路得記 第 3 章

1

(THR) I ê ta-ke Ná-o-bí kā i kóng, Góa ê cha-bó͘-kiáⁿ ah, góa kiám m̄-tio̍h kā lí chhē chı̍t ê an-sin ê só͘-chāi, hō͘ lí hióng-hok mah?

(BCL) 伊的乾家拿俄米給伊講：「我的查某子啊，我豈呣著給你尋一個安身的所在，互你享福嗎？

2

(THR) Lí kap i ê lú-pī chòe-tīn ê Pho-a-su, i kiám-m̄-sī lán ê kai-chhin mah? Khòaⁿ ah, i kim-mî pòa tōa-be̍h tī gō͘-kak-tiûⁿ.

(BCL) 你及伊的女婢做陣的波阿斯，伊豈呣是咱的該親嗎？看啊，伊今暝簸大麥佇五穀場；

3

(THR) Lí tio̍h sóe seng-khu, boah-iû, ōaⁿ-saⁿ, lo̍h-khì kàu gō͘-kak-tiûⁿ; chóng-sī m̄-thang hō͘ hit-lâng jīn-tio̍h lí, thèng-hāu i lim-chia̍h bêng-pe̍k.

(BCL) 你著洗身軀抹油，換衫，落去到五穀場，總是呣通互彼人認著你。聽候伊飲食明白，

4

(THR) Kàu i tó-teh ê sî, lí tio̍h chim-chiok khòaⁿ i tó ê só͘-chāi, chiū jı̍p-khì hian i ê kha só͘ kah-ê, tó tī-hia; i beh kā lí kóng, lí só͘ tio̍h kiâⁿ ê.

(BCL) 到伊倒的時，你著斟酌看伊倒的所在，就入去掀伊的腳所蓋的，倒佇遐，伊欲給你講，你所著行的。」

5

(THR) I chiū kóng, Lí só͘ hoan-hù-ê góa lóng beh kiâⁿ i.

(BCL) 伊就講：「你所吩咐的，我攏欲行伊。」

6

(THR) I chiū lo̍h-khì kàu gō͘-kak-tiûⁿ, lóng chiàu i ê ta-ke só͘ hoan-hù-ê kiâⁿ.

(BCL) 伊就落去到五穀場，攏照伊的乾家所吩咐的行。

7

(THR) Pho-a-su lim-chia̍h bêng-pe̍k, sim hoaⁿ-hí, chiū khì tó tī be̍h-tui ê piⁿ-thâu. I chiū liam-kha jı̍p-khì, hian-khui i ê kha só͘ kah-ê, tó tī-hia.

(BCL) 波阿斯飲食明白，心歡喜，就去倒佇麥堆的邊頭。伊就跕腳入去掀開伊的腳所蓋的，倒佇遐。

8

(THR) Kàu pòaⁿ-mî hit-lâng tio̍h-kiaⁿ, hoan-sin; bô phah-sǹg, ū cha-bó͘-gín-ná tó tī i ê kha hia.

(BCL) 到半暝，彼人著驚，翻身，無拍算有查某囝仔倒佇伊的腳遐。

9

(THR) I chiū kóng, Lí sím-mı̍h lâng? Ìn kóng, Góa sī lí ê lú-pī Lō͘-tek; chhiáⁿ lí ēng lí ê saⁿ-á-ku lâi khám lí ê lú-pī, in-ūi lí sī góa ê kai-chhin.

(BCL) 伊就講：「你甚麼人？」應講：「我是你的女婢路得。請你用你的衫仔裾來蓋你的女婢，因為你是我的該親。」

10

(THR) I kóng, góa ê cha-bó͘-kiáⁿ ah, gōan lí tit-tio̍h Iâ-hô-hoa sù-hok; lí chit lō͘-bé ê un-chêng pí chêng-ê khah-tōa; in-ūi siàu-liân lâng, bô-lūn sòng-hiong hó-gia̍h, lí lóng bô tè i.

