雅歌 第 3 章

1

(THR) Góa mî--sî the tī góa ê bîn-chhn̂g, chhē góa ê sim só͘-thiàⁿ--ê, Góa chhē i, iā chhē-bōe-tio̍h.

(BCL) 我暝時撐佇我的眠床，尋我的心所疼者；我尋伊，也尋著。

2

(THR) Taⁿ góa beh khí-lâi sì-kòe kiâⁿ tī siâⁿ-lāi, Tī koe-lō͘, tī khoan-khoah ê só͘-chāi, Góa beh chhē góa ê sim só͘-thiàⁿ-ê; Góa chhē i iā chhē-bōe-tio̍h.

(BCL) 今我欲起來四界行佇城內，佇街路，佇寬闊的所在，我欲尋我的心所疼者。我尋伊，也尋著。

3

(THR) Siâⁿ-lāi sûn-cha ê lâng tú-tio̍h góa, Góa mn̄g in kóng, Lín ū khòaⁿ-kìⁿ góa sim só͘-thiàⁿ-ê á-bô?

(BCL) 城內巡查的人抵著我；我問講：恁有看見我心所疼者抑無？

4

(THR) Góa lī-khui in bô jōa-hn̄g, Chiū tú-tio̍h góa ê sim só͘-thiàⁿ-ê, Góa khîⁿ i, m̄ hō͘ i khì; Thèng-hāu góa chhōa i jı̍p góa lāu-bú ê ke, Chiū-sī siⁿ-góa-ê ê pâng-lāi.

(BCL) 我離開無偌遠就抵著我的心所疼者。我擒伊，呣互伊去，聽候我導伊入我老母的家，就是生我者的房內。

5

(THR) Iâ-lō͘-sat-léng ê chèng cha-bó͘-gín-ná ah, Góa kí lêng-iông í-kı̍p tiân-iá ê lo̍k-bú, chhiat-chhiat hoan-hù lí, Bo̍h-tit phah-chhíⁿ i, bo̍h-tit kiáu-jiáu góa só͘-thiàⁿ-ê; Thèng-hāu i ka-kī chêng-gōan.

(BCL) 耶路撒冷的眾查某囝仔啊，我指羚羊以及田野的鹿母切切吩咐你：莫得拍醒伊、莫得攪擾我所疼者，聽候伊家己情願。

6

(THR) Hit ê tùi khòng-iá--nih lâi, hêng-chōng chhin-chhiūⁿ hé-hun ê thiāu, Ēng bu̍t-io̍h kap jú-hiuⁿ, í-kı̍p seng-lí lâng ta̍k-iūⁿ ê phang-hún lâi hō͘ i phang-ê, Sī chī-chūi ah?

(BCL) 彼個對曠野裡來、形狀親像火熏的柱、用沒藥及乳香以及生理人逐樣的芳粉來互伊芳的是是誰啊？

7

(THR) Khòaⁿ ah, sī Só͘-lô-bûn ê kiō, Sì-ûi ū la̍k-cha̍p ê ióng-sū, Lóng sī tùi Í-sek-lia̍t ióng-sū-tiong kéng--ê.

(BCL) 看啊，是所羅門的轎；四圍有六十個勇士，攏是對以色列勇士中揀者；

8

(THR) In lóng ōe hiáu ēng kiàm, gâu kau-chiàn, Lâng-lâng pē to tī io--nih, Tî-hông mî--sî ê gûi-hiám.

(BCL) 攏會曉用劍，交戰，人人佩刀佇腰裡，持防暝時的危險。

9

(THR) Só͘-lô-bûn ông ēng Lī-pa-lùn ê chhâ, Ūi ka-kī chòe chı̍t téng kim-lián.

(BCL) 所羅門王用黎巴嫩的柴為家己做一頂金輦。

10

(THR) I ê thiāu sī ēng gûn chòe--ê, I ê tóe sī ēng kim chòe ê, I ê tiām sī chí-sek-ê, Kî-tiong sī ēng Iâ-lō͘-sat-léng ê chèng cha-bó͘-gín-ná ê ài-chêng pho͘--ê.

(BCL) 伊的柱是用銀做的，伊的底是用金做的；伊的墊是紫色的，其中是用耶路撒冷的眾查某囝仔的愛情舖的。

11

(THR) Sek-an ê chèng cha-bó͘-gín-ná ah, lín tio̍h chhut-khì khòaⁿ Só͘-lô-bûn ông, I tì bián-liû, chiū-sī tī i ha̍p-hun ê jı̍t, i ê sim hoaⁿ-hí ê jı̍t, I ê lāu-bú kā i tì--ê.

(BCL) 錫安的眾查某囝仔啊，恁著出去看所羅門王！伊戴冕旒，就是佇伊合婚的日、伊的心歡喜的日，伊的老母給伊戴的。

Bible Color Mark

• 台語漢字羅馬本
• 巴克禮全羅