詩篇 第 62 章

1

(THR) Tāi-pı̍t ê si, chiàu Iâ-tō͘-tùn ê chòe-hoat; kau hō͘ Ga̍k-koaⁿ.1) Góa ê sim chēng-chēng, choan-bū thèng-hāu Siōng-tè, Góa ê chín-kiù sī tùi I lâi.

(BCL) 〔大衛的詩，照耶杜頓的作法交互樂官。〕我的心靜靜，專務聽候上帝；我的拯救是對伊來。

2

(THR) To̍k-to̍k I sī góa ê chio̍h-pôaⁿ, chín-kiù góa-ê; I sī góa ê kôaiⁿ-tâi, góa bōe tōa iô-tāng.

(BCL) 獨獨伊是我的石磐，拯救我的；伊是我的高台，我大搖動。

3

(THR) Lín tāi-ke kong-kek lâng, Chiong i húi-hōai, Chhin-chhiūⁿ húi-hōai khi-chhiâ ê chhiûⁿ, beh tó ê piah, beh kàu tī-sî ah?

(BCL) 恁大家攻擊人，將伊毀壞，親像毀壞敧斜的牆、欲倒的壁，欲到底時啊？

4

(THR) In saⁿ-kap kè-bô͘ choan-bū beh tùi i chun-kùi ê ūi kā i chhia--lo̍h-khì, In hoaⁿ-hí pe̍h-chha̍t; In chhùi chiok-hok, sim chiù-chó͘. [Sè-la̍h

(BCL) 相及計謀，專務欲對伊尊貴的位給伊捙落去；歡喜白賊，嘴祝福，心咒詛。（細拉）

5

(THR) Góa ê sîn ah, lí tio̍h chēng-chēng, choan-bū thèng-hāu Siōng-tè; In-ūi góa ê ǹg-bāng sī tùi I lâi.

(BCL) 我的神啊，你著靜靜，專務聽候上帝，因為我的向望是對伊來。

6

(THR) To̍k-to̍k I sī góa ê chio̍h-pôaⁿ, sī chín-kiù góa ê; I sī góa ê kôaiⁿ-tâi, góa bōe iô-tāng.

(BCL) 獨獨伊是我的石磐，是拯救我的；伊是我的高台，我搖動。

7

(THR) Góa ê chín-kiù, góa ê êng-kng, chāi-tī Siōng-tè; Góa ê khùi-la̍t ê chio̍h-pôaⁿ, góa ê siám-pī ê só͘-chāi, ia̍h chāi-tī Siōng-tè.

(BCL) 我的拯救、我的榮光在佇上帝；我的氣力的石磐、我的閃避的所在亦在佇上帝。

8

(THR) Lín chèng peh-sìⁿ, tio̍h sî-sî óa-khò I; Tī I ê bīn-chêng piàⁿ-chhut lín ê sim; Siōng-tè sī lán tô-siám ê só͘-chāi. [Sè-la̍h

(BCL) 恁眾百姓著時時倚靠伊，佇伊的面前傾出恁的心；上帝是咱逃閃的所在。（細拉）

9

(THR) Pi-bî ê lâng chin-chiàⁿ sī khang-hu, chun-kùi ê lâng iā sī hu-ké; Hē tī thian-phêng-óaⁿ, tek-khak phû--khí-lâi, In it-khài pí ho͘-khip ê khì khah-khin.

(BCL) 卑微的人真正是空虛；尊貴的人也是虛假；下佇天秤碗的確浮起來；一概比呼吸的氣卡輕。

10

(THR) M̄-thang óa-khò pō-gio̍k; M̄-thang in-ūi chhiúⁿ-the̍h lâi kiau-ngō͘; Nā châi-pó ke-thiⁿ, m̄-thang chù-ì tī-hia.

(BCL) 呣通倚靠暴虐，呣通因為搶提來驕傲；若財寶加添，呣通注意佇遐。

11

(THR) Siōng-tè kóng chı̍t-pái, Góa ū thiaⁿ-kìⁿ nn̄g-hāng; Chiū-sī kôan-lêng sio̍k tī Siōng-tè.

(BCL) 上帝講一擺，我有聽見二項：就是權能屬佇上帝。

12

(THR) Chú ah, chû-ài ia̍h sī sio̍k tī Lí; In-ūi Lí chiàu ta̍k-lâng ê só͘-kiâⁿ lâi pò-èng i.

(BCL) 主啊，慈愛亦是屬佇你，因為你照逐人的所行來報應伊。

Bible Color Mark

• 台語漢字羅馬本
• 巴克禮全羅