(BCL) 伊講：「我的查某子啊，願你得著耶和華賜福。你此路尾的恩情比前的卡大；因為少年人無論喪鄉好額，你攏無隨伊。

11

(THR) Góa ê cha-bó͘-kiáⁿ ah, taⁿ lí m̄-bián kiaⁿ, kìⁿ-nā lí só͘ kóng ê, góa beh kā lí kiâⁿ, in-ūi góa pún-siâⁿ ê peh-sìⁿ lóng chai lí sī hó tek-hēng ê lú-chú.

(BCL) 我的查某子啊，今你呣免驚，見若你所講的，我欲給你行；因為我本城的百姓攏知你是好德行的女子。

12

(THR) Góa sı̍t-chāi sī lí ê kai-chhin ê chı̍t-ê; chóng-sī iáu-ū chı̍t-ê pí góa koh khah chhin.

(BCL) 我實在是你的該親的一個，總是猶有一個比我閣卡親。

13

(THR) Lí kim-mî hioh chia; bîn-á-chá-khí i nā khéng kā lí chīn-kai-chhin ê pún-hūn, chiū hó, hō͘ i chīn kai-chhin ê pún-hūn; i nā m̄-khéng kā lí chīn kai-chhin ê pún-hūn, góa chí éng-o̍ah ê Iâ-hô-hoa lâi chiù-chōa, góa beh kā lí chīn kai-chhin ê pún-hūn; lí thang tó chia kàu thiⁿ-kng.

(BCL) 你今暝歇遮，明仔早起伊若肯給你盡該親的本份，就好，互伊盡該親的本份。伊若呣肯給你盡該親的本份，我指永活的耶和華來咒誓，我欲給你盡該親的本份，你通倒遮到天光。」

14

(THR) I chiū tó tī i ê kha-ē kàu thiⁿ-kng; bōe jīn-tit lâng ê sî, chiū khí-lâi. Pho-a-su kóng, M̄-thang hō͘ lâng chai ū cha-bó͘-gín-ná kàu gō͘-kak-tiûⁿ-nih.

(BCL) 伊就倒佇伊的腳下到天光，認得人的時就起來。波阿斯講：「呣通互人知有查某囝仔到五穀場裡」；

15

(THR) Koh kóng, Lí the̍h lí só͘ chhēng ê gōa-saⁿ, ēng chhiú khan i; i chiū khan i; hit-lâng chiū niû tōa-be̍h la̍k-ē, hō͘ i pē-khì; i chiū jı̍p siâⁿ.

(BCL) 閣講：「你提你所穿的外衫，用手牽伊。」伊就牽伊，彼人就量大麥六下，互伊背去，伊就入城。

16

(THR) I kàu i ê ta-ke hia; ta-ke kóng, Góa ê cha-bó͘-kiáⁿ ah, lí taⁿ cháiⁿ-iūⁿ ah? I chiū chiong hit-lâng tùi i só͘-kiâⁿ-ê lóng kā i kóng.

(BCL) 伊到伊的乾家遐，乾家講：「我的查某子啊，你今怎樣啊？」伊就將彼人對伊所行的攏給伊講，

17

(THR) Koh kóng, Hit-lâng ēng chiah ê tōa-be̍h la̍k-ē hō͘ góa, kā góa kóng, Lí m̄-thang khang-chhiú tò-khì lín ta-ke hia.

(BCL) 閣講：「彼人用諸個大麥六下互我，給我講：『你呣通空手倒去恁乾家遐。』」

18

(THR) I chiū kóng, Góa ê cha-bó͘-kiáⁿ ah, lí thang an-sim chē-teh, thèng-hāu chai che sū cháiⁿ-iūⁿ chiâⁿ; in-ūi hit-lâng kin-á-jı̍t bô chòe-chiâⁿ chit ê sū, tek-khak bô soah.

(BCL) 伊就講：「我的查某子啊，你通安心坐，聽候知這事怎樣成，因為彼人今仔日無做成此個事的確無息。」

Bible Color Mark

• 台語漢字羅馬本
• 巴克禮全羅