路得記 第 4 章

1

(THR) Pho-a-su chiūⁿ kàu siâⁿ-mn̂g, chē tī-hia; tú-tn̄g Pho-a-su só͘ kóng hit ê kai-chhin-ê tùi-hia kè; i chiū tùi i kóng, Bó͘-lâng ah, chhiáⁿ lí oat-lâi chia chē; i chiū oat-khì chē.

(BCL) 波阿斯上到城門，坐佇遐，抵當波阿斯所講彼個該親的對遐過。伊就對伊講：「某人啊，請你越來遮坐。」伊就越去坐。

2

(THR) Pho-a-su koh tùi pún-siâⁿ ê tióng-ló tiong kiò cha̍p-lâng lâi, kā in kóng, Chhiáⁿ lín chē tiàm chia; in chiū chē.

(BCL) 波阿斯閣對本城的長老中叫十人來，給講：「請恁坐踮遮。」就坐。

3

(THR) Pho-a-su tùi hit ê chì-chhin-ê kóng, Tùi Mô͘-ap tōe tò-lâi ê Ná-o-bí, taⁿ bōe i hit-hūn ê hn̂g, sī pún sio̍k lán ê hiaⁿ Í-lī-bí-le̍k ê;

(BCL) 波阿斯對彼個至親的講：「對摩押地倒來的拿俄米，今賣伊彼份的園是本屬咱的兄以利米勒的；

4

(THR) góa ì-sù beh thong-ti lí kóng, Tio̍h tī chiah ê chē-teh ê lâng ê bīn-chêng kap góa ê peh-sìⁿ ê tióng-ló ê bīn-chêng, bóe i; lí nā beh sio̍k, chiū sio̍k i; nā m̄ sio̍k i, chiū bêng-bêng kóng hō͘ góa chai; in-ūi lí í-gōa bô pa̍t-lâng thang sio̍k i, tē-jī chiū-sī góa. I ìn kóng, Góa beh sio̍k i.

(BCL) 我意思欲通知你講，著佇諸個坐的人的面前及我的百姓的長老的面前，買伊。你若欲贖，就贖伊，若呣贖伊，就明明講互我知，因為你以外無別人通贖伊，第二就是我。」伊應講：「我欲贖伊。」

5

(THR) Pho-a-su kóng, Lí tùi Ná-o-bí ê chhiú bóe hit hūn hn̂g ê jı̍t, iā tio̍h tùi sí-lâng ê bó͘, Mô͘-ap ê cha-bó͘-kiáⁿ Lō͘-tek, bóe i, lâi kiàn-lı̍p sí-lâng ê miâ tī i ê gia̍p.

(BCL) 波阿斯講：「你對拿俄米的手買彼份園的日，也著對死人的某摩押的查某子路得買伊，來建立死人的名佇伊的業。」

6

(THR) Hit ê chì-chhin-ê kóng, Góa bōe-ōe ūi ka-kī sio̍k i, kiaⁿ-liáu góa gāi-tio̍h ka-kī ê gia̍p; góa sio̍k-gia̍p ê kôan lí thang ūi ka-kī chiáng i; in-ūi góa bōe-ōe sio̍k i.

(BCL) 彼個至親的講：「我會為家己贖伊，驚了我礙著家己的業。我贖業的權你通為家己掌伊，因為我會贖伊。」

7

(THR) Chêng tī Í-sek-lia̍t tiong beh koat-tēng sím-mı̍h sū, he̍k-sī sio̍k-hôe, he̍k-sī kau-ōaⁿ, chı̍t-lâng tio̍h thǹg ôe hō͘ hit-lâng; Í-sek-lia̍t lâng lóng ēng chit-ê chòe chèng-kù ê lē.

(BCL) 前，佇以色列中欲決定甚麼事，或是贖回，或是交換，此人著褪鞋互彼人。以色列人攏用此個做證據的例。

8

(THR) Hit ê chì-chhin tùi Pho-a-su kóng, Lí ūi ka-kī bóe i; i chiū thǹg ka-kī ê ôe.

(BCL) 彼個至親對波阿斯講：「你為家己買伊！」伊就褪家己的鞋。

9

(THR) Pho-a-su kā tióng-ló kap chèng peh-sìⁿ kóng, Lín kin-á-jı̍t chòe kan-chèng, kìⁿ-nā sio̍k Í-lī-bí-le̍k, kìⁿ-nā sio̍k Ki-liân Má-lûn ê, góa lóng tùi Ná-o-bí ê chhiú bóe lâi;

(BCL) 波阿斯給長老及眾百姓講：「恁今仔日做干證，見若屬以利米勒見若屬基連、瑪倫的，我攏對拿俄米的手買來；

10

(THR) koh bóe Má-lûn ê bó͘, Mô͘-ap ê cha-bó͘-kiáⁿ, Lō͘-tek chòe góa ê bó͘, thang kiàn-lı̍p sí-lâng ê miâ tī i ê gia̍p, hō͘ sí-lâng ê miâ bô cho̍at tī i ê hiaⁿ-tī-tiong, kap i ê pún-siâⁿ; lín kin-á-jı̍t chòe kan-chèng.

