雅歌 第 1 章

1

(THR) Só͘-lô-bûn si-koa-tiong ê Ngá-ko.

(BCL) 所羅門詩歌中的雅歌。

2

(THR) Gōan i ēng i ê chhùi lâi chim góa, In-ūi lí ê ài-chêng pí chiú khah-hó.

(BCL) 願伊用伊的嘴來唚我；因為你的愛情比酒卡好。

3

(THR) Lí ê ko-iû phang koh hó; Lí ê miâ chhin-chhiūⁿ tò--chhut-lâi ê ko-iû; Só͘-í chèng cha-bó͘-gín-ná lóng thiàⁿ lí.

(BCL) 你的膏油芳閣好；你的名親像倒出來的膏油，所以眾查某囝仔攏疼你。

4

(THR) Gōan lí khan góa, góan chiū cháu lâi tè lí; Ông chhōa góa jı̍p i ê pâng-lāi; Góan beh in-ūi lí lâi hoaⁿ-hí khòai-lo̍k, Góan beh kì-liām lí ê ài-chêng, iâⁿ-kè hó chiú; In thiàⁿ lí sī eng-kai ê.

(BCL) 願你牽我，阮就走來隨你。王導我入伊的房內，阮欲因為你來歡喜快樂。阮欲紀念你的愛情，贏過好酒。疼你是應該的。

5

(THR) Iâ-lō͘-sat-léng ê chèng cha-bó͘-gín-ná ah, Góa sī o͘, iáu-kú siⁿ-chòe hó, Chhin-chhiūⁿ Ki-ta̍t ê pò͘-pîⁿ, Chhin-chhiūⁿ Só͘-lô-bûn ê tiùⁿ-lî.

(BCL) 耶路撒冷的眾查某囝仔啊，我是黑，猶久生做好，親像基達的布棚，親像所羅門的帳簾。

6

(THR) M̄-thang khòaⁿ góa lî-á o͘-sek, Sī in-ūi jı̍t pha̍k góa, Góa ê lāu-bú chiah ê kiáⁿ bat siū-khì góa, In hō͘ góa kò͘-siú phû-tô-hn̂g; Chóng-sī góa ka-kī ê phû-tô-hn̂g, góa bô kò͘-siú.

(BCL) 呣通看我厘仔黑色是因為日曝我。我的老母諸個子曾受氣我，互我顧守葡萄園；總是我家己的葡萄園我無顧守。

7

(THR) Góa sim só͘-thiàⁿ--ê ah, kiû lí kā góa kóng, Lí tī sím-mı̍h só͘-chāi chhī iûⁿ, jı̍t-tiong-tàu hō͘ in hioh tī sím-mı̍h só͘-chāi; Tī lí tâng-phōaⁿ ê iûⁿ-kûn ê piⁿ-á, Góa siáⁿ-sū chhin-chhiūⁿ tà-bīn ê lâng ah?

(BCL) 我心所疼者啊，求你給我講，你佇甚麼所在飼羊？日中晝互歇佇甚麼所在？佇你同伴的羊群的邊仔，我啥事親像罩面的人啊？

8

(THR) Lú-kài-tiong tē-it súi--ê ah, lí nā m̄-chai, Chòe lí chhut-khì, tè iûⁿ-kûn ê kha-jiah khì; Chhī lí ê soaⁿ-iûⁿ-á, tī bo̍k-chiá ê pò͘-pîⁿ-piⁿ.

(BCL) 女界中第一娞者啊，你若呣知，做你出去隨群羊的腳跡去，飼你的山羊仔佇牧者的布棚邊。

9

(THR) Góa só͘ thiàⁿ--ê, góa pí-phēng lí, Chhin-chhiūⁿ Hoat-ló ê chhia ê bé.

(BCL) 我所疼者，我比並你親像法老的車的馬。

10

(THR) Lí pìn-piⁿ ê mn̂g pīⁿ chin-súi, Lí ê ām-kún kòa chin-chu ê liān-á, chin hó-khòaⁿ.

(BCL) 你鬢邊的毛辮真娞；你的頷頸掛真珠的鍊仔真好看。

11

(THR) Góan beh kā lí chòe kim-liān-á, Siuⁿ gûn liú-á.

(BCL) 阮欲給你做金鍊仔，鑲銀紐仔。

12

(THR) Ông chē i ê toh ê sî, Góa ná-ta̍t ê hiuⁿ-iû chhèng-chhut i ê phang-bī.

(BCL) 王坐伊的桌的時，我哪噠的香油淐出伊的芳味。

13

(THR) Góa só͘ lôan-ài-ê sī chòe góa chı̍t-pau ê bu̍t-io̍h, Tòa tī góa ê heng-chêng.

(BCL) 我所戀愛者是做我一包的沒藥，帶佇我的胸前。

14

(THR) Góa só͘ lôan-ài-ê, sī chòe góa chı̍t-pha ê chńg-kah-hoe, Tī Ún-kî-tí ê phû-tô-hn̂g-lāi.

(BCL) 我所戀愛者是做我一葩的指甲花，佇隱基底的葡萄園內。

15

(THR) Góa só͘ thiàⁿ-ê, khòaⁿ ah, lí chin súi; khòaⁿ ah, lí chin súi; Lí ê ba̍k-chiu chhin-chhiūⁿ kap.

(BCL) 我所疼者，看啊，你真娞！看啊，你真娞！你的目睭親像鴿。

16

(THR) Góa só͘ lôan-ài-ê ah, khòaⁿ ah, lí chin súi, sı̍t-chāi thang hoaⁿ-hí; Lán ê bîn-chhn̂g lóng sī chhiⁿ-le̍k ê sek.

(BCL) 我所戀愛者啊，看啊，你真娞，實在通歡喜！咱的眠床攏是青綠的色。

17

(THR) Lán ê chhù ê îⁿ-á sī pek-hiuⁿ-chhâ, I ê ka̍k(**kak)-á sī siông-peh-chhâ.

(BCL) 咱的厝的楹仔是柏香柴，伊的角仔是松柏柴。

Bible Color Mark

• 台語漢字羅馬本
• 巴克禮全羅