詩篇 第 72 章

1

(THR) Só͘-lô-bûn ê si.1) Siōng-tè ah, kiû Lí chiong Lí ê phòaⁿ-tòan siúⁿ-sù ông, Chiong Lí ê kong-gī siúⁿ-sù ông ê kiáⁿ.

(BCL) 〔所羅門的詩。〕上帝啊，求你將你的判斷賞賜王，將你的公義賞賜王的子。

2

(THR) I beh chiàu kong-gī sím-phòaⁿ Lí ê peh-sìⁿ, Chiàu kong-pêng phòaⁿ-tòan Lí hiah ê khùn-khó͘ ê lâng.

(BCL) 伊欲照公義審判你的百姓，照公平判斷你許個困苦的人。

3

(THR) Tōa-soaⁿ beh in-ūi kong-gī, hō͘ peh-sìⁿ pêng-an, Soaⁿ-á iā beh án-ni.

(BCL) 大山欲因為公義互百姓平安，山仔也欲按呢。

4

(THR) I beh kā peh-sìⁿ-tiong khùn-khó͘ ê lâng phòaⁿ-tòan, I beh kiù sòng-hiong ê lâng, I beh teh-chhùi pō-gio̍k ê lâng.

(BCL) 伊欲給百姓中困苦的人判斷，伊欲救喪鄉的人，伊欲壓碎暴虐的人。

5

(THR) Lâng beh kèng-ùi Lí jı̍t-kú ge̍h-tn̂g, Tı̍t-kàu bān sè-tāi.

(BCL) 人欲敬畏你，日久月長，直到萬世代！

6

(THR) I beh kàng-lîm chhin-chhiūⁿ hō͘ lo̍h tī í-keng koah ê chháu, Chhin-chhiūⁿ kı̍p-sî ê hō͘ lūn-te̍k thó͘-tōe.

(BCL) 伊欲降臨，親像雨落佇已經割的草，親像及時的雨潤澤土地。

7

(THR) Tī i ê jı̍t-chí gī-lâng beh heng-ōng; Tōa-tōa pêng-an kap ge̍h pîⁿ kú.

(BCL) 佇伊的日子，義人欲興旺，大大平安，及月平久。

8

(THR) I beh chiáng-kôan tùi chit ê hái kàu hit ê hái, Tùi Tōa-hô kàu tōe-ke̍k.

(BCL) 伊欲掌權，對此個海到彼個海，對大河到地極。

9

(THR) Khiā-khí tī khòng-iá-ê beh kūi-pài tī i ê bīn-chêng; I ê tùi-te̍k beh chī thô͘-hún.

(BCL) 徛起佇曠野的，欲跪拜佇伊的面前；伊的對敵欲舐土粉。

10

(THR) Tha-si kap hái-sū ê lia̍t-ông beh chìn-kòng; Sī-pa kap Se-pa ê ông beh hiàn lé-mı̍h.

(BCL) 他施及海嶼的列王欲進貢；示巴及西巴的王欲獻禮物。

11

(THR) Lia̍t-ông lóng beh phak-lo̍h pài i, Bān-kok lóng beh ho̍k-sāi i.

(BCL) 列王攏欲仆落拜伊；萬國攏欲服事伊。

12

(THR) In-ūi sòng-hiong lâng kiû-kiò ê sî, i beh kiù i; Khùn-khó͘ bô i-óa ê lâng i iā beh kiù.

(BCL) 因為，喪鄉人求叫的時，伊欲救伊；困苦無依倚的人，伊也欲救。

13

(THR) I beh lîn-bín chheng-tām sòng-hiong ê lâng, I beh chín-kiù sòng-hiong lâng ê sìⁿ-miā.

(BCL) 伊欲憐憫清淡喪鄉的人，伊欲拯救喪鄉人的生命。

14

(THR) I beh kiù-sio̍k in ê sìⁿ-miā thoat-lī ap-pek kap pō-gio̍k; I beh khòaⁿ in ê huih chòe pó-pòe.

(BCL) 伊欲救贖的生命脫離壓迫及暴虐；伊欲看的血做寶貝。

15

(THR) I beh o̍ah--teh; beh chiong Sī-pa ê kim hō͘ i, Beh siông-siông ūi i kî-tó, Thong-jı̍t o-ló i.

(BCL) 伊欲活。欲將示巴的金互伊；欲常常為伊祈禱，通日謳咾伊。

16

(THR) Tī tōe--nih, tī soaⁿ-téng, gō͘-kak tek-khak bō͘-sēng, Só͘ kiat ê gō͘-kak beh iô-tāng, chhin-chhiūⁿ Lī-pa-lùn ê chhiū; Siâⁿ-lāi ê lâng beh heng-ōng, chhin-chhiūⁿ tōe-chiūⁿ ê chháu.

(BCL) 佇地裡佇山頂，五穀的確茂盛；所結的五穀欲搖動，親像黎巴嫩的樹；城內的人欲興旺，親像地上的草。

17

(THR) I ê miâ beh lâu kàu éng-óan; I ê miâ beh liû-thôan chhin-chhiūⁿ jı̍t ê kú; Lâng beh in-ūi i lâi tit-tio̍h hok-khì; Bān-kok beh chheng-ho͘ i ū hok-khì.

(BCL) 伊的名欲留到永遠，伊的名欲流傳親像日的久。人欲因為伊來得著福氣；萬國欲稱呼伊有福氣。

18

(THR) Iâ-hô-hoa Siōng-tè, chiū-sī Í-sek-lia̍t ê Siōng-tè, Chí-ū I kiâⁿ kî-īⁿ ê sū, eng-kai o-ló I.

(BCL) 耶和華上帝──就是以色列的上帝，只有伊行奇異的事，應該謳咾伊！

19

(THR) Gōan I êng-kng ê miâ éng-óan siū o-ló; Gōan I ê êng-kng chhiong-móa chôan-tōe. A-bēng, koh A-bēng.

(BCL) 願伊榮光的名，永遠受謳咾。願伊的榮光充滿全地！阿們！閣阿們！

20

(THR) Iâ-se ê kiáⁿ Tāi-pı̍t ê kî-tó bêng-pe̍k.

(BCL) 耶西的子──大衛的祈禱明白。

Bible Color Mark

• 台語漢字羅馬本
• 巴克禮全羅