啟示錄 第 7 章

1

(THR) Chiah ê tāi-chì liáu-āu góa khòaⁿ-kìⁿ sì ê thiⁿ-sài khiā tī tōe ê sì kak-thâu, chip-chiáng tōe ê sì-bīn hong, hō͘ i bô chhe tī tōe, tī hái, kap it-khài ê chhiū.

(BCL) 諸個代誌了後，我看見四個天使徛佇地的四角頭，執掌地的四面風，互伊無吹佇地，佇海及一概的樹。

2

(THR) Koh khòaⁿ-kìⁿ pa̍t ê thiⁿ-sài tùi jı̍t-chhut ê só͘-chāi chiūⁿ-lâi, the̍h chin-o̍ah Siōng-tè ê ìn; tùi hiah ê tit-tio̍h kôan, lâi siong-hāi tōe kap hái, sì ê thiⁿ-sài tōa siaⁿ kiò, kóng,

(BCL) 閣看見別個天使，對日出的所在上來，提真活上帝的印。對許個得著權來傷害地及海，四個天使大聲叫講：

3

(THR) Tōe kap hái kap chhiū lín bo̍h-tit siong-hāi, thèng-hāu góan khàm-ìn tī lán ê Siōng-tè ê lô͘-po̍k ê thâu-hia̍h.

(BCL) 「地及海及樹，恁莫得傷害，聽候阮蓋印佇咱的上帝的奴僕的頭額。」

4

(THR) Góa chiū thiaⁿ-kìⁿ siū khàm-ìn ê ê siàu-gia̍h; Í-sek-lia̍t ê kiáⁿ-sun chèng chi-phài ê tiong-kan siū khàm-ìn ê, kiōng ū cha̍p-sì-bān sì-chheng.

(BCL) 我就聽見受蓋印者的數額，以色列的子孫眾支派的中間受蓋印的共有十四萬四千。

5

(THR) Sio̍k Iû-tāi ê chi-phài siū khàm-ìn ê, chı̍t-bān nn̄g-chheng: Sio̍k Liû-piān ê chi-phài, chı̍t-bān nn̄g-chheng: Sio̍k Ka-tek ê chi-phài, chı̍t-bān nn̄g-chheng:

(BCL) 屬猶大的支派受蓋印的一萬二千；屬流便的支派一萬二千；屬迦得的支派一萬二千；

6

(THR) Sio̍k A-siat ê chi-phài, chı̍t-bān nn̄g-chheng: Sio̍k La̍p-tāi-lī ê chi-phài, chı̍t-bān nn̄g-chheng: Sio̍k Má-ná-se ê chi-phài, chı̍t-bān nn̄g-chheng:

(BCL) 屬亞設的支派一萬二千；屬拉大利的支派一萬二千；屬瑪拿西的支派一萬二千；

7

(THR) Sio̍k Se-biān ê chi-phài, chı̍t-bān nn̄g-chheng: Sio̍k Lī-bī ê chi-phài, chı̍t-bān nn̄g-chheng: Sio̍k Í-sat-ka ê chi-phài, chı̍t-bān nn̄g-chheng:

(BCL) 屬西緬的支派一萬二千；屬利未的支派一萬二千；屬以薩迦的支派一萬二千；

8

(THR) Sio̍k Se-pò͘-lûn ê chi-phài, chı̍t-bān nn̄g-chheng: Sio̍k Iok-sek ê chi-phài, chı̍t-bān nn̄g-chheng: Sio̍k Piān-ngá-bín ê chi-phài, chı̍t-bān nn̄g-chheng.

(BCL) 屬西布倫的支派一萬二千；屬約瑟的支派一萬二千；屬便雅憫的支派受蓋印的一萬二千。

9

(THR) Chiah ê tāi-chì liáu-āu, góa khòaⁿ-kìⁿ ū kui tōa tīn ê lâng, bô lâng ōe sǹg i ê siàu-gia̍h, chhut tī ta̍k kok, ta̍k cho̍k, ta̍k hō peh-sìⁿ, ta̍k iūⁿ khiuⁿ-kháu ê, khiā tī chō-ūi ê bīn-chêng, chhēng pe̍h saⁿ, chhiú kia̍h chang-chhiū ki;

(BCL) 諸個代誌了後，我看見有歸大陣的人，無人會算伊的數額，出佇逐國、逐族、逐號百姓、逐樣腔口的，徛佇座位的面前，穿白衫，手抬棕樹枝，

10

(THR) tōa siaⁿ kiò kóng, Gōan chín-kiù kui tī lán ê Siōng-tè, chiū-sī chē chō-ūi ê, kap tī Iûⁿ-ko.

(BCL) 大聲叫講：「願拯救歸佇咱的上帝，就是坐座位的及佇羊羔！」

11

(THR) Chèng thiⁿ-sài khiā tī chō-ūi kap tiúⁿ-ló kap sì ê o̍ah-mı̍h ê chiu-ûi, bīn phak tī chō-ūi chêng, kèng-pài Siōng-tè, kóng, À-bēng:

(BCL) 眾天使徛佇座位及長老及四個活物的周圍，面仆佇座位前，敬拜上帝，

12

(THR) Gōan o-ló, êng-kng, tì-hūi, kám-siā, chun-kùi, kôan-lêng, khùi-la̍t kui tī lán ê Siōng-tè, kàu tāi-tāi bô chīn. À-bēng.

(BCL) 講：阿們！願謳咾、榮光、智慧、感謝、尊貴、權能、氣力歸佇咱的上帝，到代代無盡。阿們！

13

(THR) Tiúⁿ-ló ê tiong-kan ū chı̍t ê ìn góa kóng, Chiah ê chhēng pe̍h saⁿ ê sī chī-chūi? tùi tá-lo̍h lâi ah?

(BCL) 長老的中間有一個應我講：「諸個穿白衫的是是誰？對叨落來啊？」

14

(THR) Góa kā i kóng, Góa ê Chú ah, lí chai. I kā góa kóng, Chiah-ê sī tùi hit ê tōa ê hōan-lān chhut-lâi ê, bat tī Iûⁿ-ko ê huih sóe in ê saⁿ kàu pe̍h-pe̍h.

(BCL) 我給伊講：「我的主啊，你知。」伊給我講：「諸個是對彼個大的患難出來的，曾佇羊羔的血洗的衫到白白。

15

(THR) Só͘-í in tī Siōng-tè ê chō-ūi chêng, koh tī I ê tiān mî-jı̍t ho̍k-sāi I; chē tī chō-ūi ê beh khiā-khí tī in ê tiong-kan, lâi tì-ìm in.

(BCL) 所以，佇上帝的座位前，閣佇伊的殿暝日服事伊。坐佇座位的欲徛起佇的中間來致蔭。

16

(THR) In bô koh iau, iā bô koh chhùi-ta; jı̍t kap it-chhè ê jia̍t bōe pek-tio̍h in.

(BCL) 無閣枵，也無閣嘴乾，日及一切的熱著。

17

(THR) In-ūi chō-ūi tiong ê Iûⁿ-ko beh chòe in ê bo̍k-chiá, chhōa in kàu o̍ah ê chúi-chôaⁿ; koh Siōng-tè beh tùi in ê ba̍k-chiu chhit-khì in lóng-chóng ê ba̍k-sái.

(BCL) 因為座位中的羊羔欲做的牧者，導到活的水泉；閣上帝欲對的目睭拭去攏總的目屎。」

Bible Color Mark

• 台語漢字羅馬本
• 巴克禮全羅