(BCL) 閣買瑪倫的某摩押的查某子路得做我的某，通建立死人的名佇伊的業，互死人的名無絕佇伊的兄弟中及伊的本城。恁今仔日做干證。」

11

(THR) Tī siâⁿ-mn̂g teh chē hiah ê chèng peh-sìⁿ kap tiúⁿ-ló kóng, Góan chòe kan-chèng; gōan Iâ-hô-hoa hō͘ jı̍p lí ê ke ê hū-jîn-lâng chhin-chhiūⁿ kiàn-lı̍p Í-sek-lia̍t ke La̍h-kiat Lī-a nn̄g-lâng chı̍t-iūⁿ; koh gōan lí tī Í-hoat-tha chòe hô-kia̍t, tī Pek-lī-hêng chòe ū miâ-siaⁿ-ê;

(BCL) 佇城門坐許個眾百姓及長老講：「阮做干證。願耶和華互入你的家的婦仁人，親像建立以色列家拉結、利亞二人一樣。閣願你佇以法他做豪傑，佇伯利恆做有名聲的。

12

(THR) iā gōan lí ê ke tùi Iâ-hô-hoa ēng chit ê cha-bó͘-kiáⁿ só͘ beh siúⁿ-sù lí ê hō͘-è, chiâⁿ-chòe chhin-chhiūⁿ Hoat-le̍k-su ê ke, chiū-sī Tha-má kā Iû-tāi só͘ siⁿ ê.

(BCL) 也願你的家對耶和華用此個查某子所欲賞賜你的後裔，成做親像法勒斯的家就是他瑪給猶大所生的。」

13

(THR) Tùi án-ni Pho-a-su chhōa Lō͘-tek chòe-bó͘; í-keng kap i tâng-pâng. Iâ-hô-hoa hō͘ i hôai-īn siⁿ chı̍t ê kiáⁿ.

(BCL) 對按呢，波阿斯娶路得做某，已經及伊同房。耶和華互伊懷孕生一個子。

14

(THR) Hiah ê hū-jîn-lâng tùi Ná-o-bí kóng, Iâ-hô-hoa sī eng-kai o-ló ê; in-ūi I kin-á-jı̍t bô pàng-sak lí, tì-kàu lí bô chì-chhin ê lâng; gōan chit ê gín-ná tī Í-sek-lia̍t tiong tit-tio̍h miâ-siaⁿ.

(BCL) 許個婦仁人對拿俄米講：「耶和華是應該謳咾的！因為伊今仔日無放拺你，致到你無至親的人。願此個囝仔佇以色列中得著名聲。

15

(THR) I beh ho̍k-tò lí ê cheng-eng, hōng-ióng lí ê nî-lāu; in-ūi siⁿ i-ê, chiū-sī lí hit ê thiàⁿ lí ê sim-pū, tùi-tī lí pí chhit ê kiáⁿ iáu khah-hó ê.

(BCL) 伊欲復倒你的精英，奉養你的年老，因為生伊者就是你彼個疼你的媳婦。對佇你比七個子猶卡好的！」

16

(THR) Ná-o-bí phō hit ê gín-ná, hē tī i ê heng-chêng, io i chhin-chhiūⁿ lāu-bú.

(BCL) 拿俄米抱彼個囝仔下佇伊的胸前，育伊親像老母。

17

(THR) Chhù-piⁿ hiah ê hū-jîn-lâng chiū kā i hō miâ, kóng, Ná-o-bí ū tit-tio̍h gín-ná lah; chiū kiò i ê miâ O-pī-tek; i sī Iâ-se ê lāu-pē, Iâ-se sī Tāi-pı̍t ê lāu-pē.

(BCL) 厝邊許個婦仁人就給伊號名講：「拿俄米有得著囝仔啦！」就叫伊的名俄備得。伊是耶西的老父，耶西是大衛的老父。

18

(THR) Hoat-le̍k-su ê hō͘-è kì tī ē-tóe; Hoat-le̍k-su siⁿ Hi-su-lûn;

(BCL) 法勒斯的後裔記佇下底：法勒斯生希斯崙；

19

(THR) Hi-su-lûn siⁿ Lân, Lân siⁿ A-bí-ná-ta̍t;

(BCL) 希斯崙生蘭；蘭生亞米拿達；

20

(THR) A-bí-ná-ta̍t siⁿ Ná-sūn, Ná-sūn siⁿ Sat-bûn;

(BCL) 亞米拿達生拿順；拿順生撒門；

21

(THR) Sat-bûn siⁿ Pho-a-su, Pho-a-su siⁿ O-pī-tek;

(BCL) 撒門生波阿斯；波阿斯生俄備得；

22

(THR) O-pī-tek siⁿ Iâ-se, Iâ-se siⁿ Tāi-pı̍t.4

(BCL) 俄備得生耶西；耶西生大衛。

Bible Color Mark

• 台語漢字羅馬本
• 巴克禮全羅