雅歌 第 7 章

1

(THR) Jîn-kun ê cha-bó͘-kiáⁿ ah, lí ê kha chhēng-ôe cháiⁿ-iūⁿ hiah súi; Lí ê tōa-thúi îⁿ, ku̍t(**kut) chhin-chhiūⁿ tin-pó, Sī kî-khiáu ê chhiú-kang chòe-chiâⁿ ê.

(BCL) 人君的查某子啊，你的腳穿鞋怎樣許娞！你的大腿圓，滑親像珍寶，是奇巧的手工做成的。

2

(THR) Lí ê tō͘-châi chhin-chhiūⁿ îⁿ ê poe, Bô khiàm-kheh tiau-hô ê chiú; Lí ê pak-tó͘ chhin-chhiūⁿ kui-tui ê be̍h, Chiu-ûi ū pek-ha̍p-hoe.

(BCL) 你的肚臍親像圓的杯，無欠缺調和的酒；你的腹肚親像歸堆的麥，周圍有百合花。

3

(THR) Lí ê nn̄g ê lin, chhin-chhiūⁿ chı̍t-tùi lo̍k-á, Chiū-sī lo̍k-bú siang-siⁿ--ê.

(BCL) 你的二個奶親像一對鹿仔，就是鹿母雙生的。

4

(THR) Lí ê ām-kún chhin-chhiūⁿ chhiūⁿ-gê ê thah, Lí ê ba̍k-chiu chhin-chhiūⁿ Hi-sı̍t-pún ê tî, óa-kūn Pa-te̍k-la̍h-pìn; Lí ê phīⁿ chhin-chhiūⁿ Lī-pa-lùn ê thah, ǹg Tāi-má-sek ê.

(BCL) 你的頷頸親像象牙的塔；你的目睭親像希實本的池，倚近巴特拉併；你的鼻親像黎巴嫩的塔，向大馬色的。

5

(THR) Lí ê thâu-khak tī lí ê seng-khu chhin-chhiūⁿ Ka-bı̍t, Lí ê thâu-khak-téng sûi--lo̍h-lâi ê mn̂g sī chí-sek ê; Ông ūi-tio̍h i ê thâu-mn̂g bōe-lī--tit.

(BCL) 你的頭殼佇你的身軀親像迦密；你的頭殼頂垂落來的毛是紫色的；王為著伊的頭毛離得。

6

(THR) Góa só͘-thiàⁿ-ê, lí cháiⁿ-iūⁿ hiah súi; Cháiⁿ-iūⁿ hiah thang hoaⁿ-hí, hō͘ lâng hoaⁿ-hí khòai-lo̍k!

(BCL) 我所疼者，你怎樣許娞！怎樣許通歡喜，互人歡喜快樂！

7

(THR) Lí ê sin-chhâi chhin-chhiūⁿ chó-chhiū, Lí ê lin chhin-chhiūⁿ kui-pha ê ké-chí.

(BCL) 你的身材親像棗樹；你的奶親像歸葩的果子。

8

(THR) Góa kóng, Góa beh chiūⁿ chit châng chó-chhiū, Khîⁿ i ê ki; Gōan lí ê lin chhin-chhiūⁿ phû-tô kui-pha, Lí ê khì-bī chhin-chhiūⁿ pîn-kó.

(BCL) 我講：我欲上此欉棗樹，擒伊的枝。願你的奶親像葡萄歸葩，你的氣味親像蘋果；

9

(THR) Lí ê chhùi chhin-chhiūⁿ siōng-hó ê chiú, Ūi-tio̍h góa só͘ lôan-ài-ê lim-liáu ku̍t-âu, Lâu jı̍p khùn ê lâng ê chhùi-tûn.

(BCL) 你的嘴親像上好的酒。為著我所戀愛的飲了滑喉，流入睏的人的嘴唇。

10

(THR) Góa sio̍k góa só͘ lôan-ài-ê, I iā him-bō͘ góa.

(BCL) 我屬我所戀愛者，伊也欣慕我。

11

(THR) Góa só͘ lôan-ài-ê ah, lâi ah, lán lâi khì soaⁿ-tiûⁿ, Lán lâi khì hiuⁿ-siā hioh-mî.

(BCL) 我所戀愛者啊，來啊！咱來去山場；咱來去鄉社歇暝。

12

(THR) Lán thàu-chá khí-lâi, khì phû-tô-hn̂g, khòaⁿ phû-tô puh-íⁿ khui-hoe á-bô, Sia̍h-liû khui-lúi á-bô. Góa tī-hia beh chiong ài-chêng hō͘ lí.

(BCL) 咱透早起來去葡萄園，看葡萄發芛開花抑無，石榴開蕊抑無；我佇遐欲將愛情互你。

13

(THR) Hong-ka chhut phang-bī; Tī lán ê mn̂g-piⁿ ū ta̍k-iūⁿ chin hó ê ké-chí, sin-ê kū-ê, lóng ū; Góa só͘ lôan-ài-ê, che lóng sī góa kā lí chek-chū ê.

(BCL) 風茄出芳味，佇咱的門邊有逐樣真好的果子，新的舊的攏有；我所戀愛者，這攏是我給你積聚的。

Bible Color Mark

• 台語漢字羅馬本
• 巴克禮全羅