì-bīn ê tùi-te̍k; Góa beh tī I ê pò͘-pîⁿ hiàn hoaⁿ-hí ê chè; Góa beh gîm-si, ia̍h beh chhiùⁿ-koa o-ló Iâ-hô-hoa.

(BCL) 今我的頭殼得著抬起，卡高佇我四面的對敵。我欲佇伊的布棚獻歡喜的祭；我欲吟詩亦欲唱歌謳咾耶和華。

7

(THR) Iâ-hô-hoa ah, góa chhut-siaⁿ kiû-kiò ê sî, kiû Lí thiaⁿ; Koh kiû Lí lîn-bín góa, ìn góa.

(BCL) 耶和華啊，我出聲求叫的時，求你聽；閣求你憐憫我，應我。

8

(THR) Lí bat kóng, Lín tio̍h him-bō͘ kìⁿ Góa ê bīn; hit-sî góa ê sim tùi Lí kóng, Iâ-hô-hoa ah, góa beh him-bō͘ kìⁿ Lí ê bīn.

(BCL) 你曾講：恁著欣慕見我的面。彼時我的心對你講：耶和華啊，我欲欣慕見你的面。

9

(THR) M̄-thang tùi góa ng Lí ê bīn; M̄-thang siū-khì lâi kóaⁿ Lí ê lô͘-po̍k; Lí pêng-sò͘ sī chòe góa ê pang-chān; Kiù góa ê Siōng-tè ah, m̄-thang pàng-sak góa, ia̍h m̄-thang lī-khui góa.

(BCL) 呣通對我掩你的面。呣通受氣來趕你的奴僕，你平素是做我的幫助。救我的上帝啊，呣通放拺我，亦呣通離開我。

10

(THR) In-ūi pē-bú lī-khui góa, Iâ-hô-hoa beh siu-liû góa.

(BCL) 因為父母離開我，耶和華欲收留我。

11

(THR) Iâ-hô-hoa ah, kiû Lí ēng Lí ê tō-lō͘ chí-sī góa; In-ūi góa ê tùi-te̍k ê iân-kò͘, chhōa góa tī pîⁿ-tháⁿ ê lō͘.

(BCL) 耶和華啊，求你用你的道路指示我，因為我的對敵的緣故導我佇平坦的路。

12

(THR) M̄-thang chiong góa kau hō͘ tùi-te̍k, chiâⁿ in ê sim-gōan; In-ūi lām-sám kan-chèng ê lâng khí-lâi kong-kek góa, in ia̍h thò͘-chhut hiong-ok ê ōe.

(BCL) 呣通將我交互對敵，成的心願；因為濫糝干證的人，起來攻擊我，亦吐出兇惡的話。

13

(THR) Góa nā m̄-sìn tī o̍ah-lâng ê tōe tit-tio̍h khòaⁿ-kìⁿ Iâ-hô-hoa ê un-hūi, Chiū tek-khak cho̍at-bāng.

(BCL) 我若呣信佇活人的地得著看見耶和華的恩惠，就的確絕望。

14

(THR) Tio̍h thèng-hāu Iâ-hô-hoa, Tio̍h ióng-chòng, lí ê sim tio̍h kian-kò͘; Sı̍t-chāi tio̍h thèng-hāu Iâ-hô-hoa.

(BCL) 著聽候耶和華！著勇壯，你的心著堅固！實在著聽候耶和華！

Bible Color Mark

• 台語漢字羅馬本
• 巴克禮全羅